សង្គ្រាមអ៊ុយក្រែន៖ លោកអង់តូនីញ៉ូ ហ្គូទែរស៍ថ្លែងថា សតវត្សទី២១ហើយ សង្គ្រាមមិនគួរកើតឡើងទេ !
ចុះផ្សាយនៅថ្ងៃ៖
ស្តាប់ - ០៨:១៦
លោកអង់តូនីញ៉ូ ហ្គូទែរស៍ អគ្គលេខាធិការអង្គការសហប្រជាជាតិ បានធ្វើដំណើរទៅដល់ ទីក្រុងកៀវ រដ្ឋធានីអ៊ុយក្រែន នៅព្រឹកថ្ងៃព្រហស្បតិ៍នេះ។ ជាដំណើរទៅដល់ ដើម្បីពិនិត្យស្ថានភាពដោយផ្ទាល់នឹងភ្នែករបស់លោក បន្ទាប់ពីអ៊ុយក្រែន បានរងនូវការធ្វើសង្គ្រាមឈ្លានពានពីសំណាក់រុស្ស៊ី ចាប់តាំងពីថ្ងៃទី២៤កុម្ភៈមក។ នៅទីក្រុងកៀវ លោក អង់តូនីញ៉ូ ហ្គូទែរស៍ បានថ្លែងថា មកដល់សតវត្សទី២១ទៅហើយ សង្គ្រាមវាយប្រហារ កាប់សម្លាប់គ្នា មិនគួរមានទាល់តែសោះ។
“ចុះបើជាផ្ទះខ្ញុំ ជាក្រុមគ្រួសារខ្ញុំ?”
តាំងតែពីរុស្ស៊ី បានចាប់ផ្តើមធ្វើសង្គ្រាមឈ្លានពាននៅអ៊ុយក្រែន មានប្រភពដំណឹងជាច្រើន បានអះអាងថាវាបានធ្វើឲ្យលោកអង់តូនីញ៉ូ ហ្គូទែរស៍ មានការលំបាកក្នុងចិត្តខ្លាំងណាស់។ គាត់ពិបាកចិត្ត រហូតដល់ថ្នាក់ឈឺ ទ្រុឌទ្រោម អស់កម្លាំងចិត្ត ព្រោះមិនអាចធ្វើអ្វីបាន ដើម្បីបញ្ឈប់សង្គ្រាមនេះ។ ជាក់ស្តែងនៅក្នុងសន្ទរកថា កាលពីចុងខែកុម្ភៈ អំពាវនាវឲ្យលោកពូទីនដកថយឈប់ធ្វើសង្គ្រាម លោក អង់តូនីញូ ហ្គូទែរស៍ បានថ្លែងទាំងញ័រមាត់ ទទូចអង្វរឲ្យលោកពូទីនពិចារណាឡើងវិញម្តងទៀតឲ្យច្បាស់ កុំធ្វើសង្គ្រាមកាប់សម្លាប់មនុស្ស។
នៅថ្ងៃព្រហស្បតិ៍ទី២៨មេសានេះ លោក អង់តូនីញ៉ូ ហ្គូទែរស៍ បានទៅដល់ប្រទេសអ៊ុយក្រែន ហើយលោកបានទៅពិនិត្យស្ថានភាពផ្ទាល់កន្លែង នៅតំបន់ Borodianka និងនៅ Boutcha ដែលជាក្រុងស្ថិតនៅជាប់ជាយរដ្ឋធានីកៀវ ហើយ ដែលបានរងនូវភាពខ្ទេចខ្ទាំខ្លាំងបំផុត ដោយសារសង្គ្រាម។ នៅទីក្រុងទាំង២នេះហើយ ដែលគេបានប្រទះឃើញសាកសពប្រជាជនស៊ីវីល ជាច្រើនរយនាក់ ស្លាប់ដេករណេតរណូតតាមផ្លូវ ក្បែររបងផ្ទះ និងខ្លះត្រូវគេកប់ចោលតាមរណ្តៅរួម។
ពេលឃើញអាគារផ្ទះបាក់បែក ខ្លះត្រូវគ្រាប់ផ្ទុះឆេះខ្លោច នៅផ្ទាល់កន្លែង លោក អង់តូនីញ៉ូ ហ្គូទែរស៍ បានថ្លែងថា លោកស្រម៉ៃថា ប្រសិនបើក្រុមគ្រួសារលោកជួបរឿងបែបនេះ តើលោកនឹងមានទុក្ខយ៉ាងណាទៅ! លោកថា ចុះបើជាចៅស្រីតូចៗរបស់លោក ភ័យតក់ស្លុត យំស្រែករត់រកកន្លែងជ្រក ពីការទម្លាក់គ្រាប់វិញ តើវានឹងទៅជាយ៉ាងណាទៅ!
