ចិនបញ្ចុះបញ្ចូលឲ្យក្រុមប្រទេសដែនកោះ នៅប៉ាស៊ីហ្វិកខាងត្បូង ចុះកិច្ចព្រមព្រៀងពាណិជ្ជកម្ម និងសន្តិសុខជាមួយខ្លួន
ចុះផ្សាយនៅថ្ងៃ៖
ស្តាប់ - ០៨:២៤
នៅថ្ងៃព្រហស្បតិ៍ ទី២៦ឧសភា លោក វ៉ាង យី ប្រមុខការទូតចិន បានទៅដល់កោះសាឡូម៉ុន ដើម្បីចាប់ផ្តើមទស្សនកិច្ច នៅតាមប្រទេសដែនកោះភាគខាងត្បូង មហាសមុទ្រប៉ាស៊ីហ្វិក។ ជាមួយនឹងទស្សនកិច្ចនេះ ចិនមានកម្មវត្ថុបញ្ចុះបញ្ចូល ឲ្យប្រទេសក្នុងតំបន់នេះ ចុះកិច្ចព្រមព្រៀងដ៏ធំមួយជាមួយខ្លួន ស្តីពីការដោះដូរពាណិជ្ជកម្មសេរី ព្រមទាំងកិច្ចសហប្រតិបត្តិការផ្នែកសន្តិសុខ។ តែយ៉ាងណា គម្រោងកិច្ចព្រមព្រៀងនេះ ត្រូវបានប្រទេសមហាអំណាចប្រចាំតំបន់នេះ ដូចជាអូស្ត្រាលីជាដើម បានបរិហាររិះគន់ ថាអាចជាកិច្ចព្រមព្រៀងបោកបញ្ឆោត ដើម្បីបម្រើមហិច្ឆតាវាទទីរបស់ចិន នៅក្នុងតំបន់ប៉ាស៊ីហ្វិក។
ប៉ាស៊ីហ្វិកខាងត្បូង ដែនឥទ្ធិពលថ្មីរបស់ចិន
ចិនមានគម្រោងផែនការ ធ្វើកិច្ចព្រមព្រៀង ជាមួយប្រទេសចំនួន១០ ដែលជាប្រទេសដែនកោះ ស្ថិតក្នុងតំបន់ភាគខាងត្បូងមហាសមុទ្រប៉ាស៊ីហ្វិក។ យោងតាមទីភ្នាក់ងារព័ត៌មានបារាំង AFP ដែលបានអានលំអិត គឺគម្រោងនេះ មានផែនការរយៈពេល៥ឆ្នាំ ដែលចិនបានដាក់ចុះ ដើម្បីឈានទៅសម្រេចកិច្ចព្រមព្រៀងរួម រវាងចិន និងក្រុមប្រទេសដែនកោះទាំង១០នេះ។
ចិនបានហៅគម្រោងនេះថា “ទស្សនវិស័យរួមគ្នានៃការអភិវឌ្ឍន៍”។ ហេតុដូច្នេះហើយបាន ជាលោក វ៉ាង យី បានចាប់ផ្តើមធ្វើទស្សនកិច្ចនៅក្នុងតំបន់នេះ ចាប់ពីថ្ងៃព្រហស្បតិ៍ទី២៦ឧសភានេ។ បើតាមការរំពឹងទុក ភាគីចិនសង្ឃឹមថា នឹងអាចឈានទៅដល់ការចុះហត្ថលេខារួម នៅថ្ងៃទី៣០ឧសភា នៅកោះហ្វ៊ីជី ក្នុងឱកាសដែលលោក វ៉ាង យី នឹងជួបជាមួយរដ្ឋមន្ត្រីការបរទេស នៃបណ្តាប្រទេសក្នុងតំបន់ប៉ាស៊ីហ្វិកខាងត្បូងទាំងអស់។
