លោកពូទីននិយាយធានាអាល្លឺម៉ង់ថា គេនៅអាចបង់លុយអឺរ៉ូ សម្រាប់ទូទាត់ការទិញឧស្ម័នពីរុស្ស៊ី
ចុះផ្សាយនៅថ្ងៃ៖
ស្តាប់ - ០៧:៤១
ទៅតាមការបញ្ជារបស់ប្រធានាធិបតីរុស្ស៊ី លោកវ្លាឌីមៀរ ពូទីន រដ្ឋាភិបាល ធនាគារកណ្តាលរុស្ស៊ី និងក្រុមហ៊ុនឧស្ម័នរុស្ស៊ី ត្រូវបង្ហាញ នៅថ្ងៃព្រហស្បតិ៍ទី ៣១មីនា ២០២២ ពីប្រព័ន្ធថ្មីនៃការចាយលុយរូប្លិ៍សម្រាប់ការទិញប្រេង និងឧស្ម័នរបស់រុស្ស៊ី។ នៅក្នុងកិច្ចសន្ទនាតាមទូរស័ព្ទជាមួយនាយករដ្ឋមន្រ្តីអាល្លឺម៉ង់ អូឡាហ្វ ស្ហុល កាលពីថ្ងៃពុធ ប្រធានាធិបតីរុស្ស៊ី បានបញ្ជាក់ធានាទៅសមភាគីអាល្លឺម៉ង់ថា ប្រទេសនៅអឺរ៉ុបនៅតែអាចទិញឧស្ម័នពីរុស្ស៊ី ដោយប្រើលុយអឺរ៉ូ។
ធនាគារកណ្តាល និងក្រុមហ៊ុនឧស្ម័នរុស្ស៊ីត្រូវបង្ហាញទៅប្រធានាធិបតីរុស្ស៊ី នៅថ្ងៃព្រហស្បតិ៍នេះ នូវប្រព័ន្ធថ្មី នៃការលក់ប្រេង និងឧស្ម័នដោយទូទាត់ជាលុយរូប្លិ៍ ដែលជារូបិយបណ្ណជាតិរុស្ស៊ី។សងសឹកនឹងការដាក់ទណ្ឌកម្មរបស់ប្រទេសលោកខាងលិច ក្នុងរឿងធ្វើសង្រ្គាមឈ្លានពានអ៊ុយក្រែន ប្រធានាធិបតីរុស្ស៊ី លោកវ្លាឌីមៀរ ពូទីនធ្លាប់បានប្រកាស កាលពីទី ២៣មីនាថា ប្រទេសអមិត្តរបស់រុស្ស៊ី ដែលទិញប្រេង និងឧស្ម័នពីរុស្ស៊ី ត្រូវតែបង់ជាលុយរូប្លិ៍ រូបិយបណ្ណជាតិរុស្ស៊ី ពោលគឺលែងជាលុយដុល្លារ ឬអឺរ៉ូតទៅទៀត។
ប៉ុន្តែ នៅថ្ងៃព្រហស្បតិ៍ទី៣១មីនា នេះ ដែលជាថ្ងៃដាក់កំហិតចុងក្រោយរបស់ប្រធានាធិបតីរុស្ស៊ី លោកវ្លាឌីមៀរពូទីន ដែលចង់ឲ្យអ្នកទិញប្រេង និងឧស្ម័នពីរុស្ស៊ី ត្រូវតែបង់ថ្លៃជាលុយរូប្លិ៍ លោកពូទីនខ្លួនឯង បាននិយាយទូរស័ព្ទ ប្រាប់នាយករដ្ឋមន្រ្តីអាល្លឺម៉ង់ កាលពីថ្ងៃម្សិលមិញថា ប្រទេសនៅអឺរ៉ុបនៅតែអាចបន្តបង់ជាលុយអឺរ៉ូ សម្រាប់ការទិញនាំចូលឧស្ម័នពីរុស្ស៊ី។
តាមអ្នកនាំពាក្យរបស់រដ្ឋាភិបាលអាល្លឺម៉ង់ នៅក្នុងកិច្ចសន្ទនាតាមទូរស័ព្ទជាមួយនាយករដ្ឋមន្រ្តីអាល្លឺម៉ង់ កាលពីថ្ងៃពុធម្សិលមិញ លោកប្រធានាធិបតីរុស្ស៊ី ពិតបានជានិយាយធានាសមភាគីអាល្លឺម៉ង់ថា នៅខែមេសា ខាងមុខនេះ ប្រទេសនៅអឺរ៉ុបនៅតែអាចបន្តបង់ជាលុយអឺរ៉ូ ទៅឲ្យធានាគាររុស្ស៊ី Gazprom សម្រាប់ការទិញឧស្ម័នពីរុស្ស៊ី។ ប្រធានាធិបតីរុស្ស៊ី នៅបានបញ្ជាក់ដែរថា ដំណើរការទូទាត់ជាលុយរូប្លិសម្រាប់ការទិញឧស្ម័នរុស្ស៊ី នឹងត្រូវប៉ះពាល់ដល់លក្ខខណ្ឌដែលមានចែងនៅក្នុងកិច្ចសន្យាដែលរុស្ស៊ីបានចុះជាមួយក្រុមហ៊ុនអឺរ៉ុបនោះទេ។
ហេតុអ្វី ប្រធានាធិបតីរុស្ស៊ី ផ្លាស់ប្តូរជំហររបស់ខ្លួន?
