សភាហ្វាំងឡង់ និងស៊ុយអែត បើកការប្រជុំពិភាក្សា និងអនុម័តការដាក់ពាក្យសុំចូលជាសមាជិកអូតង់
ចុះផ្សាយនៅថ្ងៃ៖
ស្តាប់ - ០៩:៣៦
សង្គ្រាមឈ្លានពានរបស់រុស្ស៊ីនៅអ៊ុយក្រែន បានរុញច្រានប្រទេស២នៅអឺរ៉ុបខាងជើង គឺហ្វាំងឡង់ និងស៊ុយអែត ដែលធ្លាប់តែស្ថិតនៅអព្យាក្រិត្យ មិនចូលបក្សសម្ព័ន្ធយោធាណាទាំងអស់នោះ ឲ្យងាកមកចង់ ចូលជាសមាជិករបស់អង្គការសម្ព័ន្ធមិត្តអាត្លង់ទិកខាងជើង ហៅកាត់ថាអូតង់ ឬណាតូ។ នៅថ្ងៃចន្ទទី១៦ឧសភានេះ សភារបស់ហ្វាំងឡង់ និងស៊ុយអែត កំពុងតែបើកការប្រជុំពិភាក្សាគ្នា ដើម្បីអនុម័តបេក្ខភាពស្នើសុំចូលជាសមាជិកអង្គការអូតង់។ ដោយឡែក រុស្ស៊ីបានចាត់ទុកបំណងរបស់ហ្វាំងឡង់ និងស៊ុយអែត ដែលចង់ចូលជាសមាជិករបស់អូតង់នេះ ថាជារឿងយល់ខុសហើយ។ ទន្ទឹមគ្នានេះ តួកគី ដែលជាសមាជិកអូតង់ម្នាក់ដែរ បានបង្ហាញជំហរមិនគាំទ្របេក្ខភាពរបស់ហ្វាំងឡង់ និងស៊ុយអែតទេ។
រុស្ស៊ីជាអ្នករុញ ឲ្យស៊ុយអែត និងហ្វាំងឡង់ចង់ចូលអូតង់
ដូចយើងបានដឹងហើយ ប្រទេសអឺរ៉ុបខាងជើងទាំង២នេះ សុទ្ធតែបានប្រកាន់ខ្ជាប់នូវ គោលនយោបាយអព្យាក្រិត្យ មិនចូលរួមជាមួយសម្ព័ន្ធភាពយោធាណាទាំងអស់ ព្រោះដើម្បីកុំឲ្យមានការថ្នាំងថ្នាក់ ជាមួយអតីតសហភាពសូវៀត និងក្រោយមកជាមួយរុស្ស៊ីនេះឯង។ ពីមុនមក ទាំងប្រជាជនទាំងអ្នកនយោបាយ ហ្វាំងឡង់ ក៏ដូចជាស៊ុយអែត គឺមិនសូវមានអ្នកគាំទ្រ ឲ្យប្រទេសគេចូលក្នុងអូតង់ទេ។ ក៏ប៉ុន្តែ អ្វីៗបានប្រែប្រួលសឹងតែទាំងស្រុង បន្ទាប់ពីគេបានឃើញនូវការធ្វើសង្គ្រាមឈ្លានពានរបស់រុស្ស៊ី ទៅលើអ៊ុយក្រែន ដែលមិនមែនជាសមាជិកអូតង់។
កាលពីថ្ងៃសៅរ៍ លោកស្រីនាយករដ្ឋមន្ត្រីហ្វាំងឡង់ Sanna Marin បានលើកឡើងថា បរិបទសន្តិសុខពេលនេះបានប្រែប្រួលហើយ។ ប្រទេសតែមួយគត់ដែលគំរាមសន្តិសុខគេឯងនៅអឺរ៉ុប គឺរុស្ស៊ី។ ចំណែកលោកស្រី Magdalena Andersson នាយករដ្ឋមន្ត្រីស៊ុយអែតវិញ បាននិយាយកាលពីថ្ងៃអាទិត្យថា ការសម្រេចចិត្ត ដាក់បេក្ខភាពចូលអូតង់នេះ វាមិនមែនជារឿងងាយស្រួលទេ ក៏ប៉ុន្តែរដ្ឋាភិបាលលោកស្រី បានថ្លឹងថ្លែងច្បាស់ហើយ ថាវាមិនអាចជួយការពារសន្តិសុខស៊ុយអែតបានទៀតទេ បើស៊ុយអែតនៅតែបន្តរក្សាអព្យាក្រិត្យភាព ទៅថ្ងៃអនាគត។
