រុស្ស៊ីចាប់ផ្តើមបើកការវាយប្រហារនៅតំបន់ដុនបាស ខណៈអាវុធអាមេរិកចាប់ផ្តើមទៅដល់ដៃអ៊ុយក្រែន
ចុះផ្សាយនៅថ្ងៃ៖
ស្តាប់ - ០៦:២១
កងទ័ពរុស្ស៊ី ដែលបានដកថយពីខាងជើងអ៊ុយក្រែន ដើម្បីប្រមូលកម្លាំងមកវាយប្រហារនៅភាគខាងកើត និងខាងត្បូងនោះ ពេលនេះ បានចាប់ផ្តើមបើកការវាយប្រហារហើយ នៅតំបន់ដុនបាស ដែលស្ថិតនៅភាគខាងកើតអ៊ុយក្រែន។ នេះបើផ្អែកតាមការប្រកាសឲ្យដឹង ពីលោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី ។ តែយ៉ាងណា លោកហ្សេឡេនស្គី បានអះអាងថា កងទ័ពអ៊ុយក្រែន នឹងបន្តតស៊ូការពារបូរណភាពដែនដី មិនថាចោរឈ្លានពានរុស្ស៊ី មានគ្នាច្រើនប៉ុណ្ណានោះឡើយ។ ជាមួយគ្នានេះដែរ យោងតាមប្រភពពីក្រសួងការពារជាតិអាមេរិក អាវុធដែលអាមេរិកបានសន្យាជួយអ៊ុយក្រែន ពេលនេះមួយផ្នែកបានទៅដល់អ៊ុយក្រែនហើយ នៅថ្ងៃអង្គារនេះ។
ប្តូរយុទ្ធសាស្ត្រ ទៅវាយយកតំបន់ដុនបាស
ដូចយើងបានដឹងហើយ ថាកងទ័ពរុស្ស៊ីបានប្តូរយុទ្ធសាស្ត្រប្រយុទ្ធ បន្ទាប់ពីតំណាក់កាលដំបូង ឃើញថាមិនជោគជ័យសោះ ដោយសារតែកម្លាំងនៅរាយប៉ាយច្រើនកន្លែងពេក។ ដោយមិនអាចវាយសម្រុកយករដ្ឋធានីកៀវបាន ទីបំផុត កងទ័ពរុស្ស៊ីបានដកថយចេញពីខាងជើងអ៊ុយក្រែន ហើយបានប្រមូលកម្លាំងឡើងវិញ ដើម្បីសម្រុកវាយប្រហារ តែនៅភាគខាងកើតទេ គឺតំបន់ដុនបាសនេះឯង។ តំបន់ដុនបាស ដែលយើងដឹងថាដែនដីមួយផ្នែក ស្ថិតក្នុងដៃរបស់ក្រុមឧទ្ទាមនិយមរុស្ស៊ី នោះគឺសាធារណរដ្ឋផ្តាច់ខ្លួន លូហ្កង់ស្គ័ និង សាធារណរដ្ឋដូណេតស៍។
នៅក្នុងវីដេអូ ផ្សាយផ្ទាល់តាមបណ្តាញ Telegram កាលពីយប់ថ្ងៃចន្ទម្សិលមិញ លោកវ្លូឌីមៀរ ហ្សេឡេនស្គី បានលើកឡើងថា “យើងអាចបញ្ជាក់បានហើយថា ពេលនេះគឺកងទ័ពរុស្ស៊ីបានចាប់ផ្តើមបើកការវាយប្រហារទ្រង់ទ្រាយធំ មកលើតំបន់ដុនបាសហើយ។ ការវាយប្រហារ ដែលពួករុស្ស៊ីបានត្រៀមរៀបចំអស់ជាច្រើនថ្ងៃមកហើយ។ កម្លាំងទាហានរុស្ស៊ីច្រើនណាស់ ដែលនឹងមកចូលរួមក្នុងការវាយប្រហារនេះ”។ តែលោកហ្សេឡេនស្គី បានបន្ថែមថា ទោះជាទ័ពរុស្ស៊ីមានគ្នាច្រើនយ៉ាងណាក៏ដោយ ក៏កងទ័ពអ៊ុយក្រែនមិនរាថយដែរ គឺនឹងបន្តប្រយុទ្ធការពារទឹកដីអ៊ុយក្រែនជានិច្ច។
បើយោងតាមមន្ត្រីក្រសួងការពារជាតិអាមេរិក ដោយសុំមិនបញ្ចេញឈ្មោះ គឺរុស្ស៊ី បានបន្ថែមកម្លាំង ចំនួន១១កងវីរសេនាតូចទៀត ដែលធ្វើឲ្យចំនួនសរុប មាន៧៦កងវីរសេនាតូច នៅភាគខាងកើតអ៊ុយក្រែន។
