កិច្ចប្រជុំG20 ជួបភាពរអាក់រអួល ក្នុងបរិបទសង្គ្រាមនៅអ៊ុយក្រែន
ចុះផ្សាយនៅថ្ងៃ៖
ស្តាប់ - ០៦:៣៩
ថ្ងៃពុធទី២០មេសានេះ ក្រុមប្រទេសសេដ្ឋកិច្ចនាំមុខ G20 ត្រូវបើកកិច្ចប្រជុំ ដោយមានឥណ្ឌូណេស៊ីជាប្រធានដឹកនាំ។ ខណៈដែលកូវីដនៅតែមិនទាន់ទៅណាឆ្ងាយនោះ បរិបទសង្គ្រាមនៅអ៊ុយក្រែន កំពុងតែធ្វើឲ្យសេដ្ឋកិច្ចពិភពលោក ជួបបញ្ហាប្រឈមជាច្រើនបន្ថែមទៀត ទាក់ទិននឹងការឡើងថ្លៃទំនិញស្បៀងអាហារ ទំនិញថាមពល ព្រមទាំងវិបត្តិលើទីផ្សារហិរញ្ញវត្ថុ។ ជាងនេះទៀត កិច្ចប្រជុំ G20 នៅថ្ងៃនេះ ក៏ជួបបញ្ហារអាក់រអួល ដោយសារតែមានប្រទេសខ្លះ បានធ្វើពហិការ ព្រោះមិនចង់ជួបប្រជុំជាមួយរុស្ស៊ី។
ពហិការ ប្រឆាំងវត្តមានរុស្ស៊ីក្នុងកិច្ចប្រជុំ
ថ្ងៃពុធ ទី២០មេសា រដ្ឋមន្ត្រីសេដ្ឋកិច្ចហិរញ្ញវត្ថុ រួមជាមួយតំណាងធនាគារកណ្តាល របស់ប្រទេសសេដ្ឋកិច្ចនាំមុខG20 ត្រូវជួបប្រជុំគ្នា ក្រោមការដឹកនាំរបស់ឥណ្ឌូណេស៊ី ដែលជាប្រធានវិលជុំ។ តែកិច្ចប្រជុំនៅថ្ងៃនេះ ត្រូវរអាក់រអួលខ្លាំងណាស់ ដោយសារតែមានវត្តមានរបស់រុស្ស៊ី ចូលរួមដែរ។ លោក Anton Silouanov រដ្ឋមន្ត្រីក្រសួងហិរញ្ញវត្ថុរុស្ស៊ី នឹងដឹកនាំគណប្រតិភូរ ចូលរួមប្រជុំដែរ។
ដោយឡែក ក្រុមប្រទេសលោកខាងលិច ដូចជាបារាំង អង់គ្លេស និង អាមេរិកជាដើម ធ្លាប់បានទាមទារ ថាត្រូវតែហាមរុស្ស៊ី មិនឲ្យចូលប្រជុំនៅថ្ងៃនេះ។ តែដោយគ្មានការសម្រេចណាមួយ រដ្ឋមន្ត្រីហិរញ្ញវត្ថុបារាំង អង់គ្លេស និង អាមេរិក បានប្រកាសរួមគ្នាថា គេនឹងចូលរួមប្រជុំតែពេលបើកឆាកដំបូង ដែលគេនិយាយពីបញ្ហារួមរបស់ពិភពលោកតែប៉ុណ្ណោះ។ ដល់ពេលដែលភាគីរុស្ស៊ីត្រូវថ្លែងការណ៍ បញ្ចេញយោបល់ គឺរដ្ឋមន្ត្រីប្រទេសទាំងនេះ នឹងមិនចូលរួមស្តាប់ទេ។ នេះគឺជាការធ្វើពហិការប្រឆាំងរុស្ស៊ី ដែលបានធ្វើសង្គ្រាមឈ្លានពាននៅអ៊ុយក្រែន។
