សង្គ្រាមអ៊ុយក្រែន៖ រុស្ស៊ី និង អ៊ុយក្រែន តទល់គ្នា នៅតុលាការយុត្តិធម៌អន្តរជាតិ
ចុះផ្សាយនៅថ្ងៃ៖
ស្តាប់ - ០៧:៤៤
រុស្ស៊ីបានចាប់ផ្តើមបើកប្រតិបត្តិការកងទ័ព វាយប្រហារអ៊ុយក្រែន កាលពីថ្ងៃទី២៤កុម្ភៈ ដោយលើកហេតុផលថា ដើម្បីរំដោះប្រជាជនអ៊ុយក្រែនភាគខាងកើត ពីអំពើប្រល័យពូជសាសន៍ ធ្វើឡើងដោយរដ្ឋាភិបាលទីក្រុងកៀវ។ ជាពាក្យចោទប្រកាន់ ដែលរដ្ឋាភិបាលអ៊ុយក្រែនអះអាងថា ជាពាក្យកុហកបោកប្រាស់ ដើម្បីជាលេសចូលឈ្លានពានអ៊ុយក្រែនតែប៉ុណ្ណោះ។ អ៊ុយក្រែនបានដាក់ពាក្យប្តឹងទៅតុលាការយុត្តិធម៌អន្តរជាតិទីក្រុងឡាអេ ដើម្បីចោទប្រកាន់ចំពោះអំពើឈ្លានពានរបស់រុស្ស៊ី។ ចាប់ពីថ្ងៃចន្ទ រហូតដល់ថ្ងៃអង្គារទី៨មីនា តុលាការក្រុងឡាអេ នឹងបើកសវនាការដើម្បីស្តាប់អំណះអំណាង នៃភាគីជម្លោះទាំង២។
« អំពើប្រល័យពូជសាសន៍ ជាពាក្យកុហកដែលរុស្ស៊ីចោទមកលើអ៊ុយក្រែន »
តុលាការយុត្តិធម៌អន្តរជាតិ ក្រុងឡាអេ បានចាប់ផ្តើមបើកសវនាការនៅព្រឹកថ្ងៃចន្ទទី ៧មីនា សវនាការដែលមានរយៈពេល២ថ្ងៃ ដើម្បីស្តាប់អំណះអំណាងភាគីទាំងសងខាង រុស្ស៊ី និងអ៊ុយក្រែន ដែលចោទគ្នាទាក់ទិនរឿងប្រល័យពូជសាសន៍។ ដូចយើងបានដឹងមកហើយថាលោកពូទីន បានប្រកាសថា ប្រតិបត្តិការសង្គ្រាមនៅអ៊ុយក្រែន គឺដោយឈរលើហេតុផលដើម្បីរំដោះប្រជាជនអ៊ុយក្រែននៅតំបន់ដុនបាស ចេញពីអំពើប្រល័យពូជសាសន៍ ធ្វើឡើងដោយរដ្ឋាភិបាលអ៊ុយក្រែន។
តែសម្រាប់រដ្ឋាភិបាលអ៊ុយក្រែន គឺពាក្យចោទទាំងនេះជាពាក្យកុហក ពាក្យប្រឌិតទាំងស្រុង ដើម្បីធ្វើជាលេសឈ្លានពានអ៊ុយក្រែនតែប៉ុណ្ណោះ។ ក្រោយរុស្ស៊ី បានបើកការវាយប្រហារមកលើអ៊ុយក្រែន បាន២ថ្ងៃ អ៊ុយក្រែនបានដាក់ពាក្យបណ្តឹងនេះទៅតុលាការក្រុងឡាអេភ្លាម ដើម្បីឲ្យតុលាការក្រុងឡេអេ ជួយរកយុត្តិធម៌ ចំពោះពាក្យចោទបែបប្រឌិតកុហករបស់រុស្ស៊ី មកលើអ៊ុយក្រែននេះ។
រុស្ស៊ីគ្មានវត្តមាននៅសវនាការ
