ជិត៤០ប្រទេស ជួបប្រជុំគ្នានៅអាល្លឺម៉ង់ ដើម្បីរៀបចំយុទ្ធសាស្ត្រជួយអ៊ុយក្រែន
ចុះផ្សាយនៅថ្ងៃ៖
ស្តាប់ - ០៨:០៦
ថ្ងៃអង្គារទី២៦មេសា តំណាងក្រុមប្រទេសជិត៤០ប្រទេស ជួបប្រជុំគ្នានៅក្នុងប្រទេសអាល្លឺម៉ង់។ ការជួបប្រជុំ ក្រោមការផ្តួចផ្តើមរបស់សហរដ្ឋអាមេរិកនេះ គឺមានកម្មវត្ថុរួមគ្នាពិភាក្សា រៀបចំយុទ្ធសាស្ត្រយូរអង្វែង ដើម្បីជួយអ៊ុយក្រែន ទប់ទល់ជាមួយការឈ្លានពានរបស់រុស្ស៊ី។ ដោយឡែក ពីខាងរុស្ស៊ីវិញ លោក ស៊ែរហ្កី ឡាវរ៉ូវ ប្រមុខការទូតរុស្ស៊ី បានថ្លែងព្រមាន កាលពីយប់ថ្ងៃថា ការលូកដៃរបស់ក្រុមប្រទេសលោកខាងលិច អាចនឹងរុញវិបត្តិនេះ ឲ្យក្លាយជាសង្រ្គាមលោកលើកទី៣ ដោយចំហរតែម្តង។
រួមគ្នាជួយអ៊ុយក្រែន
កិច្ចប្រជុំដ៏ធំនេះ គឺសហរដ្ឋអាមេរិកជាអ្នកផ្តួចផ្តើមគំនិត ធ្វើនៅមូលដ្ឋានទ័ពអាមេរិក Ramstein ស្ថិតនៅភាគខាងលិចអាល្លឺម៉ង់។ មានប្រទេសចូលរួមជិត៤០ប្រទេស ដោយក្នុងនោះ ក៏មានអូស្ត្រាលី ជប៉ុនដែរ ទោះបីនៅឆ្ងាយ ពីអ៊ុយក្រែនមែន។ តែប្រទេសធំៗ២នេះ ចង់មកចូលរួម នឹងដកបទពិសោធន៍ នៅក្នុងសំណុំរឿងអ៊ុយក្រែន - រុស្ស៊ី ដោយសារតែគេបារម្ភណាស់ដែរ អំពីបញ្ហាវាទទីឥទ្ធិពលរបស់ចិន នៅក្នុងតំបន់អាស៊ីប៉ាស៊ីហ្វិក។ ស៊ុយអែត ហ្វាំងឡង់ ដែលកន្លងមកធ្លាប់ជាប្រទេសអព្យាក្រិត្យ នៅចន្លោះរវាងក្រុមប្រទេសលោកខាងលិច និង រុស្ស៊ី ក៏បានសម្រេចចិត្តមកចូលរួម ក្នុងការប្រជុំនេះដែរ ព្រោះប្រទេស២នេះ ក៏កាន់តែបារម្ភដែរថា អនាគតខ្លួនអាច នឹងត្រូវរុស្ស៊ីរុករានឈ្លានពាន ដូចអ៊ុយក្រែន។
ដោយឡែក លោក John Kirby អ្នកនាំពាក្យក្រសួងការពារជាតិអាមេរិក បានបញ្ជាក់ថា កិច្ចប្រជុំ ដែមានរដ្ឋមន្ត្រីការបរទេស រដ្ឋមន្ត្រីការពារជាតិ នៃបណ្តាប្រទេសជាតិ៤០ចូលរួមនេះ គឺវាមិនបានធ្វើងឡើងក្នុងក្របខណ្ឌ នៃអង្គការសម្ព័ន្ធមិត្តអូតង់ទេ ថ្វីបើមានលោកអគ្គលេខាធិការអូតង់ ចូលរួមដែរ ក៏ដោយ។ នៅក្នុងពេលបើកកិច្ចប្រជុំ លោក ឡយ អូស្ទីន រដ្ឋមន្ត្រីការពារជាតិអាមេរិក បានលើកឡើងថា ត្រូវតែរួមគ្នាជួយអ៊ុយក្រែន ជួយពង្រឹងសមត្ថភាពការពារខ្លួនរបស់អ៊ុយក្រែន។ លោករដ្ឋមន្ត្រីការពារជាតិអាមេរិក អះអាងថា អ៊ុយក្រែនអាចឈានទៅឈ្នះសង្គ្រាមឈ្លានពានរបស់រុស្ស៊ី ក៏ប៉ុន្តែល្គឹកណាទាល់តែ គ្រប់គ្នា ជួយផ្តល់មធ្យោបាយដល់អ៊ុយក្រែន។
