គម្រោងដឹកជនអន្តោប្រវេសន៍យកទៅចោលនៅរវ៉ាន់ដា របស់លោកបូរីស ចនសុន ត្រូវបានតុលាការសិទ្ធិមនុស្សអឺរ៉ុបរារាំង
ចុះផ្សាយនៅថ្ងៃ៖
ស្តាប់ - ០៨:៤០
រដ្ឋាភិបាលអង់គ្លេស ដឹកនាំដោយលោកនាយករដ្ឋមន្ត្រីបូរីស ចនសុន កំពុងតែជួបរឿងអាម៉ាស់មួយថ្មីទៀត ទាក់ទិននឹងគោលនយោបាយ គ្រប់គ្រងជនអន្តោប្រវេសន៍។ បន្ទាប់ពីបានចុះកិច្ចព្រមព្រៀងជាមួយរដ្ឋាភិបាលប្រទេសរវ៉ាន់ដា អង់គ្លេសបានគ្រោងបញ្ជូនជនអន្តោប្រវេសន៍ខុសច្បាប់ ដោយដឹកតាមយន្តហោះ យកទៅទីក្រុងគីហ្កាលី ប្រទេសរវ៉ាន់ដា នៅព្រឹកថ្ងៃពុធ ទី១៥មិថុនា។ ក៏ប៉ុន្តែ នៅប៉ុន្មានម៉ោង មុនយន្តហោះចេញដំណើរ តុលាការសិទ្ធិមនុស្សអឺរ៉ុប បានធ្វើអន្តរាគមន៍រារាំងមិនឲ្យយន្តហោះចេញដំណើរបាន។
រដ្ឋាភិបាលអង់គ្លេស បានចុះកិច្ចព្រមព្រៀងជាមួយប្រទេសរវ៉ានដា ដើម្បីឲ្យប្រទេសនេះ ទទួលយកជនអន្តោប្រវេសន៍ ដែលចូលមកអង់គ្លេសដោយខុសច្បាប់។ តាមរយៈកិច្ចព្រមព្រៀងនេះ យន្តហោះទីមួយ ដែលដឹកជនអន្តោប្រវេសន៍ ត្រូវចេញដំណើរពីអង់គ្លេស នៅព្រឹកថ្ងៃពុធនេះ។ ក៏ប៉ុន្តែ ស្រាប់តែនៅវេលាល្ងាចថ្ងៃអង្គារ តុលាការសិទ្ធិមនុស្សអឺរ៉ុប បានចេញដីកា អនុវត្តនីតិវិធីបន្ទាន់ ដើម្បីរារាំងមិនឲ្យយន្តហោះនេះអាចចេញដំណើរទៅបាន។
តុលាការកំពូលអង់គ្លេស ត្រូវសម្រេចពីភាពស្របច្បាប់នៃកិច្ចព្រមព្រៀងជាមុន
តាមគម្រោងពីដំបូង រដ្ឋាភិបាលអង់គ្លេសគ្រោងដឹកជនអន្តោប្រវេសន៍ ចំនួន១៣០នាក់ ភាគច្រើនសុទ្ធតែជនជាតិស៊ីរី អ៊ីរ៉ាក់ អ៊ីរ៉ង់ និងអាល់បានី។ តែដល់ថ្ងៃចេញដំណើរ គឺមានតែជនជាតិអ៊ីរ៉ង់៣នាក់ វៀតណាមម្នាក់ អ៊ីរ៉ាក់២នាក់ និងអាល់បានីម្នាក់ទេ ដែលមានឈ្មោះក្នុងបញ្ជីត្រូវគេបញ្ជូនទៅរវ៉ានដា។ ចំណែកជនអន្តោប្រវេសន៍ផ្សេងទៀត បានដាក់ពាក្យប្តឹងទៅតុលាការអង់គ្លេស ហើយតុលាការបានចេញសាលក្រម ហាមឃាត់ឬផ្អាកមិនឲ្យបញ្ជូនខ្លួនពួកគេទៅ ដោយយោងលើហេតុផលផ្សេងៗ ថាពួកគេ គឺជាជនរងគ្រោះរងទារុណកម្ម និងខ្លះជាអនីតិជនជាដើម។