ផែនការរបស់ចិននេះ គឺបង្កើតតំបន់ដោះដូរពាណិជ្ជកម្មសេរី រវាងចិន និងក្រុមប្រទេសដែនកោះទាំង១០។ មានន័យថាប្រទេសដែនកោះតូចៗទាំងនោះអាចលក់ទំនិញទៅចិន ឯចិនវិញអាចបញ្ជូនទំនិញទៅវាយលុកទីផ្សារនៃតំបន់ប៉ាស៊ីហ្វិកខាងត្បូង។ ចិនក៏នឹងសន្យាផ្តល់ជំនួយថវិកា រាប់រយលានដុល្លារ ដល់ប្រទេសទាំងនេះ ព្រមទាំងជួយផ្នែកស្រាវជ្រាវវិទ្យាសាស្ត្រ ឧទាហរណ៍ដូចជា កំណត់ផែនទីបាតសមុទ្រ រុករករ៉ែ និងធនធានធម្មជាតិផ្សេងៗជាដើម។ បន្ថែមពីកត្តាពាណិជ្ជកម្ម គឺចិនចង់បង្កើត ចំណងសម្ព័ន្ធភាពសន្តិសុខ ដែលចិនអះអាងថា គេអាចជួយ ផ្នែកសន្តិសុខព័ត៌មានវិទ្យា បណ្តុះបណ្តាលសមត្ថកិច្ចនគរបាល និងអាចជាសហប្រតិបត្តិការយោធាថែមទៀតផង។
ជើងយន្តហោះ រវាងចិន និងប្រទេសដែនកោះក្នុងតំបន់នេះ នឹងត្រូវបង្កើនឲ្យកាន់តែសំបូរ។ ចិននឹងតែងតាំងប្រេសិតពិសេសប្រចាំតំបន់ ចិនទទួលបណ្តុះបណ្តាលមន្ត្រីជំនាញការទូតឲ្យប្រទេសទាំងនេះ និងផ្តល់ឲ្យនូវអាហារូបករណ៍ ចំនួនសរុប២៥០០ ឲ្យនិស្សិតទៅរៀននៅចិនជាដើម។
ទំនិញចិន ប្តូរនឹងធនធានធម្មជាតិ
តាំងតែងពីណាពីណីមក អ្នកដែលមានឥទ្ធិពលធំ នៅក្នុងតំបន់ប៉ាស៊ីហ្វិកខាងត្បូងនេះ គឺអូស្ត្រាលី ហើយបន្ទាប់មកពីសហរដ្ឋអាមេរិក។ ដូច្នេះ វាជារឿងធម្មតាទេ ដែលវត្តមានរបស់ចិនចូលមកប្រជែងក្នុងតំបន់នេះ បានបង្កើតឲ្យមានការរិះគន់ ពីសំណាក់អូស្ត្រាលី និងអាមេរិក។ តែយ៉ាងណា ការរិះគន់ទាំងនេះ គឺវាបានស្តែងចេញពីភាពអាថ៌កំបាំង នៃចេតនាពិតរបស់ចិន នៅពីក្រោយផែនការកិច្ចព្រមព្រៀងដ៏ធំនេះ។
ទាក់ទិននឹងការដោះដូរពាណិជ្ជកម្មសេរី គ្រប់គ្នាដឹងច្បាស់ណាស់ ថាវាពិតជាលំអៀងទៅខាងចិន យ៉ាងប្រាកដ ព្រោះថាក្រុមប្រទេសដែនកោះទាំងនោះ គ្មានទំនិញអ្វីលក់ទៅឲ្យទីផ្សារចិនទេ គឺមានតែធនធានធម្មជាតិវត្ថុធាតុដើម រ៉ែ ព្រៃឈើជាដើម។ ខណៈដែលចិនអាចនឹងសម្រុក នាំយកទំនិញប្រើប្រាស់គ្រប់សព្វសារពើ មកដាក់លក់ពាសពេញទីផ្សារ ប្រទេសដែនកោះទាំងនោះវិញ គឺអាចនឹងហិនហោចភោគផលធនធានធម្មជាតិ ដោយសារតែការកាប់គាស់ជីកកកាយគ្មានត្រាប្រណី របស់ក្រុមហ៊ុនចិន។ កត្តាបរិស្ថាន និងធនធានធម្មជាតិ មិនត្រូវបានភាគីចិន លើកយកមកលំអិតក្នុងគម្រោងនេះទេ។ បន្ថែមពីនេះ គឺវិស័យសន្តិសុខ ដែលកិច្ចព្រមព្រៀងនេះ អាចបើកផ្លូវឲ្យចិនចូលជ្រៀត មកក្នុងកិច្ចការនយោបាយផ្ទៃក្នុង របស់ប្រទេសដែនកោះទាំងនេះ។ របត់នយោបាយ និងសង្គម អាចនឹងត្រូវផ្លាស់ប្តូរ ជាមួយនឹងវត្តមា នក៏ដូចជាទស្សនវិស័យធ្វើកា ររបៀបចិនកុម្មុយនីស្ត។
សហប្រតិបត្តិការសន្តិសុខ ដែលអាចបើកផ្លូវឲ្យចិន មានមូលដ្ឋានទ័ព
នៅព្រឹកថ្ងៃព្រហស្បតិ៍នេះ លោកនាយករដ្ឋមន្ត្រីថ្មីអូស្ត្រាលី អត់តូនី អាល់បាណេស បានលើកឡើងថា “គម្រោងផែនការរបស់ចិននេះ គឺបញ្ជាក់អំពីការស្រេកឃ្លានពង្រីកឥទ្ធិពលរបស់ចិន មកក្នុងតំបន់ប៉ាស៊ីហ្វិកខាងត្បូង ជាទីដែលអូស្ត្រាលីតែងតែជាដៃគូដ៏សំខាន់ ក្នុងវិស័យសន្តិសុខ តាំងតែពីក្រោយសង្គ្រាមលោកលើកទី២មក”។ ស្របពេលគ្នានេះ រដ្ឋាភិបាលថ្មីអូស្ត្រាលីបានប្រកាស បញ្ចេញប្រាក់ចំនួន ៥០០លានដុល្លារអូស្ត្រាលី ដើម្បីជួយប្រទេសដែនកោះក្នុងតំបន់ ផ្នែកបណ្តុះបណ្តាល ការពារជាតិ សន្តិសុខផ្លូវសមុទ្រ ព្រមទាំងកសាងហេដ្ឋារចនាសម្ព័ន្ធទប់ទល់ជាមួយនឹងវិបត្តិអាកាសធាតុជាដើម។
ចំណែកលោកស្រី ចាស៊ីនដា អារដិន នាយករដ្ឋមន្ត្រីនូវែលសេឡង់វិញ បានប្រកាសថា នូវែលសេឡង់ បានត្រៀមខ្លួនឆ្លើយ ចំពោះការដង្ហើយហៅរកជំនួយផ្នែកសន្តិសុខ ពីសំណាក់ប្រទេសក្នុងតំបន់ប៉ាស៊ីហ្វិកខាងត្បូង ព្រោះថានូវែលសេឡង់ ក៏ជាសមាជិកនៃក្រុមគ្រួសារតំបន់នេះដែរ។
ពីសហរដ្ឋអាមេរិកវិញ លោក Ned Price អ្នកនាំពាក្យសេតវិមាន បានលើកឡើងថា គម្រោងផែនការរបស់ចិននេះ ធ្វើឲ្យគេបារម្ភណាស់ ព្រោះវាធ្វើទៅដោយ “តក់ក្រហល់ និងខ្វះតម្លាភាព”។ អ្នកនាំពាក្យសេតវិមានរូបនេះ បានអំពាវនាវ ឲ្យប្រទេសដែលពាក់ព័ន្ធ ត្រូវតែប្រុងប្រយ័ត្ន កុំទុកចិត្តចិនពេក។ តែយ៉ាងណា លោកអះអាងថា វាជាសិទ្ធិសម្រេចដោយឯករាជ្យ របស់ប្រទេសនីមួយៗ អាមេរិកគ្មានសិទ្ធិអ្វីទៅហាមឃាត់ទេ។
“គម្រោងខ្វះភាពស្មោះត្រង់”
