ដើមបូព៌ា ៖ លោកបៃដិនប្តេជ្ញាធ្វើគ្រប់យ៉ាងមិនឱ្យអ៊ីរ៉ង់មានអាវុធនុយក្លេអ៊ែរ
ចុះផ្សាយនៅថ្ងៃ៖
ស្តាប់ - ០៧:៥០
សហរដ្ឋអាមេរិកសន្យារឹតចំណងជាមួយអ៊ីស្រាអែលកាន់តែខ្លាំងបន្ថែមទៀត -អាមេរិកនឹងមិនបណ្តោយឱ្យអ៊ីរ៉ង់មានអាវុធនុយក្លេអ៊ែរ ... នេះជាលទ្ធផលនៃជំនួបរវាងលោកប្រធានាធិបតីអាមេរិក ចូ បៃដិន ជាមួយប្រមុខដឹកនាំអ៊ីស្រាអែល ក្នុងឱកាសបំពេញទស្សនកិច្ច ដ៏ល្អូនល្អើនពីរថ្ងៃ។ នៅថ្ងៃសុក្រនេះ លោកប្រធានាធិបតីអាមេរិកត្រូវបន្តទស្សនកិច្ចដោយធ្វើដំណើរទៅដែនដីប៉ាឡេស្ទីន និងប្រទេសអារ៉ាប៊ីសាអូឌីត។ នេះជាដំណាក់កាលដ៏សំខាន់នៃទស្សនកិច្ច តែក៏ជាលំហាត់ដ៏លំបាកសម្រាប់លោកចូបៃដិនដែរ។
មុននឹងចេញដំណើរទៅកាន់អារ៉ាប៊ីសាអូឌីត លោកប្រធានាធិបតីអាមេរិក ចូ បៃដិន បានឆៀងចូលទស្សនាមន្ទីរពេទ្យនៅក្រុងហ្សេរុយសាឡិមខាងកើត ដែលជាក្រុងសក្តិសិទ្ធិ ស្ថិតក្រោមអាណានិគមកិច្ចអ៊ីស្រាអែល ដើម្បីប្រកាសផ្តល់ជំនួយដល់ប្រព័ន្ធសុខាភិបាលមូលដ្ឋានេះ។ លោកបៃដិន ក៏បានអញ្ជើញទៅក្រុងស៊ីហ្សកដានី ដែលជាដែនដីប៉ាឡេស្ទីនក្រោមអាណានិគមអ៊ីស្រាអែលតាំងពីឆ្នាំ១៩៦៧មកដែរ ដើម្បីជួបជជែក លោក ម៉ះមូដ អាបាស់ ពីបញ្ហានយោបាយ និងសេដ្ឋកិច្ច។
គ្មានសន្ទុះថ្មីសម្រាប់ការចរចាអ៊ីស្រាអែល-ប៉ាឡេស្ទីន
លោកបៃដិន ប្រកាសផ្តល់ហិរញ្ញវត្ថុដល់ពលរដ្ឋប៉ាឡេស្ទីន គម្រោងភ្ជាប់បណ្តាញអ៊ីនធ័រនែត4G នៅឆ្នាំ២០២៣ នៅស៊ីហ្សកដានី និងនៅតំបន់ហ្កាហ្សា ដែលជាប់ការបិទខ្ទប់អ៊ីស្រាអែល តាំងពី១៥ឆ្នាំមក។ ប៉ុន្តែ ក្រៅអំពីទិដ្ឋភាពសេដ្ឋកិច្ច និងរំលឹកអំពីការគាំទ្ររបស់អាមេរិក ក្នុងការស្វែងរកដំណោះស្រាយ បង្កើតរដ្ឋពីររស់ក្បែរគ្នា ឱ្យជម្លោះអ៊ីស្រាអែល-ប៉ាឡេស្ទីន លោកបៃដិន មិនបានផ្តល់សន្ទុះអ្វីថ្មីដល់កិច្ចចរចាសន្តិភាពនេះទេ។ ជាមួយនាយករដ្ឋមន្ត្រីអ៊ីស្រាអែលម្សិលមិញ លោកប្រធានាធិបតីអាមេរិក បានត្រឹមប្រើពាក្យដដែលៗថា គាំទ្រដំណោះស្រាយបង្កើតរដ្ឋពីរ- រដ្ឋប៉ាឡេស្ទីនរស់ឋិតឋេរក្បែររដ្ឋអ៊ីស្រាអែល។