នៅព្រឹកថ្ងៃចន្ទ តុលាការយុត្តិធម៌ក្រុងឡាអេ បានសម្តែងការសោកស្តាយណាស់ ដោយក្នុងពេលសវនាការ កៅអីខាងភាគីរុស្ស៊ី ពុំមាននរណាមកអង្គុយទេ។ លោក Alexander Shulgin ឯកអគ្គរដ្ឋទូតរុស្ស៊ីប្រចាំប្រទេសហូឡង់ ដែលជាទីតាំងនៃតុលាការក្រុងឡាអេនេះ បានប្រាប់ឲ្យដឹងថា រដ្ឋាភិបាលរុស្ស៊ី មិនចូលរួមក្នុងអង្គសនាការនេះទេ។
លោក Anton Korynevich សមាជិកម្នាក់នៃគណប្រតិភូតំណាងអ៊ុយក្រែន នៅក្នុងអង្គសវនាការ បានលើកឡើងថា ការដែលរុស្ស៊ីមិនចូលមកសវនាការនេះ គឺវាជារឿងមួយដែលធ្វើឲ្យគ្រប់គ្នា ឃើញនឹងភ្នែកស្រស់ៗតែម្តង ថារុស្ស៊ីមានចរិកមើលងាយច្បាប់អន្តរជាតិកម្រិតណា! លោកសង្កត់ធ្ងន់ថា រុស្ស៊ីគ្មានមុខមកតទល់តាមផ្លូវច្បាប់ទេ ព្រោះរុស្ស៊ីរវល់ជាប់ដៃបាញ់មីស៊ីល ទំលាក់គ្រាប់បែកលើអ៊ុយក្រែន។ នេះហើយ ជារបៀបដោះស្រាយបញ្ហា របស់រុស្ស៊ី!
វិធានការបន្ទាន់ ដាក់កំហិតរុស្ស៊ីឲ្យបញ្ឈប់សង្គ្រាម
អ៊ុយក្រែនទាមទារ ឲ្យតុលាការយុត្តិធម៌អន្តរជាតិ ប្រកាសសេចក្តីថា ការចោទទាំងអម្បាលម៉ានរបស់រុស្ស៊ី មកលើអ៊ុយក្រែន ថាបានធ្វើអំពើប្រល័យពូជសាសន៍ ទៅលើប្រជាជននិយាយភាសារុស្ស៊ី ដែលរស់នៅតំបន់ដូណេត និងតំបន់លូហ្កង់ស៍នោះ គឺជាការចោទដោយគ្មានភស្តុតាង ជាពាក្យកុហកបោកប្រាស់។ ភាគីអ៊ុយក្រែន គេអះអាងថាគេមានភស្តុតាងគ្រប់គ្រាន់ បញ្ជាក់ថាភាគីគេ គ្មានបានធ្វើអំពើប្រល័យពូជសាសន៍ណាមួយឡើយ។ ដូច្នេះ ការលើកទ័ពវាយប្រហារអ៊ុយក្រែន ពីសំណាក់រុស្ស៊ី ដោយផ្អែកលើហេតុផលកុហកប្រឌិតបែបនេះ វាគឺជារឿងខុសច្បាប់អន្តរជាតិ។
ភាគីអ៊ុយក្រែន ក៏បានទាមទារផងដែរ ទៅកាន់ចៅក្រមទាំង១៥រូប នៃតុលាការក្រុងឡាអេ ថាត្រូវតែប្រកាសច្រានចោល ការទទួលស្គាល់ឯករាជ្យតំបន់លូហ្កង់ស៍ និងតំបន់ដូណេត ដែលលោកពូទីនបានធ្វើដោយអត្តនោម័តនោះ វាគឺជារឿងខុសច្បាប់ ព្រោះវាបានផ្អែកលើអំណះអំណាង ប្រឌិតកុហក របស់រុស្ស៊ី។
