បារាំងអះអាងថា លោកបៃដិន និងលោកពូទីន យល់ព្រមជួបគ្នា ដើម្បីដោះស្រាយវិបត្តិអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:១៨
កាលពីថ្ងៃអាទិត្យទី២០កុម្ភៈ លោកម៉ាក្រុង ប្រធានាធិបតីបារាំង បានប្រឹងប្រែងស្វែងរកវិធី ដើម្បីបញ្ចៀសសង្គ្រាមនៅអ៊ុយក្រែន។ លោកម៉ាក្រុង បានទូរស័ព្ទទៅនិយាយដោយផ្ទាល់ ជាមួយលោកពូទីន និងលោកចូ បៃដិន។ វិមានប្រធានាធិបតីបារាំង បានឲ្យដឹងនៅក្នុងវេលាយប់ថ្ងៃអាទិត្យឈានចូលថ្ងៃចន្ទ ថា ក្រោយជំនួបតាមទូរស័ព្ទ អស់ជាច្រើនម៉ោងនេះ លោកពូទីន និង លោកចូ បៃដិន បានសុខចិត្ត យល់ព្រមជួបគ្នាមួយទល់នឹងមួយ នៅក្នុងជំនួបកំពូលមួយ ដែលគេនឹងរៀបចំក្នុងពេលឆាប់ៗនេះ។ ដំណឹងនេះ គឺជាពន្លឺនៃក្តីសង្ឃឹមមួយ ដើម្បីស្វែងរកដំណោះស្រោយដោយសន្តិវិធី ក្នុងវិបត្តិអ៊ុយក្រែន។
លោកម៉ាក្រុង ប្រឹងប្រែងបញ្ចុះបញ្ចូលតាមទូរស័ព្ទ
យោងតាមវិមានអេលីហ្សេ គឺលោកម៉ាក្រុង បានអង្គុយចុចទូរស័ព្ទ និយាយជាមួយមេដឹកនាំដែលពាក់ព័ន្ធ សឹងតែពេញមួយយប់ថ្ងៃអាទិត្យ ដើម្បីព្យាយាមរកច្រកចេញ បញ្ចៀសសង្គ្រាមឲ្យបាន។ នៅថ្ងៃអាទិត្យម្សិលមិញនេះ លោកម៉ាក្រុងបានទូរស័ព្ទទៅនិយាយជាមួយលោកពូទីន ហើយបន្ទាប់មក បានទូរស័ព្ទនិយាយជាមួយលោក វ្លូឌីមៀរ ហ្សេឡិនស្គី ប្រធានាធិបតីអ៊ុយក្រែន និង លោកចូ បៃដិនថែមទៀត។ នៅវេលាយប់ដដែលនោះ លោកម៉ាក្រុង បានទូរស័ព្ទ ទៅលោកពូទីនម្តងទៀត ដើម្បីបញ្ជាក់ប្រាប់ពីគោលជំហររបស់ភាគីអាមេរិក។
ជាលទ្ធផលនៃការនិយាយទូរស័ព្ទចរចា បញ្ចុះបញ្ចូលនេះ វិមានប្រធានាធិបតីបារាំង បានប្រកាសនៅវេលាម៉ោងប្រមាណ២ទៀបភ្លឺថា លោក ចូ បៃដិន និង លោកពូទីន បានប្រាប់ទៅលោកម៉ាក្រុង ថាយល់ព្រមសុខចិត្តជួបគ្នាមួយទល់នឹងមួយ នៅក្នុងជំនួបកំពូលមួយ ដែលគេនឹងរៀបចំក្នុងពេលឆាប់ៗនេះ។ ក្រោយការប្រកាសរបស់វិមានប្រធានាធិបតីបារាំងនេះ អ្នកនាំពាក្យសេតវិមានអាមេរិក បានអះអាងថា លោកចូ បៃដិន បានយល់ព្រមជួបជាមួយលោកពូទីនមែន តែមានលក្ខខណ្ឌមួយ គឺថាពីពេលនេះរហូតដល់ថ្ងៃជួបគ្នា គឺរុស្ស៊ី មិនត្រូវបើកការវាយប្រហារទៅលើអ៊ុយក្រែនជាដាច់ខាត។ ពុំនោះទេ នឹងគ្មានជំនួបកំពូលនេះឡើយ។
ដោយឡែក វិមានក្រឹមឡាំងវិញ បានប្រកាសនៅព្រឹកថ្ងៃចន្ទនេះថា សម្រាប់ពេលនេះ វាតក់ក្រហល់ពេកហើយ ដែលត្រូវនិយាយពី ការរៀបចំជំនួបកំពូលរវាងលោកពូទីន និង លោកបៃដិន។ តែយ៉ាងណា នៅក្នុងពេលនិយាយទូរស័ព្ទជាមួយលោកម៉ាក្រុង គឺលោកពូទីន បានបង្ហាញជំហរច្បាស់ ថានឹងបន្តប្រឹងប្រែងរកវិធីចរចាគ្នា។ ដូច្នេះ បើទាំងលោកពូទីន និងលោកចូ បៃដិនគិតថា វាមានប្រយោជន៍ដែលត្រូវជួបគ្នា នោះគេនឹងជួបនិយាយគ្នា។
