ក្រុមប្រឹក្សាសន្តិសុខប្រជុំបន្ទាន់ ដើម្បីស្វែងរកដំណោះស្រាយរឿងអ៊ុយក្រែន
ចុះផ្សាយនៅថ្ងៃ៖
ស្តាប់ - ០៦:៣២
រហូតមកទល់នេះ នៅតែគ្មានដំណោះស្រាយណាមួយទាំងអស់ រវាងរុស្ស៊ី និងក្រុមប្រទេសលោកខាងលិច ទាក់ទិននឹងសំណុំរឿងអ៊ុយក្រែន។ មានការព្រួយបារម្ភកាន់តែខ្លាំងឡើង អំពីលទ្ធភាពនៃការបើកការវាយប្រហារឈ្លានពាន ពីសំណាក់រុស្ស៊ី មកលើអ៊ុយក្រែន។ នៅថ្ងៃចន្ទនេះ ក្រុមប្រឹក្សាសន្តិសុខនៃអង្គការសហប្រជាជាតិ នឹងបើកការប្រជុំបន្ទាន់មួយ ក្រោមការស្នើសុំពីសហរដ្ឋអាមេរិក ដើម្បីនិយាយជាមួយភាគីរុស្ស៊ី ឲ្យយល់ព្រមដកថយ ហើយចរចាគ្នាតាមផ្លូវការទូត។
ស្តាប់ តែមិនចាញ់បោកពាក្យកុហករបស់រុស្ស៊ី
កិច្ចប្រជុំបន្ទាន់នៅក្រុមប្រឹក្សាសន្តិសុខ នៅថ្ងៃទី៣១មករា គឺសហរដ្ឋអាមេរិក ជាអ្នកស្នើ។ បើតាមការបញ្ជាក់ពីលោកស្រី Linda Thomas-Greenfield ឯកអគ្គរដ្ឋទូតអាមេរិកប្រចាំអង្គការសហប្រជាជាតិ កម្មវត្ថុនៃកិច្ចប្រជុំនេះ គឺធ្វើយ៉ាងណាបញ្ចុះបញ្ចូល ឲ្យរុស្ស៊ីស្តាប់ហេតុផលសមាជិកទាំង១៤ផ្សេងទៀត នៃក្រុមប្រឹក្សានេះ ហើយឈានទៅដកថយកម្លាំងទ័ព ចេញពីព្រំដែនអ៊ុយក្រែន។
នៅតាមកញ្ចក់ទូរទស្សន៍ ABC កាលពីយប់ថ្ងៃអាទិត្យម្សិលមិញ មន្ត្រីទូតអាមេរិករូបនេះ បានលើកឡើងថា រុស្ស៊ីអាចព្យាយាមរារាំងមិនឲ្យកិច្ចប្រជុំនេះអាងដំណើរការទៅបាន។ ក៏ប៉ុន្តែលោកស្រីបានអះអាងថា សមាជិកទាំង១៤ផ្សេងទៀត មានការមូលមតិគ្នាល្អ ដើម្បីបើកការប្រជុំនេះ ហើយអង្គុយស្តាប់អំណះអំណាងរបស់រុស្ស៊ី។ គេនឹងស្តាប់អំណះអំណាងរបស់រុស្ស៊ីដោយប្រុងប្រយ័ត្ន តែមិនឲ្យធ្លាក់ចាញ់បោកពាក្យកុហកឃោសនា ពីសំណាក់រុស្ស៊ីបានឡើយ។ លោកស្រីអគ្គរដ្ឋទូតអាមេរិក លើកឡើងថា នៅក្នុងពេលប្រជុំនេះ រុស្ស៊ីប្រាកដជានឹងឆ្លើយបដិសេធ ដោយមិនខ្មាសមាត់ ថាគ្មានបំណងឈ្លានពានអ៊ុយក្រែន ហើយថាគេចោទខ្លួនដោយអយុត្តិធម៌។ តែលោកស្រីអះអាងថា អាេមរិករួមជាមួយសម្ព័ន្ធមិត្ត នឹងរួមគ្នាបង្ហាញការពិតនៅចំពោះមុខ ឲ្យរុស្ស៊ីទទួលស្គាល់។
