សាហ៊ែល៖ ភាពរកាំរកូសរវាងរបបសិកម៉ាលី និងកងទ័ពសម្ព័ន្ធមិត្តអឺរ៉ុប កំពុងតែបំផ្លាញបេសកកម្មបោសសំអាតភេរវកម្ម
ចុះផ្សាយនៅថ្ងៃ៖
ស្តាប់ - ០៧:៣៧
បេសកម្មបោសសំអាតក្រុមភេរវកម្មជីហាតអ៊ីស្លាម នៅតំបន់សាហ៊ែលអាហ្វ្រិក កំពុងតែជួបភាពរង្គោះរង្គើរយ៉ាងខ្លាំង បន្ទាប់ពីមានភាពចម្រូងចម្រាស ជាមួយនឹងរបបសិកម៉ាលី។ កងទ័ពសម្ព័ន្ធមិត្តអឺរ៉ុប ដែលដឹកនាំដោយកងទ័ពបារាំង បានលើកឡើងនូវឧបសគ្គ និងការបង្កបញ្ហាជាច្រើន ពីសំណាក់របបសិកម៉ាលី ដើម្បីរារាំងបេសកកម្មនេះ។ ដោយយោងលើហេតុផលនេះ ក្រុមកងទ័ពសម្ព័ន្ធមិត្ត នឹងរួមគ្នាពិចារណារយៈពេល២សប្តាហ៍ ដើម្បីសម្រេចថាត្រូវធ្វើយ៉ាងណាបន្តទៀត ជាមួយនឹងបេសកកម្មបោសសំអាតក្រុមជីហាត នៅតំបន់សាហ៊ែលនេះ។
របបសិកម៉ាលីបង្ហាញការប្រឆាំងកាន់ខ្លាំងឡើង នឹងវត្តមានរបស់កងទ័ពសម្ព័ន្ធមិត្តអឺរ៉ុប
រឿងរកាំរកូសនោះគឺមានច្រើនណាស់ ដែលធ្វើឲ្យភាគីកងទ័ពសម្ព័ន្ធមិត្តអឺរ៉ុប ដឹកនាំដោយបារាំង កាន់តែក្តៅស្លឹកត្រចៀក និងដល់កខ្លាំង។ ចំណោទធំបំផុតនោះ គឺកងទ័ពបារាំង បាន សង្កេតឃើញថា របបសិកម៉ាលី ដែលបានធ្វើរដ្ឋប្រហារជាថ្មីម្តងទៀត កាលពីខែឧសភា ឆ្នាំមុននោះ បានបង្ហាញអាកប្បកិរិយាជំទាស់ មិនសប្បាយចិត្ត នឹងបេសកកម្មរបស់កងទ័ពសម្ព័ន្ធមិត្តអឺរ៉ុប កាន់តែខ្លាំងឡើងៗ។
កងទ័ពម៉ាលី បានធ្វើរដ្ឋប្រហារម្តងហើយម្តងទៀត រុញច្រានការស្តារស្ថិរភាពនយោបាយម៉ាលី ឲ្យកាន់តែស្ថិតនៅឆ្ងាយទៅៗ។ របបសិកនេះ មិនព្រមគោរពការសន្យារបស់ខ្លួន ដែលត្រូវរៀបចំការបោះឆ្នោតនៅខែក្រោយនេះទេ។ ការបដិសេធមិនរៀបចំការបោះឆ្នោតនេះ ក៏ត្រូវបានសហគមសហប្រតិបត្តិការសេដ្ឋកិច្ចអាហ្វ្រិកខាងលិច CEDEAO ដាក់ទណ្ឌកម្មសេដ្ឋកិច្ច និងហិរញ្ញវត្ថុលើម៉ាលីដែរ។
កាលពីថ្ងៃសុក្រទី២៩៨មករា លោក Jean Yves Le Drian រដ្ឋមន្ត្រីក្រសួងការបរទេសបារាំង បាននិយាយដោយប្រើពាក្យធ្ងន់ៗថា របបសិកដែលគ្រប់គ្រងម៉ាលីនាពេលបច្ចុប្បន្ននេះ គឺជារបបខុសច្បាប់។ លោកបានបន្ថែមថា បរិបទនយោបាយ និងសន្តិសុខផ្ទៃក្នុងម៉ាលី កំពុងតែបង្កការលំបាកកាន់តែខ្លាំងឡើងៗ មកលើប្រតិបត្តិការដឹកនាំដោយកងទ័ពបារាំង ដែលបារាំងបានចុះកិច្ចព្រមព្រៀង ជាមួយរដ្ឋាភិបាលម៉ាលីមុន។
ម្ចាស់ផ្ទះគេមិនស្វាគមន៍