ជំនួបកំពូលដែលមិនទាន់មានរូបរាង្គ
សម្រាប់ពេលនេះ គឺវាគ្រាន់តែជាការប្រកាសបែបការទូត ថាអាចមានជំនួបកំពូលរវាងលោកពូទីន និងលោកចូ បៃដិន គ្រាន់តែថាពេលណា នៅទីកន្លែងណា គឺគេមិនទាន់ដឹងទេ។ ហើយខ្លឹមសារនៃការនិយាយគ្នា ក៏មិនទាន់ត្រូវបានកំណត់ដែរ។
អ្វីៗនឹងអាចត្រូវបានគូសវាសច្បាស់ នៅថ្ងៃព្រហស្បតិ៍ខាងមុខនេះហើយ ព្រោះជាថ្ងៃដែល ប្រមុខការទូតរុស្ស៊ី និងអាមេរិក គឺលោកស៊ែហ្កី ឡាវរ៉ូវ និងលោកអង់តូនី ប្លីងកិន ត្រូវជួបគ្នា។ តាមការរំពឹងទុក ប្រមុខការទូតទាំងពីរនេះ អាចនឹងនិយាយគ្នា អំពី លទ្ធភាពនៃការរៀបចំជំនួបកំពូល មួយទល់នឹងមួយ រវាងលោកចូ បៃដិន និង លោកពូទីន តួយ៉ាងអំពីកាលបរិច្ឆេទប្រជុំ ទីតាំងប្រជុំ ព្រមទាំងចំណុចធំៗ ដែលមេដឹកនាំទាំង២ ត្រូវនិយាយគ្នា។
ទាក់ទិននឹងខ្លឹមសារនៃចំណុចធំៗនេះ គឺសំខាន់ណាស់ ព្រោះវាជាគន្លិះដែលអាចឈានទៅរកការត្រូវរ៉ូវគ្នាណាមួយ។ ចំណុចធំៗទាំងនោះ មានដូចជា បញ្ហាតំបន់ភាគខាងកើតអ៊ុយក្រែន ដែលគ្រប់គ្រងដោយក្រុមឧទ្ទាមបំបែកទឹកដី គាំទ្រខាងរុស្ស៊ី បញ្ហាសន្តិសុខអឺរ៉ុបទាំងមូល ដែលអូតង់ និង រុស្ស៊ីកំពុងប្រឈមមុខដាក់គ្នា ព្រមទាំងសំណុំរឿងការពង្រីកសមាជិករបស់អូតង់ ទៅកាន់ប្រទេសអឺរ៉ុបខាងកើតផ្សេងទៀត។
រុស្ស៊ីបានទាមទារច្រើនចំណុចណាស់ ជាក់ស្តែង គឺការហាមដាច់ខាត មិនឲ្យអូតង់ទទួលអ៊ុយក្រែន ចូលជាសមាជិក និងហាមអូតង់ ត្រូវឈប់ធ្វើសមយុទ្ធយោធា នៅតាមប្រទេសអតីតកូនចៅសូវៀត ដែលមានព្រំដែនជាប់រុស្ស៊ី ជាដើម។ ដូច្នេះបើពិតជាមានជំនួបកំពូលពិតមែន គឺភាគីអាមេរិក ត្រូវតែពិនិត្យពិចារណា លើការទាមទារទាំងនេះ របស់រុស្ស៊ី ថាអាមេរិកអាចធ្វើសម្បទានអ្វីខ្លះ មិនព្រមលើអ្វីខ្លះ ។ តែបើនៅតែរឹងរៀងៗខ្លួនទេ គឺជំនួបកំពូលនេះ នឹងគ្មានន័យអ្វីឡើយ សង្គ្រាមនៅអ៊ុយក្រែន គឺបានត្រឹមតែបញ្ចៀសមួយរយៈពេលតូចតែប៉ុណ្ណោះ។
ផ្អែកតាមវិមានប្រធានាធិបតីបារាំង នៅក្រោយជំនួបកំពូលទ្វេភាគីរវាងលោកពូទីន និងលោកបៃដិន គឺគេនឹងពង្រីកកម្មវិធីប្រជុំមួយទៀត ឲ្យភាគីពាក់ព័ន្ធផ្សេងទៀតអាចចូលរួមប្រជុំដែរ។ ភាគីពាក់ព័ន្ធទាំងនោះ គឺអាចមានអ៊ុយក្រែន មានអូតង់ មានសហភាពអឺរ៉ុប និងអង្គការ OSCE ជាដើម ។ល។ យ៉ាងណាមិញនៅថ្ងៃចន្ទនេះ រដ្ឋាភិបាលអ៊ុយក្រែន បានសំដែងការអបអរ ដែលពន្លឺនៃការចរចា បានភ្លឺមកវិញខ្លះ។ តែយ៉ាងណា លោក Oleksiy Danilov ប្រធានក្រុមប្រឹក្សាសន្តិសុខជាតិអ៊ុយក្រែន អះអាងថា ជំនួបកំពូលរវាងអាមេរិក និងរុស្ស៊ី នឹងមិនអាចដោះស្រាយអ្វីបានទេ ប្រសិនបើគេមិនរាប់អ៊ុយក្រែន ឲ្យចូលប្រជុំជាមួយទេនោះ។
