ការផ្ទុះអាវុធជាបន្តបន្ទាប់ នៅខាងកើតអ៊ុយក្រែន នឹងបើកផ្លូវឲ្យរុស្ស៊ីមានលេសវាយប្រហារអ៊ុយក្រែន?
ចុះផ្សាយនៅថ្ងៃ៖
ស្តាប់ - ០៧:០១
សំណុំរឿងអ៊ុយក្រែន កាន់តែក្តៅគគុកឡើង ក្រោយការផ្ទុះអាវុធកាន់តែខ្លាំងទៅៗ រវាងក្រុមឧទ្ទាមបំបែកទឹកដីភាគខាងកើត និងកងទ័ពជាតិអ៊ុយក្រែន។ គិតត្រឹមថ្ងៃសៅរ៍ទី ១៩កុម្ភៈនេះ មានទាហានអ៊ុយក្រែនម្នាក់បានស្លាប់។ ហើយកាលពីថ្ងៃសុក្រ ការបាញ់ប្លោងបានបណ្តាលឲ្យផ្ទុះបណ្តាញបំពងបង្ហូរឧស្ម័ន នៅទីក្រុងលូហ្កាន់ ហើយប្រជាជនជាច្រើនពាន់នាក់នៅតំបន់នោះ បានភៀសខ្លួនទៅកាន់ទឹកដីរុស្ស៊ី។ ហើយនៅព្រឹកថ្ងៃសៅរ៍នេះ មេដឹកនាំតំបន់ផ្តាច់ខ្លួនទាំង២ នៅភាគខាងកើតអ៊ុយក្រែន បានប្រកាស ប្រមូលកម្លាំងទ័ពជាទូទៅ ដើម្បីត្រៀមប្រយុទ្ធជាមួយអ៊ុយក្រែន។ ចំណែក លោក ចូ បៃដិនវិញ បានលើកឡើងថាលោកជឿជាក់ ថាលោក ពូទីន ប្រាកដជានឹង ប្រើកម្លាំងទ័ព វាយប្រហារអ៊ុយក្រែន ក្នុងពេលឆាប់ៗនេះ។
ផ្ទុះអាវុធ កេណ្ឌទ័ព ជម្លៀសប្រជាជន
ការពិតទៅ ការផ្ទុះអាវុធ រប៉េះរប៉ោះ បំពាននឹងបទឈប់បាញ់ ខែកក្កដាឆ្នាំ២០២០ តែងតែមានជារឿយៗ បន្តិចបន្តួច នៅតាមខ្សែព្រំដែន រវាងអ៊ុយក្រែន និងតំបន់ផ្តាច់ខ្លួនទាំង២ គឺដែនដីដូណេត និងដែនដីលូហ្កាន់។ តែយ៉ាងណា យោងតាមអង្គការ OSCE គឺការផ្ទុះអាវុធ បាញ់ប្លោងដាក់គ្នា បានកើនឡើង ខ្លាំងសម្បើមណាស់ នាប្រមាណ២-៣ ថ្ងៃមកនេះ។ ការផ្ទុះអាវុធនេះ គឺមានរាប់ទាំង ការបាញ់ប្លោងគ្រាប់កាំភ្លើងធំ ជាច្រើនរយគ្រាប់ ដោយភាគីទាំងសងខាង ចោទគ្នាទៅវិញទៅមក ថាជាអ្នករករឿងមុន។
យោងតាមក្រសួងការពារជាតិអ៊ុយក្រែន គិតត្រឹមថ្ងៃសៅរ៍នេះ គឺមានទាហានអ៊ុយក្រែនស្លាប់ម្នាក់ នៅសមរភូមិខាងកើត។ នៅតំបន់ផ្តាច់ខ្លួនលូហ្កាន់ កាលពីថ្ងៃសុក្រម្សិលមិញ គ្រាប់កាំភ្លើងធំបានធ្លាក់ទៅលើសាលាបឋមសិក្សាមួយកន្លែង ហើយគ្រាប់ផ្សេងទៀត បានធ្លាក់ធ្វើឲ្យផ្ទុះបណ្តាញបំពង់បង្ហូរឧស្ម័នរុស្ស៊ី។
មេដឹកនាំតំបន់ផ្តាច់ខ្លួនទាំង២ បានប្រកាសជន្លៀសប្រជាជនប្រមាណ៧សែននាក់ ចូលទៅខាងទឹកដីរុស្ស៊ី ដោយបានអះអាងថា អ៊ុយក្រែននឹងបើកការវាយប្រហារ ក្នុងពេលឆាប់ៗនេះហើយ។ ហើយនៅព្រឹកថ្ងៃសៅរ៍នេះ មេដឹកនាំតំបន់ផ្តាច់ខ្លួនដែលកាន់ជើងរុស្ស៊ីនេះ បានប្រកាសប្រមូល កេណ្ឌកម្លាំងទ័ព ហៅឲ្យប្រជាជនដែលគ្រប់អាយុ មានកម្លាំង ត្រូវស្ម័គ្រចិត្ត កាន់អាវុធ ដើម្បីត្រៀមប្រយុទ្ធការពារដែនដី កុំឲ្យអ៊ុយក្រែនចូលឈ្លានពានបាន។
