“កិច្ចប្រជុំកំពូលអាមេរិក” ដែលលោកចូ បៃដិន បានដាក់ក្តីសង្ឃឹម បញ្ចេញក្លិនបរាជ័យ
ចុះផ្សាយនៅថ្ងៃ៖
ស្តាប់ - ០៧:៣៧
ចាប់ពីថ្ងៃចន្ទ ទី៦ដល់ថ្ងៃទី១១មិថុនា សហរដ្ឋអាមេរិក នឹងរៀបចំ “កិច្ចប្រជុំកំពូលអាមេរិក” នៅទីក្រុង Los Angeles។ ជំនួបកំពូល រៀងរាល់៤ឆ្នាំម្តងនេះ ត្រូវបានផ្តួចផ្តើមឡើង នៅឆ្នាំ១៩៩៤ ដោយលោកប៊ីល គ្លីនតុន ដើម្បីពង្រឹងសហប្រតិបត្តិការ រវាងសហរដ្ឋអាមេរិក ជាមួយប្រទេសទាំងអស់នៅទ្វីបអាមេរិក និងតំបន់ការ៉ាអ៊ីប។ ខណៈដែលចិនកំពុងមានវត្តមាន កាន់តែខ្លាំងឡើងនៅក្នុងតំបន់នេះ រដ្ឋាភិបាលលោកចូ បៃដិន មានបំណងយកវេទិកាកំពូលលើកនេះ ដើម្បីបង្ហាញពីការវិលត្រលប់មកវិញ របស់សហរដ្ឋអាមេរិក ក្នុងនាមជាមហាអំណាចប្រជាធិបតេយ្យ ដែលមិនអាចខ្វះបាន។ តែយ៉ាងណា ចំហាយក្លិនបរាជ័យ កំពុងតែរសាត់ចេញមកហើយ ខណៈដែលកិច្ចប្រជុំកំពូលនេះ មិនទាន់ទាំងចាប់ផ្តើមផង។
ពង្រឹងឥទ្ធពលសហរដ្ឋអាមេរិកឡើងវិញ
កិច្ចប្រជុំកំពូលអាមេរិក ធ្វើឡើងរៀងរាល់៤ឆ្នាំម្តង ជាឱកាសដែល សហរដ្ឋអាមេរិក ជួបប្រជុំជាមួយប្រទេសនៅទ្វីបអាមេរិកទាំងអស់ និងក្រុមប្រទេសកោះតំបន់ការ៉ាអ៊ីបផងដែរ។ ដូចយើងបានដឹងហើយ កាលពីក្នុងអាណត្តិលោកដូណាល់ ត្រាំ សហរដ្ឋអាមេរិក បានធ្វើឲ្យក្រុមប្រទេសក្នុងតំបន់នេះទាំងមូល ខកចិត្តខ្លាំងណាស់ ព្រោះរដ្ឋាភិបាលលោកដូណាល់ ត្រាំ បានដើរលើផ្លូវផ្តាច់ខ្លួនពីគេឯង បិទទ្វារសេដ្ឋកិច្ច ធ្វើជញ្ជាំងបិទខ្ទប់ព្រំដែន ។ល។ កាលពីជំនួបកំពូលនៅឆ្នាំ ២០១៨ លោក ដូណាល់ ត្រាំ មិនទាំងបានទៅចូលរួមផង។
ទន្ទឹមគ្នានេះ ចិនបានសំរុក មានវត្តមានកាន់តែខ្លាំង ជាពិសេសនៅតំបន់អាមេរិកឡាទីនតែម្តង តាមរយៈគម្រោងវិនិយោគ ការផ្តល់ប្រាក់កំចី និងកិច្ចសហប្រតិបត្តិការដោះដូរពាណិជ្ជកម្ម ក្នុងក្របខណ្ឌផ្លូវមួយខ្សែក្រវ៉ាត់មួយ។ ដដូច្នេះ សម្រាប់លើកនេះ លោកចូ បៃដិន មានបំណង ឲ្យសហរដ្ឋអាមេរិក មានសន្ទុះ មានឥទ្ធិពលឡើងវិញនៅក្នុងតំបន់នេះ ដើម្បីទប់កុំឲ្យវាធ្លាក់ទៅក្នុងកណ្តាប់ដៃចិនទាំងស្រុង។