ដោយឡែក ឥណ្ឌូណេស៊ី ដែលជាប្រធានវិលជុំ បានបញ្ជាក់ថា ខ្លួនចង់នៅកណ្តាល មិនចង់យកបញ្ហាវិបត្តិអ៊ុយក្រែន មកឡូកឡំក្នុងអង្គប្រជុំG20ទេ។ វត្តមានរបស់រុស្ស៊ី ក្នុងកិច្ចប្រជុំនេះ គឺត្រូវបានការពារផងដែរ ដោយប្រទេសសមាជិកG20 ផ្សេងទៀត ដូចជាចិន អាហ្វ្រិកខាងត្បូង និង អារ៉ាប៊ីសាអូឌីតជាដើម។ ដូច្នេះ យើងឃើញថា បរិបទសង្គ្រាមនៅអ៊ុយក្រែន វត្តមានរបស់រុស្ស៊ី កំពុងតែធ្វើឲ្យកិច្ចប្រជុំនេះរអាក់រអួល ហើយធ្វើឲ្យក្រុមប្រទេសសេដ្ឋកិច្ចនាំមុខទាំង២០ ត្រូវពុះចែកគ្នាជា២ក្រុមថែមទៀត។
“មិនឲ្យរុស្ស៊ីយកវេទិកាប្រជុំG20 ដើម្បីឃោសនាកុហកបោកប្រាស់ ដោយគ្មានការឆ្លើយតប”
មានប្រទេសខ្លះ ដូចជាអាល្លឺម៉ង់ ជាដើម បានអះអាងថា គេនឹងមានវត្តមានប្រជុំជាមួយរុស្ស៊ី ព្រោះមិនចង់ឲ្យរុស្ស៊ីនិយាយឃោសនា កុហកប្រទេសផ្សេងទៀត ដោយគ្មានការឆ្លើយតបណាមួយ។ លោក Christian Lindner រដ្ឋមន្ត្រីហិរញ្ញវត្ថុអាល្លឺម៉ង់ បានប្រាប់កាសែត Bild ថា រដ្ឋាភិបាលអាល្លឺម៉ង់ នឹងមិនទុកឲ្យ ភាគីរុស្ស៊ី ដើរនិយាយកុហក ឃោសនាការពារខ្លួន ដោយស្រួលៗ នៅចំពោះមុខអង្គប្រជុំG20 នោះឡើយ។ អាល្លឺម៉ង់នឹងមានវត្តមាន ចាំឆ្លើយផ្ទប់ទៅវិញ។ អាល្លឺម៉ង់នឹងបរិហារ ចំពោះអំពើឈ្លានពាន ដែលរុស្ស៊ីកំពុងតែធ្វើសង្គ្រាម សម្លាប់ជីវិតប្រជាជនអ៊ុយក្រែន។
ដោយឡែក យោងតាមប្រភពពីក្រសួងសេដ្ឋកិច្ចបារាំង គឺអាចមានប្រទេសច្រើន ដែលចង់ឲ្យមានការប្រកាសថ្កោលទោសរុស្ស៊ី ទាក់ទិននឹងសង្គ្រាមនៅអ៊ុយក្រែន។ បារាំង និងអាមេរិក ក៏បានទាមទារផងដែរ ឲ្យរដ្ឋមន្ត្រីហិរញ្ញវត្ថុអ៊ុយក្រែន លោក Serguii Martchenko មានវត្តមានប្រជុំG20 នៅថ្ងៃនេះដែរ។ តែយ៉ាងណា គ្មានការបញ្ជាក់ណាមួយ ថាគេបានយល់ព្រមទេ។
លោកស្រី Janet Yellen រដ្ឋមន្ត្រីហិរញ្ញវត្ថុអាមេរិក អះអាងថាលោកស្រី នឹងជួបប្រជុំដាច់ដោយឡែក ជាមួយសមភាគីអារ៉ាប៊ីសាអូឌីត និង អាហ្វ្រិកខាងត្បូង ដើម្បីព្យាយាម ប៉ះប៉ូវភាពប្រេះស្រាំ រង្គាសចិត្ត ទាក់ទិននឹងបញ្ហាសង្គ្រាមនៅអ៊ុយក្រែននេះ។ បើតាមប្រភពខ្លះ គឺអាមេរិក ចង់យកវេទិកានេះ អំពាវនាវ ឲ្យមានការថ្កោលទោស និងដាក់ទណ្ឌកម្មសេដ្ឋកិច្ចលើរុស្ស៊ីបន្ថែមទៀត។ តែយ៉ាងណា បរិបទពេលនេះគឺតានតឹង បែកបាក់គ្នាណាស់។ មិនប្រាកដថា នឹងមានការត្រូវរ៉ូវគ្នា ចេញសេចក្តីថ្លែងការណ៍រួម ថ្កោលទោស និងដាក់ទណ្ឌកម្មលើរុស្ស៊ី ក្នុងក្របខណ្ឌG20 នោះឡើយ។