ហ្វាំងឡង់មានព្រំដែនជាប់រុស្ស៊ីដល់ទៅ១៣០០គីឡូម៉ែត្រ ហើយក៏ធ្លាប់មានប្រវត្តិជូរចត់ ត្រូវសហភាពសូវៀត លើកទ័ពមកវាយឈ្លានពានដែរ។ ដូច្នេះ សង្គ្រាមនៅអ៊ុយក្រែន បានធ្វើឲ្យកម្រើកមតិសាធារណៈហ្វាំងឡង់តែម្តង ថាហ្វាំងឡង់ មិនអាចនៅអព្យាក្រិត្យទៀតបានទេ គឺត្រូវតែរកបង្អែក រកសម្ព័ន្ធមិត្តយោធាដើម្បីជួយការពារសន្តិសុខ។ យោងតាមការស្ទាបស្ទង់មតិចុងក្រោយ គឺប្រជាជនហ្វាំងឡង់យ៉ាងហោច ៧០% បានយល់ស្របថាប្រទេសខ្លួនត្រូវតែចូលជាសមាជិកអូតង់។ ចំណែកនៅស៊ុយអែតវិញ គឺប្រជាជនប្រមាណជាង៥០% ក៏យល់ដូចគ្នានេះដែរ។
នៅថ្ងៃចន្ទនេះ សភាហ្វាំងឡង់ និងស៊ុយអែត បើកការប្រជុំជជែកគ្នាជាបន្ទាន់តែម្តង ដើម្បីអនុម័តដាក់បេក្ខភាពជាផ្លូវការ នៅក្នុងសប្តាហ៍នេះតែម្តង។ យោងតាមការចុះផ្សាយរបស់បណ្តាញព័ត៌មានហ្វាំងឡង់ ក្នុងចំណោមសមាជិកសភាហ្វាំងឡង់ ទាំង២០០នាក់ គឺមានយ៉ាងហោច៨៥% បានបង្ហាញជំហរគាំទ្រ ឲ្យហ្វាំងឡង់ដាក់បេក្ខភាព។ រីឯនៅស៊ុយអែតវិញ ក្នុងចំណោមគណបក្ស៨ដែលមានសមាសភាពនៅសភា គឺមាន៦គណបក្សបានប្រកាសគាំទ្រ។ ពោលគឺគេរំពឹងថា យ៉ាងហោចមានសមាជិកសភា ៣០៤នាក់ ក្នុងចំណោម៣៤៩នាក់ ដែលនឹងបោះឆ្នោតគាំទ្រ។
តួកគីចង់រារាំង?
តាមលក្ខន្តិកៈរបស់អូតង់ គឺការទទួលសមាជិកថ្មីមួយ ត្រូវតែបានទទួលការយល់ព្រមជាឯកច្ឆ័ន្ទ ពីសំណាក់សមាជិកទាំងអស់របស់អូតង់។ មានន័យថា គេត្រូវការឲ្យ សមាជិកអូតង់រាល់ថ្ងៃ ដែលមាន៣០ប្រទេសនេះ លើកដៃគាំទ្របេក្ខភាព របស់ស៊ុយអែត និងហ្វាំងឡង់ទាំងអស់គ្នា។ ដូច្នេះបើតួកគីមិនព្រមគាំទ្រ គឺអ្វីៗនឹងជាប់គាំងហើយ។
ទាក់ទិននឹងហេតុផលរបស់តួកគីវិញ បើតាមការលើកឡើងរបស់លោក ប្រធានាធិបតីអ៊ែរដូហ្កាន់ គឺថាលោកបានចោទថា ស៊ុយអែត និងហ្វាំងឡង់ ជាពិសេសស៊ុយអែតតែម្តង ថាសំបូរសំបុករបស់ក្រុមភេរវកម្ម។ ក្រុមភេរវកម្មនេះ គឺតួកគីចង់សំដៅលើចលនា PKK ចលនារំដោះជាតិគួឌីស្ថាន ដែលរដ្ឋាភិបាលរបស់លោកអ៊ែរដូហ្កាន់ស្អប់ ប្រយុទ្ធប្រឆាំងខ្លាំងណាស់។ ចលនានេះ ក៏ត្រូវបាន សហភាពអឺរ៉ុបចាត់បញ្ចូលក្នុងបញ្ជីក្រុមភេរវកម្មដែរ។ ដូច្នេះហេតុផលរបស់តួកគី គឺមានពាក់ព័ន្ធនឹងនយោបាយផ្ទៃក្នុង របស់តួកគី។
តែយ៉ាងណា មានចំណុចដែលអ្នកវិភាគខ្លះបានលើកឡើងថា តួកគីប្រហែលជាមិនហ៊ានជំទាស់ខ្លាំងនោះទេ។ កន្លងមក នៅក្នុងអូតង់ អាកប្បកិរិយារបស់តួកគី ត្រូវបានគេរិះគន់ច្រើនដងហើយ ថាតួកគី មានទំនោរទៅខាងរុស្ស៊ីច្រើន។ ខ្លួនជាសមាជិកអូតង់ តែបែរជាទៅទិញគ្រឿងសព្វាវុធរុស្ស៊ី ហើយធ្វើប្រតិបត្តិការយោធាមួយចំនួន ប៉ះពាល់ដល់ផលប្រយោជន៍ របស់ប្រទេសសមាជិកអូតង់ដូចគ្នាថែមទៀតផង។ ដូច្នេះបើលើកនេះ តួកគីមករឹងទទឹងជំទាស់ទៀត គឺគេរឹតតែគិតថា តើតួកគីគាំទ្ររុស្ស៊ីឬក៏យ៉ាងណា!