លោក Juan Gonzalez ទីប្រឹក្សាពិសេសសម្រាប់តំបន់អាមេរិកឡាទិន របស់លោកចូ បៃដិន បានលើកឡើងថា លោក ចូ បៃដិន នឹងយកឱកាសវេទិកាកំពូលនេះ ផ្សព្វផ្សាយពីទស្សនវិស័យរួមសម្រាប់តំបន់ ដែលឈរលើគោលការណ៍ “សុខសុវត្ថិភាព” និង “លទ្ធិប្រជាធិបតេយ្យ”។
បើតាមការវិភាគ របស់លោក Christophe Ventura អ្នកជំនាញ នៅវិទ្យាស្ថានស្រាវជ្រាវអន្តរជាតិនិងយុទ្ធសាស្ត្រ IRIS គឺលោកចូ បៃដិន អាចលើកយកចំណុចធំៗមួយចំនួនមកនិយាយ នៅក្នុងកម្មវិធីនយោបាយរបស់គាត់ ដូចជា សំណុំរឿងអន្តរកម្មថាមពល ផែនការវិនិយោគថ្មីៗក្នុងវិស័យថាមពលបៃតង ដើម្បីប្រយុទ្ធនឹងបម្រែបម្រួលអាកាសធាតុ ជាដើម។ បន្ថែមពីនេះ លោក ចូ បៃដិន ក៏អាចលើកយកមកនិយាយដែរ អំពីការប្រយុទ្ធប្រឆាំងនឹងជំងឺឆ្លងកូវីដ១៩ ព្រមទាំងបញ្ហាអន្តោប្រវេសន៍ ដែលជាបញ្ហារសើបបំផុត រវាងសហរដ្ឋអាមេរិក ជាមួយប្រទេសតំបន់អាមេរិកខាងត្បូង។
ប្រទេសអាមេរិកខាងត្បូងខ្លះ ធ្វើពហិការមិនចូលរួម
គិតមកទល់ល្ងាចថ្ងៃអាទិត្យទី៥មិថុនា ប៉ុន្មានម៉ោងមុនចាប់ផ្តើម បើកកិច្ចប្រជុំកំពូល នៅទីក្រុង Los Angeles នេះ ខាងរដ្ឋាភិបាលអាមេរិក មិនទាន់បានចេញបញ្ជីឈ្មោះ ថ្នាក់ដឹកនាំ ដែលនឹងមានវត្តមានចូលរួមទេ។ លោកប្រធានាធិបតីម៉ិកស៊ិក Andre Manuel Lopez Obrador បានប្រកាសថា លោកនឹងមិនទៅចូលរួមទេ ប្រសិនបើប្រទេសទាំងអស់ នៅទ្វីបអាមេរិក នឹងមិនត្រូវបានអាមេរិកអញ្ជើញឲ្យចូលរួម ជាផ្លូវការ។
ការប្រកាសរបស់លោកប្រធានាធិបតីមិកស៊ុកបែបនេះ គឺបន្ទាប់ពី រដ្ឋាភិបាលសហរដ្ឋអាមេរិក បានអះអាងថា គឺអញ្ជើញតែប្រទេសប្រជាធិបតេយ្យតែប៉ុណ្ណោះ។ ចំណែកប្រទេសខ្លះ ដូចជា វ៉េណេស៊ុយអេឡា គុយបា និង នីការ៉ាហ្កាយ គឺគេមិនស្វាគមន៍ទេ។ ភាគីរដ្ឋាភិបាលអាមេរិក បានអះអាងថា គិតមកត្រឹមពេលនេះ គឺមាន ប្រធានាធិបតីប្រេស៊ីល ប្រធានាធិបតីអាហ្សង់ទីន និងឈីលី ដែលបានឆ្លើយថានឹងមកចូលរួម។