ដោយបញ្ជាក់ទៅភាគីអាល្លឺម៉ង់ថា អាល្លឺម៉ង់ក៏ដូចជាអឺរ៉ុបនៅតែអាចបន្តបង់ជាលុយអឺរ៉ូ សម្រាប់ការទិញនាំចូលឧស្ម័នពីរុស្ស៊ី គេអាចថា លោកពូទីនបានផ្លាស់ប្តូររបស់លោក ដែលធ្លាប់បានប្រកាសដាក់កំហិតទុកពេល ១សប្តាហ៍ឲ្យប្រទេសអឺរ៉ុប ដើម្បីបង់លុយរូប្លិ៍ សម្រាប់ការទិញឧស្ម័នរុស្ស៊ី។ លោកពូទីនអាចផ្លាស់ប្តូរជំហរ មកវិញ ព្រោះតែលោកមើលទៅឃើញថា គម្រោងការទូទាត់ជាលុយរូប្លិ៍ ពិបាកនឹងចេញជារូបរាង ព្រោះតាំងពីដើមសប្តាហ៍នេះ ប្រទេសមហាអំណាចឧស្សាហកម្ម G7 និងសហភាពអឺរ៉ុបដែលជាអតិថិជនទិញប្រេង និងឧស្ម័នដ៏សំខាន់ជាងគេរបស់រុស្ស៊ី សុទ្ធតែបដិសេធដាច់ខាតថា នឹងប្រើលុយរូប្លិ ដើម្បីទិញប្រេង ឧស្ម័នរបស់រុស្ស៊ី។
នៅក្រោយកិច្ចប្រជុំក្រុមប្រទេសG7 កាលពីថ្ងៃចន្ទ រដ្ឋមន្រ្តីសេដ្ឋកិច្ច និងថាមពលអាល្លឺម៉ង់ លោកRobert Habeck បាននិយាយក្នុងនាមរបស់ក្រុមប្រទេសG7 ថា ការទាមទាររបស់រុស្ស៊ីធ្វើឡើងដោយឯកតោភាគី និងរំលោភយ៉ាងច្បាស់ កិច្ចសន្យាដែលរុស្ស៊ីធ្លាប់បានចុះកន្លងមក។ សម្រាប់រដ្ឋមន្រ្តីអាល្លឺម៉ង់ ការបង់ថ្លៃជាលុយរូប្លិ៍ គឺជារឿងដែលមិនអាចទទួលយកបាន។ លោកបានអំពាវនាវដល់ក្រុមហ៊ុនអាល្លឺម៉ង់ កុំឲ្យអនុវត្តតាមការទាមទាររបស់ប្រធានាធិបតីរុស្ស៊ី។
នៅក្រោយចេញសេចក្តីថ្លែងការណ៍ ដែលបញ្ជាក់ពីការធានារបស់ប្រធានាធិបតីរុស្ស៊ី នៅក្នុងកិច្ចសន្ទនាតាមទូរស័ព្ទ កាលពីថ្ងៃពុធ អ្នកនាំពាក្យរបស់ប្រធានាធិបតីរុស្ស៊ីបាននិយាយប្រាប់អ្នកកាសែត នៅទីក្រុងម៉ូស្គូថា រុស្ស៊ី មិនបានទាមទារឲ្យអ្នកទិញ ឧស្ម័នត្រូវតែទូទាត់ជាលុយរូប្លិ៍ភ្លាមនោះទេ។ តាមអ្នកនាំពាក្យរបស់វិមានក្រេមឡាំង ដំណើរការទូទាត់ និងការប្រគល់ទំនិញ ត្រូវការពេលវេលា។
នៅសប្តាហ៍ បារាំង អ៊ីតាលី និងប៉ូឡូញបានចេញមុខបដិសេធមិនប្រើប្រាស់លុយរូប្លិ៍សម្រាប់ទិញឧស្ម័នពីរុស្ស៊ី។ ប្រឈមនឹងជំហរដាច់ខាតរបស់ប្រទេសនៅអឺរ៉ុប ដែលបដិសេធមិនប្រើប្រាស់លុយរូប្លិ៍ រុស្ស៊ី យល់ច្បាស់ថា ការចាប់បង្ខំឲ្យគេទូទាត់ជាលុយរូប្លិនឹងធ្វើឲ្យរុស្ស៊ីអាចបាត់បង់អតិថិជនរបស់ខ្លួន។ ពិតណាស់ថា ដោយគំរាមឈប់លក់ប្រេង ឬឧស្ម័ន បើសិនគេមិនបង់ជាលុយរូប្លិ រុស្ស៊ីចង់ដាក់សម្ពាធលើអឺរ៉ុប