សង្គ្រាមនៅមិនទាន់ទៅណាឆ្ងាយ
សម្លេងផ្ទុះ គ្រាប់កាំភ្លើង គ្រាប់កាំភ្លើងត្បាល់ បានបន្តផ្ទុះកាន់តែខ្លាំងឡើងៗ នៅតំបន់លូហ្កាន់ និងតំបន់ដូណេត ដែលជាតំបន់ផ្តាច់ខ្លួនទាំង២ នៅភាគខាងកើតអ៊ុយក្រែន។ មេដឹកនាំតំបន់ផ្តាច់ខ្លួននេះ បានអះអាងថាគេបានជន្លៀសមនុស្ស ជាង៥ម៉ឺននាក់ ទៅរកកន្លែងមានសុវត្ថិភាព នៅខាងដីរុស្ស៊ី។ ហើយនៅព្រឹកថ្ងៃចន្ទនេះ ក្រុមឧទ្ទាមបំបែកទឹកដី ដែលជាកូនចៅរុស្ស៊ីនេះ បានអះអាងថា មានប្រជាជនស្លូតត្រង់ចំនួន២នាក់ បានស្លាប់ដោយសារគ្រាប់កាំភ្លើងធំ របស់ទាហានអ៊ុយក្រែន។
តែយ៉ាងណា ខាងអ៊ុយក្រែន គេបានប្រកែក ថាគឺក្រុមឧទ្ទាមខ្លួនឯងទេ ដែលជាអ្នកបង្ករឿង បាញ់បោះតែខ្លួនឯង ធ្វើឲ្យស្លាប់មនុស្ស ដើម្បីរកលេសចោទអ៊ុយក្រែន។ ការជន្លៀសមនុស្សចេញ ធ្វើដូចភ័យផ្អើលឈូរឆនេះទៀតសោត ក៏ជាយុទ្ធសាស្ត្ររបស់រុស្ស៊ីដែរ ដើម្បីចោទថាអ៊ុយក្រែនបង្ករឿង បំពានបទឈប់បាញ់ ដើម្បីបានលេសឈ្លានបានអ៊ុយក្រែនតែប៉ុណ្ណោះ។
ទាក់ទិននឹងបញ្ហា បទឈប់បាញ់នៅភាគខាងកើតអ៊ុយក្រែននេះ អង្គការ OSCE បើកការប្រជុំវិសាមញ្ញមួយ នៅថ្ងៃចន្ទនេះ ព្រោះថាអង្គការនេះ ទាំងអ៊ុយក្រែន ទាំងរុស្ស៊ីក៏ជាសមាជិក ហើយអង្គការនេះមានតួនាទីជាអាជ្ញាកណ្តាល ដោះស្រាយវិបត្តិនៅភាគខាងកើតអ៊ុយក្រែន។
ជារួមមក គឺការបារម្ភ អំពីការឈ្លានពានអ៊ុយក្រែន ពីសំណាក់រុស្ស៊ី គឺនៅតែមានធំដដែលទេ។ ទាហានរុស្ស៊ីប្រមាណ១៥ម៉ឺននាក់ នៅតែព័ទ្ធជុំវិញអ៊ុយក្រែនដដែលទេ។ ជាក់ស្តែង រដ្ឋាភិបាលបេឡារុស បានឲ្យដឹងថា ទាហានរុស្ស៊ី ដែលបានមកធ្វើសមយុទ្ធនៅបេឡារុស ប៉ុន្មានថ្ងៃមុននេះ គឺនឹងនៅបន្តទៀត ព្រោះថា គេគ្រោងរៀបចំការធ្វើសមយុទ្ធផ្សេងទៀត។ ជាងនេះទៀត រដ្ឋាភិបាលអាមេរិក បានអះអាងនៅក្នុងលិខិតមួយ ផ្ញើទៅកាន់ឧត្តមក្រុមប្រឹក្សាសិទ្ធិមនុស្សថា គេមានឯកសារសំងាត់មួយរបស់រុស្ស៊ី ដែលរុស្ស៊ីបានធ្វើតារាងឈ្មោះជនជាតិអ៊ុយក្រែន អ្នកណាដែលត្រូវសម្លាប់ចោល អ្នកណាដែលត្រូវចាប់ដាក់គុក ក្នុងករណីរុស្ស៊ីលើកទ័ពចូលអ៊ុយក្រែន។ ភាគីអាមេរិក អះអាងថាឯកសារនេះ វាបញ្ជាក់យ៉ាងច្បាស់ ថារុស្ស៊ីពិតជាមានផែនការ ចូលឈ្លានពានគ្រប់គ្រងអ៊ុយក្រែនពិតមែន ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