ផែនការប្រឆាំងនឹងវិបត្តិអតិផរណា របស់រដ្ឋាភិបាលបៃដិន ឡើងដល់ព្រឹទ្ធសភា
ចុះផ្សាយនៅថ្ងៃ៖
ស្តាប់ - ០៧:៥៤
ព្រឹទ្ធសភាសហរដ្ឋអាមេរិក ជជែកពិភាក្សាតស៊ូមតិគ្នានៅថ្ងៃអាទិត្យទី៨កក្កដាទៀត ជុំវិញសំណើផែនការប្រឆាំងនឹងវិបត្តិអតិផរណា របស់រដ្ឋាភិបាល លោក ចូ បៃដិន។ រសៀលថ្ងៃសៅរ៍ លោក Chuck Schumer ប្រធានក្រុមគណបក្សប្រជាធិបតេយ្យប្រចាំព្រឹទ្ធសភាអាមេរិក បានណែនាំបង្ហាញពីអត្ថបទសំណើច្បាប់ ដោយបានគូសបង្ហាញពីគោលបំណងសំខាន់ៗ មានតួយ៉ាង កាត់បន្ថយតម្លៃថ្នាំសង្កូវព្យាបាលជំងឺសម្រាប់មនុស្សចាស់, វិនិយោគដើម្បីការពារបរិស្ថានអាកាសធាតុនិងដើម្បីថាមពលបៃតង, បង្កើនពន្ធចំពោះក្រុមហ៊ុនធំៗ ដើម្បីយកទៅជួយឧបត្ថម្ភផ្នែកសង្គមកិច្ចនិងបរិស្ថាន ហើយចូលរួមចំណែកកាត់បន្ថយឱនភាពសេដ្ឋកិច្ច។ សំណើច្បាប់របស់ប្រធានាធិបតីសហរដ្ឋអាមេរិក លោក ចូ បៃដិន (គម្រោង Build Back Better) គឺត្រូវរាំងស្ទះ ប្រមាណជាមួយឆ្នាំកន្លះមកហើយ។ នៅពេលនេះទៀត ក្រុមអ្នកតំណាងរាស្ត្របក្សសាធារណៈរដ្ឋ ក៏នៅតែតាមជំទាស់ មិនចង់ឲ្យច្បាប់នេះចេញរួចដែរ។
សេចក្តីព្រាងច្បាប់របស់រដ្ឋបាលលោក ចូ បៃដិន ត្រូវគេមើលឃើញថា ជាគម្រោងការកែទម្រង់ស្តារស្រោចស្រង់សង្គម សេដ្ឋកិច្ច ព្រមទាំងបរិស្ថាន។ អ្នកខ្លះបានហៅពង្រាងច្បាប់នេះ ថា ផែនការប្រឆាំងនឹងអតិផរណាទំនិញ ទៀតផង ពីព្រោះថា វាមានគោលបំណងគិតគូរដល់សេវកម្មព្យាបាលជំងឺ និងជួយដល់អ្នកក្រមនុស្សចាស់ជរា ដែលលំបាករងគ្រោះក្នុងបរិបទទំនិញឡើងថ្លៃលុយចុះថោក។
នៅសហរដ្ឋអាមេរិក តម្លៃសេវាព្យាបាលជំងឺគឺថ្លៃខ្ពស់ណាស់។ ក្រុមសមាជិកបក្សប្រជាធិបតេយ ក៏បានទទួលស្គាល់ដែរ ថាសេវាកម្មព្យាបាលចំពោះជំងឺមួយចំនួន គឺថ្លៃដ៏ទៅជាង១០ដងឯងណា បើធៀបនឹងប្រទេសអ្នកមានផ្សេងទៀត។ ឧទាហរណ៍ជាក់ស្តែង គឺជួនកាល តម្លៃព្យាបាលជំងឺនៅអាមេរិក ថ្លៃជាង១០ដង បើធៀបនឹង កាណាដា ជាប្រទេសអ្នកមានក្នុងទ្វីបអាមេរិកដូចគ្នា។ ហេតុដូច្នេះហើយ ទើបលោក Chuck Schumer ប្រធានក្រុមគណបក្សប្រជាធិបតេយ្យប្រចាំព្រឹទ្ធសភាអាមេរិក បានលើកឡើងដោយក្តីសង្ឃឹមថា តាមរយៈគម្រោងកែទម្រង់របស់រដ្ឋបាល ចូ បៃដិន គឺ ទុក្ខលំបាកដែលកើតចេញពីការខ្វះខាតលុយកាក់ទិញថ្នាំព្យាបាលជំងឺ ត្រូវកាត់បន្ថយឲ្យធូរស្រាលខ្លះ។
