ក្រុមហ៊ុនGazprom សម្រេចកាត់បន្ថយន្ថែមទៀត នូវបរិមាណឧស្ម័ន ដែលផ្គត់ផ្គង់មកឲ្យអឺរ៉ុប
ចុះផ្សាយនៅថ្ងៃ៖
ស្តាប់ - ០៧:៣០
ក្រុមហ៊ុន Gazprom របស់រុស្ស៊ី បានប្រកាសកាត់បន្ថយបរិមាណឧស្ម័ន ដែលផ្គត់ផ្គង់មកឲ្យអឺរ៉ុប។ នេះគឺជាលើកទី៣ហើយ ដែលក្រុមហ៊ុនរុស្ស៊ីនេះ បានកាត់បន្ថយការផ្គត់ផ្គង់ឧស្ម័ន ធ្វើឲ្យប្រទេសអឺរ៉ុបភ័យបារម្ភ ខ្លាចខ្វះឧស្ម័នសម្រាប់ប្រើនៅក្នុងរដូវរងារខាងមុខ។ អ៊ុយក្រែន ក៏ដូចជាក្រុមប្រទេសសហភាពអឺរ៉ុប បានចាត់ទុកការសម្រេចរបស់ក្រុមហ៊ុន Gazprom ថាឧបករណ៍របស់រុស្ស៊ី ដើម្បីសងសឹកមកលើអឺរ៉ុប ដែលបានដាក់ទណ្ឌកម្មសេដ្ឋកិច្ចលើខ្លួន ទាក់ទិននឹងវិបត្តិសង្គ្រាមនៅអ៊ុយក្រែន។
កាត់បន្ថយមកនៅត្រឹមតែ២០%នៃសមត្ថភាពបង្ហូរ
បញ្ហាខ្វះថាមពលប្រើប្រាស់ សម្រាប់រដូវរងារខាងមុខនេះ ប្រៀបបីដូចជាកំបិតភ្ជង់បំពង់កអឺរ៉ុបដូច្នេះដែរ។ ដូចយើងបានដឹងកន្លងមកហើយ ថាអឺរ៉ុបរំពឹងទៅលើហ្កាសនាំចូលពីរុស្សី ដល់ទៅ៤០%ឯណោះ នៃតម្រូវការប្រើប្រាស់រួម សរុបទាំង២៧ប្រទេស។ កាលពីល្ងាចថ្ងៃទី២៥កក្កដា ក្រុមហ៊ុនGazprom បានប្រកាសជាលើកទី៣ ថាគេនឹងកាត់បន្ថយបរិមាណឧស្ម័នបន្ថែមទៀត។
ចាប់ពីថ្ងៃពុធ ទី២៧កក្កដាទៅ គឺGazprom នឹងបង្ហូរឧស្ម័នផ្គត់ផ្គង់ឲ្យអឺរ៉ុប តែក្នុងបរិមាណចំនួន ៣៣លានម៉ែត្រគូបតែប៉ុណ្ណោះ ក្នុងមួយថ្ងៃ។ ពោលគឺមានបរិមាណ ចំនួនតែ២០%ប៉ុណ្ណោះ នៃសមត្ថភាពផ្គង់ផ្គង់ទាំងស្រុង របស់បំពង់បង្ហូរឧស្ម័ន Nord Stream។
លោកប្រធានាធិបតីរុស្ស៊ី វ្លាឌីមៀរ ពូទីន ក៏ដូចជាតំណាងរបស់ក្រុមហ៊ុន Gazprom បានលើកឡើងថា មូលហេតុ ដែលគេសម្រេចកាត់បន្ថយការបង្ហូរឧស្ម័នជាលើកទី៣នេះ ថាមកពីក្បាលម៉ាស៊ីនទួរប៊ីនមួយ នៃបំពង់បង្ហូរ Nord Stream ដែលគេបញ្ជូនទៅជួសជុលនៅកាណាដា មិនទាន់បានប្រគល់ឲ្យរុស្ស៊ីវិញទេ។ ទាក់ទិននឹងបញ្ហានេះ អាល្លឺម៉ង់ និងកាណាដា បានស្រុះស្រួលគ្នារកដំណោះស្រាយ បញ្ជូនគ្រឿងបន្លាស់ទៅឲ្យរុស្ស៊ី បើទោះបីជារុស្ស៊ីជាប់ទណ្ឌកម្មសេដ្ឋកិច្ចក៏ដោយ។ តែយ៉ាងណារហូតមកទល់ពេលនេះ ភាគីរុស្ស៊ីអះអាងថាគេនៅមិនទាន់បានទទួលក្បាលម៉ាស៊ីលទួរបីនទេ ហើយបើគ្មានវាគឺបំពង់បង្ហូរឧស្ម័ន Nord Stream មិនអាចដំណើរការបានទាំងស្រុងឡើយ។
សង្គ្រាមថាមពល