លោកបានថ្លែងថា សតវត្សទី២១ទៅហើយ រឿងរ៉ាវសោកនាដកម្ម ដោយសារតែសង្គ្រាមបែបនេះ គឺវាមិនគួរកើតឡើងទេ ហើយមិនអាចទទួលយកបានទាល់តែសោះ។ លោកបានបន្ថែមថា ចូរគ្រប់គ្នាចងចាំជានិច្ចថា ឲ្យតែពាក្យថាសង្គ្រាម គឺប្រជាជនស៊ីវីលស្លូតត្រង់ ដែលជាអ្នករងគ្រោះខ្លាំងបំផុត។
រុស្ស៊ី ត្រូវតែយល់ព្រមសហការឲ្យបានត្រឹមត្រូវ ជាមួយតុលាការព្រហ្មទណ្ឌអន្តរជាតិ!
លោកអង់តូនីញ៉ូ ហ្គូទែរស៍ បានលើកឡើងថា នៅពេលដែលយើងបានមកឃើញដោយផ្ទាល់នឹងភ្នែក នូវរូបភាពសោកនាដកម្មទាំងអស់នេះ គឺវាជារឿងចាំបាច់ណាស់ ដែលត្រូវតែមានការស៊ើបអង្កេត ពេញលេញ ឯករាជ្យ និងស៊ីជំរៅដើម្បីកំណត់រកអ្នកទទួលខុសត្រូវ។ លោកបានអំពាវនាវថា រុស្ស៊ី ត្រូវតែយល់ព្រមសហការជាមួយតុលាការព្រហ្មទណ្ឌអន្តរជាតិ ដែលបានចាប់ផ្តើមការស៊ើបអង្កេត ស្តីអំពីឧក្រិដ្ឋកម្មសង្គ្រាម ដែលអ៊ុយក្រែន បានចោទថាកងទ័ពរុស្ស៊ីបានធ្វើ។
យ៉ាងណាមិញ កាលពីថ្ងៃពុធ ទី២៧មេសា សមាជិកសភាកាណាដា បានសម្រេចអនុម័តសេចក្តីប្រកាសថ្កោលទោសមួយ ចំពោះអំពើឧក្រិដ្ឋកម្មប្រល័យពូជសាសន៍ ដែលកងទ័ពរុស្ស៊ី បានធ្វើទៅលើប្រជាជនអ៊ុយក្រែន។ លិខិតថ្កោលទោសរបស់សភាកាណាដានេះ បានអះអាងថា គេមានភស្តុតាង យ៉ាងជាក់ច្បាស់ និងច្រើនសន្ធឹកណាស់ ដែលបញ្ជាក់ថា រុស្ស៊ីបានធ្វើអំពើឧក្រិដ្ឋកម្មសង្រ្គាម ឧក្រិដ្ឋកម្មប្រឆាំងមនុស្សជាតិ ជាលក្ខណៈប្រព័ន្ធ ក្នុងទ្រង់ទ្រាយធំបែបសម្លាប់រង្គាល។
សូមរំលឹកថា កាលពីថ្ងៃទី១៣មេសា លោក Karim Khan រដ្ឋអាជ្ញាតុលាព្រហ្មទណ្ឌអន្តរជាតិ បានទៅដល់ទីក្រុងប៊ូតឆា ហើយបានចាត់ទុកថាទីនោះ គឺជាទីកន្លែងកើតហេតុ កន្លែងឧក្រិដ្ឋកម្ម ដ៏ធំបំផុត។ ក្រុមគ្រូពេទ្យ ជំនាញពិនិត្យសាកសព មកពីប្រទេសជាច្រើន ក្នុងនោះមានបារាំងដែរ បានទៅដល់ ដើម្បីចាប់ផ្តើមធ្វើកោសល្យវិច្ច័យ លើសាកសពជាច្រើនរយនាក់ ដែលគេបានប្រទះឃើញនៅទីនោះ។ ប៊ូតឆាជាឧទាហរណ៍មួយ ក្នុងចំណោមទីតាំងនិងករណីជាច្រើនផ្សេងទៀត ដែលភាគីអ៊ុយក្រែន បានអះអាងថា កងទ័ពរុស្ស៊ីបានសម្លាប់រង្គាល និងដោយឥតរើសមុខ ទៅលើប្រជាជនស៊ីវីលអ៊ុយក្រែន។
ការលំបាកក្នុងការជន្លៀសប្រជាជនស៊ីវីល ចេញពីទីលានប្រយុទ្ធ
នៅព្រឹកថ្ងៃព្រហស្បតិ៍ទី២៨មេសា លោក Sergueï Volyna មេបញ្ជាការកងពលលេខ៣៦ នៃកងទ័ពជើងទឹកអ៊ុយក្រែន ប្រចាំនៅម៉ារីយូប៉ូល បានសរសេរអំពាវនាវ លើTelegram សូមឲ្យជួយបើកប្រតិបត្តិការ រំដោះ និងជន្លៀសមនុស្សចេញពីក្រុងម៉ារីយូប៉ូលផង ពុំនោះទេនឹងស្លាប់ទាំងអស់។ បើមិនស្លាប់ដោយសារតែគ្រាប់របស់រុស្ស៊ី ក៏ស្លាប់ដោយសារតែរបួស និងដាច់ពោះស្លាប់ដែរ ព្រោះម៉ារីយូប៉ូល ត្រូវកងទ័ពរុស្ស៊ីឡោមព័ទ្ធជិត២ខែមកហើយ។ មេទាហានអ៊ុយក្រែនរូបនេះ អះអាងថា គាត់កំពុងនៅជាមួយកូនទាហាន ប្រមាណ៦០០នាក់ ដែលរងរបួស និងប្រជាជនស៊ីវីលច្រើនរយនាក់។
ដោយឡែក លោក Oleksiy Arestovich ទីប្រឹក្សាពិសេសរបស់លោកហ្សេឡេនស្គី បានអះអាងថា រដ្ឋាភិបាលអ៊ុយក្រែន កំពុងតែប្រឹងប្រែង រកវិធីនិយាយជាមួយភាគីរុស្ស៊ី ដើម្បីធ្វើយ៉ាងណា សង្គ្រោះ រំដោះប្រជាជនស៊ីវីល ចេញពីតំបន់មួយចំនួន នៅខាងកើត ដែលកំពុងតែរងការវាយប្រហារខ្លាំង ដូចជា Sloviank Kramatorsk ណិង Marioupol។ នៅម៉ារីយូប៉ូល មានទាហាន និងប្រជាជានស៊ីវីលសរុបប្រមាណ១ពាន់នាក់ ដែលកំពុងពួនសំងំនៅក្នុងរោងចក្រស្លរដែក Azovstal មិនអាចចេញទៅណារួចទេ ព្រោះកងទ័ពរុស្ស៊ីព័ទ្ធជិតឈឹងតែម្តង ជាច្រើនសប្តាហ៍មកហើយ។
