ចិន៖ ករណីឆ្លងកូវីដស្ទុះឡើង ខណៈកម្មវិធីប្រកួតកីឡាអូឡាំពិករដូវរងារខិតជិតមកដល់ រីឯសេដ្ឋកិច្ចក៏រងសំពាធ
ចុះផ្សាយនៅថ្ងៃ៖
ស្តាប់ - ០៧:៥៣
នៅបាំងតែប្រមាណ២សប្តាហ៍ទៀតប៉ុណ្ណោះ គឺនឹងដល់ថ្ងៃ បើកសម្ភោធកម្មវិធីប្រកួតកីឡាអូឡាំពិករដូវរងារ នៅទីក្រុងប៉េកាំង។ ជាកម្មវិធីដែលនឹងមានក្រុមគណៈប្រតិភូកីឡា រាប់ពាន់នាក់ មកពីទូទាំងពិភពលោកចូលរួម។ ស្ថានការណ៍ឆ្លងរាលដាលកូវីដ គឺជាអ្វីដែលអាជ្ញាធរចិនព្រួយបារម្ភបំផុត ខណៈដែលកម្មវិធីនេះខិតជិតមកដល់។ យ៉ាងណាមិញ ប៉ុន្មានសប្តាហ៍ចុងក្រោយនេះ មានករណីស្ទុះឡើងវិញ នូវការឆ្លងរាលដាលក្នុងស្រុក នៅតាមទីក្រុងធំៗមួយចំនួន ដោយក្នុងនោះមានករណីកូវីដអូមីក្រុងមួយករណីផងដែរ នៅក្នុងទីក្រុងប៉េកាំងតែម្តង។ ជាមួយគ្នានេះ សេដ្ឋកិច្ចចិន ក៏បានបង្ហាញសញ្ញាធ្លាក់ចុះខ្លះៗ ដោយសារតែវិធានការបិទខ្ទប់ដ៏តឹងតែង បណ្តាលមកពីវិបត្តិកូវីដនេះ។
បើទោះបីជាករណីរកឃើញវិជ្ជមានថ្មីៗ នាប៉ុន្មានថ្ងៃចុងក្រោយនេះ នៅក្នុងប្រទេសចិន វាមានកម្រិតតិចតួចក្តី បើប្រៀបធៀបទៅនឹងប្រទេសផ្សេងៗទៀត ដូចនៅអឺរ៉ុបជាដើម ក៏ប៉ុន្តែករណីស្ទុះឆ្លងជាថ្មីនៅប្រទេសចិននេះ គឺវាចាប់ផ្តើមខ្ពស់ខ្លាំងណាស់ បើប្រៀបធៀបពីឆ្នាំ២០២០មក។ជាងនេះទៀត ដូចយើងដឹងហើយ ថារដ្ឋាភិបាលចិន បានអនុវត្តវិធានការ « កូវីដសូន្យ » ដែលមានន័យថា មិនឲ្យមានសូម្បីតែមួយករណី គឺត្រូវតែតាមដានឲ្យជាប់ស្អិតជាប្រចាំ តាមរយៈការបិទខ្ទប់ ការធ្វើតេស្តទ្រង់ទ្រាយធំ និងវិធានការខ្លាំង ផ្សេងៗទៀត។ តែទោះជាវិធានការដ៏តឹងតែងបែបនេះក្តី ការឆ្លងរាលដាល ក្នុងស្រុកនៅតែបន្តមាន។
ជាក់ស្តែងនៅក្រុងស៊ីអាន ប៉ុន្មានសប្តាហ៍ចុងក្រោយនេះ គេបានរកឃើញករណីវិជ្ជមានថ្មីចំនួនប្រមាណ២០០០នាក់។ គេបានធ្វើតេស្ត លើប្រជាជនទាំង១៣លាននាក់នៅទីក្រុងនេះ។ ទីក្រុងទាំងមូលត្រូវបិទខ្ទប់ ប្រជាជនអាចចេញក្រៅ រៀងរាល់៣ដងប៉ុណ្ណោះ ដើម្បីទិញទំនិញចាំបាច់។ នៅខេត្តហឺណាន គិតចាប់ពីចុងខែធ្នូមក គេបានរកឃើញករណីវិជ្ជមានថ្មី ចំនួន២៥០នាក់។ អាជ្ញាធរក៏បានចេញវិធានការធ្វើតេស្តទ្រង់ទ្រាយធំ លើប្រជាជនជាង១០លាននាក់ នៅក្រុង ចេងជូ ព្រមទាំងបិទខ្ទប់សង្កាត់មួយចំនួនផងដែរ។ នៅក្រុងឆិនចិន ខេត្តគ័ងទុងវិញ គេបានរកឃើញករណីកូវីដអូមីក្រុងមួយករណី កាលពីថ្ងៃអាទិត្យម្សិលមិញ និងអូមីក្រុងមួយករណីទៀតនៅក្រុងជូហៃ ជាប់ម៉ាកាវ។
អូមីក្រុងចូលដល់ប៉េកាំង
នៅក្រុងប៉េកាំងវិញ គេក៏បានរកឃើញករណីវិជ្ជមានកូវីដអូមីក្រុងមួយករណីដែរ។ ស្រ្តីដែលមានផ្ទុកកូវីដអូមីក្រុងនៅប៉េកាំងនោះ ត្រូវបានគេដឹងថា មិនបានចេញទៅក្រៅប្រទេស ឬក៏ពាក់ព័ន្ធនឹងករណីអូមីក្រុងណាផ្សេងទៀតដែរ នេះបើផ្អែកតាមអាជ្ញាធរសុខាភិបាលចិន។ ដូច្នេះ គឺវាអាចជាករណីឆ្លងក្នុងស្រុក ដែលមានន័យថា កូវីដអូមីក្រុង កំពុងតែចល័តនៅក្រុងប៉េកាំងរួចទៅហើយ។ ភ្លាមៗនោះ គេបានចាប់ផ្តើមធ្វើតេស្តលើមនុស្សចំនួនប្រមាណ១៣០០០នាក់។ ទីតាំងទេសចរណ៍មួយចំនួនធំនៅប៉េកាំង ត្រូវបិទទ្វារ។
ហើយករណី គួរឲ្យបារម្ភមួយទៀតនោះ គឺ ការឆ្លងរាលដាលនៅក្រុងធានជីង ដែលស្ថិតនៅចំងាយតែ១០០គីឡូម៉ែត្រប៉ុណ្ណោះពីក្រុងប៉េកាំង។ នៅធានជីង គេបានរកឃើញអ្នកវិជ្ជមានចំនួនជាង៣០០ករណី ក្នុងសប្តាហ៍កន្លងទៅនេះ ដោយក្នុងនោះមានករណីអូមីក្រុងផងដែរ។ ជាសរុបនៅថ្ងៃចន្ទនេះ គេបានរកឃើញករណីវិជ្ជមានថ្មីបន្ថែមចំនួន ២២៣ករណី នៅទូទាំងប្រទេសចិន ដោយក្នុងនោះ៨០ករណីនៅក្រុងធានជីង។
« រង្វង់សុវត្ថិភាពបិទជិត »
ក្រុមកីឡាករខ្លះ បានចាប់ផ្តើមមកដល់ទីក្រុងប៉េកាំងហើយ ដើម្បីត្រៀមហ្វឹកហាត់ រងចាំថ្ងៃប្រកួត ដែលនឹងចាប់ផ្តើម នៅថ្ងៃទី៤កុម្ភៈ។ ការព្រួយបារម្ភ ពីបញ្ហាឆ្លងរាលដាលកូវីដនេះ គឺមិនមែនតែការឆ្លងក្នុងស្រុកទេ គឺរួមទាំងករណីឆ្លងតាមរយៈដំណើរមកដល់ របស់ក្រុមគណៈប្រតិភូកីឡាបរទេសនេះទៀត។
