អ៊ុយក្រែន៖ រុស្ស៊ីអះអាងថាបានបាញ់មីស៊ីលអ៊ីពែរសូនិកមួយគ្រាប់ទៀត ខណៈស្ថានភាពមនុស្សធម៌កាន់តែដុនដាបខ្លាំង
ចុះផ្សាយនៅថ្ងៃ៖
ស្តាប់ - ០៧:៥០
សង្គ្រាមនៅអ៊ុយក្រែន បន្តផ្ទុះឆាបឆេះ យ៉ាងក្តៅគគុក។ នៅថ្ងៃអាទិត្យទី២០មីនា ក្រសួងការពារជាតិរុស្ស៊ី បានអះអាងថា គេបានប្រើប្រាស់មីស៊ីលអ៊ីពែរសូនិក មួយគ្រាប់ថ្មីទៀត ដើម្បីកំទេចទីតាំងស្តុកប្រេងរបស់កងទ័ពអ៊ុយក្រែន។ នៅទីក្រុងម៉ារីយូប៉ូលឯណោះវិញ ស្ថានភាពមនុស្សធម៌កាន់តែដុនដាបខ្លាំងបំផុត ក្រោយកងទ័ពរុស្ស៊ីឡោមព័ទ្ធអស់ជាច្រើនថ្ងៃ និងបានទំលាក់គ្រាប់បែកលើទីក្រុងនេះ យ៉ាងដំណំបំផុត។ លោក វ្លូឌីមៀរ ហ្សេឡេនស្គី ប្រធានាធិបតីអ៊ុយក្រែន បានប្រកាសតាមសារវីដេអូថ្មីមួយទៀត ដោយបានចាត់ទុកថា ការឡោមព័ទ្ធរបស់កងទ័ពរុស្ស៊ី នៅក្រុងម៉ារីយូប៉ូល គឺជាអំពើដ៏សាហាវយង់ឃ្នង ដែលប្រវត្តិសាស្ត្រពិភពលោក នឹងចងចាំរាប់សតវត្សទៅមុខ។
រុស្ស៊ីចាប់ផ្តើមបញ្ចេញអាវុធធុនធំ
យោងតាមលិខិតប្រកាសរបស់ក្រសួងការពារជាតិរុស្ស៊ី គឺ កងទ័ពរុស្ស៊ី បានបាញ់មីស៊ីលក្រ័រស្យែរ « Kalibr » បាញ់ចេញពីសមុទ្រកាសព្យែន និង មីស៊ីលអ៊ីពែរសូនិក « Kinjal » មួយគ្រាប់ទៀត បាញ់ចេញពីមូលដ្ឋានទ័ពអាកាស នៅតំបន់គ្រីម៉េ។ ប្រភពដដែល អះអាងថា មីស៊ីលទាំងនេះ បានទៅកំទេចទីតាំងស្តុកប្រេងមួយកន្លែង របស់កងទ័ពអ៊ុយក្រែន ដែលស្ថិតនៅ តំបន់ Mykolaïv ភាគខាងត្បូងអ៊ុយក្រែន។ ក្រសួងការពារជាតិរុស្ស៊ីអះអាងថា ទីតាំងនេះ គឺជាទីតាំងស្តុកប្រេង សម្រាប់ប្រើលើរថក្រោះ រថពាសដែករបស់អ៊ុយក្រែន។
បន្ថែមពីនេះ នៅថ្ងៃអាទិត្យនេះដែរ ក្រសួងការពារជាតិរុស្ស៊ីក៏បានអះអាងថា គេបានប្រើមីស៊ីលទំនើបបំផុត ដោយមិនបញ្ជាក់ថាប្រភេទអ្វីទេ បាញ់ទៅលើទីតាំងបន្ទាយហ្វឹកហាត់ របស់កងទ័ពអ៊ុយក្រែន ស្ថិតនៅចំងាយប្រមាណ១៥០គីឡូម៉ែត្រ ខាងលិចទីក្រុងកៀវ។ ខាងរុស្ស៊ីអះអាងថា យ៉ាងហោចណាស់ សមាជិកកងកម្លាំងអ៊ុយក្រែន ព្រមទាំងកងកម្លាំងបរទេសនៅទីនោះ ជាង១០០នាក់ ត្រូវបានសម្លាប់។ តែយ៉ាងណា សម្រាប់ពេលនេះ ពុំមានប្រភពឯករាជ្យណា អាចផ្ទៀងផ្ទាត់ដំណឹងនេះបានទេ។
