អ៊ុយក្រែនតស៊ូប្រយុទ្ធទល់នឹងការប៉ុនប៉ងកាន់កាប់ក្រុងគៀវពីសំណាក់រុស្ស៊ី
ចុះផ្សាយនៅថ្ងៃ៖
ស្តាប់ - ០៧:៥៧
ប្រតិបត្តិការសឹករបស់រុស្ស៊ីលើប្រទេសអ៊ុយក្រែនកំពុងបន្តមានយ៉ាងសន្ធឹក។ ចាប់តាំងពីយប់ថ្ងៃសុក្រ ២៥កុម្ភៈម្សិលមិញមក កម្លាំងទ័ពរុស្ស៊ីបានព្យាយាមកាន់កាប់ទីក្រុងគៀវ ហើយការវាយប្រយុទ្ធគ្នារវាងកងទ័ពរុស្ស៊ីនិងអ៊ុយក្រែនក៏ចាប់ផ្ទុះឡើងនៅតាមដងផ្លូវជាច្រើននៃក្រុងគៀវ។ កម្លាំងរុស្ស៊ីកំពុងព្យាយាមទម្លុះតំបន់ការពាររដ្ឋធានីរបស់អ៊ុយក្រែន ប៉ុន្តែមិនបានសម្រេចទេនាពេលនេះ។ ពិភពលោកកំពុងមានការតក់ស្លុតជាខ្លាំងចំពោះស្ថានការណ៍ដ៏ក្តៅគគុកដែលកំពុងកើតមាននៅអ៊ុយក្រែននេះ។ តើសង្គ្រាមនៅអ៊ុយក្រែនវិវត្តដល់ណាហើយ? តើសង្គ្រាមនេះនឹងអូសបន្លាយដល់ពេលណាទៅ?
តើសង្គ្រាមនៅអ៊ុយក្រែនវិវត្តដល់ណាហើយ?
ស្ថានការណ៍នៅក្នុងប្រទេសអ៊ុយក្រែនកំពុងបន្តពុះកញ្ជ្រោលខ្លាំង។ នេះគឺជាវេលាដ៏គួរឲ្យភ័យខ្លាំងបំផុតមួយសម្រាប់ប្រជាជនអ៊ុយក្រែន ហើយពិភពលោកក៏កំពុងមានការតក់ស្លុតនិងកំពុងបើកភ្នែកធំៗដោយបានឃើញប្រទេសមហាអំណាចរុស្ស៊ីវាយឈ្លានពានប្រទេសជិតខាងអឺរ៉ុបជាលើកដំបូងចាប់តាំងពីសង្គ្រាមលោកលើកទី ២មក។
យោងទៅតាមព័ត៌មានចុងក្រោយ កងទ័ពរុស្ស៊ីកំពុងបន្តការវាយប្រហារយ៉ាងសន្ធឹកដើម្បីគ្រប់គ្រងរដ្ឋធានីគៀវរបស់អ៊ុយក្រែន។ ការប្រយុទគ្នារវាងកងទ័ពនៃប្រទេសទាំងពីរ នៅតាមដងផ្លូវជាច្រើនក្នុងទីក្រុងគៀវបានចាប់ផ្ទុះឡើងតាំងពីយប់ថ្ងៃសុក្រម្សិលមិញម្ល៉េះ ពោលនៅប៉ុន្មានម៉ោងក្រោយប្រធានធិបតីអ៊ុយក្រែនហ្សេឡេនស្គី ទាញសញ្ញាអាសន្នពីការប៉ុនប៉ងរបស់ទីក្រុងមូស្គូក្នុងការវាយដណ្តើមយករដ្ឋធានីគៀវឲ្យបាននៅមុនថ្ងៃរះក្នុងថ្ងៃសៅរ៍នេះ។
