កិច្ចប្រជុំសម្ព័ន្ធចតុភាគី « Quad » ពង្រឹងសម្ព័ន្ធភាពដើម្បីទប់ទល់ជាមួយចិន នៅតំបន់ឥណ្ឌូប៉ាស៊ីហ្វិក
ចុះផ្សាយនៅថ្ងៃ៖
ស្តាប់ - ០៦:២៤
រដ្ឋមន្ត្រីការបរទេស នៃមហាអំណាចបួននៅតំបន់ឥណ្ឌូប៉ាស៊ីហ្វិក គឺមានសហរដ្ឋអាមេរិក អូស្ត្រាលី ឥណ្ឌា និង ជប៉ុន បានជួបប្រជុំគ្នានៅថ្ងៃនេះ នៅទីក្រុងមែលប៊ន ប្រទេសអូស្ត្រាលី។ វាគឺជាកិច្ចប្រជុំ ក្នុងក្របខណ្ឌសម្ព័ន្ធចតុភាគី « Quad » ដែលគ្រប់គ្នាដឹងយ៉ាងច្បាស់ ថាជាសម្ព័ន្ធភាព ដែលអាមេរិកបានផ្តួចផ្តើមឡើង ដើម្បីប្រជែងឥទ្ធិពលជាមួយនឹងចិន នៅក្នុងតំបន់ឥណ្ឌូប៉ាស៊ីហ្វិកនេះ។ ថ្វីបើក្នុងអំឡុងពេលនេះពិភពលោក សហរដ្ឋអាមេរិក កំពុងតែមមាញឹក ដោះស្រាយសំណុំរឿង រុស្ស៊ី-អ៊ុយក្រែន ដែលតានតឹងខ្លាំង តែមិនមែនមានន័យថា អាមេរិកព្រលែងចិនចោលនោះទេ។
ឥណ្ឌូប៉ាស៊ីហ្វិក ជាស្នូលនៃយុទ្ធសាស្ត្រការបរទេសអាេមរិក
ជាការពិតណាស់ ទោះសំណុំរឿង លទ្ធភាពនៃការផ្ទុះសង្គ្រាមជាមួយរុស្ស៊ី នៅអឺរ៉ុប វាសំខាន់និងបន្ទាន់កម្រិតណា តែសម្រាប់អាមេរិក ចិននៅតែគូប្រជែងយុទ្ធសាស្ត្រ ដែលមិនអាចព្រលែងចោលបានទេ។ មុនពេលឡើងយន្តហោះ ឆ្ពោះមកទីក្រុងមែលប៊ន លោក អង់តូនី ប្លីងកិន បានថ្លែងទៅកាន់អ្នកកាសែតថា តំបន់ឥណ្ឌូប៉ាស៊ីហ្វិក គឺជាស្នូលនៃយុទ្ធសាស្ត្រការបរទេសអាមេរិក។
លោកបានទទួលស្គាល់ថា រុស្ស៊ីពិតជាអាចឈ្លានពានអ៊ុយក្រែន និងបង្កសង្រ្គាមនៅអឺរ៉ុបខាងកើតមែន។ ក៏ប៉ុន្តែពិភពលោកធំណាស់ ហើយដែលអាមេរិកត្រូវតែមានវត្តមាន ការពារផលប្រយោជន៍រួមគ្រប់កន្លែង។ សម្រាប់តំបន់ឥណ្ឌូប៉ាស៊ីហ្វិក គ្រប់គ្នាពិតជាដឹងហើយ ថាវាមានសារៈសំខាន់ កម្រិតណាស់ សម្រាប់អាមេរិក។
ឆ្លើយនៅក្នុងបទសម្ភាសន៍ ឲ្យកាសែត The Australian កាលពីថ្ងៃព្រហស្បតិ៍ទី១០កុម្ភៈ លោកអង់តូនី ប្លីងកិន បានសង្កត់ធ្ងន់ថា ថ្វីបើពេលនេះអាមេរិកផ្តោតការយកចិត្តទុកដាក់ និងដោះស្រាយបញ្ហាបន្ទាន់ជាមួយរុស្ស៊ីក៏ដោយ តែសំណុំក្នុងរយៈពេលវែងទៅមុខ គឺសំណុំរឿងចិន ការវាទទីទាំងសេដ្ឋកិច្ច និងយោធារបស់ចិន។ បញ្ហានេះ វាកំពុងតែធ្វើឲ្យខូចសណ្តាប់ធ្នាប់ពិភពលោកយើង។ លោកបានបន្ថែមថា តាមដែលលោកគិត គឺចិនមានមហិច្ឆិតាចង់ធ្វើមហាអំណាចទីមួយតែម្តង តាំងផ្នែកកម្លាំងទ័ពសព្វាវុធ ផ្នែកសេដ្ឋកិច្ច និងនយោបាយការទូត ហើយមិនមែនតែនៅក្នុងតំបន់ឥណ្ឌូប៉ាស៊ីហ្វិកទេ គឺទូទាំងពិភពលោកតែម្តង។