ផ្តល់អាវុធ និងពង្រឹងសមត្ថភាពកងទ័ពអ៊ុយក្រែនយូរអង្វែង
ជំហានបន្ទាន់នៅពេលនេះ គឺជាជំនួយគ្រឿងសព្វាវុធ សម្ភារៈយោធា ជួយកងទ័ពអ៊ុយក្រែន ដើម្បីប្រយុទ្ធ។ តែក្រសួងការពារជាតិអាមេរិក បានឲ្យដឹងថា គេក៏ត្រូវតែពិភាក្សាគ្នា ដើម្បីរៀបចំយុទ្ធសាស្ត្រយូរអង្វែង ធ្វើយ៉ាងណា ឲ្យកងទ័ពអ៊ុយក្រែន មានកម្លាំងមានសមត្ថភាពពេញលេញ ក្នុងការការពារខ្លួន ក្នុងករណីមានការវាយប្រហារណាមួយផ្សេងទៀត ពីសំណាក់រុស្ស៊ី។ លោក John Kirby អ្នកនាំពាក្យក្រសួងការពារជាតិអាមេរិក បានបញ្ជាក់ថា មិនមែនអាមេរិក ឬក៏ក្រុមប្រទេសលោកខាងលិច ទៅធានាការពារអ៊ុយក្រែន រហូតនោះទេ តែគេនឹងជួយធ្វើយ៉ាងណា ពង្រឹងសមត្ថភាពរបស់អ៊ុយក្រែន តាមរយៈការធ្វើទំនើបកម្មកងទ័ព និងគ្រឿងសព្វាវុធ សម្ភារៈយោធា។
សម្រាប់កាលៈទេសៈពេលនេះ អ្វីដែលបន្ទាន់គឺជួយឲ្យអ៊ុយក្រែន យកជ័យជំនះលើកងរុស្ស៊ី។ លោករដ្ឋមន្ត្រីក្រសួងការពារជាតិអង់គ្លេស បានអះអាងថា យោងតាមប្រភពរបស់លោក គឺទាហានរុស្ស៊ីមានស្លាប់យ៉ាងហោច ១៥០០០នាក់ហើយ។ យោងតាមលោក រដ្ឋមន្ត្រីការបរទេស និងរដ្ឋមន្ត្រីការពារជាតិអាមេរិក ដែលបានទៅជួបលោក វ្លូឌីមៀរ ហ្សេឡេនស្គី នៅរដ្ឋធានីកៀវ កាលពីថ្ងៃចន្ទ ម្សិលមិញ គឺកងទ័ពអ៊ុយក្រែន កំពុងតែសង្ឃឹមថានឹងអាចឈ្នះ ប្រសិនបើក្រុមសម្ព័ន្ធមិត្តលោកខាងលិច ប្រឹងជួយផ្តល់គ្រឿងសព្វាវុធបន្ថែមទៀត។
ដូចយើងដឹងហើយ ប៉ុន្មានសប្តាហ៍ចុងក្រោយមកនេះ អាមេរិកបានសម្រេចផ្តល់ជំនួយយោធាច្រើនណាស់ មកអ៊ុយក្រែន ដោយរាប់ទាំងគ្រឿងសព្វាវុធធុនធំៗ ទំនើបៗ ជាក់ស្តែង កាណុងបាញ់គ្រាប់ដ៏ទំនើប ប្រភេទ Howtizer ដែលអាចបាញ់បានចំងាយ៣០គីឡូម៉ែត្រ។ អាមេរិក ចង់យកវេទិការប្រជុំនៅថ្ងៃនេះ អូសទាញប្រទេសសម្ព័ន្ធមិត្តផ្សេងទៀត ឲ្យចូលរួមប្រឹងប្រែង ឲ្យអស់ពីសមត្ថភាពដើម្បីជួយអ៊ុយក្រែន។