កាលពីយប់មិញ រុស្ស៊ីក៏បានបើកការវាយប្រហារពីចម្ងាយដោយប្រើមីស៊ីលបាញ់ចេញពីនាវាមុជទឹកសំដៅហេដ្ឋារចនាសម្ព័ន្ធយោធាសំខាន់ៗរបស់អ៊ុយក្រែនដែរ។ នៅព្រឹកថ្ងៃសៅរ៍នេះ ហេតុការណ៍ផ្ទុះ ស្នូរគ្រាប់កាំភ្លើងជាច្រើនត្រូវបានគេរាយការណ៍នៅផ្នែកមួយចំនួននៃទីក្រុងគៀវ ខណៈដែលកងកម្លាំងរុស្ស៊ីកំពុងបន្តការវាយលុករុលចូលកាន់កាប់ទីក្រុងនេះ។
ទោះរងការវាយប្រហារដោយមីស៊ីល និងការបាញ់កាំភ្លើងពេញមួយយប់ក្តី គៀវនៅតែមិនទាន់ធ្លាក់ក្នុងកណ្តាប់ដៃរបស់ទ័ពរុស្ស៊ីនៅឡើយនោះទេ និងបន្តស្ថិតនៅក្រោមការគ្រប់គ្រងរបស់អ៊ុយក្រែនដដែល។ ហើយបើតាមប្រធានាធិបតី វ៉ូឡូឌីមៀរ ហ្សេឡេនស្គី កងទ័ពអ៊ុយក្រែនដែលហានក្លាមិនព្រមចុះចាញ់នោះទេ និងនៅបន្តតស៊ូប្រយុទ្ធរុញច្រានទ័ពរុស្ស៊ីឲ្យបកត្រលប់ក្រោយវិញ។
រដ្ឋមន្ត្រីសុខាភិបាលអ៊ុយក្រែន Viktor Lyashko បានឲ្យដឹងនៅថ្ងៃសៅរ៍នេះដែរថាមានជនស៊ីវិលប្រមាណ ១៩៨នាក់ក្នុងនោះមានកុមារបីនាក់ផងត្រូវបានសម្លាប់ដោយកងកម្លាំងរុស្ស៊ីដែលបើកវាយប្រហារលើអ៊ុយក្រែន។ អ៊ុយក្រែនដែលលោកសង្កត់ធន់ថាជាអ្នកដែលនិយមគាំទ្របស្ចិមលោក។ ក្រៅពីតែពីអ្នកស្លាប់ បើតាមសារដែលរដ្ឋមន្ត្រីសុខាភិបាលអ៊ុយក្រែនបានសរសេរនៅលើហ្វេសប៊ុក មកទល់នឹងពេលនេះ ខាងអ៊ុយក្រែនមានអ្នករងរបួសជាង ១ ១០០ នាក់ក្នុងនោះមានកុមារ៣៣នាក់។
ចំណែកជនភៀសខ្លួនអ៊ុយក្រែនវិញក៏កំពុងកើនឡើងខ្លាំងណាស់ដែរ។ អង្គការសហប្រជាជាតិបានប៉ាន់ស្មានថាមនុស្សជាង ១២ម៉ឺននាក់បានភៀសខ្លួនចេញពីប្រទេសអ៊ុយក្រែនក្នុងរយៈពេល ៤៨ម៉ោងចុងក្រោយនេះ។
អ៊ុយក្រែនតស៊ូប្រឆាំងនឹងការឈ្លានពានរបស់រុស្ស៊ី
នេះគឺជាវេលាក៏លំបាកខ្លាំងណាស់សម្រាប់អ៊ុយក្រែន ពីព្រោះថាអ៊ុយក្រែនដែលតូចនិងខ្សោយ ត្រូវប្រយុទ្ធតតាំងតែឯងទៅនឹងការវាយប្រហាររបស់រុស្ស៊ីដែលជាប្រទេសធំនិងខ្លាំងជាង ខ្លាំងជាងទាំងកម្លាំងទ័ពនិងសព្វាវុធយោធា។
ការប្រយុទ្ធគ្នានៅតែបន្តនៅក្នុងរដ្ឋធានីគៀវ និងតំបន់ផ្សេងៗគ្នានៃប្រទេសអ៊ុយក្រែន។ យ៉ាងណាក៏ដោយ កងទ័ពអ៊ុយក្រែនហាក់មិនបាក់ស្បាតនោះទេ និងមិនព្រមទមា្លក់អាវុធចុះចាញ់ងាយៗឡើយ ហើយបាននិងកំពុងតស៊ូប្រយុទ្ធទល់នឹងរុស្ស៊ី។ ចំណែកលោកប្រធានាធិបតីអ៊ុយក្រែន ហ្សេឡេនស្គីវិញក៏នៅប្រឹងបន្តអំពាវនាវឲ្យកងទ័ពនិងពលរដ្ឋកាន់អាវុធការពារប្រទេសជាតិ។