ក្នុងន័យនេះ នៅក្នុងច្បាប់ដែលមានកម្រាសជាង៧០០ទំព័រ គឺមានមាត្រាមួយ ចែងថា ក្រុមហ៊ុនឱសថ ត្រូវចេញថ្លៃបង់សងជំនួស ដល់ក្រុមហ៊ុនធានារ៉ាប់រង់សុខភាព ប្រសិនបើតម្លៃឡើងខ្ពស់ហួសពីអតិផរណា។ អត្ថបទពង្រាងច្បាប់នេះ ក៏មានចែងថា រដ្ឋមន្ត្រីសុខាភិបាល ត្រូវជជែកចរចាពីតម្លៃថ្នាំជាមួយនឹងក្រុមហ៊ុនធានារ៉ាប់រង និងក្រុមហ៊ុនផលិតឱសថ ដោយផ្ទាល់។ ច្បាប់នេះ ក៏មានចែងពីចំនួនទឹកប្រាក់ ត្រូវជួយដល់មនុស្សចាស់ សម្រាប់ការព្យាបាលនិងទិញថ្នាំ គឺប្រមាណជា ២ ពាន់ដុល្លារ ក្នុងមួយឆ្នាំ។
ជារួម សេចក្តីព្រាងច្បាប់របស់ក្រុមលោក ចូ បៃដិន គឺមានវត្ថុបំណងជួយឲ្យពលរដ្ឋអាមេរិក ទទួលបានការព្យាបាលជំងឺឲ្យសមរម្យជាងមុន និងកាត់បន្ថយវិសមភាពចំពោះលទ្ធភាពក្នុងការទទួលបានការថែទាំសុខភាព។
ផែនការច្បាប់ថ្មីនេះ គឺមានចែងមួយផ្នែកធំ ដែលផ្តោតសំខាន់លើវិស័យបរិស្ថានអាកាសធាតុ។ រដ្ឋបាលលោក ចូ បៃដិន ចង់គិតគូរយ៉ាងណាខ្លះ ក្នុងការសង្គ្រោះបរិស្ថានអាកាសធាតុ?
គម្រោងរបស់លោក ចូ បៃដិន គឺលើកសំណើថវិកា ប្រមាណ ៣៦៩ ពាន់លានដុល្លារ ដើម្បីប្រយុទ្ធប្រឆាំងនឹងការប្រែប្រួលអាកាសធាតុ។ គេរំពឹងថានឹងជួយឲ្យសហរដ្ឋអាមេរិក ចូលរួមកាត់បន្ថយការបំភាយឧស្ម័នប្រមាណ៤០% នៅឆ្នាំ២០៣០។
ចំណែកទឹកប្រាក់រាប់ពាន់លានដុល្លារទៀត គឺសម្រាប់វិនិយោគសាងសង់កង្ហាល់ផលិតថាមពល ពីខ្យល់សមុទ្រ, គម្រោងផលិតផ្ទាំងសូឡា ទាញថាមពលពីព្រះអាទិត្យ ហើយនិងគម្រោងផលិតរថយន្តដើរដោយថាមពលអគ្គិសនី។
ជាក់ស្តែង បើច្បាប់នេះ ត្រូវសភាអនុម័តមែននោះ គឺចំពោះទិញឡានដើរដោយចរន្តអគ្គិសនី នឹងត្រូវបានទទួលប្រាក់កម្ចីបន្ថែម។ ពោលគឺអ្នកទិញរថយន្តសម្រាប់ធ្វើដំណើរនិងសម្រាប់ការទិញឡានដើរដោយអគ្គិសនី នឹងទទួលប្រាក់កម្ចី ប្រមាណ ៧ ៥០០ដុល្លារ ពីរដ្ឋាភិបាល។ ចំណុចនេះ ត្រូវក្រុមអ្នកនយោបាយសាធារណៈរដ្ឋរិះគន់ថា រដ្ឋចង់ឲ្យពលរដ្ឋទិញឡានថោកៗ ត្រឹមតែ៨ពាន់ដុល្លារប៉ុណ្ណោះ។
