លោកស៊ី ជីនពីង និងលោកពូទីន ពង្រឹងសម្ព័ន្ធភាពយុទ្ធសាស្ត្រ ដើម្បីប្រជែងជាមួយអាមេរិក?
ចុះផ្សាយនៅថ្ងៃ៖
ស្តាប់ - ០៧:៣២
នៅក្នុងឱកាសកម្មវិធីបើកសម្ពោធកីឡាអូឡាំពិករដូវរងារ នៅទីក្រុងប៉េកាំង កាលពីថ្ងៃសុក្រទី៤កុម្ភៈ លោកប្រធានាធិបតីរុស្ស៊ី វ្លាឌីមៀរ ពូទីន បានអញ្ជើញទៅជាកិត្តិយស ក្រោមការអញ្ជើញរបស់លោកប្រធានាធិបតីចិន ខណៈដែលសហរដ្ឋអាមេរិកឯណោះ បានធ្វើពហិកាការទូត មិនចូលរួមកម្មវិធីនេះ។ វត្តមានដ៏ស្និទ្ធស្នាលរបស់លោកពូទីន និង លោកស៊ី ជីនពីង នាពេលនេះ ត្រូវបានអ្នកវិភាគជាច្រើន យល់ឃើញថា គឺជាការពង្រឹងសម្ព័ន្ធភាពយុទ្ធសាស្ត្រ រវាងចិន និងរុស្ស៊ី ដែលមហាអំណាចទាំង២នេះ មានសត្រូវរួមតែមួយ គឺសហរដ្ឋអាមេរិក។ តើការចាប់ពួតដៃគ្នា រវាងចិននិងរុស្ស៊ី អាចបង្កឧបសគ្គ និងការលំបាកអ្វីខ្លះ ដល់សហរដ្ឋអាមេរិក ក៏ដូចជាក្រុមប្រទេសលោកខាងលិចជាទូទៅ?
សត្រូវរបស់សត្រូវយើង គឺជាមិត្តរបស់យើង
នៅក្នុងពិភពលោកយើងបច្ចុប្បន្ននេះ នរណាក៏ដឹងដែរ ថាចិននិងរុស្ស៊ី ជាមហាអំណាចសេដ្ឋកិច្ច និងសព្វាវុធ ដែលប្រជែងគ្នាខ្លាំងណាស់ ជាមួយសហរដ្ឋអាមេរិក។ អាមេរិក អះអាងថាខ្លួនគឺជាបិតាប្រជាធិបតេយ្យ ជាអ្នកការពារពិភពលោកឲ្យមានសិទ្ធិសេរីភាព ប្រឆាំងតទល់នឹងអំណាចផ្តាច់ការ ដូចជារបបចិន ឬរបបរុស្ស៊ី។ ចំណែក ចិន និងរុស្ស៊ីវិញ គឺព្យាយាមធ្វើគ្រប់យ៉ាង ដើម្បីប្រកាសថា គេក៏មានសិទ្ធិអំណាច ស្មើគ្នាជាមួយអាមេរិកដែរ។ អាមេរិក មិនអាចមកដាក់កំហិត ឲ្យគេឯងគ្រប់គ្នាយល់ឃើញដូចខ្លួន ឬដើរតាមខ្លួននោះទេ។
វត្តមានរបស់លោកពូទីន នៅទីក្រុងប៉េកាំង ក្នុងឱកាសបើកសម្ពោធកីឡាអូឡាំពិករដូវរងារ កាលពីថ្ងៃទី៤កុម្ភៈ វាគឺជាការបង្ហាញនូវសម្ព័ន្ធភាពយុទ្ធសាស្ត្រ រវាងចិន និងរុស្ស៊ី។ តែយ៉ាងណាមិនមែនមានន័យថា រុស្ស៊ី និង ចិនស្រលាញ់គ្នាល្អូកល្អឺននោះទេ។ មានសំណុំរឿងខ្លះ ដ៏មហាអំណាចទាំង២នេះ មិនសូវត្រូវគ្នាដែរ ជាក់ស្តែងបញ្ហាអធិបតេយ្យភាពដែនដី នៅភាគខាងកើតបង្អស់របស់រុស្ស៊ី ដែលជាប់ជាមួយព្រំដែនចិន និងបញ្ហាឥទ្ធិពលចិននៅតាមបណ្តាប្រទេសអាស៊ីកណ្តាល អតីតកូនចៅសហភាពសូវៀតជាដើម។ ក៏ប៉ុន្តែវិវាទតូចតាចទាំងនេះ គឺគេទុកមួយអន្លើ ដោយងាកមករួមកម្លាំងគ្នា ទប់ទល់ជាមួយសត្រូវរួមជាមុនសិន នោះគឺសហរដ្ឋអាមេរិក។