មន្ត្រីអ៊ុយក្រែនបាននិយាយថាពួកគេបានប្រគល់កាំភ្លើងចំនួន ១៨ ០០០ដើមដល់អ្នកស្ម័គ្រចិត្តនិងបានចេញសេចក្តីណែនាំអំពីវិធីផលិតគ្រាប់បែកសាំង។ មានការរាយការណ៍ថាប្រជាជនអ៊ុយក្រែនជាច្រើនទោះបីគ្មានបទពិសោធន៍ប្រយុទ្ធក្តី ក៏ពួកគេបានតម្រង់ជួរស័គ្ម្រចិត្តដើម្បីចូលរួមការពារជាតិរបស់ខ្លួន ខណៈដែលការរឹតបន្តឹងអាយុសម្រាប់ចូលរួមកងទ័ពត្រូវបានដកចេញ។
នៅព្រឹកថ្ងៃសៅរ៍នេះ ប្រធានាធិបតីអ៊ុយក្រែនបានបង្ហោះសារធ្វីតថាដែរថាឥឡូវនេះវាគឺជាពេលវេលាដ៏សំខាន់ដែលគេត្រូវសម្រេចចិត្តហើយលើសមាជិកភាពរបស់ប្រទេសរបស់លោកនៅក្នុងសហភាពអឺរ៉ុប និងបិទបញ្ចប់កិច្ចពិភាក្សាដែលអូសបន្លាយជាយូរណាស់មកហើយនោះទៅ។
ជាការគួរឲ្យកត់សម្គាល់ដែរ ខណៈការវាយប្រយុទ្ធគ្នាកំពុងកើតឡើងនៅទីក្រុងគៀវ សង្គ្រាមព័ត៌មានវាយប្រហារលើប្រធានាធិបតីអ៊ុយក្រែន ក៏ចាប់ផ្ទុះឡើងជាខ្លាំងផងដែរ។ នៅលើបណ្តាញសង្គមមានការចុះផ្សាយថាលោកប្រធានាធិបតីអ៊ុយក្រែនហ្សេឡេនស្គីបានរត់ភៀសខ្លួនចេញពីប្រទេសអ៊ុយក្រែន។ ទន្ទឹមនេះក៏មានព័ត៌មានចុះផ្សាយទៀតថា កងទ័ពអ៊ុយក្រែនព្រមចុះចាញ់ជាដើម។ល។
ដើម្បីបញ្ជាក់ពីភក្តីភាពរបស់លោកចំពោះប្រជាជាតិអ៊ុយក្រែន លោក ហ្សេឡេនស្គី បានព្យាយាមបង្ហោះសារវីដេអូជាច្រើនបន្តបន្ទាប់គ្នាអះអាងថា រូបលោកនិងមន្ត្រីជាន់ខ្ពស់អ៊ុយក្រែន មិនបានរត់ទៅណានោះទេ និងកំពុងមានវត្តមាននៅក្នុងប្រទេសអ៊ុយក្រែនដើម្បីប្រឆាំងទល់នឹងសត្រូវឈ្លានពានរុស្ស៊ី។
ចំណែកអង់គ្លេសវិញទើបបានឲ្យដឹងថាមុននេះបន្តិចថាខ្លួននិងប្រទេស២៥ផ្សេងទៀតនឹងបញ្ជូនអាវុធនិងជំនួយបន្ថែមទៀតទៅដល់អ៊ុយក្រែន។
តើការចរចារវាងភាគីរុស្ស៊ីនិងអ៊ុយក្រែនអាចនឹងកើតឡើងដែរឬទេ?