ក្នុងចំណោម១០ប្រទេសដែលពាក់ព័ន្ធ មានប្រទេសមួយ បានចេញមុខប្រឆាំងជាងគេ នឹងគម្រោងរបស់ចិននេះ គឺសហព័ន្ធមីក្រូណេស៊ី ។ លោក David Manuelo ប្រធានាធិបតីប្រទេសនេះ បានធ្វើលិខិតមួយ ផ្ញើទៅកាន់ប្រទេសផ្សេងៗទៀតដែលពាក់ព័ន្ធ ថាត្រូវតែប្រយ័ត្ន កុំចាញ់បោកគម្រោងផែនការ ដ៏គួរឲ្យទាក់ភ្នែករបស់ចិននេះឲ្យសោះ។ លោកបានចាត់ទុកថា គម្រោងរបស់ចិននេះ មានកម្មវត្ថុឈានទៅគ្រប់គ្រងវាទទី តំបន់នេះទាំងមូលតែម្តង។ លោក David Manuelo បានចាត់ទុកគម្រោងរបស់ចិន ថាជាគម្រោង ដែល “គ្មានភាពស្មោះត្រង់” ព្រោះវានឹងបើកដៃ ឲ្យចិនអាចសង្កត់ និងមានឥទ្ធិពលមកលើរដ្ឋាភិបាល មានឥទ្ធិពលមកលើសេដ្ឋកិច្ច មានឥទ្ធិពលមកលើវិស័យឧស្សាហកម្មសំខាន់ៗ ព្រមទាំងអាចបើកដៃឲ្យចិន ឈ្លបតាមដានជាលក្ខណៈប្រព័ន្ធ តាមរយៈការស្តាប់ទូរស័ព្ទ និងប្រមូលទិន្នន័យអាឡិចត្រូនិក របស់ប្រជាជនទូទាំងតំបន់នេះតែម្តង។
យ៉ាងណាក៏ដោយ ប្រទេសផ្សេងៗខ្លះទៀត អាចនឹងទន់ទោរ យល់ព្រមទទួលកិច្ចព្រមព្រៀងរបស់ចិន ដោយសំឡឹងឃើញ ផលវិជ្ជមានមួយចំនួន ដែលអាចកើតចេញពីគម្រោងរបស់ចិននេះ។ តែយ៉ាងណា ផលវិជ្ជមានទាំងនេះ វាអាចផលវិជ្ជមាន ជាលក្ខណៈបុគ្គល បែបពុករលួយ ដែលមន្ត្រីមានអំណាច អាចក្រេបជញ្ជក់យក។ ចំណែកប្រជាជនសាមញ្ញវិញ អាចមិនទទួលផលជាក់ស្តែងក៏ថាបាន។
ថ្នាក់ដឹកនាំកោះសាឡូម៉ុង ទំនងដូចជាទន់ទោរទៅតាមចិនហើយ។ កាលពីចុងខែមេសាថ្មីៗនេះ ចិន និងកោះសាឡូម៉ុន បានប្រកាសចុះកិច្ចព្រមព្រៀមទ្វេភាគី បើកចំណងសហប្រតិបត្តិការផ្នែកសន្តិសុខ។ អាមេរិកនិងអូស្ត្រាលី កំពុងបារម្ភថា កិច្ចព្រមព្រៀងនេះ នឹងបើកផ្លូវឲ្យចិន អាចសាងសង់មូលដ្ឋានទ័ព នៅលើកោះសាឡូម៉ុងនេះ។ នៅថ្ងៃព្រហស្បតិ៍នេះ លោកស្រី Penny Wong រដ្ឋមន្ត្រីការបរទេសអូស្ត្រាលី បានធ្វើដំណើរទៅកោះហ្វ៊ីជី ដើម្បីនិយាយពីគម្រោងផែនការ ដែលចិនកំពុងតែពពាយនាយនេះ។ យើងឃើញថា អូស្ត្រាលី បានចាប់ផ្តើមយុទ្ធនាការ ដើម្បីពន្យល់អូសទាញ កុំឲ្យប្រទេសទាំងនេះ យល់ព្រមបើកផ្លូវឲ្យចិនចូលលុកលុយឲ្យសោះ!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