ដែលពឹងអាស្រ័យខ្លាំងលើឧស្ម័ន និងប្រេងរបស់ខ្លួន។ ប៉ុន្តែ ដល់ពេល ឃើញថា អឺរ៉ុបមិនចាញ់សំឡុត រុស្ស៊ី ត្រូវតែផ្លាស់ប្តូរជំហររបស់ខ្លួនវិញ ព្រោះថា បើសិនមិនលក់ប្រេង និងឧស្ម័នទៅឲ្យអឺរ៉ុប រុស្ស៊ី ខ្លួនឯងក៏បាត់ប្រាក់ចំណូល ខាតបង់ធ្ងន់ណាស់ដែរ ព្រោះរុស្ស៊ី នៅមិនទាន់មានផែនការ មធ្យោបាយ សម្រាប់បង្ហូរ លក់ឧស្ម័នទៅឲ្យប្រទេសផ្សេងក្រៅអឺរ៉ុបនោះដែរ។ រុស្ស៊ីត្រូវតែបត់បែន បន្ទន់ជំហររបស់ខ្លួនមកខ្លះ បើសិនមិនចង់បាត់បង់ប្រភពចំណូលពីការលក់ឧស្ម័នទៅឲ្យអឺរ៉ុប។
នៅថ្ងៃពុធម្សិលមិញ អ្នកនាំពាក្យរបស់ប្រធានាធិបតីរុស្ស៊ី បានអះអាងដែរថា រដ្ឋាភិបាលកំពុងគិតគូរផងដែរពីការទូទាត់ជាលុយរូប្លិ៍ សម្រាប់ការទិញទំនិញ និងវត្ថុធាតុដើមផ្សេងៗទៀតរបស់រុស្ស៊ី។
អាល្លឺម៉ង់ និងអូទ្រីសត្រៀមខ្លួន ក្នុងករណីរុស្ស៊ី ផ្អាក ឈប់លក់បង្ហូរឧស្ម័ន
នៅក្រោយដាក់ទណ្ឌកម្មសេដ្ឋកិច្ចទៅលើរុស្ស៊ី ដែលបានធ្វើសង្រ្គាមឈ្លានពានអ៊ុយក្រែន ប្រទេសនៅអឺរ៉ុបបានកែតម្រូវផែនការថាមពលរបស់ខ្លួនឡើងវិញ ដើម្បី កាត់បន្ថយការពឹងផ្អែកលើថាមពលប្រេង និងឧស្ម័នរបស់រុស្ស៊ី។
នៅថ្ងៃពុធទី ៣០មីនា អាល្លឺម៉ង់ ដែលទិញប្រេង និងឧស្ម័នពីរុស្ស៊ី ច្រើនជាងគេ នៅអឺរ៉ុបបានប្រកាសផែនការអាសន្នសម្រាប់ត្រៀមខ្លួនទប់ទល់ការខ្វះខាតថាមពលក្នុងករណីរុស្ស៊ី ឈប់បង្ហូរលក់ឧស្ម័ន ទៅប្រទេសណាដែលមិនព្រមទូទាត់ជាលុយរូប្លិ៍។
ផែនការបីចំណុចរបស់អាល្លឺម៉ង់ មាននិយាយថា រដ្ឋាភិបាលនឹងតាមដានជាប់ជានិច្ចដំណើរការបង្ហូរលក់ឧស្ម័នពីរុស្ស៊ី បរិមាណស្តុក ឧស្ម័ន និងការដាក់កម្រិតសម្រាប់ការប្រើប្រាស់ចាំបាច់ នៅក្នុងប្រទេស (សាលារៀន មន្ទីរពេទ្យ និងស្ថាប័នរដ្ឋ) ក្នុងករណីកើតមានវិបត្តិខ្វះថាមពល ដោយសាររុស្ស៊ី មិនលក់បង្ហូរ ប្រេង ឧស្ម័ន។
ដូចអាល្លឺម៉ង់ អូទ្រីសក៏បានប្រកាសផែនការអាសន្នស្តីពីថាមពល ដើម្បីធានាថា អូទ្រីសត្រូវចាត់វិធានការបន្ទាន់ ក្នុងករណីរុស្ស៊ីឈប់បង្ហូរលក់ឧស្ម័នទៅឲ្យអូទ្រីស។ បារាំង និងអ៊ីតាលី ចាត់វិធានការអាសន្នបឋម ស្តីពីថាមពល ចាប់តាំងពីរុស្ស៊ីចូលធ្វើសង្រ្គាមឈ្លានពានអ៊ុយក្រែន។
ហេតុអ្វីលោកពូទីនចង់ឲ្យគេទូទាត់ជាលុយរូប្លិ៍?