G20 ត្រូវតែស្រុះស្រួលគ្នា ដើម្បីជួយសេដ្ឋកិច្ចប្រទេសក្រីក្រ
ស្ថានភាពសេដ្ឋកិច្ចពិភពលោក កំពុងតែស្ថិតនៅក្នុងបរិបទមួយ ដ៏តានតឹងបំផុត។ ជំងឆ្លងរាតត្បាតកូវីដ១៩ នៅមិនទាន់ទៅណាឆ្ងាយ ឥឡូវមកបូកបន្ថែមដោយបញ្ហាសង្គ្រាមនៅអ៊ុយក្រែនទៀត។ ទីផ្សារហិរញ្ញវត្ថុរំជើបរំជួលខ្លាំង តម្លៃវត្ថុធាតុដើមឡើងថ្លៃ ធ្វើឲ្យតម្លៃស្បៀង ចំណីអាហារ ក៏កាន់តែឡើងថ្លៃ។ តម្លៃថាមពល ឧស្ម័ន ប្រេងឥន្ធនៈ ក៏ឡើងថ្លៃ។ ទាំងអស់នេះ វាបានបន្ថែមបន្ទុក ដល់ជីវភាព របស់ប្រជាជនក្រីក្រ ឲ្យកាន់តែជួបការលំបាក។ វិបត្តិសេដ្ឋកិច្ច ក៏អាចជាប្រភពមួយ ជំរុញឲ្យមានអស្ថិរភាពនយោបាយដែរ នៅតាមប្រទេសខ្លះដែលទន់ខ្សោយខ្លាំង។
មូលនិធិរូបិយវត្ថុអន្តរជាតិ និង ធនាគារពិភពលោក បានលើកឡើងថា វិបត្តិខ្វះស្បៀងអាហារក្នុងឆ្នាំ២០២២នេះ អាចនឹងប៉ះពាល់ទៅដល់ប្រជាជន ប្រមាណ១០លាននាក់បន្ថែមទៀត។ សេដ្ឋកិច្ចសកលលោក ដែលគេបានរំពឹងថាមានកំណើន ប្រមាណ ៤,៤% ត្រូវបានអ្នកជំនាញ ព្យាករណ៍ទាញទម្លាក់មកវិញ ត្រឹមតែ៣,៦%ប៉ុណ្ណោះ។
មូលនិធិរូបិយវត្ថុអន្តរជាតិ បានអំពាវនាវ ឲ្យG20 ត្រូវតែរួមគ្នាបន្តអនុវត្តយន្តការ សើរើបំណុល និង ពន្យាការទារបំណុល ក៏ដូចជាការប្រាក់ ពីប្រទេសក្រីក្រ។ ក្នុងចំណោមប្រទេសដែលមានប្រាក់ចំណូលទាប គឺមាន ៦០% សុទ្ធតែជាប់បំណុលច្រើនលើសពីសមត្ថភាពសង។ រដ្ឋាភិបាល ធនាគារកណ្តាល រួមជាមួយម្ចាស់បំណុលឯកជន ត្រូវតែរួមគ្នាពិចារណា ជួយប្រទេសក្រីក្រទាក់ទិននឹងបញ្ហាបំណុលនេះ។
ភាពស្រុះស្រួលគ្នា របស់ក្រុមប្រទេសសេដ្ឋកិច្ចនាំមុខទាំង២០ គឺមានសារៈសំខាន់ខ្លាំងណាស់។ ប្រទេសទាំង២០នេះ មានទម្ងន់សេដ្ឋកិច្ច ស្មើនឹង៨០% នៃសេដ្ឋកិច្ចពិភពលោក។ G20 ធ្លាប់បានចេញវិធានការជាក់ស្តែង និងមានប្រសិទ្ធភាពខ្ពស់ណាស់ ក្នុងអំឡុងពេលវិបត្តិហិរញ្ញវត្ថុឆ្នាំ២០០៨។ តែលើកនេះ ប្រឈមជាមួយភាពអាសន្នទាំងអស់នេះ យើងឃើញថា ក្រុមប្រទេសG20 កំពុងតែប្រេះស្រាំសាមគ្គី ដោយសារតែសង្គ្រាមនៅអ៊ុយក្រែន ដែលរុស្ស៊ីជាអ្នកបង្កឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