អាមេរិកគ្មានផែនការសន្តិភាពណាប្រសើរជាងមកស្នើទេ ព្រោះបើតាមអ្នកទទួលខុសត្រូវជាន់ខ្ពស់អាមេរិកម្នាក់សំណើថ្មីនឹងបង្កបង្កើតឱ្យមានក្តីសង្ឃឹមនិងការរង់ចាំ ដ៏គួរឱ្យខកចិត្តឥតប្រយោជន៍ ប៉ុន្តែបើភាគីបក្សដិបក្សទាំងពីរ ព្រមចូលចរចាគ្នា នោះអាមេរិកនឹងជួយជ្រោមជ្រែងភ្លាម។
បន្ទាប់ពីជួបជាមួយលោកបៃដិននៅថ្ងៃនេះ នៅសប្តាហ៍ក្រោយ ប្រធានអាជ្ញាធរដែនដីប៉ាឡេស្ទីន នឹងអញ្ជើញមកទីក្រុងប៉ារីស ដើម្បីជួបជាមួយប្រធានាធិបតីបារាំង លោក អេម៉ាណុយអែល ម៉ាក្រុង ដែលក៏គ្មានជម្រើសអ្វីផ្សេងសម្រាប់ដោះស្រាយវិបត្តិអ៊ីស្រាអែលនិងប៉ាឡេស្ទីនដែរ តែត្រៀមប្រមូលផ្តុំសហគមន៍អន្តរជាតិ ប្រសិនបើភាគីទាំងពីរចង់ផ្តើមការចរចាឡើងវិញ។ ការចរចាសន្តិភាពអ៊ីស្រាអែលប៉ាឡេស្ទីន បានជាប់គាំងស្តូកតាំងពីឆ្នាំ២០១៤មក។
ដៃគូចតុប្រទេស អាមេរិក អ៊ីស្រាអែល អាមីរ៉ាត់អារ៉ាប់រួម ឥណ្ឌា
ផ្ទុយទៅវិញ ក្នុងពេលស្នាក់នៅអ៊ីស្រាអែល ពីរថ្ងៃ កន្លងមកនេះ លោក ចូ បៃដិន បានជួបផ្តោះប្តូរសម្តីជាមួយប្រមុខដឹកនាំអ៊ីស្រាអែល ដោយមានចេញសេចក្តីប្រកាសជាច្រើន និងយ៉ាងល្អូនល្អើន។
លោកបៃដិន បានចូលរួមបើកជំនួបកំពូលចតុភាគី ដោយផ្ទាល់ជាមួយនាយករដ្ឋមន្ត្រីអ៊ីស្រាអែល នៅទីក្រុងហ្សេរុយសាឡិម អមដោយវត្តមានរបស់ប្រមុខដឹកនាំប្រទេសអេមីរ៉ាត់អារ៉ាប់រួម និងនាយករដ្ឋមន្ត្រីឥណ្ឌា លោក ណារិដ្រា ម៉ូឌី តាមប្រព័ន្ធវីដេអូ។ ដៃគូចតុប្រទេសដែលគេប្រសិទ្ធិនាមថា I2U2 បានពិចារណារកគម្រោងហេដ្ឋារចនាសម្ព័ន្ធរួម។ ក្រោមការដឹកនាំរបស់លោកប្រធានាធិបតីចូ បៃដិន ដែលចង់ទប់គម្រោងស្ថាបនាផ្លូវមួយខ្សែក្រវ៉ាត់មួយរបស់ចិន សហរដ្ឋអាមេរិក បានដឹកដៃ អ៊ីស្រាអែល ឥណ្ឌា និងអេមីរ៉ាត់អារ៉ាប់រួម បានប្រកាស នៅថ្ងៃព្រហស្បតិ៍ទី ១៤ កក្កដា ២០២២ ពីទីក្រុងហ្សេរុយសាឡិម បង្កើតភាពដៃគូ ក្នុងវិស័យកសិកម្មនិងថាមពល។ អេមីរ៉ាត់អារ៉ាប់រួមនឹងធ្វើវិនិយោគចំនួន២ពាន់លានអឺរ៉ូ ក្នុងវិស័យកសិកម្មនៅឥណ្ឌាដែលជាអ្នកផ្តល់ដី ចំណែកវិស័យឯកជនអ៊ីស្រាអែលនិងអាមេរិក