សភាអាមេរិកផ្តោតលើ«១៨៧នាទី» ដែលលោក ដូណាល់ ត្រាំ មិនព្រមធ្វើអ្វីសោះដើម្បីបញ្ជ្រាសអំពើហិង្សា
ចុះផ្សាយនៅថ្ងៃ៖
សវនាការដេញដោលស្តីពីរឿងសម្រុកចូលវិមានកាពីតូល បានបិទបញ្ចប់ បន្ទាប់ពីបើកធ្វើជាង៦សប្តាហ៍រួចមក។ នៅថ្ងៃព្រហស្បតិ៍ ទី២១កក្កដា គណៈកម្មការសភាអាមេរិក បានផ្តោតលើរយៈពេល១៨៧នាទី ដែលលោក ដូណាល់ ត្រាំ មិនព្រមធ្វើអ្វីសោះ ដើម្បីបញ្ជ្រាសអំពើហិង្សានៅវិមានកាពីតូល។ ជាសវនាការសាធារណៈ និងចាក់បញ្ចាំងតាមកញ្ចក់ទូរទស្សន៍ នៅម៉ោងពិសេស ម៉ោងមាស ដើម្បីឲ្យគេបានមើលតាមដានច្រើន។ ទូរទស្សន៍ Fox News ថាមានអ្នកទស្សនាសវនាការនេះរហូតដល់២០លាននាក់។
សភាខុសហ្ក្រេសអាមេរិក បានបង្កើតគណៈកម្មការពិសេសមួយ ដើម្បីការស៊ើបអង្កេតស៊ីជម្រៅជុំវិញព្រឹត្តិការណ៍ហិង្សាថ្ងៃ៦មករា២០២១ ដែលបាតុកររាប់ពាន់នាក់គាំទ្រលោកអតីតប្រធានាធិបតី ដូណាល់ ត្រាំ បានសម្រុកចូលវិមានកាពីតូល និងបានបង្កហិង្សារហូតមានស្លាប់មនុស្ស។ គណៈកម្មការនេះ មានសមាជិក៩នាក់គឺ៧នាក់ជាសមាជិកសភាមកពីគណបក្សប្រជាធិបតេយ្យនិង២នាក់មកពីគណបក្សសាធារណរដ្ឋ។លោក Bennie Thomson សមាជិកសភាបក្សប្រជាធិបតេយ្យជាប្រធាន ហើយចំណែកលោកស្រីLiz Cheney សមាជិកសភាបក្សសាធារណរដ្ឋជាអនុប្រធាន។ លោកស្រីម្នាក់នេះ គឺជាអ្នកនយោបាយបក្សសាធារណៈរដ្ឋដ៏កម្រម្នាក់ដែលបានចេញមុខតទល់នឹងលោកដូណាល់ត្រាំនៅក្រោយហេតុការណ៍៦មករា២០២១។
គណៈកម្មការពិសេសសភាពអាមេរិក ផ្តោតលើ«រយៈពេល១៨៧នាទី» ដែលលោក ដូណាល់ ត្រាំ មិនព្រមធ្វើអ្វីសោះបញ្ជ្រាសអំពើហិង្សា។តើគេមានភស្តុតាងអ្វីខ្លះ?