ដោយឡែក បើតាមប្រភពច្បាស់ការផ្សេងទៀត លោកប្រធានាធិបតីហ្កាតេម៉ាឡា និងបូលីវី បានបញ្ជាក់ថានឹងមិនទៅចូលរួមទេ។ ចំណែកលោកស្រីប្រធានាធិបតី ហុងឌូរ៉ាស់ ដែលស្វាមីគាត់ គឺលោក Manuel Zelaya ត្រូវគេធ្វើរដ្ឋប្រហារទំលាក់នៅឆ្នាំ២០០៩ ហើយដែលគេសង្ស័យថាជាស្នាដៃរបស់ចារកិច្ចអាមេរិកនោះ ក៏បានប្រកាសថា លោកស្រីមិនទៅចូលរួមដែរ។ រីឯក្រុមប្រទេសការ៉ាអ៊ីប រួមគ្នាក្នុងសម្ព័ន្ធ Caricom ក៏បានបញ្ជាក់ថា នឹងមិនទៅចូលរួមដែរ។
សហរដ្ឋអាមេរិក កាន់តែចុះថយឥទ្ធិពល
គេសង្កេតឃើញថា ប៉ុន្មានឆ្នាំចុងក្រោយនេះ ជាពិសេស ចាប់តាំងពីអាណត្តិលោកដូណាល់ ត្រាំមក គឺថាសហរដ្ឋអាមេរិកកាន់តែអស់ឥទ្ធិពលហើយ នៅក្នុងតំបន់នេះ។ ក្នុងអាណត្តិលោកដូណាល់ ត្រាំ គោលនយោបាយអន្តោប្រវេសន៍ របស់សហរដ្ឋអាមេរិក បានធ្វើឲ្យប្រទេសអាមេរិកខាងត្បូង មានការខកចិត្តខ្លាំងណាស់។ ជាងនេះទៀត រដ្ឋាភិបាលលោកដូណាល់ ត្រាំ បានដកខ្លួនចេញពីទ្រឹស្តីពហុភាគីនិយម បិទទ្វារការពារសេដ្ឋកិច្ចតែខ្លួនឯង បែបអត្មានិយម។ ដោយហេតុនេះហើយ បានជាប្រទេសកាន់ច្រើន នៅតំបន់អាមេរិកខាងត្បូង បានងាកទៅខាងចិន ដើម្បីរៀបចំ ធ្វើកិច្ចព្រមព្រៀងពាណិជ្ជកម្មសេរី និងខ្ចីប្រាក់ចិនយកមកវិនិយោគ។
ជាងនេះទៀត ចាប់តាំងពីលោកចូ បៃដិនចូលកាន់អំណាចមក គឺរដ្ឋាភិបាលសហរដ្ឋអាមេរិក មិនបានធ្វើអ្វីឲ្យជាក់ស្តែង ដើម្បី ជួយស្តារទំនាក់ទំនងនៅក្នុងតំបន់នេះទេ។ បញ្ហាអន្តប្រវេសន៍ ក៏នៅតែដដែល មិនទាន់កម្មវិធីនយោបាយថ្មី ដែលទន់ភ្លន់ជាងកាលជំនាន់លោកដូណាល់ ត្រាំឡើយ។ ក្នុងអំឡុងពេលវិបត្តិជំងឺឆ្លងកូវីតទៀត គឺរដ្ឋាភិបាលលោកចូ បៃដិន មិនបានជួយផ្តល់វ៉ាក់សាំង ទៅឲ្យប្រទេសអាមេរិកខាងត្បូងទេ។ ប្រទេសទាំងនោះ សូម្បីតែប្រទេសខ្លះដែលធ្លាប់តែស្និទនឹងសហរដ្ឋអាមេរិក គឺបានវ៉ាក់សាំងពីចិន និងពីរុស្ស៊ីទៅវិញទេ។