ចម្លើយថាតើការចរចាគ្នារវាងរុស្ស៊ី និងអ៊ុយក្រែនអាចនឹងកើតឡើងដែរឬអត់នោះ នៅមិនទាន់មានអ្នកណាដឹង ហើយក៏នៅមិនទាន់មានអ្នកណាហ៊ាននិយាយអ្វីដែរជុំវិញចំណុចនេះ។
ក៏ប៉ុន្តែ ការចរចារវាងភាគីទាំងពីរនេះពិបាកនឹងកើតឡើងក្នុងពេលឆាប់ៗនេះបានណាស់។ ហេតុអ្វី? រុស្ស៊ីបានហៅក្រុងគៀវឲ្យចរចាក៏ពិតមែន ក៏ប៉ុន្តែរុស្ស៊ីបានដាក់លក្ខខណ្ឌដ៏ពិបាកទៅរួចមួយគឺទាមទារឲ្យកងទ័ពអ៊ុយក្រែនទម្លាក់អាវុធចុះចាញ់ជាមុនសិន។
មកទល់នឹងពេលនេះ កងទ័ពអ៊ុយក្រែននៅតែមានភក្តីភាពចំពោះរដ្ឋាភិបាលរបស់ខ្លួនដែលរុស្ស៊ីចាត់ទុកថាជាពួកញៀនថ្នាំ និងពួកណាហ្ស៊ីបែបថ្មី។ ដូច្នោះហើយប្រសិនបើកងទ័ពអ៊ុយក្រែននៅបន្តកាន់អាវុធការពារប្រទេសពីការវាយប្រហាររបស់រុស្ស៊ី សួរថាតើរុស្ស៊ីរបស់លោកលោកពូទីនព្រមចរចាជាមួយរដ្ឋាភិបាលរបស់លោកហ្សេឡេនស្គីទេ? សំណួរនេះមានតែលោកពូទីនម្នាក់ប៉ុណ្ណោះដែលអាចឆ្លើយបាន។
បើកងាកមកអ៊ុយក្រែនឯណោះវិញ លោកប្រធានាធិបតីហ្សេឡេនស្គី តាមរយៈអ្នកនាំពាក្យបានបញ្ជាក់ពីជំហររបស់អ៊ុយក្រែនក្នុងការត្រៀមពិភាក្សាជាមួយរុស្ស៊ីអំពីបទឈប់បាញ់ឈានទៅបញ្ចប់ការប្រយុទ្ធគ្នា។ ប៉ុន្តែទន្ទឹមគ្នានេះលោកហ្សេឡេនស្គី ក៏បានអះអាងដែរថារូបលោកដែលជាប្រធានាធិបតីជាមួយនឹងមន្ត្រីជាន់ខ្ពស់ និងទាហានអ៊ុយក្រែនគឺនៅតែតស៊ូមិនចុះចាញ់នឹងការឈ្លានពានរបស់សត្រូវជាដាច់ខាត។
ជារួមមក សង្គ្រាមនៅអ៊ុយក្រែននាខណៈពេលនេះកំពុងបង្កជាតក់ស្លុតយ៉ាងខ្លាំងមិនថាចំពោះតែនៅអឺរ៉ុប ឬក៏ពិភពលោកទាំងមូលនោះទេ។ ហើយគេក៏មិនដឹងដែរថាសង្គ្រាមនេះអាចនឹងអូសបន្លាយដល់ពេលណា និងអាចនឹងបិទបញ្ចប់វិញនៅពេលណា។
ទាក់ទងរឿងនេះ លោកប្រធានាធិបតីបារាំងលោកអេម៉ានុយអែល ម៉ាក្រុងដែលជាប្រធានផ្លាស់វេនអឺរ៉ុប បានព្រមានថាបើនៅតែបណ្តែតបណ្តោញទៀត នោះសង្រ្គាមនៅអ៊ុយក្រែននឹងបន្តទៅមុខយូរ ហើយវានឹងជះចេញជាវិបត្តិកាន់តែធំៗឡើង ហើយវិបត្តិទាំងអស់នោះហើយដែលនឹងនាំមកនូវផលវិបាករយៈពេលយូរអង្វែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