លេសដើម្បីបើកការវាយប្រហារលើអ៊ុយក្រែន
ការផ្ទុះអាវុធនៅភាគខាងកើតអ៊ុយក្រែន ក្នុងតំបន់របស់ពួកឧទ្ទាមនេះ វាអាចជាជំហានដំបូង ដែលនឹងបើកផ្លូវ ឲ្យរុស្ស៊ីមានហេតុផល ដើម្បីប្រើកម្លាំងវាយប្រហារអ៊ុយក្រែន។ មន្ត្រីក្រសួងការពារជាតិអាមេរិកម្នាក់ បានអះអាងថា ភាពចលាចល ការផ្ទុះអាវុធ និងការជន្លៀសមនុស្ស ចេញពីតំបន់ផ្តាច់ខ្លួនភាគខាងកើតនាពេលនេះ គឺជាយុទ្ធសាស្រ្តរបស់រុស្ស៊ីទាំងស្រុង ដើម្បីបង្កើតបញ្ហា ឲ្យឃើញថាអ៊ុយក្រែនជាអ្នករករឿងមុន។
ក្រសួងការពារជាតិអាមេរិកអះអាងថា បច្ចុប្បន្ននេះ បើរាប់ទាំងកម្លាំងរបស់ក្រុមឧទ្ទាមបំបែកទឹកដីផង គឺរុស្ស៊ីមានកម្លាំងទ័ពប្រមាណ ១៩ម៉ឺននាក់ ឡោមព័ទ្ធអ៊ុយក្រែន ពីជើងរហូតដល់ត្បូងតែម្តង។ នេះគឺជាចំនួនទ័ពដ៏ច្រើនបំផុត បើគិតពីក្រោយសង្គ្រាមត្រជាក់មក។ ប្រភពដដែលនេះ អះអាងថាកម្លាំងទាហានរុស្ស៊ី ចំនួន ពី ៤០% ទៅ ៥០% កំពុងស្ថិតនៅក្នុងភាពបម្រុង ដើម្បីបើកការប្រយុទ្ធ រួចទៅហើយ។
យ៉ាងណាមិញ នៅថ្ងៃសៅរ៍នេះ លោកពូទីន កំពុងដឹកនាំការធ្វើសមយុទ្ធយោធា ទ្រង់ទ្រាយធំណាស់ ជាមួយប្រធានាធិបតីបេឡារុស។ ជាសមយុទ្ធ ដែលរុស្ស៊ីបញ្ចេញគ្រប់គ្រឿងសព្វាវុធតែម្តង តែផ្លូវគោក ផ្លូវទឹក ផ្លូវអាកាស នាវាមុជទឹកបាតសមុទ្រ នាវាចម្បាំង យន្តហោះទម្លាក់គ្រាប់បែក នឹងមានទាំងប្រើមីស៊ីលបាលីស្ទីក អាចផ្ទុកក្បាលគ្រាប់នុយក្លេអ៊ែរ ថែមទៀតផង។ ទោះបីក្រសួងការពារជាតិរុស្ស៊ី អះអាងថា នេះជាការធ្វើសមយុទ្ធធម្មតាៗក៏ដោយ តែក្នុងបរិបទបែបនេះ គឺមិនអាចមិនធ្វើឲ្យគេគិត ថាវាការត្រៀមកម្លាំងវាយប្រហារអ៊ុយក្រែននោះទេ។
លោក Lloyd Austin រដ្ឋមន្ត្រីការពារជាតិអាមេរិក បានលើកឡើង តាមកញ្ចក់ទូរទស្សន៍ ABC ថាលោកពូទីន កំពុងតែរំកិលកូនអុកកាន់តែច្រើនហើយ ដែលចាំបាច់សម្រាប់បើកការវាយប្រហារឈ្លានពានអ៊ុយក្រែន។ លោកថា នេះមិនមែនជាការកំញើញ បំភ័យត្រឹមតែរូបភាពនោះទេ តែគឺរុស្ស៊ីអាចនឹងវាយប្រហារពិតប្រាកដមែន។ យ៉ាងណាមិញ កាលពីថ្ងៃសុក្រុម្សិលមិញ លោកចូ បៃដិន ក៏បានអះអាងដែរ ថា លោកជឿជាក់ លោកពូទីន បានសម្រេចចិត្តរួចទៅហើយ ថានឹងឈ្លានពានអ៊ុយក្រែន។ តែយ៉ាងណា លោក ចូបៃដិន អះអាងថា ដរាបណា មិនទាន់មានការវាយប្រហារជាក់ស្តែងទេ គឺលោកនៅតែផ្តល់អាទិភាព ដល់ដំណោះស្រាយចរចាផ្នែកការទូត។