គឺកត្តាទាំងនេះហើយ ដែលគួបផ្សំគ្នា ធ្វើឲ្យប្រទេសអាមេរិកខាងត្បូង លែងសូវផ្តល់តម្លៃ ដល់ឥទ្ធិពលរបស់សហរដ្ឋអាមេរិក។ លោក Michael Shifter អ្នកស្រាវជ្រាវនៅ Inter-American Dialogue បានលើកឡើងថា ប្រទេសផ្សេងៗក្នុងតំបន់ដឹងថា លោកចូ បៃដិន គ្មានប្រជាប្រិយក្នុងស្រុក ហើយអាចប្រឈមនឹងការបាត់សំឡេងភាគច្រើនក្នុងសភាខុនហ្ក្រេសទៀត នៅពេលបោះឆ្នោតពាក់កណ្តាលអាណត្តិចុងឆ្នាំនេះ។ សហរដ្ឋអាមេរិករាល់ថ្ងៃនេះ មានឥទ្ធិពលទៅលើប្រទេសក្បែរខាងក្នុងតំបន់ តែផ្នែកវប្បធម៌កំសាន្តសប្បាយ ចម្រៀង ភាពយន្ត និងរបៀបប្រើប្រាស់ទំនិញជាដើម ពោលគឺជា « Soft Power » ។ ដោយឡែក ឥទ្ធិពលសេដ្ឋកិច្ច នយោបាយ និងកិច្ចការបរទេសវិញ គឺថាចុះអន់ថយ ពីមួយថ្ងៃទៅមួយថ្ងៃ។
ក្លិនចំហាយបរាជ័យ
ក្រុមការងារសេតវិមាន និងក្រសួងការបរទេសអាមេរិក បានប្រឹងប្រែងសម្បើមណាស់ ក្នុងការរៀបចំកម្មវិធីជំនួបកំពូលនេះ។ គ្រាន់តែលោកប្រធានាធិបតី ប្រទេសម៉ិកស៊ិក ប្រកាសថាមិនទៅចូលរួម ប្រទេសផ្សេងៗទៀត នាំគ្នាប្រកាសដែរ ធ្វើឲ្យភាគីសហរដ្ឋអាមេរិក ល្វីងមុខតែម្តង។
តែយ៉ាងណា យើងត្រូវរងចាំមើល ថាតើ រដ្ឋាភិបាលលោកចូ បៃដិន នឹងស្នើផែនការអ្វីខ្លះ ដើម្បីស្តារទំនាក់ទំនងនយោបាយ និងសេដ្ឋកិច្ចជាមួយក្រុមប្រទេសអាមេរិកខាងត្បូង។ តើសហរដ្ឋអាមេរិក នឹងមានផែនការពាណិជ្ជកម្មជួយប្រទេសទាំងនោះ ដែរឬទេ? តើនឹងមានផែនការ ផ្តល់កំចីហិរញ្ញវត្ថុ យកទៅវិនិយោគ គ្រាន់បើជាងចិន ដែរឬទេ?
លោក Eric Farnsworth អនុប្រធានក្រុមប្រឹក្សាអាមេរិក ដែលជាអង្គភាពមួយលើកកំពស់ការដោះដូរពាណិជ្ជកម្មសេរីក្នុងតំបន់ បានលើកឡើងកាលពីពេលថ្មីៗនេះថា កិច្ចប្រជុំកំពូលអាមេរិកនេះ ពីមួយ ទៅមួយទៀត គឺថាកាន់តែចុះខ្សោយ កាន់តែលែងមានផែនការសេដ្ឋកិច្ចពាណិជ្ជកម្ម ដែលគួរជាទីត្រេកអរ។ ដូចគ្នាដែរ លោក Benjamin Gedan សាស្ត្រាចារ្យនៅ Woodrow Wilson International Center បានលើកឡើងថា សហរដ្ឋអាមេរិកនៅពេលនេះ គឺនឹងធ្វើឲ្យប្រទេសអាមេរិកខាងត្បូងខកបំណង ដោយចៀសមិនបាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