យ៉ាងណាមិញ នៅព្រឹកមិញនេះ លោកស្រីរដ្ឋមន្ត្រីក្រសួងការពារជាតិអាល្លឺម៉ង់ បានប្រកាសថា អាល្លឺម៉ង់ នឹងផ្តល់ឲ្យអ៊ុយក្រែន នូវរថក្រោះទំនើបរបស់ខ្លួន ប្រភេទខ្លារខិន (Flakpanzer Gepard) ។ នេះជាការបោះជំហានមួយដ៏ធំមួយទៀត របស់អាល្លឺម៉ង់ ព្រោះកន្លងមក អាល្លឺម៉ង់ជួយតែសម្ភារៈស្រាលតែប៉ុណ្ណោះ។ ដូចគ្នាដែរ ក្រសួងការពារជាតិបារាំង បានបញ្ជាក់ឲ្យដឹងមុននេះបន្តិចដែរ ថាគេនឹងបញ្ជូនប្រព័ន្ធបាញ់គ្រាប់កាំភ្លើងធំ Caesar ដែលអាចបាញ់បានចំងាយ៤០គីឡូម៉ែត្រ។ ចំណែកអង់គ្លេសវិញ គេបានសន្យាថានឹងបញ្ជូនទៅឲ្យអ៊ុយក្រែន នូវមីស៊ីលប្រឆាំងផ្លូវអាកាស Starstreak រួមជាមួយនឹងរថក្រោះខ្លះទៀតផង។
ដោយឡែក បើតាមប្រភពពីអ្នកកាសែត ដែលបានទៅផ្ទាល់នៅមូលដ្ឋានទ័ពអាមេរិក Remstein ក្នុងទឹកដីអាល្លឺម៉ង់ គឺថា ក៏មានប្រទេសអឺរ៉ុបខ្លះទៀត ដោយសុំមិនបញ្ចេញឈ្មោះ បានសម្រេចបញ្ជូនគ្រាប់រ៉ូកែត គ្រាប់កាំភ្លើងត្បាល់ដែលផលិតនៅរុស្ស៊ី យកទៅឲ្យអ៊ុយក្រែនដែរ។
រុស្ស៊ីគំរាមថា ប្រយ័ត្នក្លាយជាសង្គ្រាមលោកលើកទី៣
លោក ស៊ែរហ្កី ឡាវរ៉ូវ រដ្ឋមន្ត្រីការបរទេសរុស្ស៊ី បាននិយាយតាមទូរទស្សន៍ កាលពីថ្ងៃចន្ទម្សិលមិញ ដោយលើកឡើងថា ក្រុមប្រទេសលោកខាងលិច ជួយផ្តល់អាវុធឲ្យអ៊ុយក្រែន ដើម្បីប្រយុទ្ធនេះ គឺមិនខុសពីយកសាំងទៅជះលើភ្លើងទេ។ លោកបានបន្ថែមថា គ្រោះថ្នាក់ដ៏ធ្ងន់ធ្ងរបំផុត ដែលមិនអាចមើលស្រាលបាននោះ គឺបញ្ហានេះអាចឈានទៅក្លាយទៅជាសង្គ្រាមលោកលើកទី៣ ដោយចំហតែម្តង ហើយអាចជាសង្គ្រាមនុយក្លេអ៊ែរ។
បើយើងស្តាប់សម្តីរបស់លោកស៊ែរហ្កី ឡាវរ៉ូវនេះ គឺមានន័យថា ក្រុមប្រទេសលោកខាងលិច មិនត្រូវមកជួយអ៊ុយក្រែនទេ គឺត្រូវទុកឲ្យរុស្ស៊ីវាយអ៊ុយក្រែន លេបត្របាក់ទឹកដីអ៊ុយក្រែន តាមសម្រួល បើមិនចង់ឲ្យមានរឿង។ ត្រង់នេះហើយ ដែលក្រុមប្រទេសលោកខាងលិច គេមិនអាចនៅស្ងៀមបាន។ ថ្ងៃនេះ រុស្ស៊ីវាយយកអ៊ុយក្រែន ថ្ងៃស្អែករុស្ស៊ីនឹងខិតទៅមុខទៀត។ សួរថាអ្នកណាជាអ្នកចាប់ផ្តើមធ្វើសង្គ្រាមនេះ គឺរុស្ស៊ី។ ដូច្នេះ ប្រតិកម្មរបស់ក្រុមប្រទេសលោកខាងលិច វាគឺជាការឆ្លើយតប ចំពោះអំពើឈ្លានពានរបស់រុស្ស៊ី មកលើប្រទេសឯករាជ្យមួយ ដូចជាអ៊ុយក្រែន។
