កិច្ចប្រជុំកំពូលអាមេរិក សម្រេច សេចក្តីប្រកាសស្តីពីការទទួលនិងការគ្រប់គ្រងជនអន្តោប្រវេសន៍
ចុះផ្សាយនៅថ្ងៃ៖
ស្តាប់ - ០៧:២៦
នៅក្នុងរដ្ឋកាលីហ្វ័រញ៉ា «កិច្ចប្រជុំកំពូលអាមេរិកលើកទី៩» ដែលប្រមូលផ្តុំដោយប្រទេសនៅក្នុងទ្វីបអាមេរិក-តំបន់អាមេរិកឡាទីន បានបិទបញ្ចប់ហើយ នៅថ្ងៃសុក្រ ទី១០មិថុនា។ ជាមួយនឹងលទ្ធផលដ៏ស្តួងស្តើង គឺមានប្រទេសចំនួន២០ បានសម្រេចចុះហត្ថលេខាលើកិច្ចព្រមព្រៀងមួយ ដែលគេហៅថា«សេចក្តីប្រកាសទីក្រុង Los Angeles » ស្តីពីការទទួលនិងការគ្រប់គ្រងជនអន្តោប្រវេសន៍នៅក្នុងតំបន់។ សេចក្តីប្រកាសនេះ បញ្ជាក់ថា រដ្ឋហត្ថលេខីត្រូវខិតខំពង្រឹងសុវត្ថិភាពសន្តិសុខតាមបណ្តោយព្រំដែន, បង្កើតវិធានការជួយគាំពារដល់ជនភៀសខ្លួនស្របច្បាប់ ហើយនិងប្រឹងប្រែងប្រយុទ្ធប្រឆាំងនឹងការជួញដូរមនុស្សដែលកើតតាមរយៈការរត់ភៀសខ្លួន។ ជាមួយគ្នានឹងនេះ ថ្នាក់ដឹកនាំនៃសហរដ្ឋអាមេរិក កាដាណា និងប្រទេសហត្ថលេខី មួយចំនួនទៀត ក៏បានសម្រេចប្រកាសពីចំនួនជនអន្តោប្រវេសន៍ ដែលប្រទេសរបស់ខ្លួន ស្ម័គ្រចិត្តទទួល។
កិច្ចប្រជុំកំពូលអាមេរិកលើកទី៩ ត្រូវគេមើលឃើញថា ហាក់ដូចជាទទួលបានលទ្ធផលតិចតួចស្តួចស្តើង។
អ្នកវិភាគស្ថានការណ៍អន្តរជាតិ សម្គាល់លទ្ធផលតិចតួច។ ចំពោះអ្នកខ្លះ នៅក្នុងពេលបើកកិច្ចប្រជុំពីដំបូង គឺគេស្ទើរតែហ៊ានដល់ថាបរាជ័យទៀតផង។ ពីព្រោះថា មានប្រទេសខ្លះក្នុងតំបន់ដែរ តែមិនបានមកចូលរួមទេ ព្រោះតែសហរដ្ឋអាមេរិកមិនស្វាគមន៍ ហើយ មានប្រទេសខ្លះទៀត ក៏បានប្រកាសថា មិនមកចូលរួមដោយខ្លួនឯងតែម្តង។
ចំណែក កិច្ចព្រមព្រៀង ឬ«សេចក្តីប្រកាសទីក្រុង Los Angeles » ស្តីពីការទទួលនិងការគ្រប់គ្រងជនអន្តោប្រវេសន៍នៅក្នុងតំបន់ នៅពេលនេះទៀតសោត គឺវាមិនមានលក្ខណៈចាប់បង្ខំឲ្យអនុវត្តនោះទេ គឺរដ្ឋសមាជិកហត្ថលេខី ធ្វើតាមការស្មគ្រចិត្ត។ គ្រាន់តែមានការចែងថា ត្រូវខំប្រឹងប្រែងអនុវត្តប៉ុណ្ណោះ។