តែនៅទីបំផុត ជនអន្តោប្រវេសន៍មិនដល់១០នាក់នេះ ក៏អង់គ្លេសមិនអាចបញ្ជូនចេញទៅរវ៉ានដាបានដែរ បន្ទាប់ពីមានអន្តរាគមន៍ នៅនាទីចុងក្រោយ ពីសំណាក់តុលាការសិទ្ធិមនុស្សអឺរ៉ុប។ តុលាការសិទ្ធិមនុស្សអឺរ៉ុប បានលើកឡើង ពីករណីជនជាតិអ៊ីរ៉ាក់ម្នាក់ ដែលមានឈ្មោះក្នុងបញ្ជីត្រូវគេបញ្ជូនទៅ និងបានលើកហេតុផល ពីការការបារម្ភ របស់ឧត្តមស្នងការសិទ្ធិមនុស្សនៃអង្គការសហប្រជាជាតិ ទាក់ទិននឹងលក្ខខណ្ឌទទួលជនភៀសខ្លួនបរទេស របស់អាជ្ញាធររវ៉ានដា។ មិនត្រឹមតែប៉ុណ្ណោះ តុលាការសិទ្ធិមនុស្សអឺរ៉ុប បានអះអាងថា កិច្ចព្រមព្រៀងរវាងរដ្ឋាភិបាលអង់គ្លេស និងរវ៉ានដានេះ គឺត្រូវតែឆ្លងកាត់ “ការបញ្ជាក់ភាពស្របច្បាប់” ពីតុលាការកំពូលអង់គ្លេសសិន ទើបអាចអនុវត្តវាបាន។ តាមធម្មតា តុលាការកំពូលអង់គ្លេស នឹងត្រូវសម្រេចសេចក្តីនៅរវាងខែកក្កដាខាងមុខនេះ។
“វិធានការគ្មានធម៌មេត្តា និងខុសច្បាប់”
មានតែក្រុមស្តាំនិយមជ្រុលនៅអង់គ្លេសទេ ដែលគាំទ្រវិធានការដ៏តឹងតែងនេះ។ លោកបូរីស ចនសុន ចង់បំពេញបំណងក្រុមស្តាំនិយមជ្រុលនេះឯង ដើម្បីបញ្ជាក់ថា រដ្ឋាភិបាលគាត់មានដំណោះស្រាយ លើបញ្ហាអន្តោប្រវេសន៍ខុសច្បាប់ បន្ទាប់ពីអង់គ្លេសបានផ្តាច់ខ្លួនលែងនៅក្នុងសហភាពអឺរ៉ុប។ ក៏ប៉ុន្តែ សម្រាប់អង្គការសិទ្ធិមនុស្ស និងក្រុមនយោបាយឆ្វេងនិយមវិញ គឺវិធានការចាប់បញ្ជូនជនភៀសខ្លួន ជនអន្តោប្រវេសន៍ យកទៅទុកចោលនៅប្រទេសមួយទៀត ចំងាយរាប់ពាន់គីឡូម៉ែត្រ វាគឺជាវិធានការជ្រុលហួសហេតុ គ្មានធម៌មេត្តា គ្មានការអាណិតអាសូរ។
ជាក់ស្តែង លោក Sadiq Khan អភិបាលទីក្រុងឡុងដ៍ មកពីគណបក្សពលករ បានសរសេរលើទំព័រ Twitter ថា “ការចាប់បញ្ជូនជនភៀសខ្លួន ដែលគ្នាបានផ្សងជីវិត រត់គេចពីសង្គ្រាម ពីការកាប់សំលាប់ ទំរាំបានមកដល់អង់គ្លេសដែលមានសុវត្ថិភាព វាមិនត្រឹមតែជាវិធានការគ្មានធម៌មេត្តា អមនុស្សធម៌ប៉ុណ្ណោះទេ តែកិច្ចព្រមព្រៀងនេះ អាចមានទម្រង់លក្ខណៈខុសច្បាប់ថែមទៀតផង”។
មួយថ្ងៃចំណាយ ៦៧អឺរ៉ូ
នៅក្នុងដំណាក់កាលដំបូង នៃគម្រោងនេះ អង់គ្លេសគ្រោងប្រគល់ប្រាក់ ឲ្យរដ្ឋាភិបាលរ៉ូវ៉ាប់ដា ចំនួនប្រមាណ ១៤០លានអឺរ៉ូដើម្បីយកទៅចំណាយ។ បើនិយាយឲ្យងាយស្តាប់ គឺហាក់ដូច អង់គ្លេស ជួលប្រទេសរវ៉ានដា ដើម្បីទុកជនអន្តោប្រវេសន៍។ ដោយឡែក ប្រភពពីលោកស្រី Yolande Makolo រដ្ឋមន្ត្រីមហាផ្ទៃរវ៉ានដា បានឲ្យដឹងថា គេនឹងចំណាយទៅលើជនអន្តោប្រវេសន៍ម្នាក់ ចំនួន៦៧អឺរ៉ូ ក្នុងមួយថ្ងៃ ទាំងថ្លៃស្នាក់នៅ និងការហូបចុក។ ថ្លៃចំណាយទាំងអស់គឺ ជាបន្ទុករបស់រដ្ឋាភិបាលអង់គ្លេស។
