អង់គ្លេស៖លោកបូរីស ចនសុនចុះពីកៅអីប្រធានបក្សអភិរក្សនិយម និងបន្តអង្គុយកៅអីនាយករដ្ឋមន្រ្តីរហូតដល់មានអ្នកថ្មីជំនួស
ចុះផ្សាយនៅថ្ងៃ៖
ស្តាប់ - ០៦:១៩
នៅអង់គ្លេស, នាយករដ្ឋមន្រ្តី លោក បូរីស ចនសុន បានប្រកាសលាលែងចុះពីតំណែងប្រមុខគណបក្សអភិរក្សនិយម ហើយបន្តកាន់តំណែងនាយករដ្ឋមន្ត្រីបណ្តោះអាសន្ន មួយរយៈសិន ទម្រាំមានការបោះឆ្នោតជ្រើសតាំងថ្មី។ ការប្រកាសនេះ ធ្វើឡើងនៅក្នុងសេចក្តីថ្លែងការណ៍ទៅកាន់ប្រជាជាតិ នៅថ្ងៃព្រហស្បតិ៍ ទី៧កក្កដា និងដែលធ្វើឡើងបន្ទាប់ពីមានរឿងអាស្រូវផ្ទួនៗ ហើយ សមាជិករដ្ឋាភិបាល និង រដ្ឋមន្ត្រី កាន់តែច្រើននាក់ សុំចុះចេញពីតំណែងជាបន្តបន្ទាប់ នាពេល៣ថ្ងៃមកនេះ។
ការប្រកាសចុះចេញពីតំណែងជាប្រមុខដឹកនាំបក្សកាន់អំណាចមិនមែនជារឿងភ្ញាក់ផ្អើលពេកទេ។
គេដឹងគ្រប់គ្នាហើយ ថា ប្រជាប្រិយភាពរបស់នាយករដ្ឋមន្ត្រីអង់គ្លេសរូបនេះ បានចុះស្រុតខ្លាំងមែនទែន ហើយសំណើសុំឲ្យរូបលោក ចុះពីតំណែង ក៏មានស្ទើរគ្រប់មជ្ឈដ្ឋាន រាប់ទាំងមន្ត្រីជាន់ខ្ពស់ នៅក្នុងជួបបក្សកាន់អំណាចខ្លួនឯង ហើយនិង ក្នុងរង្វង់សមាជិកគណៈរដ្ឋមន្ត្រីរបស់លោកផង។ រដ្ឋមន្ត្រីដែលសុំចុះពីតំណែងជាបន្តបន្ទាប់ បានសរសេរផ្តាំផ្ញើផង ដាស់តឿនផង និងអង្វរករផង សុំឲ្យ លោក ចនសុន លាឈប់ទៅ ចុះពីតំណែងទៅ ដើម្បីប្រយោជន៍បក្សនិងប្រយោជន៍ជាតិមាតុភូមិ។
ស្ថានការណ៍កាន់តែទុំជោរខ្លាំង ក្នុងបីថ្ងៃចុងក្រោយនេះ គឺចាប់ពីថ្ងៃអង្គារមក មានសមាជិករដ្ឋាភិបាល ៥៧នាក់ បានសុំចុះចេញពីតំណែង ព្រមៗគ្នា ក្នុងនោះ មានរដ្ឋមន្ត្រី ដ៏ទៅ៥នាក់ ក៏ចុះចេញពីតំណែងបន្តកន្ទុយគ្នាដែរ ពីថ្ងៃអង្គារមក។ សូម្បីតែ រដ្ឋមន្ត្រីមួយចំនួន ដែលទើបតែតែងតាំងជំនួសតំណែងថ្មីៗ កាលពីថ្ងៃអង្គារសោះ គឺធ្វើការមិនបានបីថ្ងៃស្រួលបួលផង ក៏សុំលាលែងពីតំណែងទៅទៀត។
រចនា ក្នុងសប្តាហ៍នេះ មានការស្ទង់មតិស្តីពីចំណាត់ថ្នាក់ប្រជាប្រិយភាពរបស់លោក និងឆន្ទៈរបស់ពលរដ្ឋអង់គ្លេស ថាចង់ឲ្យលោក ចនសុននៅបន្តឬចុះពីតំណែង។ លទ្ធផល គឺ ពលរដ្ឋអង់គ្លេស ប្រមាណ ៧០% ចង់ឲ្យលោកចុះចេញពីតំណែង។
