OMS/WHO ៖ អឺរ៉ុបអាចនឹងងើបចេញពីវិបត្តិជំងឺឆ្លងកូវីដ១៩ ក្នុងពេលឆាប់ៗនេះហើយ
ចុះផ្សាយនៅថ្ងៃ៖
ស្តាប់ - ០៦:៥៥
បច្ចុប្បន្ននេះ កូវីដអូមីក្រុង កំពុងតែឆ្លងរាលដាលខ្លាំងណាស់ នៅតាមបណ្តាប្រទេសអឺរ៉ុប។ តែយ៉ាងណា អ្វីដែលអាជ្ញាធរសុខាភិបាលបានសង្កេតឃើញ គឺកម្រិតគ្រោះថ្នាក់ដល់សុខភាព នៃកូវីដអូមីក្រុង គឺមិនសូវជាធ្ងន់ធ្ងរឡើយ។ ជាមួយនឹងចំនួនអ្នកឆ្លងច្រើន ដែលអាចបង្កើតជាប្រព័ន្ធការពារខ្លួមរួម ព្រមទាំងទំហំនៃការចាក់វ៉ាក់សាំង ធំទូលំទូលាយផងនេោះ ប្រទេសអឺរ៉ុប អាចនឹងងើបចេញពីវិបត្តិជំងឺឆ្លងកូវីដ១៩ នៅក្នុងពេលដ៏ឆាប់នេះហើយ។ នេះបើផ្អែកតាមការសន្និដ្ឋាន របស់មន្ត្រីជំនាញ នៃអង្គការសុខភាពពិភពលោក។
កូវីដអូមីក្រុង ចូលវាយលុកសព្វ ពេញអឺរ៉ុប
បើតាមការពន្យល់ របស់លោក Hans Kluge អគ្គនាយកប្រចាំអឺរ៉ុប នៃអង្គការសុខភាពពិភពលោក គឺមានហេតុផលចំបងមួយ ដែលធ្វើឲ្យគេសង្ឃឹម នោះគឺទំហំនៃការឆ្លងរាលដាលកូវីដអូមីក្រុង ចូលសព្វនៅក្នុងសង្គម។ ដូចយើងបានដឹងកន្លងមកហើយ កូវីដអូមីក្រុង ឆ្លងលឿនខ្លាំងណាស់ តែមិនសូវគ្រោះថ្នាក់ខ្លាំងទេដល់សុខភាព។ នៅបារាំង ប៉ុន្មានសប្តាហ៍មកនេះ ករណីឆ្លងថ្មីបន្ថែមប្រចាំថ្ងៃ មានពី ៣០ ទៅ ៤០ម៉ឺននាក់ ជារៀងរាល់ថ្ងៃឯណោះ តែចំនួនករណីឈឺធ្ងន់នៅមន្ទីរពេទ្យគឺនៅនឹង។
យោងតាមអ្នកជំនាញ នៃអង្គការសុខភាពពិភពលោក នៅរវាងដើមខែមីនាខាងមុខនេះ កូវីដអូមីក្រុង នឹងគ្របដណ្តប់ទៅលើប្រជាជនអឺរ៉ុប យ៉ាងហោច ៦០%។ យ៉ាងណាមិញ យោងតាមទីភ្នាក់ងារសុខាភិបាលអឺរ៉ុប នៅក្នុងប្រទេសទាំង២៧នៃសហភាពអឺរ៉ុប រួមទាំងអ៊ីស្លង់ និងន័រវ៉េសផង ដែលកូវីដអូមីក្រុងចាប់ផ្តើមវាយលុកពីចុងខែវិច្ឆិកាមក គឺមកទល់ពេលនេះ កូវីដអូមីក្រុងបានក្លាយជាមេរោគ ដែលគ្របដណ្តប់ភាគច្រើនលើសលប់រួចទៅហើយ។
អ្នកជំនាញជឿថា ទំហំនៃការគ្របដណ្តប់លើសលប់ ចូលសព្វក្នុងសង្គមនេះ នឹងបង្កើតជាប្រព័ន្ធការពារខ្លួនរួម ហើយបូកផ្សំជាមួយនឹងទំហំនៃការចាក់វ៉ាក់សាំងទូលំទូលាយផងដែរ។ បន្ថែមពីនេះទៀត ចាប់ពីខែមីនាទៅ សីតុណ្ហភាពនឹងឡើងក្តៅមកវិញ។ ជាទូទៅ ជំងឺឆ្លងគឺវាមានរលកឆ្លងក្នុងមួយរយៈធំ ទៅតាមរដូវកាលរបស់វា។ គឺកត្តារួមផ្សំទាំងអស់នេះហើយ ដែលធ្វើឲ្យអ្នកជំនាញនៃអង្គការសុខភាពពិភពលោក ហ៊ានអះអាងថា អឺរ៉ុបនឹងងើបផុតពីវិបត្តិកូវីដ១៩ក្នុងពេលឆាប់ៗនេះ។