យោងតាមដំណឹងទាំងនេះ គឺមានន័ថា វាជាលើកទី២ហើយ ដែលរុស្ស៊ីប្រើប្រាស់មីស៊ីលអ៊ីពែរសូនិក ដែលអាចបាញ់ចេញ ពីទីកន្លែងឆ្ងាយ ក្នុងល្បឿនដ៏លឿន។ អ្វីដែលពិសេសនោះ គឺមីស៊ីលប្រភេទថ្មីរបស់រុស្ស៊ីនេះ គឺអាចរត់គេចពីប្រព័ន្ធខែល គ្មានអ្វីអាចមកស្ទាក់កំទេចបានទេ។ តែបាញ់ចេញទៅហើយ គឺដឹងតែទៅដល់គោលដៅហើយ។ មានន័យថា ចាប់ពីពេលនេះទៅ គឺវាឈានដល់ដំណាក់កាល ដែលរុស្ស៊ីបញ្ចេញអាវុធធន់ធំៗ។
លោក Iouri Ignat អ្នកនាំពាក្យកងទ័ពអាកាសអ៊ុយក្រែន បានលើកឡើងថា អ៊ុយក្រែន កំពុងតែត្រូវបានរុស្ស៊ី យកធ្វើជាទីលាន ដើម្បីបាញ់សាកល្បងអាវុធទំនើបថ្មីៗ របស់គេ ដោយគ្មានខ្លាចរអារនរណាទាំងអស់។ ដោយឡែក សម្រាប់ក្រសួងការពារជាតិអង់គ្លេសវិញ គឺគេយល់ថា ការដែលរុស្ស៊ីចាប់ផ្តើមប្រើប្រាស់ មីស៊ីលបាញ់ពីចំងាយឆ្ងាយៗបែបនេះ គឺដោយសារតែរុស្ស៊ី មិនអាចគ្រប់គ្រងផ្លូវអាកាសនៅពីលើអ៊ុុយក្រែន បានខ្លាំងប៉ុន្មានឡើយ។ ហេតុដូច្នេះហើយ បានជាត្រូវចាំបាច់ បាញ់គ្រាប់មកពីឆ្ងាយ ដើម្បីជួយទប់។
គិតចាប់ពីថ្ងៃចាប់ផ្តើមសង្គ្រាម យោងតាមតួលេខរបស់អ៊ុយក្រែន គឺរុស្ស៊ីបានបាញ់មីស៊ីលចំនួន ២៩១គ្រាប់ និងប្រើគ្រាប់បាញ់ពីលើយន្តហោះ ចំនួន ១៤០៣គ្រាប់។
« ការឡោមព័ទ្ធទីក្រុងម៉ារីយូប៉ូល ជាឧក្រិដ្ឋកម្មសង្គ្រាម »
អាជ្ញាធរក្រុងម៉ារីយូប៉ូល បានផ្សាយសារតាមតេឡេក្រាមថា កាលពីថ្ងៃសៅរ៍ម្សិលមិញ អាគារសាលាសិល្បៈមួយកន្លែង ដែលមានមនុស្សសំងំជ្រកពួន ប្រមាណ៤០០នាក់ ត្រូវបានរងគ្រាប់បែករបស់រុស្ស៊ី។ មនុស្សនៅទីនោះសុទ្ធតែកុមារ និងមនុស្សស្រី និងជនចាស់ជរា។ គិតមកត្រឹមពេលនេះ គឺមិនទាន់ដឹងថាមានស្លាប់ មានរបួសប៉ុន្មាននាក់ទេ តែអាជ្ញារអ៊ុយក្រែនប្រចាំក្រុងនេះអះអាងថា មានមនុស្សច្រើននាក់ណាស់ ដែលស្ថិតនៅក្រោមគំនរអាគារបាក់បែកនេះ។ នៅម៉ារីយូប៉ូលដែរ កុមារកំព្រាចំនួន១៩នាក់ កំពុងជាប់គាំងនៅក្នុងអាគារទុកសាកសពមួយកន្លែង ដោយគ្មាននរណាអាចទៅជួយបានទេ ជាច្រើនថ្ងៃមកហើយ។
