ឥណ្ឌូណេស៊ីពង្រឹងដៃគូយោធាជាមួយបារាំងដោយទិញយន្តហោះចម្បាំងបារាំងចំនួន ៤២គ្រឿង
ចុះផ្សាយនៅថ្ងៃ៖
ស្តាប់ - ០៦:០៦
នៅថ្ងៃព្រហស្បតិ៍ ទី១០ កុម្ភៈ ប្រទេសឥណ្ឌូណេស៊ីបានចុះកិច្ចសន្យាទិញយន្តហោះចម្បាំងបារាំងរ៉ាហ្វាល់ (Rafal) ចំនួន ៤២គ្រឿង។ ពិធីចុះហត្ថលេខានេះបានធ្វើឡើងរវាងរដ្ឋមន្រ្តីក្រសួងការពារបារាំងលោកស្រីហ្លូរ៉ង់ ប៉ាលី និងសមភាគីឥណ្ឌូណេស៊ីលោកប្រាបូវ៉ូ ស៊ូប៊ីយ៉ង់តូក្នុងទីក្រុងហ្សាការតា។ លោកអេរិច ត្រាព្ជេ ប្រធានក្រុមហ៊ុនបារាំងដាស់សូ (Dassault) បានពន្យល់ថា ការបង់លុយ និងការប្រគល់យន្តហោះនឹងត្រូវធ្វើឡើងជាពីរដំណាក់ការ។ គួរបញ្ជាក់ថា នេះជាលើកទី១ ដែលឥណ្ឌូណេស៊ីបានកម្ម៉ង់ទិញយន្តហោះចម្បាំងរ៉ាហ្វាល់របស់បារាំង។
មានហេតុផលសំខាន់ចំនួន ៣ ដែលឥណ្ឌូណេស៊ីបានសម្រេចចិត្តបំពាក់យន្តហោះចម្បាំងរ៉ាហ្វាល់របស់បារាំង ទី១ គឺមកពីឥណ្ឌូណេស៊ីត្រូវការប្តូរយន្តហោះចម្បាំងចាស់ៗរបស់ខ្លួនចេញ ទី២ គឺមកពីឥណ្ឌូណេស៊ីចង់បំពាក់គ្រឿងសព្វាវុធរបស់ប្រទេសផ្សេងក្រៅពីប្រទេសដែលខ្លួនបានធ្លាប់បានទិញកន្លងមក ពិសេសយន្តហោះចម្បាំង និងទី៣ គឺមកពីឥណ្ឌូណេស៊ីបានសំឡឹងឃើញពីប្រសិទ្ធិភាព គុណភាព និងបច្ចេកវិទ្យារបស់យន្តហោះចម្បាំងបារាំងរ៉ាហ្វាល់។ គួរបញ្ជាក់ថាសព្វថ្ងៃនេះ ឥណ្ឌូណេស៊ីមានយន្តហោះចម្បាំងអាមេរិកប្រភេទ F១៦ ប្រមាណជា ៣០គ្រឿង និងយន្តហោះចម្បាំងរុស្ស៊ីប្រភេទ Su២៧ និង Su៣០ ប្រមាណជា ១៥គ្រឿង។
តែយន្តហោះទាំងអស់នេះសុទ្ធតែចាស់ៗដែលឥណ្ឌូណេស៊ីត្រូវប្តូរថ្មី។ តាមពិតទៅ ឥណ្ឌូណេស៊ីបាន និងកំពុងបន្តចរចាជាមួយប្រទេសដៃគូជាច្រើនដើម្បីបំពាក់យន្តហោះចម្បាំងថ្មីៗឲ្យទ័ពអាកាសរបស់ខ្លួន។ ជាមួយបារាំង ពិធីចុះហត្ថលេខាទិញយន្តហោះចម្បាំងរ៉ាហ្វាល់ចំនួន ៤២គ្រឿងក្នុងទឹកប្រាក់ជាង ៨ ០០០លានដុល្លារបានធ្វើឡើងនៅក្នុងក្របខណ្ឌនៃកិច្ចព្រមព្រៀងសហប្រតិបត្តិការក្នុងវិស័យការពាររវាងបារាំង និងឥណ្ឌូណេស៊ីដែលបានចុះហត្ថលេខារវាងរដ្ឋមន្រ្តីការពារជាតិក្នុងក្រុងប៉ារីសកាលពីឆ្នាំ ២០២១។ ក្រៅពីបារាំង ឥណ្ឌូណេស៊ីក៏កំពុងបន្តចរចាទិញយន្តហោះចម្បាំងអាមេរិកប្រភេទ F១៥ និងយន្តហោះចម្បាំងកូរ៉េខាងត្បូងប្រភេទ KF-២១។
ពិតណាស់រហូតមកដល់ពេលនេះ ឥណ្ឌូណេស៊ីមិនដែលទិញយន្តហោះចម្បាំងបារាំងមែន។ តែគេមិនត្រូវភ្លេចបញ្ជាក់ទេថា ឥណ្ឌូណេស៊ីក៏ជាអតិថិជនម្នាក់នៃវិស័យការពារអឺរ៉ុប។ ជាក់ស្តែងក្នុងខែវិច្ឆិកាកន្លងទៅ ឥណ្ឌូណេស៊ីបានកម្ម៉ង់ទិញពីក្រុមហ៊ុន Airbus នូវយន្តហោះដឹកទ័ពប្រភេទ A៤០០M ចំនួន ២គ្រឿង និងមានបំណងចង់ទិញថែមចំនួន ៤គ្រឿងទៀត។
ហេតុផលដែលឥណ្ឌូណេស៊ីបំពាក់យន្តហោះចម្បាំងថ្មី
