សង្គ្រាមអ៊ុយក្រែន៖ បារម្ភកាន់តែធំ ក្រោយការបាញ់ប្លោងផ្ទួនៗ ទៅលើស្ថានីយ៍នុយក្លេអ៊ែរ Zaporijjia
ចុះផ្សាយនៅថ្ងៃ៖
ស្តាប់ - ០៦:០០
ស្ថានីយ៍អគ្គិសនីដើរដោយថាមពលនុយក្លេអ៊ែរ ហ្សាប៉ូរីចា (Zaporijjia) ស្ថិតនៅភាគខាងត្បូងអ៊ុយក្រែន ដែលជារោងចក្រថាមពលនុយក្លេអ៊ែរ ដ៏ធំជាងគេបង្អស់នៅអឺរ៉ុបនោះ បានរងនូវការវាយប្រហារ បាញ់ប្លោងផ្ទួនៗគ្នា កាលពីថ្ងៃសុក្រ និងយប់ថ្ងៃសៅរ៍ម្សិលមិញនេះ។ អ៊ុយក្រែន និងរុស្ស៊ី ចោទគ្នាទៅវិញទៅមក ថាជាអ្នកបាញ់ប្លោងគ្រាប់ ប៉ះពាល់ដល់ស្ថានីយ៍នេះ។ ដោយឡែក ទីភ្នាក់ងារថាមពលនុយក្លេអ៊ែរអន្តរជាតិ កំពុងតែមានការព្រួយបារម្ភកាន់តែខ្លាំងឡើង ទាក់ទិននឹងគ្រោះថ្នាក់នុយក្លេអ៊ែរនៅស្ថានីយ៍នេះ ដែលវាអាចជាហានិភ័យ គំរាមទ្វីបអឺរ៉ុបទាំងមូលតែម្តង។
ចោទគ្នាទៅវិញទៅមក
ស្ថានីយ៍អគ្គិសនីនុយក្លេអ៊ែរ Zaporijjia / Zaporizhzhia បានរងការបាញ់ប្លោងកាលពីថ្ងៃសុក្រ។ ស្រាប់តែនៅយប់ថ្ងៃសៅរ៍ ឈានចូលថ្ងៃអាទិត្យម្សិលមិញនេះ មានការបាញ់ប្លោងមួយទៀត បានធ្លាក់ចំក្បែរស្ថានីយ៍នេះ។ គួរបញ្ជាក់ដែរថា ស្ថានីយ៍ Zaporijjia ស្ថិតនៅក្បែរទីក្រុង Energodar ដែលទីក្រុងនេះ ត្រូវបានធ្លាក់ទៅក្នុងដៃរបស់កងទ័ពរុស្ស៊ី តាំងតែពីពាក់កណ្តាលខែមីនាម្លេះ។ ក៏ប៉ុន្តែ យើងមិនមានព័ត៌មានឲ្យច្បាស់ប្រាកដទេ ថាភាគីខាងណាមួយ ដែលជាអ្នកបន្តគ្រប់គ្រងរោងចក្រអគ្គិសនី Zaporijjia នេះ។
អាជ្ញាធររុស្ស៊ីដែលកាន់កាប់ក្រុង Energodar បានអះអាងថា គឺកងទ័ពអ៊ុយក្រែន ដែលជាអ្នកបានបាញ់ រ៉ូកែតមានផ្ទុកកូនគ្រាប់ ប្រភេទOuragan មួយគ្រាប់ កាលពីយប់ថ្ងៃសៅរ៍ ឈានចូលថ្ងៃអាទិត្យ។ គ្រាប់រ៉ូកែតនេះ បានធ្លាក់នៅចំងាយប្រមាណ៤០០ម៉ែត្រ ពីរ៉េអាក់ទ័រមួយ នៃស្ថានីយ៍នេះ ដែលរ៉េអាក់ទ័រនោះកំពុងដំណើរការធម្មតាទេ។ ប្រភពពីអាជ្ញាធររុស្ស៊ីដដែល អះអាងទៀតថា បំណែកផ្ទុះរបស់គ្រាប់រ៉ូកែត បានធ្វើឲ្យខូចខាតអាគាររដ្ឋបាលនៃស្ថានីយ៍ និងបានប៉ះពាល់ផ្នែកខ្លះ ដល់ទីតាំងស្តុកកាកសំណល់នុយក្លេអ៊ែរចាស់ៗ។
ដោយឡែក ប្រភពពីក្រុមហ៊ុនជាតិអគ្គិសនីនុយក្លេអ៊ែរអ៊ុយក្រែន ឈ្មោះ Energoatom បានបញ្ជាក់ថា បុគ្គលិកម្នាក់របស់ក្រុមហ៊ុន ដែលប្រចាំការនៅស្ថានីយ៍នេះ បានរងរបួសធ្ងន់ និងត្រូវបានបញ្ជូនទៅមន្ទីរពេទ្យ ដោយសារតែគ្រាប់រ៉ូកែត បាញ់ដោយកងទ័ពរុស្ស៊ី កាលពីយប់ថ្ងៃសៅរ៍។ ហើយកាលពីថ្ងៃសុក្រវិញ ខាងអាជ្ញាធរអ៊ុយក្រែន បានចោទថា គឺកងទ័ពរុស្ស៊ី ដែលបានបាញ់ប្លោងគ្រាប់ចំនួន៣លើក មកលើស្ថានីយ៍នុយក្លេអ៊ែរ Zaporijjia។