លោក បូរីស ចនសុន ត្រូវពួកអ្នកគាំទ្រការផ្តាច់ខ្លួនពីអឺរ៉ុប ចាត់ទុកថា វីរបុរស មួយរូប។
លោក បូរីស ចនសុន ចូលកាន់អំណាចនៅរដូវក្តៅ ខែកក្កដា ឆ្នាំ២០១៩ ហើយនៅខែមករា ដើមឆ្នាំ២០២០ លោកបានសម្តេច ជោគជ័យ ដកខ្លួនអង់គ្លេសចេញពីសហភាពអឺរ៉ុប ទោះបីជាក្នុងតម្លៃណាក៏ដោយ។ រឿងនេះ ត្រូវពួកអ្នកគាំទ្រការផ្តាច់ខ្លួនពីអឺរ៉ុប ចាត់ទុករូបលោក ថាជាវីរបុរស ផង។ ក៏ប៉ុន្តែ លោក បូរីស ចនសុន អាយុ៥៨ឆ្នាំ បានក្លាយជានាយករដ្ឋមន្ត្រីអង់គ្លេសទី១ ដែលជួបរឿងអប្រជាប្រិយភាពខ្លាំងជាងគេ ក្នុងប្រវត្តិសាស្ត្រនយោបាយអង់គ្លេស។
ពោលគឺមានការភូតកុហកច្រើននៅក្នុងដំណើរការដឹកនាំជាតិ, នាំឲ្យមានកំហឹងប្រជាជន, ការធុញទ្រាន់ចំពោះអ្នកនយោបាយនិងអ្នកតំណាងរាស្ត្រ ហើយបង្កឲ្យមានចលនាប្រឆាំងច្រើននៅក្នុងសង្គម។ មិនតែប៉ុណ្ណោះ ក្រោមការដឹកនាំរបស់លោក គឺអង់គ្លេសបានជួបនឹងបញ្ហាអតិផរណាទំនេញ ដល់ទៅ៩% ដែលគេពុំធ្លាប់ជួបទេ ពីមុនមក។
បញ្ហាខ្លាំងជាបន្តបន្ទាប់ គួរឲ្យកត់សម្គាល់ គឺចាប់តាំងតែពីពេលមានរឿងអាស្រូវ ផឹកស៊ីជប់លៀង នៅក្នុងនិវេសដ្ឋាននាយករដ្ឋមន្រ្តី ខណៈពេលដែល នគរអង់គ្លេស និងពិភពលោក កំពុងស្ថិតក្នុងការបិទខ្ទប់ ដោយកូវីដ១៩ កាលពីឆ្នាំ ២០២១។
ក្រោយមកទៀត នៅមានរឿងអាស្រូវផ្លូវភេទជាច្រើននៅក្នុងសភា ជាក់ស្តែង មានតំណាងរាស្រ្តម្នាក់ដែលជាប់ចោទពីបទចាប់រំលោភត្រូវនគរបាលចាប់ខ្លួន រួចត្រូវដោះលែងវិញ។ តំណាងរាស្រ្តម្នាក់ទៀតបានលាចុះពីតំណែងក្នុងខែមេសា ក្រោយពីបានមើលរឿងកុនកូនជ្រូក អាសអាភាសលើទូរស័ព្ទដៃ នៅក្នុងមន្ទីររដ្ឋសភាជាតិ។
នៅថ្ងៃព្រសហ្បតិ៍ ទី៧កក្កដា ក្រោយការប្រកាសរបស់លោក ចន សុន លាចុះពីតំណែងថ្នាក់ដឹកនាំបក្សអភិរក្សនិយម គឺខាងបក្សកាន់អំណាច បានធូរទ្រូងបន្តិច ហើយនៅខាងថ្នាកដឹកនាំបក្សប្រឆាំង ក៏បានថ្លែងសាទរដែរ។
តែយើងគួរគូបញ្ជាក់ថា ពេលនេះ គឺលោក ចនសុន ចុះពីតំណែងប្រមុខបក្សកាន់អំណាចក៏ពិតមែន ប៉ុន្តែ លោកគឺនៅតែជាប្រមុខដឹកនាំប្រទេស បន្តជាច្រើនសប្តាហ៍ទៀត រហូតដល់មានការជ្រើសរើសនាយករដ្ឋមន្ត្រីថ្មី។
តើបេក្ខជនណាខ្លះ ដែលសក្តិសមដើម្បីជំនួសកៅអីនាយករដ្ឋមន្ត្រីអង់គ្លេស ?