យ៉ាងណាមិញ នៅអាហ្វ្រិកខាងត្បូង ដែលប្រទេសផ្ទុះការឆ្លងរាលដាលកូវីដអូមីក្រុង មុនគេបង្អស់នោះ ក៏គេបានសង្កេតឃើញសន្ទុះវិជ្ជមាននេះដែរ ដោយថាសប្តាហ៍កន្លងមកនេះ ករណីឆ្លងថ្មីប្រចាំថ្ងៃ បានចាប់ផ្តើមធ្លាក់ចុះហើយ។ ដូចគ្នាដែរ នៅសហរដ្ឋអាមេរិក លោក Anthony Fauci អ្នកជំនាញសុខភាពនៃសេតវិមាន ក៏បានលើកឡើងកាលពីថ្ងៃអាទិត្យម្សិលមិញ ថាស្ថានការណ៍កំពុងតែបត់ទៅរកច្រកចេញហើយ។
កូវីដ១៩ អាចនឹងត្រលប់មកវិញនៅចុងឆ្នាំ
ទោះជាយ៉ាងនេះក្តី វាគ្រាន់តែជាក្តីសង្ឃឹម នៃការងើបដកដង្ហើម មួយរយៈប៉ុណ្ណោះ។ លោក Hans Kluge បានសន្និដ្ឋានថា រលកឆ្លងរាលដាលថ្មី អាចនឹងត្រលប់មកវិញ នៅរវាងចុងឆ្នាំ២០២២នេះ នៅអឺរ៉ុប។ តែទន្ទឹមគ្នានេះ អ្នកជំនាញរូបនេះ ជឿថា ទោះរលកឆ្លងរាលដាលកូវីដអាចត្រលប់មកវិញមែន តែក៏អាចមិនជាធ្ងន់ធ្ងរខ្លាំងនោះដែរ។
លោកបានក្រឿនរំលឹកថា ត្រូវតែបន្តការប្រុងប្រយ័ត្នទៀត ព្រោះមេរោគនេះ គេនៅមិនទាន់អាចចាត់ទុកវាបាន ថាជាមេរោគអង់ដេមីក ដូចមេរោគគ្រុនផ្តាសាយនោះដែរ។ ពាក្យថាមេរោគជំងឺឆ្លងអង់ដេមីក មានន័យថា គឺគេអាចប៉ាន់ស្មានដឹងមុន។ ដោយឡែក ជាមួយកូវីដ គឺគេមិនអាចស្មានទុកមុនបានទេ។ ទំរង់មេរោគបំប្លែងខ្លួនថ្មីណាមួយទៀត អាចនឹងលេចចេញមក ធ្វើឲ្យប្រែប្រួលក៏ថាបានដែរ។
ហេតុដូច្នេះហើយ បានជាអ្នកជំនាញ នៅតែទាញសញ្ញាអាសន្ន ឲ្យមានការប្រុងប្រយ័ត្ន ពីសំណាក់អាជ្ញាធររដ្ឋាភិបាល និងជាពិសេសគឺប្រជាពលរដ្ឋម្នាក់ៗតែម្តង ឲ្យមានស្មារតីទទួលខុសត្រូវ រៀងៗខ្លួន។ អាទិភាពចំបង គឺការពារអ្នកដែលងាយរងគ្រោះ ដូចជាមនុស្សចាស់ជរាជាដើម។ ហើយមួយវិញទៀត កម្រិតទំហំនៃការចាក់វ៉ាក់សាំង នៅក្នុងតំបន់អឺរ៉ុបទាំងមូល ដែលមានដល់ទៅ៥៣ប្រទេសនោះ គឺមិនដូចគ្នាទេ។ ប្រទេសខ្លះមានប្រជាជនប្រមាណ៩០%វាចាក់វ៉ាក់សាំងគ្រប់ដូស រីឯប្រទេសខ្លះទៀត មានត្រឹមតែ២០%ផង។
ដូច្នេះ ប្រជាពលរដ្ឋ ត្រូវចូលរួមជាមួយអាជ្ញាធរ អនុវត្តគោលនយោបាយសាធារណៈ ដើម្បីការពារធ្វើយ៉ាងណាឲ្យមានលំនឹង កុំឲ្យប្រព័ន្ធសុខាភិបាល ត្រូវរងរលកបោកជន់ជោរខ្លាំង នៃករណីអ្នកជំងឺកូវីដដែលឈឺធ្ងន់ធ្ងរ ព្រោះថាស្ថានភាពបែបនេះ គឺវាធ្វើប៉ះពាល់ដល់ អ្នកជំងឺផ្សេងៗទៀត ដូចជាជម្ងឺមហារីកជាដើម ដែលត្រូវការការយកចិត្តទុកដាក់ ព្យាបាលពីគ្រូពេទ្យដែរ។