ជនអន្តោប្រវេសន៍ ដែលគេបញ្ជូនទៅដល់រវ៉ានដា ត្រូវស្នាក់នៅក្នុងទីតាំងកំណត់មួយ ដែលគេរៀបចំទុក ហើយអាចមានសិទ្ធិដើរហើរចេញក្រៅធម្មតា ទំរាំដល់ពេលសំណុំឯកសារ ត្រូវបានគេពិនិត្យវិនិច្ឆ័យរួចរាល់។ តាមអ្វីដែលមានកំណត់ក្នុងកិច្ចព្រមព្រៀង គឺជនអន្តោប្រវេសន៍ អាចមានជម្រើស៣នៅពេលទៅដល់រវ៉ានដា ៖ ទី១ គឺអាចសុំសិទ្ធិជ្រកកោននៅរវ៉ានដា ទី២ អាចធ្វើដំណើរទៅកាន់ប្រទេសកំណើតវិញ ហើយទី៣ គឺអាចចាកចេញទៅប្រទេសផ្សេងមួយទៀត តែត្រូវធ្វើតាមនីតិវិធីស្របច្បាប់។
បើទោះបីប្រឈមនឹងការរិះគន់យ៉ាងណាក៏ដោយ រដ្ឋាភិបាលរវ៉ានដា បានអះអាង កាលពីថ្ងៃអង្គារម្សិលមិញ ដោយការពារកិច្ចព្រមព្រៀងនេះ។ រវ៉ានដាអះអាងថា ខ្លួនចង់ចូលរួមដោះស្រាយបញ្ហាអន្តោប្រវេសន៍ខុសច្បាប់ ចង់សង្គ្រោះជីវិតមនុស្ស ព្រោះថារាល់ថ្ងៃនេះ ត្រូវពួកឈ្មួញទុច្ចរិតដែលរកស៊ីដឹកជញ្ជូន ជនអន្តោប្រវេសន៍នោះ កេងប្រវញ្ចគ្រប់រូបភាព។
“ជនអន្តោប្រវេសន៍នឹងគ្មានអនាគតទេ នៅរវ៉ានដា”
តែយ៉ាងណា មានមតិលើកឡើង ថាកិច្ចព្រមព្រៀងនេះ អាចមិនស្របច្បាប់ទេ ព្រោះថា គេអាចបញ្ជូនជនភៀសខ្លួន ជនអន្តោប្រវេសន៍ យកទៅទុកនៅទីកន្លែងមួយបាន ល្គឹកណាទីនោះ ជាទីមានសុវត្ថិភាព មានសន្តិសុខ។ ដោយឡែក រវ៉ានដា ជាប្រទេសក្រីក្រខ្លាំង មានអសន្តិសុខ ហើយពុករលួយថែមទៀត។ កាលពីឆ្នាំ២០១៨ ជនភៀសខ្លួនកុងហ្គោ ចំនួន១១នាក់ ត្រូវបាននគរបាលរវ៉ានដា បាញ់សំលាប់ បន្ទាប់ពីពួកគេធ្វើបាតុកម្មតតវ៉ា រឿងរបបចំណីអាហារ នៅក្នុងមណ្ឌលជនភៀសខ្លួន Kaziba។
យ៉ាងណាមិញ លោកស្រី Victoire Ingabire ប្រធានគណបក្សប្រឆាំងនៅរវ៉ានដា បានលើកឡើងថា រវ៉ានដាជាប្រទេសក្រតោកយ៉ាក យុវជនខ្លួនឯងគ្មានទាំងការធ្វើផង តើឲ្យជនភៀសខ្លួន ជនអន្តោប្រវេសន៍បរទេសមក ឲ្យគ្នារស់រំពឹងអី? ពួកគេនឹងគ្មានអនាគតទេ នៅរវ៉ានដា ព្រោះរវ៉ានដា គ្មានលទ្ធភាពផ្តល់ឲ្យនូវសេវាសង្គម សេវ៉ាសុខភាព និងការអបរំ ដល់កូនចៅជនអន្តោប្រវេសន៍ ដែលត្រូវគេបញ្ជូនមកនោះទេ។
អង់គ្លេសអាចនឹងដកខ្លួន ចេញពីសន្ធិសញ្ញាសិទ្ធិមនុស្សអឺរ៉ុប