រឿងរ៉ាវចុងក្រោយមួយទៀត ដែលធ្វើឲ្យកងទ័ពសម្ព័ន្ធមិត្តអឺរ៉ុប មិនសប្បាយចិត្ត គឺបន្ទាប់ពីរបបសិកម៉ាលី បានប្រកាសបណ្តេញកងទ័ព ប្រទេសដាណឺម៉ាក។ កងទ័ពដាណឺម៉ាក ទើបតែបានសម្រេចបញ្ជូនកម្លាំង ចំនួន៨០០នាក់ ទៅចូលរួមក្នុងប្រតិបត្តិការTAKUBA ដើម្បីប្រយុទ្ធប្រឆាំងនឹងក្រុមជីហាតភេរវកម្ម នៅសាហ៊ែល។ តែរបបសិកម៉ាលី បានអះអាងថា ទង្វើនេះជាការមិនគោរពអធិបតេយ្យភាពខ្លួន។ ដោយឡែក សម្រាប់បារាំង ក៏ដូចជាក្រុមសម្ព័ន្ធមិត្តអឺរ៉ុប វាគឺជាអ្វីដែលមានកំណត់ នៅក្នុងកិច្ចព្រមព្រៀងជាមួយរដ្ឋាភិបាលម៉ាលីមុន ពោលគឺគេផ្តល់សិទ្ធិឲ្យបារាំង ជាអ្នកដឹកនាំកងកម្លាំងសម្ព័ន្ធមិត្តអឺរ៉ុប។
លោកស្រី Trine Bramsen រដ្ឋមន្ត្រីការពារជាតិដាណឺម៉ាកបានប្រកាសថា បើម្ចាស់ផ្ទះគេមិនស្វាគមន៍ គឺកងទ័ពដាណឺម៉ាកនឹងមិនទៅថោកចចែសចង់នៅនោះទេ។ ដាណឺម៉ាកនឹងដកកម្លាំងទ័ពចេញមកវិញ ដោយមានការព្រមព្រៀងពីសភាដាណឺម៉ាក។
សហការជាមួយទាហានស៊ីឈ្នួលរុស្ស៊ី ដើម្បីបន្តក្តាប់អំណាច
ជាច្រើនខែមកហើយ ដែលបារាំង បានលើកឡើងថា របបសិកម៉ាលី បានបើកដៃ អញ្ជើញក្រុមកងទ័ពស៊ីឈ្នួលរុស្ស៊ី ឈ្មោះក្រុម Wagner ឲ្យមកធ្វើប្រតិបត្តិការនៅម៉ាលី ប្រជែងជាមួយកងទ័ពសម្ព័ន្ធមិត្តអឺរ៉ុប។ យោងតាមប្រភពពីកងទ័ពបារាំង គឺបច្ចុប្បន្ននេះ មានទាហានស៊ីឈ្នួលរបស់ក្រុម Wagner យ៉ាងហោច៦០០នាក់ហើយ ដែលកំពុងធ្វើប្រតិបត្តិការនៅម៉ាលី។ ប្រភពដដែលនេះបន្ថែមថា មិនយូរទេ កម្លាំងនេះនឹងឡើងដល់ខ្ទង់ជាងពាន់នាក់ ពោលគឺស្មើពាក់កណ្តាលនៃកម្លាំងកងទ័ពបារាំង ដែលមានប្រមាណតែ២៥០០នាក់ទេ នៅទូទាំងតំបន់សាហ៊ែល។
យ៉ាងណាមិញ លោករដ្ឋមន្ត្រីការបរទេសដាណឺម៉ាក បានលើកឡើងថា អ្វីដែលរបបសិកម៉ាលីកំពុងតែធ្វើនាពេលនេះ គឺបង្កបញ្ហា បង្កភាពរញ៉េរញ៉ៃ ធ្វើឲ្យកងទ័ពសម្ព័ន្ធមិត្តអឺរ៉ុបពិបាកធ្វើការ ខឹងទ្រាំលែងបាន ហើយដកទ័ពចេញពីម៉ាលី។ របបសិកនេះ ចង់បើកទ្វារទូលាយ ឲ្យតែក្រុមទាហានស៊ីឈ្នួលរបស់រុស្ស៊ីទេ ដើម្បីអាចបន្តកាន់អំណាចនៅម៉ាលីតទៅទៀត។ របបសិកម៉ាលី មិនពេញចិត្តប្រទេសអឺរ៉ុប ព្រោះដោយសារតែប្រទេសអឺរ៉ុបទាមទារឲ្យរបបសិកនេះ រៀបចំការបោះឆ្នោតដោយសេរី ដើម្បីឲ្យប្រជាជនម៉ាលី អាចមានសិទ្ធិជ្រើសរើសតែងតែងតាំងរដ្ឋាភិបាលស៊ីវីល ដោយស្របច្បាប់។ ផ្ទុយទៅវិញ សម្រាប់រុស្ស៊ីវិញ គឺគេមិនខ្វល់ថារបបនេះ ជារបបសិកខុសច្បាប់អ្វីទេ។ ហេតុដូច្នេះហើយបានជារបបសិកម៉ាលី ចង់សហការជាមួយក្រុមទាហានស៊ីឈ្នួលរុស្ស៊ី ជាជាងជាមួយកងទ័ពសម្ព័ន្ធមិត្តអឺរ៉ុប។