កាលពីថ្ងៃព្រហស្បតិ៍ កាសែតចិន Global Times បានចុះផ្សាយប្រើពាក្យយ៉ាងពិរោះរណ្តំ បញ្ជាក់អំពីមិត្តភាពផ្ទាល់ខ្លួន ដ៏ស្និទ្ធស្នាលរវាងលោកពូទីន និងស៊ី ជីនពីង។ កាសែតនេះសរសេរថា មេដឹកនាំទាំង២បានជួបគ្នាមិនតិចជាង៣០ដងទេ បើគិតពីឆ្នាំ២០១៣មក ដែលនេះគឺជាចំនួនមួយដ៏ច្រើន និងដ៏កម្រណាស់។ មេដឹកនាំទាំង២ ថែមទាំងធ្លាប់ចូលរួម ពិធីបុណ្យខួបកំណើតគ្នាទៅវិញទៅមក ថែមទៀតផង។
លោក Steve Tsang សាស្រ្តាចារ្យ នៅវិទ្យាស្ថានចិន នៃសកលវិទ្យាល័យទីក្រុងឡុងដ៍ បានទទួលស្គាល់ថា បើប្រៀបធៀបទៅប្រធានាធិបតីចិនមុនៗ លោកស៊ី ជីនពីង ពិតជាមានភាពស្និទ្ធស្នាលខ្លាំង ជាមួយលោកពូទីនពិតមែន។ ចំណុចរួមរបស់លោកពូទីន និងលោកស៊ី ជីនពីង គឺទស្សនវិស័យចង់ប្រជែងឥទ្ធិពល ជាមួយអាមេរិក កុំឲ្យអាមេរិកធ្វើជាមេ អាងយ៉ាងតែម្នាក់ឯងក្នុងពិភពលោក។
ចិន និង រុស្ស៊ី ប្រឆាំងរាល់ការពង្រីកពង្រឹងឥទ្ធិពលសម្ព័ន្ធមិត្តយោធាអាមេរិក
បើយោងតាមសេចក្តីថ្លែងការណ៍រួម កាលពីថ្ងៃសុក្រទី៤កុម្ភៈ ក្រោយប្រធានាធិបតីទាំង២បានជួបគ្នានៅប៉េកាំង គឺគ្មានអ្វីត្រូវសង្ស័យទៀតនោះទេ។ ចិននៅខាងរុស្ស៊ី ចិនគាំទ្ររុស្ស៊ី ក្នុងសំណុំរឿងអ៊ុយក្រែន។ លោកពូទីន និងលោក ស៊ីជីនពីង បានរួមគ្នាប្រកាស បើកទំព័រសករាជ្យថ្មី នៃទំនាក់ទំនងការបរទេស និងឈានទៅបិទបញ្ចប់ឥទ្ធិពលវាទទីតែម្នាក់ឯង របស់សហរដ្ឋអាមេរិក។
នៅក្នុងសេចក្តីថ្លែងការណ៍រួមនេះ លោក ស៊ី ជីនពីង និងលោកពូទីន បានប្រកាសថាប្រឆាំងដាច់ខាត ចំពោះការពង្រីក បន្ថែមសមាជិកនៃអង្គការអូតង់។ ដែលនេះវាបានបង្ហាញថា ចិន គាំទ្រចំពោះការទាមទារចង់បានរបស់រុស្ស៊ី ទាក់ទិននឹងសំណុំរឿងអ៊ុយក្រែន។ មេដឹកនាំទាំង២នេះ បានបរិហារថា យុទ្ធសាស្ត្រពង្រីក ពង្រឹងសម្ព័ន្ធមិត្តកងទ័ពរបស់អាមេរិក ជាមួយក្រុមប្រទេសលោកខាងលិច មិនថាតាមរយៈអូតង់ ឬតាមរយៈសម្ព័ន្ធភាពAUKUS គឺវាជាយុទ្ធសាស្ត្រ ដែលបំផ្លាញស្ថិរភាព និងសន្តិភាពពិភពលោក។
ដូចយើងដឹងស្រាប់ មិនខុសពីរុស្ស៊ី ចិនក៏មានបញ្ហាជាមួយអាមេរិកដែរ ទាក់ទិននឹងបញ្ហាពង្រីកឥទ្ធិពលយោធាអាមេរិកនេះ។ សម្ព័ន្ធភាពAUKUS ដែលអាមេរិកបានរៀចចំបង្កើត ជាមួយអូស្ត្រាលី និងជប៉ុនដើម្បីឡោមព័ទ្ធចិន នៅតំបន់អាស៊ីប៉ាស៊ីហ្វិក គឺវាមិនខុសពីអូតង់ ដែលឡោមព័ទ្ធរុស្ស៊ីនោះឡើយ។ ចង់មិនចង់ ចិនយល់ពីអារម្មណ៍របស់រុស្ស៊ី។ យ៉ាងណាមិញ អ្វីដែលលោកពូទីន កំពុងតែធ្វើនៅអ៊ុយក្រែន តាមរយៈការហ៊ានបញ្ចេញកម្លាំងតទល់ច្បាស់ៗ ជាមួយអាមេរិកនេះ ក៏ត្រូវបានលោកស៊ី ជីនពីង ស្ងើចសរសេរមិនតិចដែរ។