នឹងទៅចូលរួមដែរ។ គម្រោងមួយទៀត នៅឥណ្ឌាដែរ ដៅលើការសាងសង់មជ្ឈមណ្ឌលអគ្គីសនី ដើរដោយពន្លឺព្រះអាទិត្យសូឡា និងខ្យល់ទំហំ ៣០០មេហ្កាវ៉ាត់។ ជាមួយលោកនាយករដ្ឋមន្ត្រីអ៊ីស្រាអែល ឡាពីដ លោកប្រធានាធិបតីអាមេរិកបានអះអាងសហរដ្ឋអាមេរិកចង់បន្តដើរតួនាទីជាក្បាលម៉ាស៊ីនដឹកនាំតំបន់នេះ ដោយបណ្តោយគូប្រជែងចិនរុស្ស៊ីបានឱកាសឡើយ។
អាមេរិកប្តេជ្ញាការពារអ៊ីស្រាអែល និងមិនឱ្យអ៊ីរ៉ង់មានអាវុធនុយក្លេអ៊ែរ
បន្ទាប់មក លោកបៃដិន បានចុះហត្ថលេខា ជាមួយលោកនាយករដ្ឋមន្ត្រីអ៊ីស្រាអែល យ៉ាអៀរ ឡាពីដ លើសេចក្តីថ្លែងការណ៍រួម ស្តីពីភាពជាដៃគូយុទ្ធសាស្ត្ររវាងអាមេរិកនិងអ៊ីស្រាអែល។ ជាដៃគូយុទ្ធសាស្ត្រពិសេស ដែលមានប្រព័ន្ធការពារជាតិទំនើបជាងគេបំផុតនៅលើពិភពលោក។ បើតាមលោកបៃដិន អាមេរិកចង់រុញច្រានអ៊ីស្រាអែលឱ្យលេចធ្លោបំផុតនៅតំបន់។
សំណុំរឿងដ៏សំខាន់បំផុតមួយនៃទស្សនកិច្ចនៅអ៊ីស្រាអែល គឺបញ្ហានុយក្លេអ៊ែរអ៊ីរ៉ង់។ ជាមួយនឹងការប្តេជ្ញាយ៉ាងមុះមុតការពារអ៊ីស្រាអែល លោកប្រធានាធិបតីអាមេរិកបានព្រមានថាវ៉ាស៊ីនតោន ត្រៀមនឹងប្រើគ្រប់អំណាចដែលមានដើម្បីទប់ស្កាត់ជាដាច់ខាត មិនឱ្យអ៊ីរ៉ង់មានអាវុធនុយក្លេអ៊ែរ។ អាមេរិកនៅតែបើកទ្វារចំហ ផ្តល់អាទិភាពដល់ការរកដំណោះស្រាយតាមផ្លូវការទូតជានិច្ច ដូច្នេះ អ៊ីរ៉ង់អាចត្រលប់មកគោរពតាមកិច្ចព្រមព្រៀងនុយក្លេអ៊ែរឆ្នាំ២០១៥វិញបាន តែអាមេរិកមិនចេះតែអង្គុយរង់ចាំទេ។ នេះជាប្រសាសន៍របស់លោកបៃដិន នៅក្នុងពេលធ្វើសន្និសីទកាសែតរួមក្រោយជំនួបជាមួយលោកនាយករដ្ឋមន្ត្រីអ៊ីស្រាអែលរួច។
សេចក្តីថ្លែងការណ៍ហ្សេរុយសាឡិម
អ៊ីស្រាអែលសង្ស័យរហូតមក ខ្លាចអ៊ីរ៉ង់សំងំផលិតអាវុធនុយក្លេអ៊ែរ ហើយមានជំនឿថាដំណោះស្រាយការទូតមិនអាចបញ្ឈប់ការគំរាមកំហែងរបស់អ៊ីរ៉ង់បានទេ។ ហេតុដូច្នេះហើយបានជាអ៊ីស្រាអែល ចង់ប្រើដំណោះស្រាយដាច់ខាត រហូតសុខចិត្តលាដៃរកអារ៉ាប៊ីសាអូឌីតដែលធ្លាប់ជាសត្រូវនឹងគ្នា។ ក្នុងខណៈដែលការចរចានុយក្លេអ៊ែរអ៊ីរ៉ង់ជាមួយក្រុមមហាអំណាច