ភស្តុតាងសម្រាប់បញ្ជាក់ចំណុចនេះ គឺចេញពីសក្ខីកម្មរបស់បុគ្គលិកសេតវិមានប្រធានាធិបតី ដែលធ្វើការនៅថ្ងៃកើតហេតុ និងមន្ត្រីការពារសន្តិសុខប្រធានាធិបតី ព្រមទាំងអ្នកដែលនៅជិតដិតនឹងលោក ដូណាល់ ត្រាំ នៅពេលនោះ។តួយ៉ាងមាន លោក Matthew Pottinger ជាអតីតទីប្រឹក្សារងសន្តិសុខជាតិប្រចាំសេតវិមាន និងមន្ត្រីជាច្រើនផ្សេងទៀត។
គណៈកម្មការស៊ើបអង្កេតរបស់សភាអាមេរិក សម្រាប់ស៊ើបអង្កេតស៊ីជម្រៅ សួរដេញដោល និង ទទួលភស្តុតាង សក្ខីកម្ម ជុំវិញព្រឹត្តិការណ៍ថ្ងៃទី៦មករា២០២១ គឺអ្នកខ្លះហៅថា «គណៈកម្មការ៦មករា»។ ចំណែកសំណុំរឿងស៊ើបអង្កេតសវនាការថ្ងៃចុងក្រោយនេះវិញ គេហៅថា «សំណុំរឿង១៨៧នាទី» គឺសំដៅដល់ចំនួនរយៈពេលដែលលោក ដូណាល់ ត្រាំ មិនព្រមធ្វើសកម្មភាពអ្វីសោះដើម្បីហាមឃាត់បាតុករកុំឲ្យប្រើអំពើហិង្សា តែបែរជា«ចាក់ប្រេងសាំងលើភ្លើងទៅវិញ»។ សម្តីចុងក្រោយនេះជារបស់សក្សីម្នាក់ គឺលោក Sarah Matthews អតីតអ្នកទទួលបន្ទុករៀបចំសន្នីសីទនៅសេតវិមាន។ បើតាមអតីតបុគ្គលិកវិមានប្រធានាធិបតីរូបនេះ នៅថ្ងៃកើតហេតុនោះ លោកដូណាល់ ត្រាំ នៅក្នុងបន្ទប់ទទួលទានអាហារ ហើយដើរតែបន្តិច ដល់បន្ទប់សន្នីសីទសារព័ត៌មាន។ លោក Sarah Matthews លើកឡើងថា គ្រប់គ្នានៅពេលនោះ សង្ឃឹមថាលោក ត្រាំ ធ្វើអន្តរាគមន៍ជាសាធារណ៍ ប្រាប់ឲ្យបាតុករឈប់ គឺលោក ត្រាំ គ្រាន់តែ ដើរទៅបន្ទប់សន្នីសីទសារព័ត៌មាន ដែលកាំម៉េរ៉ាបើកចាំស្រេច និងថ្លែងតែបន្តិច ក៏រួចហើយ ប៉ុន្តែ លោក ត្រាំ មិនធ្វើ និងបណ្តោយឲ្យមានអំពើហិង្សា រហូតដល់មានស្លាប់មនុស្សផង។
អ្នកតំណាងរាស្ត្រមួយរូបទៀត មកពីបក្សសាធារណរដ្ឋ លោក Adam Kinzinger បានថ្លែងថា លោក ត្រាំ អសកម្មក្នុងការបញ្ជ្រាសហិង្សា នៅថ្ងៃនោះ។ ថ្ងៃនោះ ប្រសិនបើលោកលើកទូរសព្ទតែបន្តិច បញ្ជាប្រាប់ទៅមន្ត្រីរដ្ឋបាលក្រោមបង្គាប់ នគរបាល កម្លាំងប៉ូលីសជាតិ ប៉ូលីសក្រុង ឲ្យជួយអន្តរាគមន៍ គឺស្រេចទៅហើយ ប៉ុន្តែ លោក ត្រាំ ជ្រើសរើសមិនធ្វើទេ។ ទន្ទឹមនឹងនេះ លោក Bennie Thomson ជាប្រធានគណៈកម្មការស៊ើបអង្កេត ឈឺឆ្លងជំងឺកូវីដ តែបានចូលរួមសវនាការថ្ងៃព្រហស្បតិ៍តាមវីដេអូ ដោយលោកបានសង្កត់ធ្ងន់ថា លោក ដូណាល់ ត្រាំ បានរំលោភបំពានចំពោះករណីកិច្ចដែលលោកត្រូវធ្វើក្នុងនាមជាអគ្គមេបញ្ជាការ។