កាលពីថ្ងៃអាទិត្យម្សិលមិញនេះ គេបានបើកការប្រជុំនៅក្រុងប៊ែរឡាំង ដើម្បីនិយាយជាមួយតួកគី ស្តីពីការជំទាស់នេះ។ ទាំងលោក អគ្គលេខាធិការអង្គការអូតង់ ទាំងលោករដ្ឋមន្ត្រីការបរទេសអាមេរិក សុទ្ធតែបានអះអាងថា គេមានសង្ឃឹមថាអាចបញ្ចុះបញ្ចូលតួកគីបាន។ លោក Jens Stoltenberg បានអះអាងថា ខាងតួកគីបានបញ្ជាក់ជំហរហើយ ថាគេគ្មានបំណងទៅរារាំង បេក្ខភាពរបស់ហ្វាំងឡង់ និងស៊ុយអែតទេ។
ហ្វាំងឡង់មានទាហានបម្រុង៨៧ម៉ឺននាក់ និងគ្រឿងសព្វាវុធទំនើប
លោក Tytti Tuppurainen រដ្ឋមន្ត្រីហ្វាំងឡង់ ទទួលបន្ទុកកិច្ចការអឺរ៉ុប បានលើកឡើងប្រាប់កាសែតLe Monde ថា ទាំងហ្វាំងឡង់ ទាំងស៊ុយអែត នឹងផ្តល់ឲ្យនូវប្រយោជន៍យុទ្ធសាស្ត្រច្រើនណាស់ សម្រាប់អូតង់ ហើយកុំគិតថា ប្រទេសគេទាំង២នេះ នឹងបន្ថែមបន្ទុក បន្ថែមការងារឲ្យអូតង់លំបាកនោះ។ ពោលគឺ ហ្វាំងឡង់ និងស៊ុយអែត មិនមែនមកដៃទទេរទេ !
អគ្គនាយកក្រសួងការពារជាតិហ្វាំងឡង់ បានអះអាងថា ព្រំដែនហ្វាំងឡង់ដែលមានជាមួយរុស្ស៊ីចំនួន ប្រមាណ១៣០០គីឡូម៉ែត្រនោះ គឺគេនឹងការពារដោយខ្លួនគេ អូតង់កុំចាំបាច់ភ័យអី។ មានន័យថា គឺហ្វាំងឡង់ទេ ដែលជាអ្នកការពារសន្តិសុខឲ្យប្រទេសអូតង់ផ្សេងទៀត ព្រោះហ្វាំងឡង់អ្នកនៅជួរមុខជាប់ព្រំដែនរុស្ស៊ីតែម្តង។
ជាងនេះទៀត ហ្វាំងឡង់ ដែលមានប្រជាជនប្រមាណតែជាង៥លាននាក់ ហើយមានទាហានអាជីពចំនួន តែ១២០០០នាក់មែន តែហ្វាំងឡង់មានទាហានបម្រុង ចំនួន៨៧ម៉ឺននាក់ ក្នុងនោះ ២៨ម៉ឺន គឺអាចកេណ្ឌមកធ្វើប្រតិបត្តិការ ប្រយុទ្ធភ្លាមៗតែម្តង ឲ្យតែត្រូវការ។ មន្ត្រីក្រសួងការពារជាតិហ្វាំងឡង់ដដែលនេះ អះអាងទៀតថា ហ្វាំងឡង់មានសមត្ថភាពសព្វាវុធខ្លាំងមិនអន់ទេ បើប្រៀបធៀបទៅប្រទេសអឺរ៉ុបធំៗ។ ហ្វាំងឡង់បានបញ្ជាទិញ យន្តហោះចម្បាំង F-35 អាមេរិក ចំនួន៦៤គ្រឿង កាលពីឆ្នាំ២០២១។ ហ្វាំងឡង់មានសមត្ថភាពកងទ័ពជើងទឹកដ៏ល្អទៀត ដើម្បីបើកប្រតិបត្តិការនៅក្នុងសមុទ្របាល់ទិក។ ហើយហ្វាំងឡង់ ក៏មានគម្រោងដំឡើងការចំណាយផ្នែកកងទ័ព ដើម្បីទិញសព្វាវុធបន្ថែម និងរើសទាហានអាជីពចំនួន៥០០នាក់ទៀត ហើយបើកប្រតិបត្តិការហ្វឹកហាត់ទាហានបម្រុងបន្ថែមទៀត។ នេះបើផ្អែកតាមលោក រដ្ឋមន្ត្រីការពារជាតិហ្វាំងឡង់ Antti Kaikkonen។