ដូចយើងបានដឹងហើយ ប៉ុន្មានខែចុងក្រោយនេះ រុស្ស៊ីត្រូវបានអ៊ុយក្រែន និងក្រុមប្រទេសលោកខាងលិច ចោទថាបានបញ្ជូនចល័តទ័ព ប្រមាណ១សែននាក់ និងគ្រឿងសព្វាវុធផង នៅតាមបណ្តោយព្រំដែន ដើម្បីរៀបគម្រោងវាយប្រហារអ៊ុយក្រែន។ រុស្ស៊ីបានប្រកែក ថាគ្មានគម្រោងនេះទេ តែទន្ទឹមនឹងនេះរុស្ស៊ីបានទាមទារឲ្យអាមេរិក និងអូតង់ត្រូវតែឈប់រើសសមាជិកថ្មីបន្ថែម ជាក់ស្តែងគឺមិនត្រូវឲ្យអ៊ុយក្រែន ចូលជាសមាជិកអូតង់តែម្តង។
កិច្ចប្រជុំរវាងរដ្ឋមន្ត្រីការបរទេសអាេមរិក និងរុស្ស៊ី នៅក្រុងហ្សឺណែវ កាលពីសប្តាហ៍មុនមិនបានលទ្ធផលទេ ដោយអាមេរិក បានឆ្លើយជាលាយលក្ខណ៍អក្សទៅរុស្ស៊ីហើយ ថាអាមេរិកមិនអាចធ្វើតាមការទាមទាររបស់រុស្ស៊ីបានជាដាច់ខាត។ អ៊ុយក្រែនប្រទេសឯករាជ្យ ដែលមានសិទ្ធិជ្រើសរើស ចូលក្នុងក្រុមសម្ព័ន្ធមិត្តមួយណា ជារឿងរបស់អ៊ុយក្រែន។
សង្កត់ដោយទណ្ឌកម្មសេដ្ឋកិច្ច
ជំហានបន្ទាប់ទៀត គឺត្រូវតែដាក់សំពាធលើរុស្ស៊ី តាមរយៈទណ្ឌកម្មសេដ្ឋកិច្ច និងហិរញ្ញវត្ថុ។ បើតាមការលើកឡើងពីមន្ត្រីទូត ដែលស្និទនឹងសំណុំរឿងនេះ អាមេរិក និងអង់គ្លេស កំពុងតែពិចារណា ដាក់ទណ្ឌកម្មទៅលើបណ្តាញបំពង់បង្ហូរឧស្ម័នរុស្ស៊ី Nord Stream 2 និងការដករុស្ស៊ីមិនឲ្យអាចប្រើប្រាស់ប្រព័ន្ធទូទាត់សាច់ប្រាក់ និងប្រតិបត្តិការធនាគារអន្តរជាតិ ដែលប្រើប្រាស់ប្រាក់ដុល្លារ។
រដ្ឋាភិបាលអង់គ្លេសលើកឡើងថា ត្រូវតែវាយឲ្យចំណុចសំខាន់ៗ ដែលប៉ះពាល់ដោយផ្ទាល់ទៅលើក្រុមបក្សពួកមនុស្សមានអំណាច នៃរដ្ឋាភិបាលរុស្ស៊ីតែម្តង។ ដូចគ្នាដែរ នៅអាមេរិកវិញ សមាជិកសភា២នាក់ បានអះអាងកាលពីថ្ងៃម្សិលមិញទេ សភាខុនហ្ក្រេសអាមេរិក កំពុងតែឈានទៅអនុម័តគម្រោងច្បាប់ថ្មីមួយ ដែលកំណត់ចែងពីទណ្ឌកម្មសេដ្ឋកិច្ច ទៅលើរុស្ស៊ី។
លោក Bob Menendez ប្រធានគណកម្មការកិច្ចការអន្តរជាតិ នៃព្រឹទ្ធសភាអាមេរិក បាននិយាយនៅតាមទូរទស្សន៍ CNN ថាកាលៈទេសៈពេលនេះ គឺអាេមរិក រួមទាំងសម្ព័ន្ធមិត្ត មិនត្រូវចាញ់បោករុស្ស៊ីបានទេ កុំឲ្យប្រវត្តិសាស្ត្រជាន់ដាន ដូចនៅជំនាន់មុនសង្គ្រាមលោកលើកទី២ ដែលអ៊ីត្លែ បានបោកប្រាស់បំភ័ន្តភ្នែកសម្ព័ន្ធមិត្ត នៅក្នុងកិច្ចព្រមព្រៀងទីក្រុងមុយនីឆ។ ព្រឹទ្ធសមាជិកអាមេរិករូបនេះអះអាងថា ទោះបានអ៊ុយក្រែនមួយហើយ ក៏រុស្ស៊ីមិនស្កប់ស្កល់ដែរ រុស្ស៊ីនឹងបន្តលេបត្របាក់បន្តទៀត បើគ្រប់គ្នាមិនពួតកម្លាំងគ្នាទប់នៅពេលនេះទេនោះ។