ទន្ទឹមគ្នានេះ ក្នុងពេលរងចាំសេចក្តីសម្រេចរបស់ចៅក្រម ដែលអាចចំនាយពេលច្រើនខែ ឬអាចឈានដល់ឆ្នាំផងនោះ ភាគីអ៊ុយក្រែន បានដាក់ពាក្យសុំឲ្យតុលាការក្រុងឡាអេ ចេញវិធានការបន្ទាន់មួយ ក្នុងពេលនេះភ្លាម ដើម្បីការពារអាយុជីវិតប្រជាជនអ៊ុយក្រែន។ វិធានការបន្ទាន់នេះ គឺអ៊ុយក្រែនសូមឲ្យតុលាការក្រុងឡាអេ សម្រេចដាក់កំហិត ឲ្យរុស្ស៊ីត្រូវតែបញ្ឈប់ការវាយប្រហារជាបន្ទាន់ ព្រោះជាការវាយប្រហារ ដែលផ្អែកលើហេតុផលកុហកឥតខ្មាសមាត់របស់រុស្ស៊ី។ វិធានការបន្ទាន់នេះ គឺភាគីអ៊ុយក្រែន អះអាងថា ដើម្បីទប់ស្កាត់អំពើប្រល័យពូជសាសន៍ ដែលរុស្ស៊ីកំពុងតែធ្វើមកលើប្រជាជនអ៊ុយក្រែន។
កាំបិតចិតដងឯង
ក្រុមមេធាវី តំណាងភាគីអ៊ុយក្រែន បានអះអាងថា ប្រើសិនបើសង្គ្រាមនេះនៅតែបន្ត ហើយរីករាលដាលពាសពេញអ៊ុយក្រែន នោះគឺអ៊ុយក្រែន នឹងរងគ្រោះធ្ងន់ធ្ងរណាស់ ជាសោកនាដកម្ម ដែលមិនអាចប៉ះប៉ូវបាន។ ពាក្យចោទរបស់រុស្ស៊ី ថាអ៊ុយក្រែនបានធ្វើអំពើប្រល័យពូជសាសន៍ ពេលនេះកំពុងតែវិលត្រលប់ទៅរករុស្ស៊ីខ្លួនឯងវិញហើយ។
ដោយសារតែគ្រាប់បែក គ្រាប់មីស៊ីលរបស់រុស្ស៊ីដែលទំលាក់មកលើទឹកដីអ៊ុយក្រែន សឹងតែគ្រប់ទីកន្លែង វាបានសម្លាប់ជីវិតប្រជាជនស៊ីវីលស្លូតត្រង់ ស្លាប់ទាហាន ខូចខាតហិនហោចទ្រព្យសម្បត្តិឯកជន និងសាធារណៈ ព្រមទាំងបង្កឲ្យមានវិបត្តិមនុស្សធម៌ថែមទៀត ព្រោះប្រជាជនអ៊ុយក្រែច្រើនលាននាក់ ត្រូវបង្ខំចិត្តរត់ភៀសខ្លួន។ ទាំងនេះ គឺបណ្តាលមកពីសង្គ្រាម ដែលរុស្ស៊ីជាអ្នកបង្កឡើង តែម្នាក់ឯងគត់។
យ៉ាងណាមិញ មិនមែនតែអ៊ុយក្រែនទេ ដែលប្តឹងរុស្ស៊ីនៅតុលាការយុត្តិធម៌អន្តរជាតិ។ អង្គការអ្នករាយការណ៍គ្មានព្រំដែន ក៏បានប្តឹងរុស្ស៊ីទៅកាន់តុលាការព្រហ្មទណ្ឌអន្តរជាតិក្រុងឡាអេដែរ ដោយចោទពីឧក្រិដ្ឋកម្មសង្គ្រាម។ ឧក្រិដ្ឋកម្មដែលកងទ័ពរុស្ស៊ីកំពុងតែធ្វើនៅអ៊ុយក្រែន ដោយការទម្លាក់គ្រាប់បែក គ្រាប់មីស៊ីល ដោយឥតរើសមុខ ដោយមិនខ្វល់អំពីជីវិតរបស់អ្នកសារព័ត៌មាន និងប្រជាជនស្លូតត្រង់ផ្សេងទៀត។
លោកពូទីន នឹងឯកោកាន់តែខ្លាំង
