ជប៉ុនកំពុងទទួលរងសំពាធ ដោយសារតែភាពតានតឹងរវាងចិន-អាមេរិក ក្នុងសំណុំរឿងតៃវ៉ាន់
ចុះផ្សាយនៅថ្ងៃ៖
ស្តាប់ - ០៩:១៤
លោកស្រីណាន់ស៊ី ប៉េឡូស៊ី ប្រធានសភាសហរដ្ឋអាមេរិក បានអញ្ជើញទៅដល់ទីក្រុងតូក្យូហើយ នៅព្រឹកថ្ងៃសុក្រនេះ ដែលជាគោលដៅចុងក្រោយនៃទស្សនកិច្ច បន្ទាប់ពីលោកស្រីបានទៅដល់កោះតៃវ៉ាន់ និងកូរ៉េខាងត្បូង។ ជាដំណើរទស្សនកិច្ច ដែលបានបង្កឲ្យមានភាពតានតឹងជាខ្លាំង ខណៈដែលចិន បានចាប់ផ្តើមធ្វើសមយុទ្ធយោធាទ្រង់ទ្រាយធំមិនធ្លាប់ នៅជុំវិញកោះតៃវ៉ាន់ ដើម្បីបង្ហាញពីការកើតទុក្ខមិនសុខចិត្ត ចំពោះដំណើរទៅដល់តៃវ៉ាន់ របស់លោកស្រីប្រធានសភាអាមេរិក។ ជប៉ុនដែលស្ថិតនៅមិនឆ្ងាយប៉ុន្មានពីតៃវ៉ាន់ កំពុងតែទទួលរងសំពាធនេះជាខ្លាំង បន្ទាប់ពីមីស៊ីលបាលីស្ទីករបស់ចិន ចំនួនយ៉ាងហោច៥គ្រាប់ បានធ្លាក់ចូលទៅក្នុងដែនទឹករបស់ជប៉ុន។
មីស៊ីលចិនធ្លាក់ចូលដែនទឹកជប៉ុនជាលើកទី១
ដើម្បីបង្ហាញការតវ៉ាជំទាស់ ឬអាចជាការបញ្ចេញកម្លាំងបង្ហាញសាច់ដុំគំរាមផងក៏ថាបាន គឺចិនបានរៀបចំការធ្វើសមុទ្រយោធាទ្រង់ទ្រាយធំមិនធ្លាប់មានទេ ចាប់ពីថ្ងៃព្រហស្បតិ៍ទី៤សីហា រហូតដល់ថ្ងៃអាទិត្យចុងសប្តាហ៍នេះ។ យោងតាមទីភ្នាក់ងារព័ត៌មានផ្លូវការចិន កងទ័ពចិនបានប្រើយន្តហោះចម្បាំងប្រមាណជាង១០០គ្រឿង ព្រមទាំងនាវាចម្បាំង ជាង១០គ្រឿងថែមទៀត។
ផ្អែកតាមកងទ័ពតៃវ៉ាន់ យ៉ាងហោចណាស់ ចិនបានបាញ់មីស៊ីលបាលីស្ទិក ប្រភេទ Dongfeng ចំនួន១១គ្រាប់។ ដោយឡែកខាងកងទ័ពជប៉ុនវិញអះអាងថា គេរាប់ឃើញ៩គ្រាប់ ហើយក្នុងនោះមានប្រហែល៥គ្រាប់ បានហោះរំលងកោះតៃវ៉ាន់ ទៅធ្លាក់ក្នុងតំបន់សេដ្ឋកិច្ចផ្តាច់មុខ នៃដែនទឹករបស់ជប៉ុន។ ដូចយើងដឹងហើយ ថាកោះរបស់ជប៉ុនដែលស្ថិតក្នុងប្រជុំកោះអូគីណាវ៉ា គឺស្ថិតនៅចំងាយប្រមាណតែជាង១០០គីឡូម៉ែត្រប៉ុណ្ណោះ ពីតៃវ៉ាន់។ ហេតុដូច្នេះហើយ បានជាការធ្វើសមយុទ្ធយោធារបស់ចិននៅតំបន់នេះ កំពុងតែធ្វើឲ្យជប៉ុនបារម្ភណាស់ អំពីសន្តិសុខជាតិខ្លួន ក៏ដូចជាសុខសុវត្ថិភាពរបស់ប្រជាជន អ្នកនេសាទ និងនាវាដឹកទំនិញផងដែរ។