ក្រុមបញ្ចឹមលោកលើកកម្លាំងទ័ពទៅជួយអ៊ុយក្រែន
ជាការពិត ត្រឹមទណ្ឌកម្មសេដ្ឋកិច្ចមិនគ្រប់គ្រាន់ទេ។ ក្រុមប្រទេសលោកខាងលិច ត្រូវតែរួមគ្នា ប្រុងជើង ដើម្បីទប់ទល់ជាមួយរុស្ស៊ី ក្នុងករណីមានការវាយប្រហារមកលើអ៊ុយក្រែនមែន។ ជាក់ស្តែង រដ្ឋភិបាលអង់គ្លេស នឹងស្នើទៅកាន់អូតង់ ថាខ្លួននឹងបញ្ជូនកម្លាំងទ័ពទៅ អ៊ុយក្រែន។ ជាសំណើ ដែលធ្វើឲ្យអូតង់ ក៏ដូចជារដ្ឋាភិបាលអ៊ុយក្រែន មានការកក់ក្តៅនិងសប្បាយចិត្ត។
លោកស្រី Anita Anand រដ្ឋមន្ត្រីក្រសួងការពារជាតិកាណាដា ក៏ទើបតែទៅដល់ទីក្រុងគាវ នៅថ្ងៃអាទិត្យម្សិលមិញ។ លោកស្រីបានអះអាងថា កាណាដា នឹងបញ្ជូនជំនួយសម្ភារៈ និងកម្លាំងទ័ពកាណាដា ទៅភាគខាងលិចអ៊ុយក្រែន ដើម្បីត្រៀមកម្លាំងទប់ទល់ ក្នុងករណីមានការឈ្លានពាន។ ជាមួយគ្នានេះដែរ កាណាដា បានប្រកាសប្រមូលបុគ្គលិកការទូតដែលមិនចាំបាច់ ឲ្យចេញពីអ៊ុយក្រែន ជាបណ្តោះអាសន្នសិន។
នៅសប្តាហ៍នេះ រដ្ឋមន្ត្រីការបរទេសបារាំង រដ្ឋមន្ត្រីការបរទេសអាល្លឺម៉ង់ រួមទាំងលោករដ្ឋមន្ត្រីប៉ូឡូញផង នឹងទៅជួបប្រជុំនៅទីក្រុងគាវ ដែរ ដើម្បីគូសវាស ផែនការជួយអ៊ុយក្រែនក្នុងការការពារខ្លួន។ ដូច្នេះយើងឃើញថា ក្រុមសម្ព័ន្ធមិត្តលោកខាងលិច មិនទុកអ៊ុយក្រែនចោលទេ ហើយខំប្រឹងរកវិធីជួយ។ កាលពីថ្ងៃសុក្រ លោក Volodymyr Zelensky ប្រធានាធិបតីអ៊ុយក្រែន បានប្រកាសអំពាវនាវ ឲ្យរុស្ស៊ីដកថយទ័ព ហើយងាកមកចរចាគ្នា ។ តែទន្ទឹមនឹងនេះលោកក៏បានសូមកុំឲ្យក្រុមសម្ព័ន្ធមិត្តលោកខាងលិច បង្កការភ័យជ្រួលច្របល់ពេកដែរ ទាក់ទិននឹងលទ្ធភាពដែលថារុស្ស៊ីលើកទ័ពមកឈ្លានពានអ៊ុយក្រែន ក្នុងពេលឆាប់ៗនោះ។
យ៉ាងណាក៏ដោយ បើតាមការលើកឡើង របស់លោកស្រី Victoria Nuland អនុរដ្ឋលេខាធិការក្រសួងការបរទេសអាមេរិក ដែលបាននិយាយនៅតាមទូរទស្សន៍ CBS កាលពីថ្ងៃម្សិលមិញ គឺថា ភាគីរុស្ស៊ីបានបង្ហាញសញ្ញាខ្លះៗហើយ ថាចង់បន្តការចរចា ដែលអាមេរិក និងអូតង់បានស្នើ។ មន្ត្រីអាមេរិករូបនេះ បញ្ជាក់ថា ក្នុងសប្តាហ៍នេះ លោកអង់តូនី ប្លីងកិន អាចនឹងជួបនិយាយគ្នាជាមួយលោក ស៊ែរហ្កី ឡារ៉ូវ ជាថ្មីម្តងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