អាមេរិកសម្រេចផ្តល់គ្រឿងសព្វាវុធធុនធំ ដល់អ៊ុយក្រែន ក្នុងតម្លៃ៨០០លានដុល្លារ
ចុះផ្សាយនៅថ្ងៃ៖
ស្តាប់ - ០៧:៤៣
កងទ័ពរុស្ស៊ីកំពុងតែប្រមូលផ្តុំកម្លាំង ដើម្បីវាយសម្រុកនៅភាគខាងកើត និងខាងត្បូងអ៊ុយក្រែន។ ដើម្បីជួយកងទ័ពអ៊ុយក្រែន លោក ចូ បៃដិន បានសម្រេចកាលពីល្ងាចថ្ងៃពុធទី១៣មេសា ផ្តល់គ្រឿងសព្វាវុធធុនធំ ក្នុងតម្លៃប្រមាណ៨០០លានដុល្លារ។ នេះគឺជាការបោះជំហានថ្មីមួយទៀត របស់សហរដ្ឋអាមេរិក នៅក្នុងសង្គ្រាមអ៊ុយក្រែន ព្រោះថាកន្លងមក រដ្ឋាភិបាលលោកចូ បៃដិន បានបដិសេធ មិនផ្តល់អាវុធធុនធំទេ ដោយផ្តល់តែគ្រឿងសម្ភារៈ និងអាវុធតូចតាចដើម្បីឲ្យអ៊ុយក្រែនការពារខ្លួនប៉ុណ្ណោះ។
លោក ចូ បៃដិន បាននិយាយទូរស័ព្ទជាមួយលោក វ្លូឌីមៀរ ហ្សេឡេនស្គី ប្រមាណជាងមួយម៉ោង កាលពីថ្ងៃពុធទី១៣មេសា។ ក្នុងពេលនិយាយគ្នានេះ លោក ចូ បៃដិន បានប្រាប់ទៅលោកហ្សេឡេនស្គី ថាលោកបានសម្រេច ផ្តល់ជំនួយយោធា ជាគ្រឿងសព្វាវុធ ទៅតាមការសំណូមពរ របស់ភាគីអ៊ុយក្រែន។ ជំនួយយោធា ដែលមានតម្លៃទឹកប្រាក់សរុប ប្រមាណ៨០០លានដុល្លារនេះ គឺមានដូចជាសម្ភារៈយោធា ដែលអាមេរិកធ្លាប់បានផ្តក់ឲ្យអ៊ុយក្រែនរួចហើយ ព្រមទាំងគ្រឿងសព្វាវុធធុនធំ ទំនើបៗថ្មីៗផ្សេងទៀត ដូចជារថក្រោះ រថពាសដែក ប្រព័ន្ធកាណុងនិងគ្រាប់កាំភ្លើងធំ ជាដើម។ល។ នេះបើផ្អែកតាមលិខិតប្រកាសរបស់សេតវិមាន។
កាណុង គ្រាប់មីស៊ីល រថក្រោះ ឧត្ថម្ភាគចក្រ ដ្រូនអត្តឃាត…
លោក John Kirby អ្នកនាំពាក្យក្រសួងការពារជាតិអាមេរិក បានចេញផ្សាយបញ្ជីរាយឈ្មោះសម្ភារៈ គ្រឿងសព្វាវុធដែលកងទ័ពអាមេរិក មានក្នុងស្តុកស្រាប់ ហើយដែលគេនឹងផ្តល់ទៅឲ្យអ៊ុយក្រែន ភ្លាមៗនេះតែម្តង។ គ្រឿងសព្វាវុធទាំងនោះមានដូចជា កាណុង M777 Howitzer ចំនួន១៨ដើម រួមជាមួយក្បាលគ្រាប់ប្លោង ទំហំ ១៥៥មីលីម៉ែត្រ ចំនួន៤ម៉ឺនគ្រាប់ ប្រព័ន្ធរ៉ាដាចល័ត ប្រឆាំងគ្រាប់ប្លោងចំនួន១០គ្រឿង និងប្រព័ន្ធរ៉ាដាប្រឆាំងមីស៊ីល ចំនួន២គ្រឿង ។