មហាអំណាចប្រជាធិបតេយ្យ រួមគ្នាទប់ទល់ជាមួយមហាអំណាចផ្តាច់ការ
ទោះបីក្នុងពេលប្រជុំគ្នា គេមិននិយាយលើកឈ្មោះចិនឲ្យចំៗ តែគឺវានៅក្នុងន័យនេះទៅហើយ។ នៅក្នុងពេលបើកការប្រជុំនៅព្រឹកនេះ លោកនាយករដ្ឋមន្ត្រីអូស្ត្រាលី ស្កុត ម៉ូរីសុន បានថ្លែងអំពីសារៈសំខាន់ នៃកិច្ចប្រជុំរបស់សម្ព័ន្ធចតុភាគីនេះ ដើម្បីបង្កើតចំណងសហប្រតិបត្តិការរវាងប្រទេសប្រជាធិបតេយ្យ ដែលមានគំនិតយល់ឃើញ និងឧត្តមគតិដូចគ្នា។ សម្តីប៉ុណ្ណេះ គឺយើងអាចកាត់យល់បានទៅហើយ បានសំដៅទៅដល់ចិន ដែលជាប្រទេសមានរបបផ្តាច់ការ គ្មានប្រជាធិបតេយ្យ។
លោកស្កុត ម៉ូរីសិន លើកឡើងថា ពិភពលោកយើងបច្ចុប្បន្ននេះ គឺងាយប្រឈមគ្រោះថ្នាក់ ងាយបែកបាក់ ហើយពោរពេញដោយជម្លោះវិវាទ។ តែលោកអះអាងថា អូស្ត្រាលី នឹងប្រឆាំងតទល់ ជាមួយអ្នកដែលចង់មកដាក់ឧបសគ្គ ធ្វើបាបអីស្ត្រាលី។ លោកបន្ថែមថា អូស្ត្រាលីមានការកក់ក្តៅណាស់ ដែលសមភាគីទាំង៣ប្រទេសទៀត បានយល់ការពិត ថាអូស្ត្រាលីបានរងសំពាធកម្រិតណា នាពេលកន្លងមកនេះ។ សំពាធនេះ គឺសំពាធការទូត និងពាណិជ្ជកម្ម ដែលអូស្ត្រាលី មានជាមួយចិននេះឯង។
យ៉ាងណាមិញ កាលពីខែមករាកន្លងទៅ លោក Yoshimasa Hayashi រដ្ឋមន្ត្រីការបទេសជប៉ុន បានថ្លែងពន្យល់ទៅកាន់សភាជប៉ុនថា សម្ព័ន្ធភាពចតុភាគីនេះ គឺវានឹងអនុញ្ញាត ឲ្យពង្រឹងសណ្តាប់ធ្នាប់ដែលឈរលើសិទ្ធិសេរីភាព បើកចំហ ហើយផ្អែកលើច្បាប់អន្តរជាតិជាធំ សម្រាប់តំបន់ឥណ្ឌូប៉ាស៊ីហ្វិកទាំងមូល។ សិទ្ធិសេរីភាពផ្អែកលើច្បាប់អន្តរជាតិនេះ សំដៅចំតែម្តងទៅចិន ដែលជាជប៉ុនគិតថាមហាអំណាច ប្រើឥទ្ធិពលវាទទីក្នុងតំបន់ ដោយគ្មានគោរពសិទ្ធិ ក៏ដូចជាផលប្រយោជន៍របស់អ្នកផ្សេង។
Soft Power