លោក Jean-Marc Thouvenin មេធាវីម្នាក់តំណាងរដ្ឋាភិបាលអ៊ុយក្រែន នៅក្នុងសំណុំរឿងនេះ បានលើកឡើងថា តាមការសង្កេតរបស់លោក គឺរុស្ស៊ីមិនខ្វល់ មិនយកភ្នែកមើល មិនយកត្រចៀកស្តាប់ សេចក្តីសម្រេចចិត្តរួមនៃអង្គការសហប្រជាជាតិ ដែលបានប្រកាសផ្តន្ទាទោសរុស្ស៊ីមែន ព្រោះថាសេចក្តីសម្រេចចិត្តរួមនេះ គ្មានកម្លាំងចាប់បង្ខំផ្លូវច្បាប់ទេ។ ក៏ប៉ុន្តែ រុស្ស៊ីប្រុងប្រយ័ត្នណាស់ នៅពេលបោះឆ្នោតនៅក្រុមប្រឹក្សាសន្តិសុខ ព្រោះវាមានកម្លាំងចាប់បង្ខំ ហើយរុស្ស៊ីតែងតែប្រើសិទ្ធិវ៉េតូ ដើម្បីការពារខ្លួន។ ជានិច្ចជាកាល តាមការសង្កេត រុស្ស៊ីផ្តល់សារៈសំខាន់គ្រាន់បើ ដល់ការការសម្រេចផ្លូវច្បាប់ ដែលមានភ្ជាប់ជាមួយកាតព្វកិច្ច ជាក់ស្តែង ដូចជាការសម្រេចរបស់តុលាការអន្តរជាតិផ្នែកកីឡា នៅទីក្រុងឡូហ្សាន ដែលធ្លាប់ផ្តន្ទាទោសរុស្ស៊ីជាដើម។
តែយ៉ាងណាក៏ដោយ ក្នុងករណីដែរតុលាការក្រុងឡាអេ ប្រកាសឲ្យអ៊ុយក្រែនត្រូវ គឺថាតុលាការក៏គ្មានសមត្ថកិច្ចឯណា ទៅចាប់បង្ខំឲ្យរុស្ស៊ីត្រូវតែគោរពតាមសាលក្រមនោះដែរ។ ក៏ប៉ុន្តែទោះចង់មិនចង់ សាលក្រមវាអាចមានទំងន់ ធ្វើឲ្យរុស្ស៊ីដឹងខ្លួន ពិចារណាសម្រេចឈប់ធ្វើសង្គ្រាម ហើយងាកមករកការចរចាវិញ។
ដូចគ្នាដែរ លោក Sergueï Vasiliev សាស្ត្រានីតិអន្តរជាតិនៅសកលវិទ្យាល័យអាំស្ទែរដាំ បានលើកឡើងថា រុស្ស៊ីប្រាកដជាខ្មាសគេ មិនដឹងយកមុខទៅទុកនៅឯណាទេ នៅពេលណាដែរ សវនាការបោះជំហានទៅមុខ ហើយពិភពលោកទាំងមូល បានដឹងថាអ្វីដែលរុស្ស៊ីចោទលើអ៊ុយក្រែន គឺជាពាក្យកុហកបោកប្រាស់ទាំងអស់នោះ។ រុស្ស៊ី ជាពិសេសគឺលោកពូទីនតែម្តង នឹងកាន់តែឯកោ គ្មានពាក្យអ្វីមកថ្លែងដើម្បីការពារខ្លួនទៀតទេ មិនថានៅលើឆាកអន្តរជាតិ និងនៅចំពោះមុខប្រជាពលរដ្ឋរុស្ស៊ីខ្លួនឯង។
ជាក់ស្តែង សូម្បីតែមេធាវីខ្លះ ក៏មិនហ៊ានចូលរួមការពាររុស្ស៊ី នៅតុលាការក្រុងឡាអេដែរ ។ លោក Alain Pellet ជាមេធាវី និងជាកំពូលសាស្ត្រាចារ្យនីតិអន្តរជាតិ ជនជាតិបារាំង ដែលត្រូវបានរុស្ស៊ីអញ្ជើញ ឲ្យដឹកនាំការការពារក្តី ពេលនេះបានប្រកាសបដិសេធហើយ។ លោកលើកឡើងថា លោកមិនអាចការពារក្តីឲ្យប្រទេសមួយ ដែលបានបំពានជាន់ឈ្លីដោយឥតខ្មាសអៀន មកលើច្បាប់អន្តរជាតិ ដូចរុស្ស៊ីនេះបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