ក្រុមហ៊ុនផលិតរថយន្តវិញ អាចនឹងទទួលបានការឧបត្ថម្ភប្រមាណ ២ពាន់លានដុល្លារ ករណីដែលក្រុមហ៊ុនចង់កែសម្រួលដំណើរការផលិតរថយន្ត ពីស៊ីប្រេងសាំង មកជាការផលិតឡានដើរដោយអគ្គិសនី ឬថាមពលស្អាត។
មិនតែប៉ុណ្ណោះ រដ្ឋាភិបាលនឹងជួយចេញថ្លៃមួយចំនួន រហូតអាចដល់៣០% សម្រាប់ការដាក់ដំឡើងផ្ទាំងសូឡា ទាញយកថាមពលពន្លឺព្រះអាទិត្យ នៅលើដំបូលផ្ទះ។
គម្រោងកែប្រែសង្គម សេដ្ឋកិច្ច និងបរិស្ថានរបស់សហរដ្ឋអាមេរិកនេះ គឺត្រូវការថវិកាច្រើនណាស់ដើម្បីសម្រេចឲ្យបាន។
គម្រោងទឹកប្រាក់ប្រមាណ ១ ៧៥០ ពាន់លានដុល្លារ ហើយក្នុងនោះ ប្រហែលជា ៣៧០ពាន់លានដុល្លារ សម្រាប់ការវិនិយោគលើវិស័យបរិស្ថានអាកាសធាតុ។ ដើម្បីកាត់បន្ថយកម្ចីសាធារណៈ គឺរដ្ឋបាលរបស់លោក ចូ បៃដិន ស្នើយកពន្ធពីអ្នកមានមកជួយអ្នកក្រ គឺបង្កើនពន្ធ ប្រមាណ១៥% ចំពោះក្រុមហ៊ុនរកស៊ីណាដែលបានចំណេញប្រាក់លើសពី១ពាន់លានដុល្លារឡើងទៅ។ ទន្ទឹមនឹងនេះ ត្រូវកាត់បន្ថយផលប្រយោជន៍ផ្សេងៗខ្លះ តួយ៉ាងក្នុងករណីរួចកាតព្វកិច្ចពន្ធ ត្រូវគិតគូរពិចារណាឡើងវិញ។
លើសពីនេះទៅទៀត អាជ្ញាធររដ្ឋបាលខាងគ្រប់គ្រងពន្ធ នឹងបន្ថែមថវិកាចំនួន៨០ពាន់លានដុល្លារបន្ថែម ដើម្បីបំពេញកិច្ចការត្រួតពិនិត្យការគេចពន្ធ។ ក្នុងនោះ គេនឹងជ្រើសរើសមន្ត្រីបន្ថែម ៣៧ ០០០នាក់ បន្ថែមលើបុគ្គលិក ៧៨ ០០០ នាក់ ដែលមានស្រាប់។ ការបង្កើនចំនួននេះ គឺត្រូវក្រុមបក្សសាធារណរដ្ឋរិះគន់ថា មានចំនួនច្រើនហួស គឺស្ទើរតែច្រើនជាងកងទ័ពអង់គ្លេសទៅទៀត។ ក្រុមបក្សសាធារណៈរដ្ឋ តាមខ្ទាស់ មិនចង់ឲ្យច្បាប់នេះចេញទេ។
ទោះជាម្តេចក្តី សម្រាប់ការចេញពីព្រឹទ្ធសភា ការបោះឆ្នោតសម្រេចអនុម័ត គឺត្រូវការតែសំឡេង៥០ បូកនឹងសំឡេងរបស់អនុប្រធានាធិបតី Kamala Harris មួយទៀត គឺគ្រប់គ្រាន់ហើយ។ បន្តមកទៀត អត្ថបទច្បាប់នេះ នឹងត្រូវដាក់ឲ្យសភាអ្នកតំណាងរាស្ត្រ ជជែកដេញដោលនិងសម្រេចបោះឆ្នោត នៅដើមសប្តាហ៍ថ្មី ដែលលោក ចូ បៃដិន សង្ឃឹមថាសភានឹងសម្រេចអនុម័ត ដោយមិនពន្យារពេលតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