ដោយឡែក លោក Pavlo Kirilenko អភិបាលតំបន់ដូនែតស៍ បានអះអាងថា យ៉ាងហោចណាស់ មានប្រជាជនអ៊ុយក្រែននៅក្រុងម៉ារីយូប៉ូល ចំនួនជាង១០០០នាក់ ត្រូវបានរុស្ស៊ីកេណ្ឌចេញទាំងបង្ខំ ដឹកចូលទៅដីរុស្ស៊ី បាត់ដំណឹងឈឹងសូន្យតែម្តង។ ប្រភពតាមបណ្តាញសង្គមរបស់សមាជិកសភាអ៊ុយក្រែន ច្រើននាក់ អះអាងថា រោងចក្រស្លដែកដ៏ធំជាងគេមួយនៅទូទាំងអឺរ៉ុប ស្ថិតនៅជាយក្រុងម៉ារីយូប៉ូលនេះ ត្រូវបានកងទ័ពរុស្ស៊ីបាញ់កំទេចអស់ហើយ។ នេះគឺជាការបាត់បង់ផ្នែកសេដ្ឋកិច្ចមួយដ៏ធំ សម្រាប់អ៊ុយក្រែន។
បាទស្ថានភាពនៅក្រុងម៉ារីយូប៉ូល គឺវេទនាអានោចអាធម្មខ្លាំងសម្បើមណាស់ សម្រាប់ប្រជាជនដែលកំពុងតែជាប់នៅទីនោះ។ ណាមួយដោយសារតែគ្រាប់បែក មីស៊ីលរបស់រុស្ស៊ី ធ្លាក់ផ្ទុះឥតដាច់។ ណាមួយទៀត គឺបញ្ហាស្បៀងអាហារ។ ប្រជាជនត្រូវពួនសំងំរស់នៅក្នុងបន្ទប់ក្រោមដី ក្នុងសីតុណ្ហភាពត្រជាក់ ជាមួយនឹងអារម្មណ៍ភ័យខ្លាច មិនដឹងថាពេលនេះ គ្រាប់របស់រុស្ស៊ីនឹងធ្លាក់មកលើចំនោះ! សាក្សីខ្លះអះអាងថា សាកសពមនុស្ស ដេកស្លាប់រាយប៉ាយ មិនទាន់ប្រមូលអស់ផង គ្រាប់បែករុស្ស៊ីក៏ធ្លាក់ផ្ទុះបន្ថែមទៀត។ គិតមកទល់ពេលនេះ នៅម៉ារីយូប៉ូល មានមនុស្សស្លាប់ ចំនួន២១០០នាក់ហើយ។
លោក ប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានបង្ហោះសារវីដេអូថ្មីមួយទៀត ដោយបានហៅ ការឡោមព័ទ្ធទីក្រុងម៉ារីយូប៉ូល របស់កងទ័ពរុស្ស៊ីនេះ ថាជាអំពីដ៏ព្រៃផ្សៃ គ្មានធម្មមេត្តាទេ។ លោកបានលើកឡើងថា ប្រវត្តិសាស្ត្រពិភពលោក នឹងចងចាំហេតុការណ៍នេះរាប់សតវត្សទៅមុខ ព្រោះវាឧក្រិដ្ឋកម្មសង្គ្រាម ដែលរុស្ស៊ីបានធ្វើមកលើប្រជាជនអ៊ុយក្រែន។ តែយ៉ាងណា លោកបានអះអាងថា ទោះជាលំបាកយ៉ាងណា ក៏លោកនៅតែមិនបិទផ្លូវចរចា ជាមួយរុស្ស៊ីដែរ។
រុស្ស៊ីចង់ឲ្យអ៊ុយក្រែនសន្យាថានឹងនៅអព្យាក្រិត្យ