លោកប្រធានាធិបតីពូទីនបានប្រកាសកាលពីថ្ងៃទី ២៣ មីនា ថា ប្រទេសដែលមិនមែនជាមិត្តរបស់រុស្ស៊ី ដែលបានដាក់ទណ្ឌកម្មលើរុស្ស៊ី ក្នុងរឿងធ្វើសង្រ្គាមនៅអ៊ុយក្រែន ត្រូវតែ បង់ជាលុយរូប្លិ៍ នៅពេលទិញប្រេងឬឧស្ម័ន ពីរុស្ស៊ី ព្រោះរុស្ស៊ីលែងទូទាត់ជាលុយផ្សេងទៀតហើយ។ លោកពូទីនធ្លាប់បានលម្អិតថា រុស្ស៊ីសម្រេចចិត្តយ៉ាងដូច្នេះ ដើម្បីឆ្លើយតបទៅនឹងទណ្ឌកម្ម របស់ក្រុមប្រទេសដែលបានបង្កកទ្រព្យធនរុស្ស៊ីចំនួន ៣០០ពាន់លានដុល្លារនៅបរទេស ក្រោយពីរុស្ស៊ីចេញធ្វើប្រតិបត្តិការយោធានៅអ៊ុយក្រែន។
រុស្ស៊ីចាប់តម្រូវឲ្យគេទិញឧស្ម័ន ប្រេងរុស្ស៊ី ដោយប្រើលុយរូប្លិ តបនឹងទណ្ឌកម្មរបស់អាមេរិក និងប្រទេសនៅអឺរ៉ុប។ ការសម្រេចប្រើលុយរូប្លិ៍សម្រាប់ការទិញនាំចូលប្រេង និងឧស្ម័នរបស់រុស្ស៊ី មិនមែនធ្វើឡើងដើម្បីគ្រាន់តែជាសងសឹក តែប៉ុណ្ណោះទេ ប៉ុន្តែ វាជាយុទ្ធសាស្រ្តមួយរបស់រុស្ស៊ី ដើម្បី អាចដកខ្លួនចេញពីទណ្ឌកម្មសេដ្ឋកិច្ច និងដើម្បីបង្កើនតម្លៃលុយរូប្លិ៍ឡើងវិញ។
ការប្រកាសរបស់ប្រធានាធិបតីរុស្ស៊ីដែលចង់ឲ្យអ្នកទិញប្រេង និងឧស្ម័នរុស្ស៊ី ត្រូវបង់ជាលុយរូប្លិ៍ បានធ្វើឲ្យ តម្លៃរូបិយបណ្ណរុស្ស៊ី លុយរូប្លិ កើនឡើងខ្ពស់ឡើងវិញ បន្ទាប់ពីធ្លាក់ដាំក្បាលចុះខ្លាំង នៅក្រោយការប្រកាសដាក់ទណ្ឌកម្មសេដ្ឋកិច្ចពីសំណាក់ប្រទេសលោកខាងលិច។ ដោយសារលុយរូប្លិធ្លាក់ចុះថោក ប្រៀបធៀបនឹងលុយដុល្លារ រុស្ស៊ី ជួបបញ្ហាអតិផរណា និងមិនសូវចំណេញច្រើនពីការនាំចេញរបស់ខ្លួន ដែលជាហេតុធ្វើឲ្យរុស្ស៊ី ខ្វះថវិកាសម្រាប់ធ្វើសង្រ្គាម។ ដោយប្រកាសឲ្យគេទូទាត់ការទិញប្រេង ដោយប្រើលុយរូប្លិ លោកពូទីនសង្ឃឹមថា តម្លៃលុយរូប្លិ៍ នឹងកើនឡើងតម្លៃខ្ពស់។ ដោយមើលឃើញថា លុយរូប្លិ មានតម្លៃខ្ពស់ នោះក្រុមហ៊ុនមួយចំនួនអាចធ្វើជំនួញដោះដូរ ជាមួយរុស្ស៊ី តាមរយៈ ការទូទាត់ជាលុយរូប្លិ៍ផ្ទាល់ ដោយមិនចាំបាច់ឆ្លងកាត់ ប្រើប្រាស់លុយដុល្លារ ឬលុយអឺរ៉ូ។ ការរំដោះសេដ្ឋកិច្ចរុស្ស៊ីចេញពីលុយដុល្លារ គឺជាក្តីស្រមៃតាំងពីយូរហើយរបស់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