ហាក់ត្រូវជាប់គាំង អ៊ីស្រាអែលស្រមៃចង់បាន សម្ព័ន្ធយោធាតំបន់មួយ ដែលប្រមូលផ្តុំក្រុមប្រទេសសម្ព័ន្ធមិត្តអាមេរិកទាំងអស់ នៅដើមបូព៌ា ដូចជា អ៊ីស្រាអែលផ្ទាល់ខ្លួនឯង អេហ្ស៊ីប ហ្សកដានី និងក្រុមរាជាណាចក្រក្នុងតំបន់ឈូងសមុទ្ទពែក្ស អេមីរ៉ាតអារ៉ាប់រួម បារ៉ែន និងអារ៉ាប៊ីសាអូឌីត ដែលលោកបៃដិន ត្រូវទៅបំពេញទស្សនកិច្ចនៅថ្ងៃសុក្រទី១៥កក្កដា២០២២នេះ។
បើតាមសារព័ត៌មានអ៊ីស្រាអែល សេចក្តីថ្លែងការណ៍ដែលលោកចូបៃដិន និងលោក ឡាពីដបានចុះហត្ថលេខា នៅថ្ងៃព្រហស្បតិ៍ម្សិលមិញនេះ មានឈ្មោះថា “សេចក្តីថ្លែងការណ៍ហ្សេរុយសាឡិម”។ ជាសេចក្តីថ្លែងការណ៍ សម្រាប់ក្រុមសម្ព័ន្ធមិត្តអាមេរិកនៅក្នុងតំបន់ទាំងអស់ ដែលមានទម្រង់ជាសម្ព័ន្ធយោធា មានរចនាសម្ព័ន្ធសន្តិសុខរួម រវាងប្រទេសជាមិត្តក្នុងតំបន់។ ប៉ុន្តែមិនមែនជាសម្ព័ន្ធពេញលេញ ដូចករណីសម្ព័ន្ធអូតង់ទេ ព្រោះក្នុងដំណាក់កាលនេះ អារ៉ាប៊ីសាអូឌីត ពិតជាមិនអាចមកចងសម្ព័ន្ធភាពអ្វីជាផ្លូវការជាមួយអ៊ីស្រាអែលបានទេនៅពេលនេះ។
ត្រឹមអ៊ីស្រាអែលប្រកាសមិនប្រឆាំងនឹងការផ្ទេរកូនកោះពីរនៅសមុទ្ធក្រហមទៅឱ្យអារ៉ាប៊ីសាអូឌីត ហើយអារ៉ាប៊ីសាអូឌីតប្រកាសបើកព្រំដែនអាកាសឱ្យយន្តហោះអ៊ីស្រាអែលអាចឆ្លងកាត់បានមុនពេលលោកបៃដិនទៅដល់ ចាត់ទុកថាជាដំណឹងល្អ ជាប្រវត្តិសាស្ត្រស្រេចទៅហើយ។ សូមបញ្ជាក់ថា មកទល់នឹងថ្ងៃនេះ អារ៉ាប៊ីសាអូឌីត មិនដែលទទួលស្គាល់អ៊ីស្រាអែលជារដ្ឋឯករាជ្យមួយទេ ។
តែសេចក្តីថ្លែងការណ៍ហ្សេរុយសាឡិម ពិតជាតំណាងឆន្ទៈរួម និងផលប្រយោជន៍រួម របស់ក្រុមប្រទេសជាសម្ព័ន្ធមិត្តអាមេរិក នៅក្នុងតំបន់ ដើម្បីប្រឈមទប់ទល់នឹងអ៊ីរ៉ង់ដែលមាននយោបាយបង្កអស្ថិរភាពជាប្រាកដ។
គ្រាន់តែបានឃើញសេចក្តីថ្លែងការណ៍នេះភ្លាម អ៊ីរ៉ង់បានបញ្ចេញប្រតិកម្មដោយមិនបង្អង់ថា កុំឱ្យអាមេរិកនិងសម្ព័ន្ធមិត្តបង្កអស្ថិរភាពតំបន់ ពុំនោះទេអ៊ីរ៉ង់នឹងផ្តល់ចម្លើយអាក្រក់និងគួរឱ្យសោកស្តាយតបវិញហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