យើងសង្កេតឃើញថា បន្តិចម្តងៗ សម្ព័ន្ធចតុភាគីនេះ មានទម្រង់ជាសម្ព័ន្ធភាពយោធា រវាងអាមេរិក អូស្ត្រាលី ជប៉ុន និងឥណ្ឌា។ ទម្រង់ដែលបានស្តែងចេញ តាមរយៈការធ្វើសមយុទ្ធរួមគ្នា កាលពីឆ្នាំ២០២០ នៅក្នុងមហាសមុទ្រឥណ្ឌា។
ក៏ប៉ុន្តែទន្ទឹមគ្នានេះ សម្ព័ន្ធចតុភាគីនេះ មានកម្មវត្ថុរួមពង្រឹកកម្លាំងគ្នា បង្កើតជាបណ្តុំមហាអំណាចទន់ ឬដែលយើងហៅថា « Soft Power » ដើម្បីប្រជែងជាមួយចិន នៅក្នុងតំបន់ឥណ្ឌូប៉ាស៊ីហ្វិកនេះ។ ពោលគឺជាប្រមូលផ្តុំគ្នា ពង្រីកឥទ្ធិពល ឲ្យប្រទេសនៅក្នុងតំបន់នេះទាំងមូល មានជម្រើស ថា រវាងមហាអំណាចផ្តាច់ការដូចជាចិន និងមហាអំណាចសេរីប្រជាធិបតេយ្យ រើសយកខាងណា។
ជាក់ស្តែង លោកស្រី Marise Payne រដ្ឋមន្ត្រីការបរទេសអូស្រ្តាលី បានថ្លែងមុនពេលបើកកិច្ចប្រជុំថា ក្រុមប្រទេសធំៗទាំង៤នេះ នឹងរួមគ្នាបង្កើតជា បណ្តាញប្រជាធិបតេយ្យសេរី ដែលសន្យាសហប្រតិបត្តិការជួយជាក់ស្តែង ដល់ប្រទេសទាំងអស់ក្នុងតំបន់ឥណ្ឌូប៉ាស៊ីហ្វិក មិនថាធំមិនថាតូច ដើម្បីឲ្យប្រទេសនីមួយៗ មានកម្លាំងមានសិទ្ធិអាចសម្រេចកិច្ចការយុទ្ធសាស្ត្រផ្សេងៗ ដោយឈរលើភាពម្ចាស់ការ។
ជាមួយនឹងវិបត្តិកូវីដ សម្ព័ន្ធចតុភាគីនេះ បានរួមគ្នាសន្យាប្រមូលវ៉ាក់សាំងចំនួន ១៣០០លានដូស ដើម្បីជួយប្រទេសតូចតាចក្នុងតំបន់ ដែលក្នុងនោះ ប្រមាណ៥០០លានដូស ត្រូវបានគេចែកចាយរួចហើយ។ សម្រាប់កិច្ចប្រជុំលើកទី៤ នៅពេលនេះ គឺមានសំណុំរឿងធំៗមួយចំនួន ដែលគេនឹងលើកមកនិយាយគ្នា តួយ៉ាង ផ្នែកដឹកជញ្ជូនផ្លូវសមុទ្រដែលមិនបញ្ចេញឧស្ម័នពុល ការប្រយុទ្ធប្រឆាំងនឹងការកើនឡើងកំដៅផែនដី ព្រមទាំងការរៀបចំ ពង្រឹងសុវត្ថិភាពផ្នែកបច្ចេកវិទ្យាអ៊ីនធ័រនិតជាដើម ដើម្បីប្រឈមជាមួយនឹងការវាយប្រហារណាមួយ។ ទាក់ទិននឹងបញ្ហាបច្ចេកវិទ្យានេះ ដូចយើងដឹងហើយ គឺទាំងអូស្ត្រាលី ទាំងអាមេរិក ប្រឆាំងដាច់ខាត មិនប្រើបច្ចេកវិទ្យា5G របស់ចិនទេ។ កិច្ចប្រជុំនៅថ្ងៃនេះ ក៏ជាជំហានរៀបចំជំនួបកំពូល រវាងមេដឹកនាំទាំង៤ប្រទេសដែរ ដែលគេគ្រោងធ្វើ ប្រហែលនៅខែឧសភាខាងមុខ នៅប្រទេសជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