លោក Pascal Ausseur អគ្គនាយកមូលនិធិមេឌីទែរ៉ាណេ ដើម្បីការសិក្សាយុទ្ធសាស្ត្រ FMES បានលើកឡើងថា លោក ស៊ី ជីនពីង ស្ញប់ស្ញែងលោកពូទីន ដែលមានភាពក្លាហាន ព្រោះថាចិន មិនអាចចេះតែធ្វើខ្លាំងបែបនេះ បានទេ មិនថាជាមួយអាមេរិក ឬជាមួយអឺរ៉ុប ដោយសារតែបញ្ហាសេដ្ឋកិច្ច។ ការដែលរុស្ស៊ីហ៊ានប្រើកម្លាំងទ័ព កំញើញត្រង់ៗ ដាក់អាមេរិក យ៉ាងប្រថុយប្រថានបែបនេះ វាគឺជាហានិភ័យភូមិសាស្ត្រនយោបាយ ដែលលោកស៊ី ជីនពីង នៅមិនទាន់ហ៊ានធ្វើដូចលោកពីទីន ឡើយ។
គ្មានសម្ព័ន្ធភាពស៊ីជំរៅ តែអាចជាការសហការគ្នាដោយប្រយោល
ជាបឋម នៅក្នុងសំណុំរឿងអ៊ុយក្រែន គឺចិន និងរុស្ស៊ីអាចជួយគ្នាទៅវិញទៅមក។ បើតាមការវិភាគរបស់ លោក Steve Tsang គឺលោកស៊ី ជីនពីង ប្រហែលជាបានសុំទៅលោកពូទីន ថាកុំអាលបើកប្រតិបត្តិការវាយប្រហារទៅលើអ៊ុយក្រែន ក្នុងអំឡុងពេលប្រកួតកីឡាអូឡាំពិកនៅក្រុងប៉េកាំង នាពេលនេះ ព្រោះវាអាចរំខាន ធ្វើឲ្យគេលែងសូវចាប់អារម្មណ៍កម្មវិធីជាមុខមាត់របស់ចិន។ ចំណែកចិនវិញ ទំនងជាបានសន្យាជួយរុស្ស៊ី នៅក្នុងករណីដែលអាមេរិក ក៏ដូចជាអឺរ៉ុបព្រួតគ្នាដាក់ទណ្ឌកម្មសេដ្ឋកិច្ចលើរុស្ស៊ី។
ដោយឡែក លោក Anton Barbashin អ្នកជំនាញរុស្ស៊ីនៅ ក្រុមវិភាគ Riddle នៅក្រុងហ្ក្លាសកូវ គឺ ទាំងរុស្ស៊ី ទាំងចិន គឺជាមហាអំណាចដែលផ្តោតអាទិភាពធំ ដល់ការការពារអធិបតយេ្យភាពរៀងៗខ្លួនណាស់។ ដូច្នេះ នឹងមិនអាចមានការសហការគ្នា បង្កើតជាសម្ព័ន្ធភាពស៊ីជំរៅណាមួយឡើយ។ តែប្រទេសទាំង២នេះ អាចនឹងកំណត់កម្មវត្ថុរួម ដើរស្របគ្នា ផ្តល់ដំណឹងឲ្យគ្នាទៅវិញទៅមក។ ពោលគឺវាជាទម្រង់នៃការសហការគ្នាដោយប្រយោល។
លោកស្រី Stephanie Pezard អ្នកវិភាគនៅ RAND Corporation បានលើកឡើងថា រុស្ស៊ី និងចិន ទាំង២នេះ មានសមត្ថភាពវាយប្រហារ តាមប្រព័ន្ធបណ្តាញបច្ចេកវិទ្យាដូចគ្នា។ វាជាទម្រង់មួយនៃសង្គ្រាមលាក់មុខ ដែលអាមេរិក ត្រូវតែប្រុងប្រយ័ត្នបំផុត។ បន្ថែមពីនេះទៀត រុស្ស៊ី និងចិន អាចនឹងពួតកម្លាំងគ្នា ប្រើប្រាស់ឥទ្ធិពលនៅតាមស្ថាប័នអន្តរជាតិធំៗ ដើម្បីរារាំងកុំឲ្យអាមេរិក អាចធ្វើអ្វីបានតាមចិត្ត។ មានសត្រូវដល់ទៅ២ក្នុងពេលតែមួយ អាមេរិក អាចត្រូវបង្ខំចិត្តចែករំលែកកម្លាំង ដែលអាចធ្វើឲ្យទន់ខ្សោយខ្លះ។ ហើយបើអាមេរិក លែងចង់ប្រកួត ចង់ដកថយពីឆាកអន្តរជាតិ ងាកទៅសំងំក្នុងផ្ទះ គិតគូរតែបញ្ហាផ្ទៃក្នុងវិញ នោះគឺចិន និងរុស្ស៊ី ប្រាកដជាឈានជើងទៅមុខកាន់តែឆ្ងាយ ដើម្បីពង្រីកឥទ្ធិពល លើឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