សម្រាប់ពេលនេះ ជប៉ុនបានជូនដំណឹងទៅចិនតាមផ្លូវការទូត ដោយបានប្រាប់ទៅខាងចិន ថាត្រូវតែបញ្ឈប់សកម្មភាពធ្វើសមយុទ្ធយោធានេះជាបន្ទាន់។ លោក Nobuo Kishi រដ្ឋមន្ត្រីក្រសួងការពារជាតិជប៉ុន បានលើកឡើងថា សមយុទ្ធយោធារបស់ចិននេះ មានលក្ខណៈជា “ការគំរាមសំឡុត” ខ្លាំងណាស់ មកលើសន្តិសុខជាតិជប៉ុន។ វាជាលើកទី១ហើយ ដែលមីស៊ីលចិនធ្លាក់ចូលដែនទឹកជប៉ុន។
“ជប៉ុននិងអាមេរិក នឹងរួមគ្នាការពារសន្តិភាព ស្ថិរភាពនៅតំបន់ច្រកសមុទ្រតៃវ៉ាន់”
នៅក្នុងពេលជួបជាមួយ លោកស្រី ណាន់ស៊ី ប៉េឡូស៊ី នៅព្រឹកថ្ងៃសុក្រទី៥សីហា លោក ហ្វូមីអូ គីស៊ីដា នាយករដ្ឋមន្ត្រីជប៉ុន បានថ្លែងថា “សកម្មភាពសមយុទ្ធយោធារបស់ចិន បាញ់មីស៊ីលចូលដែនទឹកជប៉ុននេះ គឺជាបញ្ហាធ្ងន់ធ្ងរ មិនអាចប្រហែសបានទេ ព្រោះវាប៉ះពាល់ដល់សុវត្ថិភាពរបស់ប្រជាជនជប៉ុន”។ ទន្ទឹមគ្នានេះ លោកបានប្រកាសថា “ទោះយ៉ាងណាក៏ដោយ ជប៉ុននិងអាមេរិក នឹងរួមគ្នាសហការ យ៉ាងពេញដៃ ដើម្បីរក្សាការពារសន្តិភាព ស្ថិរភាពនៅតំបន់ច្រកសមុទ្រតៃវ៉ាន់។ ច្រកនេះជាច្រកដែលមានចរាចរណ៍នាវាដឹកទំនិញ ដ៏មមាញឹកបំផុត”។
គួរកត់សំគាល់ថា ជាផ្លូវការ លោក Hirokazu Matsuo អ្នកនាំពាក្យរដ្ឋាភិបាលជប៉ុន បានបញ្ជាក់ថា “ជប៉ុនគ្មានតួនាទីអ្វីទៅធ្វើអត្ថាធិប្បាយ បញ្ចេញយោបល់ រឿងទស្សនកិច្ចរបស់លោកស្រីណាន់ស៊ី ប៉េឡូស៊ី នៅតៃវ៉ាន់នោះទេ”។ ក៏ប៉ុន្តែ យោងតាមប្រភពការទូតជប៉ុនផ្សេងទៀត ដោយសុំមិនបញ្ចេញឈ្មោះ បានលើកឡើងថា ប្រសិនបើគេ បានសួរយោបល់រដ្ឋាភិបាលជប៉ុន ម្លេះជប៉ុននឹងឆ្លើយថា ការទៅទស្សនកិច្ចនៅតៃវ៉ាន់ របស់លោកស្រីប្រធានសភាអាមេរិក គឺវាមិនមែនជារឿងគួរធ្វើទេ។
បើតាមសំដីនេះ មានន័យថា ប្រហែលជាភាគីអាមេរិក មិនបានជូនដំណឹងឬសួរយោបល់ទៅខាងភាគីជប៉ុនទេ។ ហើយជប៉ុនមិនគាំទ្រប៉ុន្មានទេ ដែលលោកស្រីប្រធានសភាអាមេរិកទៅទស្សនកិច្ចនៅតៃវ៉ាន់ ព្រោះជប៉ុនដឹងថាវានឹងដុតកំហឹងរបស់ចិន។ តែធ្វើម្តេចបើអង្ករក្លាយជាបាយទៅហើយ ជប៉ុនមានតែខំញញឹមរាក់ទាក់លោកស្រីណាន់ស៊ី ប៉េឡូស៊ី យ៉ាងទើសទាល់បំផុតនាពេលនេះ។
“ចិនគ្មានសិទ្ធិអ្វី មករារាំងមិនឲ្យគេ មានទំនាក់ទំនងជាមួយតៃវ៉ាន់ឡើយ!”