ហេតុដូច្នេះហើយ បានជាអាជ្ញាធរចិន បានដាក់ចេញនូវ វិធានការរួមមួយចំនួន ដែលគេហៅឈ្នោះថា « រង្វង់សុវត្ថិភាពបិទជិត »។ ពោលគឺការចែកខណ្ឌ ប្រជាជនចិនទូទៅ មិនឲ្យប៉ះពាល់ ប្រាស្រ័យជាមួយ ក្រុមគណៈប្រតិភូ កីឡាករបរទេសទាំងអស់ ដែលមកចូលរួមក្នុងកម្មវិធីប្រកួត និងរួមទាំងបុគ្គលិក ដែលធ្វើការក្នុងដំណើរកម្មវិធីប្រកួត មានទាំងអ្នកធ្វើម្ហូប អ្នកបោសសំអាត អ្នកបើកបរដឹកជញ្ជូនកីឡាករ និងក្រុមអ្នកស្មគ្រចិត្តជាដើម ។ល។ ជាងនេះទៀត អ្នកដែលចូលមកក្នុងរង្វង់សុវត្ថិភាពបិទជិតនេះ គឺត្រូវតែបានចាក់វ៉ាក់សាំង ឬក៏ត្រូវតែធ្វើចត្តាឡីស័ក ចំនួន២១ថ្ងៃ នៅពេលមកដល់ក្រុងប៉េកាំង។
បន្ថែមពីនេះ អាជ្ញាធរចិន បានចាត់វិធានការកាត់ផ្តាច់ ទំនាក់ទំនងចេញចូល រវាងក្រុងប៉េកាំង ជាមួយនឹងតំបន់ផ្សេងៗទៀត មិនថាតាមផ្លូវគោក ផ្លូវដែក ឬផ្លូវអាកាស។ នៅតាមទីក្រុងមួយចំនួន ដែលមានការហក់ឡើងនូវការឆ្លងរាលដាល គឺប្រជាជនមិនអាចចេញពីទីក្រុងបានទេ។ ហើយបើចង់ចូលមកក្រុងប៉េកាំង គឺកាន់តែលំបាកថែមទៀត ដោយត្រូវតែមានលទ្ធផលតេស្តអវិជ្ជមាន ទាំងមុន និងក្រោយពេលមកដល់។ ក្នុងឱកាសបុណ្យចូលឆ្នាំចិន ខាងមុខនេះ អាជ្ញាធរចិនបានអំពាវនាវ មិនឲ្យប្រជាជនក្រុងប៉េកាំង ធ្វើដំណើរចេញពីក្រុងទេ។ ស្ថានការណ៍ទាំងនេះ កំពុងតែធ្វើឲ្យអាជ្ញាធរចិន មានការប្រុងប្រយ័ត្នខ្លាំងណាស់ ខ្លាចក្រែងទប់ការឆ្លងរាលដាលមិនឈ្នះ នៅក្នុងអំឡុងពេលប្រកួតកីឡាអូឡាំពិក។
សេដ្ឋកិច្ចចិនរងសំពាធខ្លាំង
យោងតាមតួលេខផ្លូវការ ក្នុងឆ្នាំ២០២១ ចំណូលដុលក្នុងស្រុក PIB របស់ចិន បានមានកំណើនចំនួន ៨.១%។ បើទោះបីជាកំណើននេះ ល្អលើសពីការរំពឹងទុកមែន តែអ្នកវិភាគជាច្រើន បានទទួលស្គាល់ថា សេដ្ឋកិច្ចចិនកំពុងរងសំពាធខ្លាំងណាស់។ វិធានការបិទខ្ទប់ « កូវីដសូន្យ » ដែលរដ្ឋាភិបាលចិន បានបន្តអនុវត្តនោះ បាននឹងកំពុងតែសង្កត់សេដ្ឋកិច្ចឲ្យមានការលំបាក។ មិនត្រឹមតែលំបាកផ្នែកសេដ្ឋកិច្ចទេ ផ្នែកសង្គមកិច្ចក៏លំបាកខ្លាំងណាស់ដែរ។