គិតមកទល់ពេលនេះ ការបោះជំហានទៅមុខ ក្នុងការចរចានោះ មានតិចតួចណាស់។ កាលពីសប្តាហ៍កន្លងទៅ ភាគីទាំងសងខាង បានលើកឡើងពីចំនុចសុទិដ្ឋិនិយមខ្លះៗ តែក្រោយមកក៏បានចោទគ្នាវិញ ថាបានធ្វើឲ្យការចរចាត្រូវរអាក់រអួល យឺតយ៉ាវ។
ទីភ្នាក់ងារព័ត៌មាន Interfax ទើបតែបានចុះផ្សាយ ដោយស្រង់សំដី របស់លោក ស៊ែរហ្កី ឡាវរ៉ូវ រដ្ឋមន្ត្រីការបរទេសរុស្ស៊ីថា កម្មវត្ថុដែលរុស្ស៊ីចង់បាន គឺចង់ឲ្យអ៊ុយក្រែន ចុះហត្ថលេខា ជាលាយលក្ខណ៍អក្សរ លើកិច្ចព្រមព្រៀងរួមស្តីពីសន្តិសុខ ដោយក្នុងនោះ ត្រូវរាប់បញ្ចូលចំណុច ដែលបញ្ជាក់ថា អ៊ុយក្រែន នឹងនៅជាប្រទេសអព្យាក្រិត្យជានិច្ច។
ក៏ប៉ុន្តែ មិនប្រាកដថាលក្ខខណ្ឌទាមទារនេះ ត្រូវភាគីអ៊ុយក្រែនអាចទទួលយកបានឡើយ។ ទន្ទឹមគ្នានេះ លោកប្រធានាធិបតីអ៊ុយក្រែនឯណេះវិញ បានព្យាយាមអំពាវនាវខ្លាំងសម្បើមណាស់ នៅតាមប្រទេសប្រជាធិបតេយ្យធំៗ ដើម្បីឲ្យមតិសាធារណៈតាមប្រទេសទាំងនេះ ចូលរួមគាំទ្រអ៊ុយក្រែនឲ្យបានច្រើន ហើយជំរុញរដ្ឋាភិបាលខ្លួន ត្រូវតែធ្វើអ្វីម្យ៉ាង ដើម្បីដាក់សំពាធលើលោកពូទីន។ លោក ហ្សេឡេនស្គី បានថ្លែងសារសឹងតែជារៀងរាល់ថ្ងៃ តាមប្រព័ន្ធវីដេអូខុសហ្វឺរិនស៍ ចំពោះមុខក្រុមបាតុករ ប្រឆាំងសង្គ្រាម និងចំពោះមុខអង្គសភាបរទេស ជាក់ស្តែងនៅថ្ងៃនេះ គឺលោកនឹងថ្លែងសារទៅកាន់សភាអ៊ីស្រាអ៊ែល។ តែយ៉ាងណា យុទ្ធនាការប្រកូកប្រកាសរកការគាំត្រពីបរទេស របស់លោកហ្សេឡិនស្គី នេះ គឺបានត្រឹមតែការអាណិតអាសូរតែប៉ុណ្ណោះ។
ដោយឡែក ជាលើកទីមួយនៅថ្ងៃអាទិត្យនេះ លោក Mykhaïlo Podoliak ប្រធានក្រុមចរចារបស់អ៊ុយក្រែន បានប្រកាសសារ អំពាវនាវឲ្យចិនត្រូវតែចូលរួមជួយអ៊ុយក្រែនផង។ លោកបានលើកឡើងថា ចិនអាចជាធាតុមួយដ៏សំខាន់ នៅក្នុងប្រព័ន្ធសន្តិសុខពិភពលោក ប្រសិនបើចិនសម្រេចចិត្តជ្រើសរើស ជួយក្រុមប្រទេសដែលរីកចម្រើនមានអរិយធម៌ ដោយការប្រកាសថ្កោលទោស អំពើសាហាវយង់ឃ្នងរបស់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