លោក Pat Cipollone អតីតទីប្រឹក្សាច្បាប់ប្រចាំវិមានប្រធានាធិបតី នាជំនាន់នោះ បានលើកឡើងថា ការណ៍ដែលលោក ត្រាំ មិនប្រតិកម្មជាវិជ្ជមាននៅថ្ងៃកើតហេតុនោះ ព្រោះតែលោកអាត្មានិយម ហើយនៅចង់ក្រាញអំណាច មិនព្រមទទួលស្គាល់ថាខ្លួនចាញ់ឆ្នោត។
គណៈកម្មការសភាអាមេរិក ធ្លាប់បានបញ្ជាក់ថា ព្រឹត្តិការណ៍ហិង្សាថ្ងៃទី៦មករា២០២១ គឺជាការប៉ុនប៉ងធ្វើរដ្ឋប្រហារ ផ្តួលរំលំស្ថាប័នលទ្ធិប្រជាធិបតេយ្យសហរដ្ឋអាមេរិក ហើយមនុស្សម្នាក់ដែលជាមេញុះញង់ ជំរុញឲ្យកើតហេតុការណ៍នេះ គឺលោក ដូណាល់ ត្រាំ។បន្ទាប់ពីទទួលសក្ខីកម្មច្រើន និងបើកសវនាការសាធារណៈ ចំនួន៨ដងរួចមក អនុប្រធានគណៈកម្មការស៊ើបអង្កេតរបស់សភាអាមេរិក និងជា សមាជិកសភាបក្សសាធារណរដ្ឋ លោកស្រី Liz Cheney មានប្រសាសន៍ថា «រនាំងរបាំង បានត្រូវចាប់ផ្តើមបំបែកហើយ»។
តើ គណៈកម្មការស៊ើបអង្កេតរស់សភាអាមេរិក នឹងត្រូវធ្វើអ្វីបន្តទៀត?
បើតាមអ្នកតំណាងរាស្ត្របក្សប្រជាធិបតេយ្យម្នាក់ គឺលោកស្រី Zoe Lofgren បញ្ជាក់ថា គណៈកម្មការស៊ើបអង្កេតរបស់សភាអាមេរិក ឬ «គណៈកម្មការ៦មករា» នឹងដកឃ្លាបន្តិច ដើម្បីរៀបចំសរសេររបាយការណ៍បញ្ចប់របស់ខ្លួន ហើយដែលអាចនឹងបង្ហាញឲ្យដឹងសេចក្តីសម្រេច នៅខែកញ្ញាខាងមុខ។
ដូច្នេះ ក្នុងអំលុងពេលនេះ គណៈកម្មការស៊ើបអង្កេតរបស់សភាអាមេរិក ក៏នៅតែបន្តទទួលជាបន្តទៀត នូវ ឯកសារភស្តុតាងផ្សេងៗ និងសក្ខីកម្មថ្មីៗថែមទៀត ហើយប្រសិនបើចាំបាច់ គេក៏នឹងបើកសវនាការសួរដេញដោលបន្ថែមទៀតដែរ។ ហើយសេចក្តីសន្និដ្ឋានចុងក្រោយរបស់គណៈកម្មការសភា គឺអាចជា«អនុសាសន៍»ដែលនឹងទំនងជាស្នើសុំឲ្យបើកការប្តឹងផ្តល់តាមផ្លូវច្បាប់ប្រឆាំងនឹងអតីតប្រធានាធិបតី ដូណាល់ ត្រាំ។
ទោះជាយ៉ាងនេះក្តី ចំពោះការបន្តនីតិវិធីប្តឹងផ្តល់ឡើងតុលាការប្រឆាំងលោក ដូណាល់ ត្រាំ គឺជាការសម្រេចចិត្តរបស់រដ្ឋមន្រ្តីក្រសួងយុត្តិធម៌អាមេរិក លោក Merrick Garland។ រដ្ឋមន្ត្រីរូបនេះ ធ្លាប់បានមានប្រសាសន៍រួចមកហើយ កាលពីថ្ងៃពុធ ថា«នៅក្នុងប្រទេសនេះ គ្មានបុគ្គលណា អង្គុយលើច្បាប់ទេ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