ដំណោះស្រាយការទូត កាន់តែថយពន្លឺសង្ឃឹម
ទោះសង្ឃឹមតិចស្តួចស្តើងប៉ុណ្ណា ក៏គេចាំបាច់ត្រូវតែប្រឹងប្រែងផ្តល់អាទិភាពដល់ការចរចាដែរ ដើម្បីបញ្ចៀសការផ្ទុះអាវុធ។ លោក ចូ បៃដិន បានអះអាងថា នៅថ្ងៃព្រហស្បតិ៍ក្រោយ លោករដ្ឋមន្ត្រីការបរទេសអាមេរិក អង់តូនី ប្លីងកិន នឹងជួបប្រជុំជាមួយ លោករដ្ឋមន្ត្រីការបរទេសរុស្ស៊ី ម្តងទៀត។ ចំណែកនៅថ្ងៃអាទិត្យស្អែកនេះ លោក ម៉ាក្រុង នឹងទូរស័ព្ទទៅនិយាយជាមួយលោកពូទីន ជាថ្មីម្តងទៀតដែរ។ យោងតាមប្រភពពីក្រសួងការបរទេសបារាំង បើពិនិត្យលើអ្វីដែលរុស្ស៊ីបានទាមទារ មកក្រុមប្រទេសលោកខាងលិច គឺវានៅមានចន្លោះដែល អាចឲ្យគេនិយាយគ្នាបាន ស្តីពីបញ្ហាធានាសន្តិសុខទាំងសងខាង។
តែយ៉ាងណា ក្រុមប្រទេសលោកខាងលិច ក៏ត្រៀមកម្លាំងទប់ទល់ជាមួយរុស្ស៊ីដែរ បើក្នុងករណីការចរចាបរាជ័យទាំងស្រុង។ ថ្លែងនៅក្នុងអង្គសន្និសីទស្តីពីសន្តិសុខនៅក្រុងមុយនីឆ លោករដ្ឋមន្ត្រីការបរទេសបារាំង បានលើកឡើងថា រុស្ស៊ីត្រូវតែបើកចិត្ត ព្រមចរចាដោយស្មោះត្រង់ មិនមែនមាត់ថាចង់ចរចា ហើយទង្វើជាក់ស្តែងធ្វើផ្ទុយនោះទេ។ លោករដ្ឋមន្ត្រីការបរទេសបារាំង អះអាងថា បើក្នុងករណីរុស្ស៊ីឈ្លានពានអ៊ុយក្រែនមែន គឺអឺរ៉ុបនឹងរួមកម្លាំងគ្នា ដាក់ទណ្ឌកម្មលើរុស្ស៊ី ឲ្យធ្ងន់បំផុត។ លោកស្រីប្រធានគណកម្មការអឺរ៉ុប បានគំរាមថា បើរុស្ស៊ីវាយអ៊ុយក្រែមែន នោះទណ្ឌកម្មអឺរ៉ុប ប្រាដកជាវាយបំបាក់ ភាពរីកចម្រើនរបស់រុស្ស៊ី។
កិច្ចប្រជុំនៅក្រុងមុយនីឆ នៅថ្ងៃសៅរ៍នេះ ក៏មានវត្តមានចូលរួម ដោយលោកប្រធានាធិបតីអ៊ុយក្រែន វ្លូឌីមៀរ ហ្សេឡិនស្គី និង លោករដ្ឋាភិបាលអាល្លឺម៉ង់ អូឡាហ្វ ស្ហុល និង លោកស្រីកាម៉ាឡា ហារី អនុប្រធានាធិបតីអាមេរិកដែរ។ តាមការរំពឹងទុក ក្រុមប្រទេសលោកខាងលិច នឹងរួមកម្លាំងគ្នា ជួយអ៊ុយក្រែន ទាំងផ្នែកកម្លាំងកម្លាំង សព្វាវុធ និងថវិកា។ កងទ័ពសម្ព័ន្ធមិត្តអូតង់ ក៏នឹងពង្រឹងបន្ថែមកម្លាំងផងដែរ នៅភាគខាងកើតអឺរ៉ុប ដើម្បីទប់ទល់ជាមួយរុស្ស៊ី។ សេចក្តីសង្ឃឹមចរចា កាន់តែផុតផើយ រីឯរងើកភ្លើងសង្គ្រាម កាន់តែឆាបឆេះ ខ្លាំងឡើងៗហើយ!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