ក្រៅពីនេះ គឺមាន យានដ្រូនអត្តឃាត Switchblade ចំនួន៣០០គ្រឿង មីស៊ីល Javelin បាញ់ចេញពីលើស្មារ ចំនួន៥០០ដើម ព្រមទាំងមីស៊ីលកម្ទេចរថក្រោះ ជាច្រើនពាន់គ្រាប់ទៀត។ នៅក្នុងចំណោមយានយន្តវិញ គឺមានរថក្រោះដឹកកម្លាំងទ័ព ប្រភេទM113 ចំនួន ២០០គ្រឿង និងរថពាសដែកធុនតូច ប្រភេទ Humvee ចំនួន១០០គ្រឿងទៀត។ លើអាកាស អាមេរិកនឹង ផ្ទេរឧត្ថមម្ភាគចក្រ Mi-17 ផលិតនៅសូវៀត ចំនួន១១គ្រឿង។
ហើយនៅលើទឹកវិញ គឺអាមេរិក នឹងផ្តល់នាវាគ្មានមនុស្សបើក ប្រភេទថ្មីច្រឺងតែម្តង តែដោយមិនបញ្ជាក់ចំនួនទេ។ ដ្រូនបណ្តែតទឹកនេះ អាចបំពេញតួនាទីឈ្លបយកការណ៍ នៅលើទឹក និងនៅក្នុងបាតសមុទ្រ តាមរយៈប្រព័ន្ធចាប់រលកសញ្ញា របស់នាវាមុជទឹកបាតសមុទ្រ។
អាមេរិកប្តូរយុទ្ធសាស្ត្រ ហ៊ានលូកដៃកាន់តែជ្រៅក្នុងសង្គ្រាមនៅអ៊ុយក្រែន
កន្លងមក លោកហ្សេឡេនស្គី បានអំពាវនាវ សុំអាវុធធុនធំ ច្រើនលើកច្រើនសារណាស់ តែភាគីអាមេរិក មិនព្រមទេ ដោយមិនចង់លូកដៃចូលជ្រៅ នៅក្នុងសង្គ្រាមនៅអ៊ុយក្រែន។ បើគិតពី ត្រីមាសទី៤ ចុងឆ្នាំ២០២១មក អាមេរិកបានផ្តល់ជំនួយយោធា ដល់អ៊ុយក្រែន គិតជាទឹកប្រាក់ ប្រមាណ ២៤០០លានដុល្លាររួចហើយ ដោយមិនរាប់បញ្ចូលលើកនេះទេ។ ជាជំហានដំបូង អាមេរិកបានផ្តល់ជំនួយយោធាទៅឲ្យអ៊ុយក្រែន ជាគ្រឿងសម្ភារៈតូចតាច ដើម្បីឲ្យកងទ័ពអ៊ុយក្រែនប្រើប្រាស់ការពារខ្លួន។ ពោលគឺអាមេរិក បែងចែក ថាអាចជួយជាគ្រឿងសម្ភារៈការពារខ្លួន តែមិនមិនចង់ជួយជាគ្រឿងសព្វាវុធប្រើប្រាស់ក្នុងការវាយប្រហារទេ។
ក៏ប៉ុន្តែ អ្វីដែលយើងឃើញនាពេលនេះ គឺថា អាមេរិកហាក់លែងធ្វើការបែងចែកបែបនេះទៀតហើយ ពោលគឺយល់ព្រមជួយទាំងគ្រឿងសព្វាវុធធុនធំៗ ឲ្យអ៊ុយក្រែនវាយប្រហារ ទប់ទល់ជាមួយរុស្ស៊ី។ តែយ៉ាងណា វាក៏មិនទាន់ដល់ដំណាក់កាលខ្លាំង ដែលអាមេរិក ផ្តល់យន្តហោះចម្បាំង យន្តហោះទម្លាក់គ្រាប់ ទៅឲ្យអ៊ុយក្រែននោះដែរ។