កាលពីល្ងាចថ្ងៃចន្ទ ទី២៥កក្កដា លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានអំពាវនាវថា អឺរ៉ុបត្រូវតែរកវិធីឆ្លើយតប ពិន័យទៅលើរុស្ស៊ី ដែលមិនគោរពកិច្ចសន្យា ព្រោះថាបញ្ហាក្បាលម៉ាស៊ីនទួរប៊ីនដែលជួសជុលនៅកាណាដានោះ គ្រាន់តែជាលេសតែប៉ុណ្ណោះ។ សម្រាប់លោក ហ្សេឡេនស្គី វាច្បាស់ណាស់ ដែលរុស្ស៊ីយកបញ្ហាឧស្ម័ននេះ ជាឧបករណ៍ធ្វើសង្គ្រាម ច្របាច់កប្រទេសសហភាពអឺរ៉ុប។
នៅរសៀលថ្ងៃអង្គារនេះ ក្រុមប្រទេសសមាជិកអឺរ៉ុប នឹងបើកការប្រជុំបន្ទាន់ ដើម្បីនិយាយគ្នាពីបញ្ហានេះ។ លោក Jozef Sikela រដ្ឋមន្ត្រីក្រសួងថាមពលសាធារណរដ្ឋឆេក ដែលជាប្រធានវិលជុំអឺរ៉ុប វានលើកឡើងមុនពេលប្រជុំថា ការប្រកាសកាត់បន្ថយការផ្គត់ផ្គង់ឧស្ម័នរបស់ Gazprom គឺជាភស្តុតាងយ៉ាងច្បាស់មកបញ្ជាក់ថា អឺរ៉ុបត្រូវតែរកវិធីរំដោះខ្លួនចេញពីអន្ទាក់ចំណងរបស់រុស្ស៊ីជាបន្ទាន់។ អឺរ៉ុបត្រូវតែពង្រឹងឯករាជភាពរបស់ខ្លួន ដោយត្រូវឈប់រំពឹងលើប្រភពថាមពលបានមកពីរុស្ស៊ី។
អឺរ៉ុបត្រូវសន្សំសំចៃថាមពល
ក្នុងអំឡុងពេលដែលអឺរ៉ុបអាចរកទិញឧស្ម័នពីអ្នកផ្សេងទៀតបាន គឺអឺរ៉ុបត្រូវតែកាត់បន្ថយការប្រើប្រាស់ថាមពល ត្រូវតែសន្សំសំចៃ។ កាលពីសប្តាហ៍មុន គណកម្មការអឺរ៉ុប បានលើកជាសំណើដំណោះស្រាយ ឲ្យប្រទេសសមាជិកទាំងអស់ ត្រូវប្រឹងប្រែងឲ្យអស់ពីសមត្ថភាព កាត់បន្ថយការប្រើប្រាស់ឲ្យបាន១៥% រវាងពីដើមខែសីហាឆ្នាំនេះ ដល់ខែមីនាឆ្នាំក្រោយ ។ ពុំនោះទេ នៅរដូវរងារខាងមុខ អឺរ៉ុបអាចនឹងគ្មានឧស្ម័នប្រើគ្រប់គ្រាន់ទេ ដើម្បីផលិតជាចរន្តអគ្គីសនី ព្រមទាំងសម្រាប់ការប្រើប្រាស់តាមផ្ទះ និងតាមរោងចក្រឧស្សាហកម្មនានា។
គណកម្មការអឺរ៉ុបចង់ដាក់កំហិតថា បើ “ភាពអាសន្នខ្វះថាមពលមានកាន់តែខ្លាំង” គឺករណីកិច្ចកាត់បន្ថយការប្រើប្រាស់ឧស្ម័ន១៥%នេះ នឹងក្លាយជា “កាតព្វកិច្ច” ដែលប្រទេសសមាជិកត្រូវតែគោរព ឲ្យខាងតែបាន។ វិធានការនេះ គឺដើម្បីបង្ហាញការសាមគ្គីដល់ប្រទេសមួយចំនួន ដែលរំពឹងខ្លាំងលើឧស្ម័ននាំចូលពីរុស្ស៊ី ជាក់ស្តែង ដូចជាប្រទេសអាល្លឺម៉ង់តែម្តង។ ក្នុងនាមអាល្លឺម៉ង់ជាក្បាលម៉ាស៊ីនសេដ្ឋកិច្ចអឺរ៉ុបធំជាងគេ បើអាល្លឺម៉ង់គ្មានឧស្ម័នប្រើ គ្មានចរន្តអគ្គិសនីប្រើ នោះសេដ្ឋកិច្ចអឺរ៉ុបទាំងមូល ក៏អាចជួបបញ្ហាដែរ។ តែយ៉ាងណា ស្រីពេជ្រ មានប្រទេសខ្លះ ដូចជាអ៊ីតាលី អេស្ប៉ាញ ក្រិក ប៉ូឡូញ និងព័រទុយហ្កាល់ជាដើម គេបានបង្ហាញការមិនគាំទ្រ លើវិធានការដាក់កំហិតឲ្យកាត់បន្ថយបែបនេះទេ។