កាលពីថ្ងៃអង្គារ នៅទីក្រុងម៉ូស្គូ លោកអគ្គលេខាធិការអង្គការសហប្រជាជាតិ បានប្រាប់ទៅភាគីរុស្ស៊ី អំពីបំណងចង់បង្កើតក្រុមការងារមួយ ដោយមានមន្ត្រីអង្គការសហប្រជាជាតិជាអ្នកសម្របសម្រួល ដើម្បីឲ្យអ៊ុយក្រែន និងរុស្ស៊ីធ្វើការជាមួយគ្នា ឈានទៅបើកច្រកជន្លៀសមនុស្សដោយសុវត្ថិភាព។ លោក Oleksiï Reznikov រដ្ឋមន្ត្រីការពារជាតិអ៊ុយក្រែន បានប្រាប់ឲ្យដឹងកាលពីថ្ងៃពុធម្សិលមិញថា កងទ័ពរុស្ស៊ីកំពុងតែដឹកខ្លាំងថាបរាជ័យយុទ្ធសាស្ត្រហើយ ដូច្នេះក្នុងរវាង១សប្តាហ៍ទៅមុខទៀតនេះ គឺកងទ័ពរុស្ស៊ីប្រាកដជា នឹងបើកការវាយប្រហារយ៉ាងសាហាវ មកលើអ៊ុយក្រែន។
សង្គ្រាមកាន់តែផុងជ្រៅ
សម្រាប់ពេលនេះ សង្គ្រាមនៅតែបន្ត ហើយបន្តខ្លាំងទៀត ផងនៅភាគខាងកើត និងខាងត្បូងអ៊ុយក្រែន។ កងទ័ពរុស្ស៊ីវិញ បានអះអាងកាលពីល្ងាចម្សិលមិញ ថាគេបានវាយប្រហារទីតាំងមួយកន្លែង នៅ Zaporijjia ដែលជាទីតាំងស្តុកអាវុធដែលអាមេរិកនិងប្រទេសអឺរ៉ុប បញ្ជូនទៅជួយអ៊ុយក្រែន។ តែយ៉ាងណាភាគីអ៊ុយក្រែនអះអាងថា ទីតាំងដែលរងការវាយប្រហារនោះ គ្មានអាវុធទេ។ ហើយនៅព្រឹកនេះ លោក Mykhaïlo Podoliak ទីប្រឹក្សាម្នាក់របស់លោកហ្សេឡេនស្គី បានអះអាងថា អ៊ុយក្រែន ក៏មានសិទ្ធិបើកការវាយប្រហារ ទៅលើទឹកដីរុស្ស៊ីដែរ។
ដូច្នេះ យើងឃើញថាសង្គ្រាមនេះ កាន់តែផុងជ្រៅទៅហើយ។ លោកស្រីរដ្ឋមន្ត្រីក្រសួងការបរទេសអង់គ្លេស បានអំពាវនាវ ហៅក្រុមប្រទេសលោកខាងលិចទាំងអស់ ត្រូវតែប្រមែរប្រមូលគ្រឿងសព្វាវុធដែលមាន យកទៅជួយអ៊ុយក្រែន ព្រោះសង្គ្រាមនេះ មិនមែនជាសង្គ្រាមរបស់អ៊ុយក្រែនតែម្នាក់ឯងទេ តែវាជាសង្គ្រាមរួមរបស់បច្ចឹមលោក ។ លោក ពូទីន វិញ កាលពីថ្ងៃម្សិលមិញ បានថ្លែងសុន្ទរកថាគំរាមថា ក្រុមប្រទេសលោកខាងលិច ដែលនាំគ្នាផ្តល់អាវុធឲ្យអ៊ុយក្រែន គឺប្រាកដជានឹងរកការឆ្លើយតបវិញ យ៉ាងចាស់ដៃពីរុស្ស៊ី ជាក់ជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