យោងតាមអ្នករាយការណ៍ព័ត៌មានបារាំង ប្រចាំនៅតូក្យូ បរិយាកាសអួរអាប់ ក៏មានខ្លាំងដែរក្នុងចំណោមសមាជិកគណៈប្រតិភូអាមេរិក ដែលអមដំណើរលោកស្រីណាន់ស៊ី ប៉េឡូស៊ី។ វាបង្ហាញពីការមានខ្លួនទើសទាល់ដែរ ពីសំណាក់ភាគីអាមេរិក ព្រោះថាបញ្ហាផ្ទុះផុសផុលឡើង ដោយសារតែខ្លួន។ តែយ៉ាងណា លោកស្រីណាន់ស៊ី ប៉េឡូស៊ី បានប្រកាសនៅតូក្យូថា “អាមេរិកគ្មានបំណងធ្វើឲ្យប្រែប្រួល ដល់លក្ខន្តិកៈស្ថិរភាពក្នុងសំណុំរឿងតៃវ៉ាន់ទេ តែចិនក៏គ្មានសិទ្ធិអ្វី មកបិទខ្ទប់ដាក់រនាំងព័ទ្ធតៃវ៉ាន់ មិនឲ្យគេឯងផ្សេងទៀត ចូលទៅមានទំនាក់ទំនងជាមួយតៃវ៉ាននោះឡើយ”។
ជប៉ុនទទួលសំពាធ ដោយសារជម្លោះរវាងចិន និងអាមេរិក
នៅទីក្រុងភ្នំពេញឯនេះ ក្នុងឱកាសជំនួបកំពូលអាស៊ាន លោកវ៉ាង យី ប្រមុខការទូតចិន បានលុបចោលកិច្ចប្រជុំទ្វេភាគី ជាមួយលោករដ្ឋមន្ត្រីការបរទេសជប៉ុន។ បញ្ហានេះវាកំពុងតែធ្វើឲ្យជប៉ុនរងសំពាធខ្លាំងណាស់ ព្រោះថាជប៉ុនជាសម្ព័ន្ធមិត្តរបស់អាមេរិក។ ក្នុងសំណុំរឿងតៃវ៉ាន់ ដែលចិន និងអាមេរិក តែងតែសង្គ្រឺតធ្មេញដាក់គ្នាទៅវិញទៅមកនេះ វាប្រៀបបីដូចជាថ្មដ៏ដ៏មានទំងន់ ដាក់បន្ទុកទៅលើជប៉ុន។ កន្លងមកជប៉ុន ព្យាយាមអត់ធ្មត់ ហើយខិតខំភ្ជាប់ទំនាក់ទំនងជាមួយចិនខ្លាំងណាស់ ទាក់ទិននឹងវិស័យសេដ្ឋកិច្ចពាណិជ្ជកម្ម។
ចង់មិនចង់ ជប៉ុនជាសម្ព័ន្ធមិត្តរបស់អាមេរិក ហើយជប៉ុនមានភូមិសាស្ត្រក្បែរតៃវ៉ាន់ បើផ្ទុះសង្គ្រាម មានបញ្ហាទៅ គឺជប៉ុនក៏មិនអាចគេចផុតដែរ។ យ៉ាងណាមិញ សមយុទ្ធយោធារបស់ចិនក្នុងពេលនេះ មិនមែនចិនគំរាមតែតៃវ៉ាន់នោះទេ តែចិនចង់គំរាមគ្រប់គ្នាទាំងអស់ ដែលមានចំណែកពាក់ព័ន្ធក្នុងរឿងតៃវ៉ាន់ រាប់ទាំងអាមេរិក និងជប៉ុនផងដែរ។ មីស៊ីលបាលីស្ទីកចិន ធ្លាក់ចូលដែលទឹកជប៉ុនកាលពីថ្ងៃម្សិលមិញ វាមិនមែនជារឿងចៃដន្យទេ!