វិស័យមួយចំនួនដែលជួបបញ្ហាខ្លាំងបំផុតនោះ គឺវិស័យកំសាន្ត វិស័យទេសចរណ៍ ភោជ្ជនីយដ្ឋាន សណ្ឋាគារ និងវិស័យដឹកជញ្ជូនជាដើម។ វិស័យទាំងនេះ ជួបការខាតបង់ច្រើនណាស់ មិនទាន់ងើបឡើងវិញ ឲ្យបានស្មើកម្រិតមុនមានវិបត្តិកូវីដទេ។ ជាងនេះទៀត សន្ទុះសេដ្ឋកិច្ចចិន ត្រូវពើបប្រទះនឹងបញ្ហា តម្លៃវត្ថុធាតុដើនឡើងថ្លៃ បូកបន្ថែមនឹងបញ្ហាអស្ថិរភាពក្នុងវិស័យអចនទ្រព្យថែមទៀត ដូចយើងបានដឹងកន្លងមកហើយ ជាមួយនឹងការដួលរលំ នៃអាណាចក្រក្រុមហ៊ុន Evergrande។
នៅព្រឹកថ្ងៃចន្ទនេះ លោក Ning Jizhe មន្ត្រីការិយាល័យស្ថិតិជាតិចិន បានទទួលស្គាល់ថា សេដ្ឋកិច្ចចិនបច្ចុប្បន្ន កំពុងរងសំពាធពី៣ផ្នែកធំៗ ទីមួយគឺ ការធ្លាក់ចុះនៃការបញ្ជាទិញ ទាំងក្នុងនិងក្រៅស្រុក ទី២ គឺបញ្ហាកកស្ទះ រអាក់រអួលផ្នែកបណ្តាញផ្គត់ផ្គង់ ហើយទី៣នោះ គឺកម្មវត្ថុសេដ្ឋកិច្ចដែលត្រូវកែតម្រូវបញ្ចុះឲ្យនៅទាប។
ការប្រើប្រាស់ក្នុងស្រុកចិន មានសន្ទុះតិចបំផុត កាលពីខែធ្នូកន្លងទៅ។ ជាមួយនឹងការបិទខ្ទប់ទីក្រុងធំៗនាពេលថ្មីៗនេះ គឺវានឹងបន្ថែមការលំបាកទៀត ទៅលើវិស័យសេវាកម្ម បដិសណ្ឋារកិច្ច និងវិស័យដឹកជញ្ជូនធ្វើដំណើរ។ នេះបើផ្អែកតាមការវិភាគ របស់លោកស្រី Yue Su អ្នកជំនាញនៅ Economist Intelligence Unit (EIU)។
ភាពមិនប្រាកដប្រជា ផ្នែកសេដ្ឋកិច្ច និងបញ្ហាសង្គមទាំងនេះ ក៏ជាផ្នែកមួយ ធ្វើឲ្យប្រជាជនចិន មិនយកកូនដែរ។ តួលេខអត្រាកំណើតទារក បានធ្លាក់ចុះខ្លាំង។ កាលពីឆ្នាំ២០២០ មាន ៨.៥២ ក្នុងចំណោមប្រជាជន១០០០នាក់ តែនៅឆ្នាំ២០២១ ធ្លាក់មកត្រឹមតែ ៧.៥២ទេ។ លោក Zhiwei Zhang នៅការិយាល័យ Pinpoint Asset Management បានលើកឡើងថា ការធ្លាក់ចុះអត្រាកំណើតទារកនេះ គឺបង្ហាញថា កូវីដក៏បានមកវាយបំបាក់អនាគតយុវជន ដែលជាសរសរទ្រូង នៃសេដ្ឋកិច្ចចិនទៅថ្ងៃអនាគតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