ទោះជាយ៉ាងនេះក្តី ថ្នាក់ដឹកនាំសហរដ្ឋអាមេរិក លោក ចូ បៃដិន គិតនិងយល់ថា កិច្ចព្រមព្រៀងនេះ នឹងជួយឲ្យគ្រប់គ្រងចាត់ចែងជនអន្តោប្រវេសន៍ បានប្រសើរជាងមុន និងល្អមិនធ្លាប់មានក្នុងប្រវត្តិសាស្ត្រ។ ល្អពីព្រោះថា មានការបែងចែងការទទួលខុសត្រូវទៅតាមប្រទេសនីមួយ ក្នុងស្មារតីរួមមួយ គឺថា គិតគូរដល់ការជួយគាំទ្រដល់ជនភៀសខ្លួន តែក៏ត្រូវពង្រឹងសន្តិសុខតាមព្រំដែន និងសើរើនីតិវិធីសុំសិទ្ធិជ្រកក្រោន។
តាមប្រសាសន៍របស់ប្រធានាធិបតីអាមេរិក គឺលោក ចូ បៃដិន ចង់ឲ្យការធ្វើអន្តោប្រវេសន៍ ដោយមានសុវត្ថិភាព និងស្របច្បាប់ ហើយដោយមានស្មារតីមនុស្សធម៌ផង ក្នុងរឿងនេះ។ ចំពោះលោកប្រធានាធិបតីអាមេរិក ចូ បៃដិន បានថ្លែងបញ្ជាក់តាំងពីថ្ងៃបើកឆាកដំបូងមកម្ល៉េះ ថា« អន្តោប្រវេសន៍ស្របច្បាប់ ដែលមានសុវត្ថិភាព មានការរៀបចំត្រឹមត្រូវ គឺវាអាចហុចគុណប្រយោជន៍ ដល់សេដ្ឋកិច្ចទាំងអស់គ្នា រាប់ទាំងសហរដ្ឋអាមេរិកផង។ ពោលគឺវាអាចចូលរួមចំណែក ដល់ការចម្រុងចម្រើន ជារៀងដរាប។»
អាមេរិក បានប្រកាសទទួលជនភៀសខ្លួនបន្ថែម។ ចំណែកប្រទេសផ្សេងៗនៅក្នុងតំបន់ ក៏បានបញ្ជាក់ពីជំហរទទួលជនភៀសខ្លួនដែរ ព្រមទាំងប្រកាសពីកែសម្រួលគម្រោងទទួលជនអន្តោប្រវេសន៍ផង។
ចំពោះភាគីសហរដ្ឋអាមេរិក, រដ្ឋបាលរបស់លោក ចូ បៃដិន បានប្រកាសទទួលជនភៀសខ្លួន ចំនួន២ម៉ឺនាក់ ដែលមកពីតំបន់អាមេរិកឡាទីន នៅឆ្នាំថ្មី ឆ្នាំ២០២៣ និង២០២៤។ ជាចំនួនមួយដែលគេមើលឃើញថា បានកើនឡើងបីដង។ ប៉ុន្តែ វានៅតែតិចជាងចំនួនដែលសហរដ្ឋអាមេរិកទទួលជនភៀសខ្លួនអ៊ុយក្រែន ដែលមានចំនួនដល់១០ម៉ឺននាក់។
ទោះជាយ៉ាងនេះក្តី រដ្ឋបាលរបស់លោក ចូ បៃដិន ក៏បញ្ជាក់ដែរ ថានឹងផ្តល់ថវិកាចំនួន ៣១៤ លានដុល្លារ ដើមផ្តល់ជំនួយផ្នែកមនុស្សធម៌ សម្រាប់ពលរដ្ឋភៀសខ្លួនជាតិ វ៉េណេស៊ុយអេឡា។ ហើយអាមេរិកក៏នឹងជួយពលរដ្ឋហៃទី។ បើទោះបីមិនបញ្ជាក់ពីចំនួនច្បាស់លាស់ តែរដ្ឋបាលរបស់លោក ចូ បៃដិន ក៏បង្ហើបថានឹងបង្កើនចំនួនជនភៀសខ្លួន ជាតិហៃទី នេះដែរ។