សម្រាប់ក្រុមប្រទេសលោកខាងលិច រុស្ស៊ីជាអ្នកបញ្ឆេះសង្គ្រាមនេះ ដោយភាពលោភលន់របស់លោកពូទីន ដូច្នេះកុំមកចោទគេ ថាជាអ្នករុញបញ្ហាឲ្យឈានក្លាយ ទៅជាសង្គ្រាមលោកលើកទី៣។ មកដល់ដំណាក់កាលនេះ គឺភាគី អ៊ុយក្រែន រួមជាមួយសម្ព័ន្ធមិត្តលោកខាងលិច គ្មានជំរើសអ្វីផ្សេងទេ ក្រៅតែពីបន្ថែមទំងន់អំណាចនៃកម្លាំង ដើម្បីធ្វើយ៉ាងណា ឲ្យរុស្ស៊ីដឹងខ្លួន ហើយដកថយទៅវិញ។
គ្មានពន្លឺសង្ឃឹមស្តីពីការចរចា
បើផ្អែកតាមមន្ត្រីការទូតតួកគី ដែលជាអ្នកប្រឹងប្រែងរៀបចំ ឲ្យមានជំនួបចរចាគ្នា រវាងភាគីអ៊ុយក្រែន និង រុស្ស៊ី ប៉ុន្មានលើកមកនេះ គឺថាការចរចា សម្រាប់ពេលនេះមានសង្ឃឹមតិចណាស់ ។ លោកអគ្គលេខាធិការអង្គការសហប្រជាជាតិ ធ្វើដំណើរទៅជួបលោក ពូទីន ដល់ក្រុងមូស្គូ នៅថ្ងៃអង្គារនេះ ក៏គេគ្មានសង្ឃឹមថា លោកពូទីននឹងស្តាប់ហេតុផលដែរ។ តាមការគ្រោងទុក នៅថ្ងៃនេះ លោក អ៊ែរដូហ្កាន់ ប្រធានាធិបតីតួកគី នឹងទូរស័ព្ទទៅនិយាយជាមួយលោកពូទីនដែរ។ ចំណែកលោក អគ្គលេខាធិការអង្គការសហប្រជាជាតិ នឹងធ្វើដំណើរចេញពីម៉ូស្គូ ទៅរដ្ឋធានីកៀវ ដើម្បីជួបជាមួយលោក ហ្សេឡេនស្គី។
ការប្រឹងប្រែងផ្នែកការទូត ចេះតែប្រឹងជាបន្តបន្ទាប់ បោះទោះបីមកទល់ពេលនេះ បានផលស្តួចស្តើងក៏ដោយ។ សង្គ្រាមនេះអាចចប់បាន ទាល់តែទីមួយ អ្នកចាប់ផ្តើមសុខចិត្តឈប់ ឬមួយក៏អ្នកត្រូវបានគេវាយ សុខចិត្តចាញ់។ ដោយឡែក អ៊ុយក្រែន មិនព្រមចុះចាញ់ទេ ហើយក៏មិនព្រមបាត់បង់ទឹកដីទៅឲ្យរុស្ស៊ីដែរ។ ចំណែកខាងរុស្ស៊ីវិញ គឺលោកពូទីនកំពុងតែព្យាយាមប្រឹងយកឈ្នះ ឲ្យបានយ៉ាងហោចនៅតំបន់ដុនបាស និងភាគខាងត្បូងអ៊ុយក្រែន ដើម្បីយកជ័យជំនះនេះ ទៅអួតប្រជាជនរុស្ស៊ីនៅថ្ងៃទី៩ឧសភា។ ដូច្នេះសម្រាប់ពេលនេះ បើតាមការវិភាគ គឺគ្មានពន្លឺវិជ្ជមាន នៃការចរចាណាមួយឡើយ គឺមានតែការប្រយុទ្ធរុញទៅរុញទៅមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