រដ្ឋាភិបាលអង់គ្លេស សង្ឃឹមខ្លាំងណាស់ ថាអាចឈានទៅមានប្រជាប្រិយភាពវិញ ក្នុងក្រសែភ្នែកប្រជាជនអង់គ្លេសមួយចំនួន តាមរយៈវិធានការគ្រប់គ្រងជនអន្តោប្រវេសន៍ខុសច្បាប់នេះ។ បើគិតពីដើមឆ្នាំ២០២២នេះមក មានជនអន្តោប្រវេសន៍ ចំនួនប្រមាណ ១០៥០០នាក់ហើយ ដែលបានប្រថុយគ្រោះថ្នាក់ ជិះទូកឆ្លងសមុទ្រ ពីបារាំង ទៅដល់ប្រទេសអង់គ្លេស។ ជាក់ស្តែង គ្រាន់តែថ្ងៃអង្គារម្សិលមិញ មានប្រមាណ២៥០នាក់ ដែលត្រូវបានក្រុមសង្គ្រោះបារាំង សង្រ្គោះស្រង់ពីទឹកសមុទ្រនៅក្បែរឆ្នេរទីក្រុង Douvres។
យោងតាមបណ្តាញព័ត៌មានអង់គ្លេស យន្តហោះមួយគ្រឿង ដែលគេគ្រោងដឹកជនអន្តោប្រវេសន៍ មិនដល់១០នាក់ ចេញទៅរវ៉ានដា ហើយត្រូវខកខានវិញនេះ គឺរដ្ឋាភិបាលអង់គ្លេសបានចំណាយប្រាក់សរុបប្រមាណ ៥សែនលីវ្រស្ទែរលីង ដែលស្មើនឹង ៥៧៥០០០អឺរ៉ូ។ ក៏ប៉ុន្តែ កាលពីថ្ងៃអង្គារម្សិលមិញ លោកស្រី Liz Truss រដ្ឋមន្ត្រីការបរទេសអង់គ្លេសបាននិយាយតាមទូរទស្សន៍ថា បើទោះជាចំណាយប្រាក់ច្រើនមែន តែ “អង់គ្លេសនឹងមិនខាតទេ” បើសម្លឹងទៅរយៈពេលវែង។ លោកស្រីរដ្ឋមន្ត្រីរូបនេះ អះអាងថា វាគឺជាវិធានការ ដែលនឹងផ្តល់សញ្ញាបន្ទុចបង្ហាក់ ធ្វើឲ្យជនអន្តោប្រវេសន៍ទាំងអស់ លែងហ៊ានឆ្លងចូលអង់គ្លេសដោយខុសច្បាប់តទៅទៀត។
បន្ទាប់ពីត្រូវបានតុលាការសិទ្ធិមនុស្សអឺរ៉ុប រារាំងមិនឲ្យយន្តហោះចេញដំណើរ លោកស្រី Priti Patel រដ្ឋមន្ត្រីក្រសួងមហាផ្ទៃអង់គ្លេស បានថ្លែងថា លោកស្រីខកចិត្តណាស់ ក៏ប៉ុន្តែវានឹងមិនធ្វើឲ្យរដ្ឋាភិបាលលោកស្រី បោះបង់ចោលគម្រោងផែនការនេះទេ។ លោកស្រីបានអះអាងថា ក្រុមអ្នកច្បាប់កំពុងតែពិនិត្យ ឯកសារករណីជនអន្តោប្រវេសន៍នីមួយៗ ដើម្បីរៀបចំចាប់បញ្ជូនយកចេញតាមយន្តហោះ ជើងថ្មីមួយទៀតនៅពេលឆាប់ៗនេះ។
ជាងនេះទៀត លោកនាយករដ្ឋមន្ត្រី បូរីស ចនសុន បានអះអាងថា លោកក៏អាចពិចារណាដែរ លើជម្រើសដកខ្លួនប្រទេសអង់គ្លេស ចេញពីសន្ធិសញ្ញាសិទ្ធិមនុស្សអឺរ៉ុប។ ធ្វើបែបនេះ គឺ ដើម្បីកុំឲ្យតុលាការសិទ្ធិមនុស្សអឺរ៉ុប មកចេះឈឺឆ្អាល រារាំង រំខាន ដល់គោលនយោបាយអន្តោប្រវេសន៍ របស់រដ្ឋាភិបាលអង់គ្លេស តទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