ដកកម្លាំងទៅប្រមូលផ្តុំនៅប្រទេសមួយទៀត ដើម្បីបន្តបេសកកម្ម
កាលពីព្រឹកថ្ងៃទី ២៩មករា លោកស្រី Florence Parly រដ្ឋមន្ត្រីក្រសួងការពារជាតិបារាំង បានលើកឡើងថា កងទ័ពសម្ព័ន្ធមិត្ត មិនអាចមានៈនៅម៉ាលីទៀតបានទេ ប្រសិនបើរបបសិកម៉ាលី នៅតែប្រកាន់ជំហរ អាកប្បកិរិយាក្រអឺតក្រទម ជំទាស់ ដាក់ឧបសគ្គមកលើបេសកកម្មនេះ។
ដោយឡែក រដ្ឋមន្ត្រីការបរទេសម៉ាលី បានថ្លែងនៅវិទ្យុបារាំងអន្តរជាតិ RFI ថាម៉ាលី ក៏កំពុងពិចារណាដែរ ដោយមិនចោលជំរើសណាមួយទាំងអស់ ទាំងជម្រើសបញ្ជាឲ្យដកទ័ព។ តំណាងរដ្ឋាភិបាលម៉ាលីរូបនេះ បានអះអាងថា កិច្ចព្រមព្រៀងដែលបារាំងបានចុះជាមួយរដ្ឋាភិបាលម៉ាលីមុន គឺមានចំណុចខ្លះផ្ទុយនឹងរដ្ឋធម្មនុញ្ញម៉ាលី បំពានអធិបតេយ្យម៉ាលី។ ដូច្នេះ ត្រូវតែសើរើ កិច្ចព្រមព្រៀងនេះម្តងទៀត។
តែយ៉ាងណា សម្រាប់ពេលនេះ ភាគីអឺរ៉ុបមិនទាន់និយាយអំពីពាក្យថា ដកទ័ពចេញពីម៉ាលីនោះទេ។ ក្រុមប្រទេសសម្ព័ន្ធមិត្ត នឹងពិគ្រោះយោបល់គ្នា រយៈពេល២សប្តាហ៍ ដើម្បីពិចារណា ថាត្រូវធ្វើយ៉ាងណា។ ក៏ប៉ុន្តែ ការដកទ័ពចេញពីសាហ៊ែលទាំងស្រុង វាអាចជាការបរាជ័យ និងជារឿងអាម៉ាសសម្រាប់បារាំង។ មួយវិញទៀតក្រុមជីហាតភេរវកម្មអ៊ីស្លាម នៅតែធ្វើសកម្មភាព មិនទាន់ចុះថយទេ។ អស្ថិរភាពតំបន់សាហ៊ែល នឹងរុញច្រានជនភៀសខ្លួនបន្ថែមទៀតមកអឺរ៉ុប ទៅថ្ងៃខាងមុខ។ យោងតាមប្រភពច្បាស់ការ បានឲ្យដឹងថា សម្ព័ន្ធមិត្តអឺរ៉ុប អាចដកចេញពីម៉ាលី ដោយយកកម្លាំងទៅប្រមូលផ្តុំ នៅប្រទេសនៅប្រទេសមួយទៀតជាប់នោះ ដើម្បីបន្តបេសកកម្មនេះ។
វត្តមានកងទ័ពបារាំងនៅម៉ាលី ក៏កំពុងតែត្រូវបានមតិសាធារណៈបារាំង ជំទាស់និងចោទសួរដែរ។ ចាប់តាំងពីឆ្នាំ២០១៣ បារាំងបានចំណាយប្រាក់ប្រមាណ១០០០លានអឺរ៉ូ និងមានទាហានស្លាប់ចំនួន៥៣នាក់នៅសាហ៊ែល។ តែចុងបញ្ចប់ ម៉ាលីមិនត្រឹមតែមិនដឹងគុណទេ គឺបែជារករឿងចោទប្រកាន់ ចង់ដេញកងទ័ពបារាំងថែមទៀត។ តែយ៉ាងណា ក្នុងនាមបារាំង ជាប្រធានដឹកនាំសហភាពអឺរ៉ុប ក្នុងអំឡុងពេលនេះផង គឺបារាំងចង់សម្រេចដោយរួមសហការជាមួយប្រទេសអឺរ៉ុប។ បារាំងមិនចង់សម្រេចតែម្នាក់ឯង ដូចក្នុងករណីអាមេរិកធ្វើនៅអាហ្វហ្កានីស្ថាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