ចំពោះមុខតំណែងប្រមុខរដ្ឋាភិបាលថ្មី បើតាមកាសែតបារាំង និងទីភ្នាក់ព័ត៌មានបារាំង AFP គឺគេកំពុងតែសម្លឹងទៅលើបេក្ខជន ដល់ទៅ ៨ នាក់ឯណានោះ។
លោក រីស៊ី សុនាក់ (Rishi Sunak) អតីតរដ្ឋមន្ត្រីហិរញ្ញវត្ថុ ដែលទើបតែប្រកាសចុះចេញពីតំណែងកាលពីថ្ងៃអង្គារ។ លោកនេះ ជាកូនចៅឥណ្ឌាភៀសខ្លួនទៅអង់គ្លេស និងជាអ្នកនយោបាយកាន់ឥណ្ឌូទី១ ដែលបានកាន់តំណែងរដ្ឋមន្ត្រីរបស់ប្រទេសអង់គ្លេស។ លោកជាអ្នកមានទ្រព្យធនសម្បើមណាស់ និងជាអ្នកដែលគាំទ្រឲ្យអង់គ្លេស ផ្តាច់ចេញពីអឺរ៉ុប។
អតីតរដ្ឋមន្ត្រីមួយទៀត ដែលទើបតែប្រកាសចុះចេញពីតំណែងកាលពីថ្ងៃអង្គារដែរ គឺរដ្ឋមន្ត្រីសុខាភិបាល លោក សាជីដ ចាវីដ (Sajid Javid) ជាកូនចៅខ្សែស្រឡាយជាតិបាគីស្ថានភៀសខ្លួន។ ធ្លាប់ជារដ្ឋមន្ត្រីហិរញ្ញវត្ថុឆ្នាំ២០២០ និង ជាអ្នកគាំទ្រឲ្យចេញពីអឺរ៉ុបដែរ។
បេក្ខជនមួយទៀត គឺរដ្ឋមន្ត្រីការជាតិ Ben Wallace ដែលពេលនេះ ល្បីខ្លាំង ក្នុងបរិបទ ដែលរុស្ស៊ីវាយលុកចូលអ៊ុយក្រែន។
ចំណែក អតីតីរដ្ឋមន្ត្រីការបរទេស និងសុខាភិបាល លោក Jeremy Hunt និង រដ្ឋមន្ត្រីសុខាភិបាល Nadhim Zahawi ហើយនិងលោក Tom Tugendhat ប្រធានគណៈកម្មាធិការកិច្ចការបរទេសរបស់សភាអង់គ្លេស ក៏ជាបេក្ខជនដែលគេកំពុងសម្លឹងដែរ។
ក្នុងចំណោមបេក្ខភាពពីបក្សអភិរក្សនិយមទាំង៨នាក់ គឺមានបេក្ខភាពស្រីពីរនាក់។ នោះ អនុរដ្ឋលេខាធិការ ទទួលបន្ទុកពាណិជ្ជកម្ម លោកស្រី Penny Mordaunt ជាតួអង្គនយោបាយល្បីមួយ ជំរុញឲ្យអង់គ្លេសចេញពីសហភាពអឺរ៉ុប។ ហើយម្នាក់ទៀត គឺ លោកស្រី Liz Truss ដែល រដ្ឋមន្ត្រីក្រសួងកិច្ចការបរទេស។ លោកស្រីធ្លាប់ធ្វើជាអ្នកចរចាក្នុងសំណុំរឿងចាកចេញពីអឺរ៉ុប និង បានសម្រេចកិច្ចព្រមព្រៀងជាច្រើន។ ប្រមុខការទូតអង់គ្លេសរូបនេះ ជាមនុស្សស្រីម្នាក់ ដែលគេមើលឃើញថា មានទឹកមាត់ប្រៃ និងជាចូលចិត្តនិយាយត្រង់ៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