បារាំងអនុវត្តកាតព្វកិច្ច បង្ហាញលិខិតបញ្ជាក់ចាក់វ៉ាក់សាំង
ដោយឡែកនៅបារាំង ចាប់ពីថ្ងៃចន្ទទី២៤មករានេះទៅ ច្បាប់ថ្មីកំណត់ពីកាតព្វកិច្ច បង្ហាញលិខិតបញ្ជាក់ថាបានចាក់វ៉ាក់សាំង បានចូលជាធរមានហើយ។ អ្វីដែលជាការប្រែប្រួលនោះ គឺថា ពីមុន នៅបារាំងមនុស្សម្នា អាចបង្ហាញលិខិតបញ្ជាក់ថាបានចាក់វ៉ាក់សាំង ឬក៏លទ្ធផលតេស្តអវិជ្ជមានក៏បាន។
ក៏ប៉ុន្តែចាប់ពីពេលនេះទៅ ដើម្បីអាចចូលទៅក្នុងទីតាំងសាធារណៈមួយចំនួនធំ ដូចជាបារ ហាងកាហ្វេ ភោជនីយដ្ឋាន រោងកុន រោងល្ខោន ឬក៏ក្នុងមធ្យោបាយដឹកជញ្ជូនផ្លូវឆ្ងាយទាំងអស់ គឺត្រឹមលទ្ធផលតេស្តអវិជ្ជមាន លែងគ្រប់គ្រាន់ទៀតហើយ។ មនុស្សចាប់ពីអាយុ១៦ឆ្នាំទៅ គឺត្រូវតែបង្ហាញក្រដាសបញ្ជាក់ថា ខ្លួនបានចាក់វ៉ាក់សាំង។
អ្វីដែលជាកម្មវត្ថុរបស់រដ្ឋាភិបាលបារាំង គឺជំរុញឲ្យប្រជាជនបារាំង ដែលនៅរារាំង ត្រូវប្រញ៉ាប់ទៅចាក់វ៉ាក់សាំង។ តែទន្ទឹមនឹងនេះ មានមតិខ្លះលើកឡើងថា សម្រាប់អ្នកដែលប្រឆាំងវ៉ាក់សាំងតាំងតែពីដំបូងមកនោះ គឺគេមិនជឿថាច្បាប់ថ្មីនេះ នឹងធ្វើឲ្យពួកគេប្តូរចិត្តនោះឡើយ។
យ៉ាងណាក៏ដោយ រដ្ឋាភិបាលបានប្រកាសនូវការបន្ធូរបន្ថយវិធានការមួយចំនួន ចាប់ពីថ្ងៃទី ២កុម្ភៈទៅ ដោយប្រជាជនលែងត្រូវចាំបាច់ពាក់ម៉ាសនៅខាងក្រៅទៀតហើយ ហើយតាមសហគ្រាស ក្រុមហ៊ុននានា ក៏លែងមានកាតព្វកិច្ចឲ្យបុគ្គលិកធ្វើការពីផ្ទះដែរ។ បន្ទាប់មកទៀត ចាប់ពីថ្ងៃទី១៦កុម្ភៈ រង្គសាល ឌីស្កូតែក នឹងត្រូវអនុញ្ញាតឲ្យបើកទ្វារទទួលភ្ញៀវឡើងវិញ អតិថិជនទូទៅ ក៏អាចឈរពិសារភេសជ្ជៈ នៅបញ្ជរកុងទ័រហាងនានា បានឡើងវិញដែរ។
ការបន្ធូរបន្ធយទាំងអស់នេះ គឺបន្ទាប់ពីរដ្ឋាភិបាលសង្កេតឃើញថា ស្ថានការណ៍មិនគ្រោះថ្នាក់ខ្លាំង។ ហើយមួយវិញទៀត គឺដើម្បីបើកផ្លូវ ឲ្យយុទ្ធនាការឃោសនាពបោះឆ្នោត អាចប្រព្រឹត្តិទៅតាមសម្រួលដែរ ពុំនោះទេ គណបក្សលោកម៉ាក្រុង ប្រាកដជាត្រូវគេចោទថា លេងខ្សែលើ រិតត្បិតការជួបជុំឃោសនា របស់បក្សផ្សេងទៀត មិនខានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