បើតាមការពន្យល់របស់លោក John Kirby អ្នកនាំពាក្យក្រសួងការពារជាតិអាមេរិក គឺថាហេតុផលវាស្ថិតនៅលើការផ្លាស់ប្តូរសមរភូមិ និងយុទ្ធសាស្ត្រប្រយុទ្ធ។ មន្ត្រីអាមេរិករូបនេះ លើកឡើងថា សម្រាប់ពេលនេះ វាខុសពីពេលមុន ព្រោះកងទ័ពរុស្ស៊ី កំពុងតែប្រមូលកម្លាំងផ្តុំគ្នានៅតំបន់ដុនបាសតែមួយ លែងដាក់ពង្រាយ រប៉ាត់រប៉ាយច្រើនសមរភូមិ ដូចមុនទៀតហើយ។
ដូចយើងបានដឹងកន្លងមកហើយ យោងតាមការវិភាគជាច្រើន គឺថា លោកពូទីន ចង់វាយដណ្តើម យកជ័យជំនះនៅតំបន់ដុនបាស និងតំបន់ភាគខាងត្បូង តាមបណ្តោយឆ្នេរសមុទ្រឲ្យបាន ដើម្បីយកទៅអួតប្រជាជនរុស្ស៊ី ក្នុងឱកាសបុណ្យខួប ថ្ងៃទី៩ឧសភា ជ័យជំនះនៃកងទ័ពសូវៀត លើរបបអ៊ីទ្លែណាហ្ស៊ី។
លោក John Kirby លើកឡើងថា តំបន់ដុនបាស ភាគខាងកើតអ៊ុយក្រែននេះ ជាតំបន់មានសណ្ឋានដីរាបស្មើ វាលធំ មិនដូចនៅភាគខាងជើងរដ្ឋធានីកៀវទេ។ ដូច្នេះ មានន័យថា កងទ័ពរុស្ស៊ី អាចនឹងប្រើរថក្រោះ ព្រមទាំងប្រព័ន្ធកាំភ្លើងធំ បាញ់គ្រាប់វាយប្រហារទីតាំងនីមួយសិន មុននឹងបញ្ជូនកម្លាំងទ័ពថ្មើរជើងឲ្យចូលមក។ ដូច្នេះហើយ អ្វីដែលកងទ័ពអ៊ុយក្រែនត្រូវការបំផុតនាពេលនេះ គឺកាណុង និងគ្រាប់ ដើម្បីបាញ់កម្ទេចរថក្រោះរបស់រុស្ស៊ី។
នាវាចម្បាំងរុស្ស៊ី Moskva រងអគ្គីភ័យនៅក្នុងសមុទ្រខ្មៅ
ដោយឡែក យោងតាមប្រភពព័ត៌មានជាច្រើន ព្រមទាំងរូបថតជាបន្ទាល់ផង គឺនាវាចម្បាំងដ៏ធំរបស់រុស្ស៊ី ឈ្មោះ Moskva កំពុងតែត្រូវភ្លើងឆេះ យ៉ាងដំណំ នៅក្នុងសមុទ្រខ្មៅ មិនឆ្ងាយប៉ុន្មានពីឆ្នេរអ៊ុយក្រែន នៅព្រឹកថ្ងៃព្រសហ្បតិ៍នេះ។ លោក Maxime Martchenko អភិបាលក្រុងអូដេសា ដែលជាទីក្រុងកំពង់ផែមាត់សមុទ្ររបស់អ៊ុយក្រែន បានអបអរសាទរថា គឺមីស៊ីល Neptune របស់អ៊ុយក្រែន ដែលបានបាញ់ចំនាវាចម្បាំង Moskva បង្កឲ្យមានអគ្គីភ័យ។ លោក Serghuii Bratchouk អ្នកនាំពាក្យរដ្ឋបាលយោធាអ៊ុយក្រែន ប្រចាំតំបន់អូដេសា បានប្រកាសតាមបណ្តាញ Telegram ថាគឺគ្រាប់មីស៊ីលរបស់អ៊ុយក្រែន ដែលបានបាញ់ចំនាវាចម្បាំង Moskva របស់រុស្ស៊ី។