ការបដិសេធរបស់រុស្ស៊ី មិនព្រមបើកច្រកផ្លូវជន្លៀសប្រជាជនស៊ីវីល ជាភស្តុតាងនៃឧក្រិដ្ឋកម្មសង្គ្រាម
កងទ័ពរុស្ស៊ី បានចាប់ផ្តើម បាញ់គ្រាប់កាំភ្លើងធំ និងមីស៊ីលច្រើនខ្លាំងណាស់ គិតចាប់ពីយប់ថ្ងៃចន្ទ ម្សិលមិញមក។ ផ្អែកតាមលោក Serguii Gaidai អភិបាលអ៊ុយក្រែន នៃតំបន់លូហ្កង់ស្គ៍ គឺថាកងទ័ពរុស្ស៊ីកំពុងទម្លាក់គ្រាប់ នៅ Roubijné Popasna។ ចំណែកក្រុង Kreminna បានធ្លាក់ទៅក្នុងដៃកងទ័ពរុស្ស៊ីហើយ។ លោក Serguii Gaidai ក៏បានអំពាវនាវផងដែរ ឲ្យរុស្ស៊ីត្រូវតែបើកច្រកមនុស្សធម៌ ដើម្បីឲ្យប្រជាជនស៊ីវីលចាកចេញពីទីលានប្រយុទ្ធនៅតំបន់លូហ្កងស្ក៍។
ដោយឡែក លោកស្រី Iryna Verechtchouk ឧបនាយករដ្ឋមន្ត្រីអ៊ុយក្រែន បានប្រកាស កាលពីថ្ងៃចន្ទម្សិលមិញ អំពាវនាវ ឲ្យរុស្ស៊ីបើកច្រកមនុស្សធម៌នៅ Berdyansk និង នៅ Marioupol។ យោងតាមរដ្ឋបាលក្រុងម៉ារីយូប៉ូល មានប្រជាជនស៊ីវីល ប្រមាណ១០០០នាក់ ភាគច្រើនជាស្រ្តី កុមារ និងមនុស្សចាស់ កំពុងតែជាប់គាំង នៅក្នុងកន្លែងលាក់ខ្លួនក្រោមដី ក្នុងបរិវេនរោងចក្រស្លរដែក Azovstal ។ លោកស្រីឧបនាយករដ្ឋមន្ត្រីអ៊ុយក្រែន បានលើកឡើងថា ការបដិសេធរបស់រុស្ស៊ី មិនព្រមបើកច្រកផ្លូវជន្លៀសប្រជាជនស៊ីវីលចេញពីទីលានប្រយុទ្ធ គឺវានឹងក្លាយជាភស្តុតាង សម្រាប់ថ្ងៃខាងមុខ បញ្ជាក់ថារុស្ស៊ីបានធ្វើអំពើឧក្រិដ្ឋកម្មសង្គ្រាម។
នៅលូហ្កង់ស្ក៍ និង ដូណេតស៍ កងទ័ពអ៊ុយក្រែនអះអាងថា បានបាញ់កម្ទេចរថក្រោះរុស្ស៊ីចំនួន១០ រថពាសដែកចំនួន១៨គ្រឿង រថយន្តដឹកទាហានច្រើនគ្រឿង ព្រមទាំងប្រព័ន្ធកាំភ្លើងធំ និងកាណុងកាំភ្លើងត្បាល់មួយផងដែរ។
ទន្ទឹមគ្នានេះ កងទ័ពរុស្ស៊ីមិនមែនសម្រុកវាយប្រហារតែនៅខាងកើតទេ។ រុស្ស៊ីក៏នៅតែបន្តបាញ់ប្លោងមីស៊ីលទៅភាគខាងលិចដែរ ទៅលើទីតាំងយុទ្ធសាស្ត្រមួយចំនួន។ ជាក់ស្តែង កាលណពីថ្ងៃម្សិលមិញ រុស្ស៊ីបានបាញ់មីស៊ីល កម្ទេចទីតាំងស្តុកអាវុធមួយកន្លែង នៅក្បែរក្រុង Lvin។
អាមេរិកបញ្ជូនអាវុធទៅដល់ និងចាប់ផ្តើមបង្វឹកទាហានអ៊ុយក្រែន