ប្រទេសសមាជិកផ្សេងៗទៀត ក៏បានបញ្ជាក់ពីជំហររបស់ខ្លួនរៀងខ្លួនដែរ។ ជាក់ស្តែង ប្រទេស កូឡុំប៊ី ក៏ប្រកាសផ្តល់បណ្ណរស់នៅស្របច្បាប់ ដល់ពលរដ្ឋភៀសខ្លួនជាតិ វ៉េណេស៊ុយអេឡា ចំនួន ១,៧ លាននាក់។ ចំពោះ កូស្តា-រីកា ក៏បានបញ្ជាក់ថានឹងបន្តសុពុលភាព គម្រោងជួយផ្តល់ការងាររយៈពេលខ្លី ទៅដល់ជនភៀសខ្លួនដែលមកពីប្រទេស គុយបា, នីការ៉ាហ្កា និង វ៉េណេស៊ុយអេឡា ដែរ។
ម៉ិចស៊ិក នឹងបង្កើតចំនួនអ្នកដែលនឹងត្រូវទទួលបានផលប្រយោជន៍ពីគម្រោងការងារសម្រាប់ជនជនអន្តោប្រវេសន៍ ពីចំនួន១ម៉ឺន ទៅ២ម៉ឺននាក់។ រីឯ កាណាដា បើកចំហព្រំដែនទទួលជនភៀសខ្លួន ចំនួន៥ម៉ឺននាក់ ដែលចង់ទៅធ្វើការវិស័យកសិកម្ម។ ហើយ ប្រទេស Bélize នឹងប្រកាសពីគម្រោងជួយគាំទ្រផ្លូវច្បាប់សម្រាប់ជនអន្តោប្រវេសន៍ខុសច្បាប់ ក្នុងទឹកដីរបស់ខ្លួន។
សំណុំរឿងជនអន្តោប្រវេសន៍នៅក្នុងតំបន់និងទ្វីបអាមេរិក គឺជា មធ្យោបាយមួយសម្រាប់ប្រទេសទាំងឡាយនៅក្នុងតំបន់ ដើម្បីដាក់សម្ពាធទៅលើសហរដ្ឋអាមេរិក។ ហេតុអ្វី?
បើនិយាយថា វាជាសម្ពាធសម្រាប់អាមេរិក ព្រោះជាអាចនឹងបង្កការលំបាកដល់សេវាសង្គមកិច្ច និងការគ្រប់គ្រងសន្តិសុខនានា។ ទន្ទឹមនឹងនេះ គណបក្សសាធារណៈរដ្ឋ និងក្រុមប្រឆាំង គឺតែងតែរិះគន់មិនសំចៃមាត់ចំពោះនយោបាយអន្តោប្រវេសន៍ របស់បក្សខាងប្រជាធិបតេយ្យ។ យោងតាមទិន្នន័យរបស់ទីភ្នាក់ព័ត៌មានបារាំង AFP គឺនៅឆ្នាំ២០២១ សហរដ្ឋអាមេរិក បានជាប់ឃាត់ខ្លួនជនអន្តោប្រវេសន៍ខុសច្បាប់ ចំនួនជាង២លាននាក់។
បើគិតពីផ្នែកសេដ្ឋកិច្ចវិញ គឺវាអាចចំណេញទាំងអស់គ្នា។ ការទទួលជនភៀសខ្លួន គឺមិនសុទ្ធតែអាក្រក់ទេ។ នៅមុននេះ យើងក៏បានលើកឡើងពីប្រសាសន៍របស់លោកចូបៃដិនដែលបញ្ជាក់ពីផលប្រយោជន៍សេដ្ឋកិច្ច ប្រសិនបើគេគ្រប់គ្រងវិស័យនេះឲ្យត្រឹមត្រូវ។ ប្រភពចំណូលមួយទៀត គឺសម្រាប់ក្រុមគ្រួសាររបស់ជនភៀសខ្លួន ខ្លួនឯងផង និងជាចំណូលសេដ្ឋកិច្ចជាតិ របស់ប្រទេសកំណើតគេ មួយបែបផង។ ដូច្នេះ គេលំបាកនឹងបិទខ្ទប់កុំឲ្យមានលំហូរជនភៀសខ្លួននេះណាស់។