ដោយឡែក ផ្អែកតាមលោក John Kirby អ្នកនាំពាក្យសេតវិមានអាមេរិក កងទ័ពជើងទឹកអាមេរិក ដែលប្រចាំការនៅក្នុងតំបន់ប៉ាស៊ីហ្វិក បានសម្រេចផ្អាក មិនបាញ់សាកល្បងមីស៊ីលអន្តរទ្វីបទេ ដោយមិនចង់ធ្វើឲ្យស្ថានការណ៍ កាន់តែតានតឹង។ តែនាវាចម្បាំងអាមេរិក និងបន្តក្រវែលនៅក្បែរតៃវ៉ាន់ ដើម្បីតាមដានស្ថានការណ៍។
លោក Tetsuo Kotani សាស្ត្រាចារ្យជំនាញផ្នែកសន្តិសុខ នៅសកលវិទ្យាល័យ Meikai បានលើកឡើងថា ក្នុងករណីផ្ទុះសង្គ្រាម ជប៉ុនមិនអាចគេចផុត ពីរងមីស៊ីលរបស់ចិននោះឡើយ។ នៅកោះអូគីណាវ៉ា របស់ជប៉ុន ក៏មានមូលដ្ឋានទ័ពអាមេរិកថែមទៀត។ បច្ចុប្បន្នមានទាហានអាមេរិកឈរជើងនៅទីនោះ យ៉ាងហោច៥៥០០០នាក់។ ដូច្នេះ វាជាចំណងជាមួយអាមេរិក ដែលជប៉ុនមិនអាចស្រាយបានទេ។ លោក Tetsuo Kotani អះអាងទៀតថា ភាពតានតឹងកាន់តែកើនខ្លាំងបែបនេះ គឺសកម្មភាពយោធារបស់ចិននៅជុំវិញតៃវ៉ាន់ នឹងកាន់តែមានញឹកញាប់ ហើយកាន់តែធំ ទៅថ្ងៃខាងមុខទៀត។ ដូច្នេះ សន្តិសុខជប៉ុន សុវត្ថិភាពនាវាដឹកទំនិញជាដើម នឹងប្រាកដជាជួបការលំបាក។
ជប៉ុននឹងពង្រឹងវិស័យកងទ័ពដើម្បីការពារខ្លួន ក្នុងករណីផ្ទុះសង្គ្រាម
ជានិច្ចជាកាល ពីរដ្ឋាភិបាលមួយទៅរដ្ឋាភិបាលមួយ ជប៉ុនតែប្រកាន់ជំហរ ជើងមួយជាន់ទូកពីរ មិនចង់ចេញមុខខ្លាំង បោះពួយហក់ចូលក្នុងរង្វង់ដៃអាមេរិកទេ។ តែកាលៈទេសៈកាន់តែតានតឹង ចិនកំរើកកាន់តែខ្លាំង ដែលអាចធ្វើឲ្យជប៉ុននឹងលែងមានជម្រើស តទៅទៀត។ ទំនោរប៉ុន្មានឆ្នាំចុងក្រោយនេះ គឺជប៉ុនកំពុងតែឈានទៅពង្រឹងវិស័យកងទ័ព តាមរយៈការធ្វើកំណែទម្រង់រដ្ឋធម្មនុញ្ញសន្តិនិយមរបស់ខ្លួន។ បើតាមការវិភាគ រដ្ឋាភិបាលជប៉ុន កំពុងតែស្ទឺស្ទាក់ ក្នុងការដំឡើងថវិកាចំណាយលើវិស័យកងទ័ព មួយទ្វេជាពីរឲ្យឡើងដល់ ២%នៃចំណូលដុលក្នុងស្រុករបស់ជប៉ុន។
តែយ៉ាងណាក៏ដោយ ក្នុងសំណុំរឿងចូលខ្លួនប្រឡូកក្នុងរឿងតៃវ៉ាន់ ដែលមានអាមេរិក និងចិនមេជម្លោះ គឺវាជារឿងមួយពិបាកថ្លឹងថ្លែងខ្លាំងណាស់ សម្រាប់រដ្ឋាភិបាលជប៉ុន។ យោងតាមការវិភាគរបស់លោក Paul Nadeau នៅក្នុងទស្សនាវត្តី Tokyo Review គឺក្នុងចំណោមមតិសាធារណៈជប៉ុន មានចំនួនភាគច្រើនគាំទ្រ ឲ្យជប៉ុនជួយតៃវ៉ាន់។ ក៏ប៉ុន្តែ មានការខ្វែងគំនិតខ្លាំអ ទាក់ទិននឹងមធ្យោបាយជួយ ថាជួយដោយរបៀបណា ក្នុងរូបភាពបែបណា។
ការសម្រេចឈានជើងចូលធ្វើសង្គ្រាមជាក់ស្តែងណាមួយ ដើម្បីជួយតៃវ៉ាន់ អាចប្រហែលជាមិនមានការគាំទ្រច្រើនទេ ពីប្រជាជនជប៉ុន ល្គឹកណាតែថាជប៉ុនខ្លួនឯង ត្រូវរងការវាយប្រហាពីចិនដែរ។ អនុស្សាវរីយ៍អតីតកាលដ៏ជូរចត់ ដែលជប៉ុនរងគ្រាប់បែកបរមាណូ២គ្រាប់ នៅដក់ជាប់ក្នុងមនសិកាជប៉ុននៅឡើយទេ ហេតុដូច្នេះហើយការចូលរួមធ្វើសង្គ្រាម គឺប្រជាជនប្រឆាំងដាច់ខាត។ តែយ៉ាងណា ដំណើរវិវឌ្ឍន៍នៃសំណុំរឿងដ៏តានតឹងនេះ មិនមែនជប៉ុនម្នាក់ឯងជាអ្នកកំណត់ទេ។ កាលៈទេសៈអាចនឹងរុញច្រាន ឲ្យជប៉ុនធ្វើទាំងបង្ខំក៏ថាបានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