យោងតាមប្រភពព័ត៌មាន ពីមន្ទីរបញ្ចកោណ គឺយន្តហោះដឹកគ្រឿងសព្វាវុធ ចំនួន៤ជើងហោះហើរ បានហោះទៅដល់ក្បែរព្រំដែនអ៊ុយក្រែនហើយ ដើម្បីរៀបចំប្រគល់គ្រឿងសព្វាវុធ ទៅឲ្យកងទ័ពអ៊ុយក្រែន។ យន្តហោះទី៥ នឹងហោះទៅដល់ រវាងថ្ងៃស្អែកនេះហើយ។ នេះគឺជាគ្រឿងសព្វាវុធ ដែលរដ្ឋាភិបាលអាមេរិក បានសន្យាជួយអ៊ុយក្រែន ក្នុងតម្លៃសរុបចំនួន ៨០០លានដុល្លារ។
ដោយឡែក យោងតាមលោក John Kirby អ្នកនាំពាក្យវិមានបញ្ចកោណ គឺអ្នកជំនាញកងទ័ពអាមេរិក នឹងធ្វើការបង្វឹកកងទ័ពអ៊ុយក្រែន ឲ្យចេះប្រើ ប្រព័ន្ធកាំភ្លើងធំ M777 Howitzer។ ការហ្វឹកហាត់ នឹងធ្វើនៅក្នុងប្រទេស ក្បែរខាងជាប់អ៊ុយក្រែន។ ប្រព័ន្ធកាំភ្លើងធំ M777 Howitzer គឺជាប្រព័ន្ធកាំភ្លើងធំសេរីថ្មី របស់កងទ័ពអាមេរិក។ អ្នកនាំពាក្យក្រសួងការពារជាតិអាមេរិក បញ្ជាក់ថា កងទ័ពអ៊ុយក្រែន ធ្លាប់ប្រើតែកាណុងប្រើគ្រាប់ទំហំ ១៥២មីលីម៉ែត្រ ផលិតនៅរុស្ស៊ី។ តែកាណុង M777 Howitzer ថ្មីរបស់អាមេរិក ប្រើគ្រាប់ទំហំ១៥៥មីលីម៉ែត្រ ដែលតម្រូវឲ្យកងទ័ពអ៊ុយក្រែន ត្រូវតែហ្វឹកហាត់ពីរបៀបប្រើ។
បន្ថែមទណ្ឌកម្មលើរុស្ស៊ី
ជាមួយគ្នានេះ លោក John Kirby បានអះអាងថា រុស្ស៊ីកំពុងតែចាប់ផ្តើមជួបការលំបាកហើយ ក្នុងវិស័យផលិតគ្រឿងសព្វាវុធទំនើប។ យោងតាមលោក John Kirby គឺថារុស្ស៊ី កំពុងតែជួបបញ្ហា មិនអាចមានគ្រឿងផ្សំបច្ចេកវិទ្យាអេឡិចត្រូនិក ទំនើប យកមកផលិតអាវុធទំនើបបានទេ។ ជាក់ស្តែង ប្រព័ន្ធបាញ់ និងមីស៊ីល បញ្ជាពីចម្ងាយ។ គ្រឿងផ្សំបច្ចេកវិទ្យាទាំងនេះ គឺផលិតនៅតៃវ៉ាន់ និងកូរ៉េខាងត្បូង។ តែឥឡូវ ប្រទេស២នេះ មិនអាចផ្គត់ផ្គង់ឲ្យរុស្ស៊ីទៀតបានទេ ព្រោះដោយសារតែទណ្ឌកម្មរបស់អាមេរិក។
យ៉ាងណាមិញ នៅរសៀលថ្ងៃអង្គារនេះដែរ លោក ចូ បៃដិន នឹងបើកការប្រជុំពីចំងាយមួយទៀត ជាមួយថ្នាក់ដឹកនាំក្រុមប្រទេសសម្ព័ន្ធមិត្តអាមេរិកទាំងអស់ ដើម្បីនិយាយគ្នាពីជំហានបន្ទាប់ ក្នុងការជួយអ៊ុយក្រែន។ បើតាមការស្មាន គឺគេអាចនិយាយគ្នាអំពីទណ្ឌកម្មបន្ថែមទៀត ដាក់ទៅលើរុស្ស៊ី។ លោក Ned Price អ្នកនាំពាក្យសេតវិមាន បានអះអាងថា រដ្ឋាភិបាលអាមេរិក រួមជាមួយសម្ព័ន្ធមិត្ត នឹងរិះរកវិធីថ្មីទៀត នឹងបន្តដាក់សម្ពាធ បន្ថែមទណ្ឌកម្មហិរញ្ញវត្ថុ ព្រមទាំងទណ្ឌកម្មសេដ្ឋកិច្ចទៅលើរុស្ស៊ី ធ្វើឲ្យរុស្ស៊ីដឹងខ្លួនថាកំពុងធ្វើខុសធ្ងន់ធ្ងរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