ម្យ៉ាងវិញទៀត បើយើងនិយាយពីលក្ខខណ្ឌសត្យានុម័ត ផ្នែកមនុស្សធម៌។ ជាក់ស្តែង ប្រទេសវ៉េណេស៊ុយអេឡា! ការផ្ទុះចម្លោះផ្ទៃក្នុង វិបត្តិសង្គម បញ្ហាសេដ្ឋកិច្ច និងវិបត្តិនយោបាយ ប៉ុន្មានឆ្នាំងចុងក្រោយនេះ គឺធ្វើឲ្យពលរដ្ឋវ៉េណេស៊ុយអេឡា ប្រមាណជាជាង៦លាននាក់ហើយ ដែលត្រូវបង្ខំចិត្តភៀសខ្លួនចាកចោលប្រទេសកំណើត។ ពួកគេត្រូវការប្រទេសជ្រកក្រោណមួយដែលមានសុវត្ថិភាព និងអាចធ្វើការរកស៊ីទទួលទាន។
«កិច្ចប្រជុំកំពូលអាមេរិក លើកទី៩» ក៏ជាផ្នែកមួយដែល សហរដ្ឋអាមេរិក ខំប្រឹងយកចិត្តទុក ដើម្បីស្តារមុខមាត់ ទ្វីបអាមេរិក - តំបន់អាមេរិកឡាទីន។
បើគិតត្រឡប់ក្រោយបន្តិច គឺនៅក្នុងអាណត្តិ របស់ប្រធានាធិបតីអាមេរិក លោក ដូណាល់ ត្រាំ នាពេលកន្លងទៅ គឺបានធ្វើឲ្យកិត្តិយសនិងឥទ្ធិពលរបស់សហរដ្ឋអាមេរិក ហាក់បានអាប់ឱនជាច្រើននៅក្នុងតំបន់ទ្វីបអាមេរិក-អាមេរិកឡាទីន។ អាប់ឱន គឺលោក ដូណាល់ ត្រាំ បានបង្កជម្លោះបាញ់បោះពាក្យសម្តីទ្រគោះបោះបោកជាច្រើនជាមួយថ្នាក់ដឹកនាំនៃប្រទេសក្នុងតំបន់នេះ ហើយលោកក៏បានអនុវត្តគោលនយោបាយសួនតួនិយម ដែលគិតតែប្រយោជន៍របស់អាមេរិកជាធំ។ ក្នុងបរិបទនេះ គឺវាបានធ្វើឲ្យប្រទេសក្នុងតំបន់នេះ អាក់អន់ចិត្ត ហើយកាន់តែងាយទៅរកប្រទេសចិន កាន់តែខ្លាំង។
នៅក្នុងទ្វីបអាមេរិក - តំបន់អាមេរិកឡាទីន សព្វថ្ងៃនេះ គឺការវិនិយោគចិន បានរីកកំណើតខ្លាំង ហើយទីផ្សារពាណជ្ជកម្មរបស់ចិន គឺមានវិសាលភាព គ្រប់តែប្រទេសនៅក្នុងតំបន់នេះ។ រឿងនេះ បានធ្វើសហរដ្ឋអាមេរិក ព្រួយបារម្ភមិនតិចទេ ហើយខំប្រឹងយកចិត្ត និងរកមធ្យោបាយធ្វើការជាមួយប្រទេសទាំងនោះ ឲ្យល្អប្រសើរឡើងវិញ។
ទោះបីជាយ៉ាងនេះក្តី លោក ចូ បៃដិន ក៏ដឹងខ្លួនច្បាស់ដែរ ថា ពេលនេះ អាមេរិក ក៏មិនចង់អភិវឌ្ឍគម្រោងហេដ្ឋារចនាសម្ព័ន្ធនិងគម្រោងវិនិយោគធំៗ នៅក្នុងតំបន់នេះ ដូចដែល ក្រុងប៉េកាំង បានធ្វើ និងកំពុងធ្វើនោះដែរ។ នេះទីភ្នាក់ព័ត៌មានបារាំង AFP៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