ស៊ុយអែត ប្រយោជន៍យុទ្ធសាស្ត្រសម្រាប់អូតង់
មិនខុសពីហ្វាំងឡង់ ស៊ុយអែត បានដំឡើងការចំណាយផ្នែកកងទ័ពជាលំដាប់ ជាពិសេសបន្ទាប់ពីឃើញរុស្ស៊ីលើកទ័ពចូលឈ្លានពាននៅតំបន់គ្រីម៉េ។ ឆ្នាំ២០២១ ស៊ុយអែត ចំណាយប្រាក់លើវិស័យយោធាចំនួន ៦៦០០លានដុល្លារ ពោលគឺស្មើនឹង ១,២៦%នៃចំណូលដុលក្នុងស្រុក។ ស៊ុយអែត ក៏បានរៀបចំឲ្យមានកាតព្វកិច្ចយោធាឡើងវិញដែរ។
បច្ចុប្បន្ននេះ ស៊ុយអែតមានទាហានចំនួន ៥ម៉ឺននាក់ ដែលពាក់កណ្តាលជាទាហានបម្រុង។ ស៊ុយអែតទាហានតិចមែន តែយោងតាមអ្នកជំនាញ ចំណុចខ្លាំងរបស់ស៊ុយអែត គឺសម្ភារៈគ្រឿងសព្វាវុធ បច្ចេកវិទ្យាទំនើប ដែលឧស្សាហកម្មស៊ុយអែតអាចធ្វើបាន។ ស៊ុយអែតមាននាវាមុជទឹកបាតសមុទ្រ Corvette ៥គ្រឿង មានយន្តហោះចម្បាំង JAS 39 Gripen និងជាពិសេសនោះ គឺមានប្រព័ន្ធរ៉ាដាចាប់ទិន្នន័យ ពេញមួយតំបន់សមុទ្របាល់ទិកតែម្តង។ នេះបើផ្អែកតាមការបញ្ជាក់ ពីលោកស្រី Anna Wieslander នាយិកាទទួលបន្ទុកតំបន់អឺរ៉ុបខាងជើង នៃក្រុមប្រឹក្សាអាត្លង់ទិក។
បន្ថែមពីនេះ ស៊ុយអែតគឺជាទីតាំងយុទ្ធសាស្ត្រមួយសំខាន់ណាស់ ទាំងក្នុងសមុទ្របាល់ទិក ទាំងខាងលើជាប់តំបន់អាកទិក ដែលសុទ្ធតែស្ថិតនៅទល់មុខ រុស្ស៊ីទាំងអស់។ កោះ Gotland របស់ស៊ុយអែត ស្ថិតនៅកណ្តាលសមុទ្របាល់ទិក ទល់មុខរុស្ស៊ីគឺជាទីតាំងយុទ្ធសាស្ត្រដ៏សំខាន់។ យ៉ាងណាមិញ លោក Tomas Ries អ្នកស្រាវជ្រាវនៅសកលវិទ្យាល័យការពារជាតិស៊ុយអែត បានអះអាងថា បើអូតង់បានស៊ុយអែតនិងហ្វាំងឡង់ជាសមាជិក គឺអូតង់ អាចមានលទ្ធភាពពេញលេញ ក្នុងការការពារសន្តិសុខប្រទេសសមាជិក៣ នៅតំបន់បាល់ទិក គឺអេស្តូនី ឡេតូនី និងលីទុយអានី។ ប្រទេស៣នេះនៅជាប់រុស្ស៊ី ហើយបើមានការអីអូតង់ទៅមិនដល់ដោយងាយទេ។
បន្ថែមពីនេះទៀត លោកស្រី Heljä Ossa អ្នកស្រាវជ្រាវនៅសកលវិទ្យាល័យ ការពារជាតិហ្វាំងឡង់ បានលើកឡើងថា ហ្វាំងឡង់និង ស៊ុយអែត មិនមែនត្រឹមតែនាំមកនូវ កម្លាំងទាហានមានសមត្ថភាព និងគ្រឿងសព្វាវុធទំនើប៉ុណ្ណោះទេ តែគឺប្រទេស២នេះ នាំមកនូវប្រជាជនដែលមានទឹកចិត្តមោះមុត ត្រៀមប្រយុទ្ធ ដែល ប្រទេសសមាជិកអូតង់ខ្លះទៀត មិនមានដូចផងទេ!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