ឥណ្ឌូណេស៊ីជាប្រទេសធំជាងគេនៅអាស៊ីអាគ្នេយ៍ និងអាចជាប្រទេសធំលំដាប់ទី២ នៅអាស៊ីប៉ាស៊ីហ្វិក។ គេអាចនិយាយបានជារួមថា វាជារឿងចាំបាច់ដែលឥណ្ឌូណេស៊ីត្រូវបំពាក់យន្តហោះចម្បាំងថ្មី ព្រោះទី១ យន្តហោះចម្បាំងដែលឥណ្ឌូណេស៊ីកំពុងមានក្នុងដៃសព្វថ្ងៃច្រើនជាយន្តហោះចាស់ៗ និងទី២ គឺមកពីអាស៊ីប៉ាស៊ីហ្វិកកំពុងបន្តក្លាយជាតំបន់នៃការប្រជែងកម្លាំងរវាងប្រទេសផ្សេង ពិសេសរវាងចិន និងអាមេរិក។ តាមរដ្ឋមន្រ្តីការពារជាតិឥណ្ឌូណេស៊ីលោកប្រូបូវ៉ូ ស៊ូប៊ីយ៉ង់តូ កិច្ចសហប្រតិបត្តិការរវាងឥណ្ឌូណេស៊ី និងបារាំងក៏មាននៅក្នុងវិស័យការពារផ្លូវទឹកដោយឥណ្ឌូណេស៊ីគ្រោងទិញនាវាមុជទឹកបារាំងចំនួន ២គ្រឿង។
ទាក់ទងនឹងខាងបារាំងវិញ គឺចំណេញទាំងសេដ្ឋកិច្ច និងឥទ្ធិពល ព្រោះចូរកុំភ្លេចថា បារាំងក៏ជាប្រទេសមួយដែលកំពុងសំឡឹងមើលតំបន់អាស៊ីប៉ាស៊ីហ្វិកដែរ។ ក្រៅពីឥណ្ឌូណេស៊ី បារាំងក៏ចង់ពង្រឹងសម្ព័ន្ធភាពជាមួយក្រុមប្រទេសអតីតដៃគូ ដូចជាជប៉ុន និងឥណ្ឌា រួមទាំងប្រទេសដៃគូអាស៊ីផ្សេងទៀត។ លើសពីនេះ គេអាចនិយាយបានថា កិច្ចសន្យាទិញយន្តហោះចម្បាំងបារាំងរ៉ាហ្វាល់ពីឥណ្ឌូណេស៊ីពេលនេះជាកាដូយុទ្ធសាស្រ្តមហាសាលសម្រាប់បារាំង បន្ទាប់ពីអូស្រា្តលីបានលុបចោលកិច្ចសន្យាទិញនាវាមុជទឹកបារាំង និងងាកទៅទិញនាវាមុជទឹកអាមេរិកវិញកាលពីឆ្នាំ ២០២១។ ក្រោយការលុបចោល អូស្រ្តាលីក៏បានប្រកាសចូលរួមនៅក្នុងសម្ព័នមិត្ត AUKUS ជាមួយអាមេរិក និងអង់គ្លេស។
ជោគជ័យសម្រាប់យន្តហោះចម្បាំងបារាំងរ៉ាហ្វាល់
បើគេនិយាយពីជោគជ័យ និងប្រយោជន៍យុទ្ធសាស្រ្តដែលបារាំងទទួលបាន គេក៏មិនអាចមិននិយាយពីជោគជ័យរបស់យន្តហោះចម្បាំងរ៉ាហ្វាល់បានដែរ ព្រោះថា គឺទើបតែក្នុងរយៈពេលប៉ុន្មានឆ្នាំចុងក្រោយនេះដែលយន្តហោះចម្បាំងបារាំងរ៉ាហ្វាល់ត្រូវបានទទួលស្គាល់ និងត្រូវបានលក់កាន់តែច្រើនទៅបរទេស។ បើគិតតាំងពីឆ្នាំ ២០១៥ កិច្ចសន្យាទិញពីឥណ្ឌូណេស៊ីចំនួន ៤២គ្រឿងជាកិច្ចសន្យាធំទី៧ បន្ទាប់ពីការលក់ឲ្យប្រទេសអេមីរ៉ាតអារ៉ាប់រួមចំនួន ៨០គ្រឿង លក់ឲ្យប្រទេសអេហ្ស៊ីបចំនួន ៣០គ្រឿង លក់ឲ្យប្រទេសក្រិកចំនួន ១៨គ្រឿង ក្នុងនោះមានជំនំចំនួន ១២គ្រឿង និងលក់ឲ្យប្រទេសក្រូអាស៊ីចំនួន ១២គ្រឿងដែលជំនំទាំងអស់។
បើសរុបជាមួយនឹងការទិញចំនួន ៤២គ្រឿងពីឥណ្ឌូណេស៊ីពេលនេះ ក្រុមហ៊ុនដាស់សូលក់បានយន្តហោះចម្បាំងរ៉ាហ្វាល់ទៅបរទេសចំនួន ២៧៩គ្រឿង ក្នុងនោះមានថ្មីចំនួន ២៥៥គ្រឿង។ ក្រៅពីនេះ គេត្រូវបូកបញ្ចូលការលក់ក្នុងស្រុកចំនួនជិត ២០០គ្រឿងទៅឲ្យក្រសួងការពារជាតិបារាំង។ សរុបមកទល់ពេលនេះ ក្រុមហ៊ុនដាស់សូលក់បានយន្តហោះចម្បាំងបារាំងរ៉ាហ្វាល់របស់ខ្លួនចំនួន ៤៧១គ្រឿង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