មុនពេលចាប់ផ្តើមការប្រជុំនៅព្រុចស៊ែល នៅព្រឹកថ្ងៃអង្គារនេះ លោកស្រី Kadri Simson ស្នងការអឺរ៉ុបទទួលបន្ទុកថាមពល បានលើកឡើងថា ប្រទេសសមាជិកនីមួយៗ មានបញ្ហាប្រឈមរៀងៗខ្លួន និងមិនមានកម្រិតធ្ងន់ធ្ងរដូចគ្នាឡើយ ទាក់ទិននឹងរឿងឧស្ម័ននេះ។ តែយ៉ាងណាលោកស្រីសង្ឃឹមថា ប្រទេសទាំងអស់នឹងរួមគ្នាសាមគ្គី សម្រេចឲ្យបានកិច្ចព្រមព្រៀងនយោបាយមួយ ដើម្បីដោះស្រាយបញ្ហាវិបត្តិថាមពល ដែលកំពុងតែចោទនាពេលនេះ។
អាល្លឺម៉ង់អាចបន្តប្រើរោងចក្រនុយក្លេអ៊ែរផលិតថាមពលអគ្គិសនី
ដោយសារតែបញ្ហាប្រឈម ខ្វះឧស្ម័នប្រើនេះ នៅអាល្លឺម៉ង់ មានមតិមួយចំនួនលើកឡើងថា គួរតែបន្តឲ្យស្ថានីយ៍អគ្គិសនីនុយក្លេអ៊ែរ ដែលនៅមិនទាន់បិទជាស្ថាពរ អាចបន្តផលិតថាមពលអគ្គិសនីជាបណ្តោះអាសន្នសិន។ បច្ចុប្បន្ននេះ នៅមានរោងចក្រផលិតថាមពលអគ្គិសនីនុយក្លេអ៊ែរចំនួន៣ស្ថានីយ៍ ដែលនៅដំណើរការមិនទាន់បិទទេ។ តាមធម្មតា យោងតាមផែនការ គឺរោងចក្រទាំងនេះ នឹងត្រូវបិទទ្វារឈប់ដំណើរការផលិតអគ្គិសនី នៅដំណាច់ឆ្នាំនេះ។ អាជ្ញាធរថាមពលនុយក្លេអ៊ែរអាល្លឺម៉ង់ នឹងត្រូវធ្វើតេស្តពិនិត្យឲ្យបានល្អិតល្អន់ ថារោងចក្រដែលនៅសល់ទាំង៣នោះ អាចបន្តដំណើរការដល់ពេលណាបាន ដើម្បីកុំឲ្យមានបញ្ហាសុវត្ថិភាព។
កាលៈទេសៈពេលនេះ តម្លៃថាមពលកាន់តែឡើងថ្លៃ បង្កការលំបាកដល់ជីវភាពប្រជាជន។ គណបក្សនយោបាយធំៗនៅក្នុងរដ្ឋាភិបាលចម្រុះអាល្លឺម៉ង់ បានចាប់ផ្តើមលើកជាគំនិត ថាគួរតែបន្តប្រើអគ្គិសនីនុយក្លេអ៊ែរ បន្តិតទៀតសិនទៅ។ លោក Michael Kruse សមាជិកបក្សស្តាំនិយម FDP បានលើកឡើងថា គួរតែឲ្យរោងចក្រអគ្គិសនីនុយក្លេអ៊ែរទាំង៣ បន្តដំណើរការរហូតដល់ពាក់កណ្តាលឆ្នាំ២០២៤ ព្រោះកំឡុងពេលនេះ ជាកំឡុងពេលដែលអាល្លឺម៉ង់ប្រឈមខ្លាំងនឹងការខ្វះចរន្តអគ្គិសនី។
ដោយឡែក ក្រុមគណបក្សបរិស្ថាននិយម ដែលកន្លងមកជាអ្នកប្រឆាំងនឹងថាមពលនុយក្លេអ៊ែរ ពេលនេះក៏បានបន្ទន់ឥរិយាបថខ្លះដែរ។ លោកស្រី Katrin Goring Eckardt អនុប្រធានសភា មកពីបក្សបរិស្ថាននិយម បានលើកឡើងថា ដោយយោងលើស្ថានភាពអាសន្នបច្ចុប្បន្ននេះ ការបន្តប្រើថាមពលអគ្គិសនីនុយក្លេអ៊ែរ អាចជាជម្រើសមួយ ព្រោះពុំនោះទេ សេវាកម្មរដ្ឋ សាលារៀន មន្ទីរពេទ្យជាដើម អាចខ្វះចរន្តអគ្គិសនីប្រើ។ លោកស្រីរដ្ឋមន្ត្រីការបរទេសអាល្លឺម៉ង់ មកពីបក្សបរិស្ថាននិយម ក៏បានអះអាងដែរថា គេនឹងពិចារណាលើជម្រើសទាំងអស់ ដើម្បីប្រឈមនឹងបញ្ហាខ្វះថាមពលអគ្គិសនី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