ដូចគ្នាដែរ លោក Oleksii Arestovitch ទីប្រឹក្សារបស់លោកហ្សេឡេនស្គី បានប្រកាសបែបចំអក លើបណ្តាញYoutube ថា នាវាចម្បាំង Moskva របស់រុស្ស៊ី ទើបតែបានជួបរឿងគួរឲ្យភ្ញាក់ផ្អើលមួយ។ មិនដឹងថីទេ ស្រាប់តែអគ្គីភ័យកំពុងឆាបឆេះយ៉ាងខ្លាំងលើនាវានេះ! ជាមួយនឹងខ្យល់ ព្រមទាំងរលកសមុទ្របោកបក់យ៉ាងខ្លាំងបែបនេះ មិនដឹងថាពេលណា ក្រុមសង្គ្រោះនឹងមកជួយរំដោះទាហានរុស្ស៊ីចំនួន៥១០នាក់ ដែលជាប់នៅលើនោះ បានទាន់ពេលវេលាទេ។
ដោយឡែក ភាគីរុស្ស៊ីវិញ គេមិនបានបញ្ជាក់ថា នាវាចម្បាំងនេះ បានរងគ្រាប់មីស៊ីលទេ។ យោងតាមក្រសួងការពារជាតិរុស្ស៊ី ផ្សាយដោយបណ្តាញព័ត៌មានរដ្ឋរុស្ស៊ី គឺនាវានេះបានជួបគ្រោះអគ្គិភ័យ ហើយបានធ្វើឲ្យផ្ទុះគ្រាប់ដែលគេស្តុកទុកនៅលើនោះ តែមិនបណ្តាលឲ្យនាវានេះលិចក្នុងសមុទ្រទេ។ ប្រភពដដែលនេះ អះអាងថា កងទាហានទាំងអស់ ត្រូវបានជន្លៀសចេញពីនាវានេះហើយ ហើយគេកំពុងតែពិនិត្យ ស្រាវជ្រាវរកប្រភពបណ្តាលឲ្យមានអគ្គីភ័យនេះ។
គួរបញ្ជាក់ដែរថា នាវា Moskva នេះ ត្រូវបានកងទ័ពរុស្ស៊ីប្រើប្រាស់ ដើម្បីបាញ់មីស៊ីល ក្នុងសង្គ្រាមនៅស៊ីរី។ ហើយនៅក្នុងសង្គ្រាមអ៊ុយក្រែន គឺប្រហែលជាកងទ័ពរុស្ស៊ី ក៏បានបាញ់មីស៊ីលជាច្រើនគ្រាប់ ចេញពីនាវានេះដែរ សំដៅទៅលើក្រុងអូដេសា និងតំបន់ផ្សេងៗទៀត នៅភាគខាងត្បូងអ៊ុយក្រែន។ បើអគ្គីភ័យនេះ បណ្តាលមកពីមីស៊ីលរបស់អ៊ុយក្រែនមែន នោះវាគឺជាលើកទីមួយហើយ គិតចាប់ថ្ងៃចាប់ផ្តើមសង្គ្រាមមក ដែលកងទ័ពរុស្ស៊ី ខូចខាតគ្រឿងសម្ភារៈធ្ងន់ធ្ងរខ្លាំងបែបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