ខូចប្រព័ន្ធរ៉ាដាចាប់ធាតុវិទ្យុសកម្ម
ប្រភពពីក្រុមហ៊ុន Energoatom បានអះអាងថា ប្រព័ន្ធរ៉ាដាចាប់ធាតុវិទ្យុសកម្មចំនួន៣ ដែលស្ថិតនៅជុំវិញស្ថានីយ៍ Zaporijjia បានរងការខូចខាត។ ប្រព័ន្ធរ៉ាដាខូចខាត មានន័យថាគេមិនអាចតាមដានដឹង អំពីកម្រិតធាតុវិទ្យុសកម្មនៅក្នុងបរិយាកាស ជុំវិញស្ថានីយនេះ ឡើងឬចុះកម្រិតណាទេ ហើយក៏មានន័យថា គេមិនអាចធ្វើអន្តរាគមន៍ឲ្យទាន់ពេលវេលាដែរ ក្នុងករណីមានគ្រោះថ្នាក់នុយក្លេអ៊ែរ។
កាលពីថ្ងៃសៅរ៍ ទីភ្នាក់ងារថាមពលនុយក្លេអ៊ែរអន្តរជាតិ AIEA បានចាត់ទុកថា ស្ថានភាពកាន់តែអាសន្ន និងបង្កឲ្យមានការបារម្ភខ្លាំងណាស់ ស្តីពីសុវត្ថិភាពរបស់ស្ថានីយ៍Zaporijjia នេះ។ ផ្អែកតាមទីភ្នាក់ងារនេះ មានរ៉េអាក់ទ័រមួយ នៃស្ថានីយ៍ត្រូវបានបិទ លែងឲ្យដំណើរការហើយ បន្ទាប់ពីមានការវាយប្រហារប្លោងគ្រាប់ កាលពីថ្ងៃសុក្រ។
ការបារម្ភនេះ ក៏ត្រូវបានលោកអគ្គលេខាធិការអង្គការសហប្រជាជាតិ លើកឡើងផងដែរ។ ពីទីក្រុងតូក្យូ លោក អង់តូនីញ៉ូ ហ្គូតទែរស៍ បានអំពាវនាវ ថាត្រូវតែបញ្ឈប់ជាបន្ទាន់ នូវការវាយប្រហារបាញ់ប្លោងគ្រាប់ទៅលើស្ថានីយ៍នុយក្លេអែរ។ ការវាយប្រហារដែលលោកចាត់ទុកថា ប្រៀបបីដូចជាអំពើអត្តឃាត សម្លាប់ខ្លួនឯង។ លោកក៏បានអំពាវនាវបន្ថែមថា ត្រូវតែរៀបចំអនុញ្ញាត ឲ្យមន្ត្រីជំនាញរបស់ទីភ្នាក់ងារថាមពលនុយក្លេអ៊ែរអន្តរជាតិ AIEA អាចចូលទៅពិនិត្យស្ថានការណ៍ជាបន្ទាន់ នៅឯស្ថានីយ៍Zaporijjia។
មហន្តរាយអាចមានលើស Tchernobyl ១០ដង
ស្ថានីយ៍ Zaporijjia គឺជារោងចក្រអគ្គិសនី ដើរដោយថាមពលនុយក្លេអ៊ែរ ដែលមានទំហំធំជាងគេបង្អស់ នៅក្នុងអឺរ៉ុបទាំងមូល។ ស្ថានីយ៍នេះ អាចផលិតអគ្គិសនីបានចំនួន ៦០០០ម៉េហ្កាវ៉ាត់ ពោលគឺប្រមាណ២០%នៃតម្រូវការអគ្គិសនីទាំងអស់ របស់អ៊ុយក្រែន។ ស្ថានីយ៍ Zaporijjia មានរ៉េអាក់ទ័រនុយក្លេអ៊ែរ សរុបទាំងអស់៦ ដែលរ៉េអាក់ទ័រដំបូងគេសង់តាំងតែពីឆ្នាំ១៩៧៩ នៅពេលអ៊ុយក្រែនស្ថិតជាសមាជិកនៃសហភាពសូវៀតនៅឡើយ។ ចំណែករ៉េអាក់ទ័រចុងក្រោយ គឺសង់នៅឆ្នាំ១៩៩៥។
យោងតាមអ្នកជំនាញ ស្ថានីយ៍នុយក្លេអ៊ែរ Zaporijjia ជាស្ថានីយ៍ដែលគោរពក្រិត្យក្រមសុវត្ថិភាពខ្ពស់ ជាងស្ថានីយ៍នុយក្លេអ៊ែរ Tchernobyl ដែលបានផ្ទុះកាលពីខែមេសា ឆ្នាំ១៩៨៦។ គ្រោះថ្នាក់ផ្ទុះនៅ Tchernobyl គឺមានរ៉េអាក់ទ័រតែមួយទេ ដែលបានផ្ទុះ តែវាជាគ្រោះមហន្តរាយ ដ៏ធំបំផុតមួយ នៅក្នុងប្រវត្តិសាស្ត្រនៃឧស្សាហកម្មអគ្គិសនីនុយក្លេអ៊ែរ។ ចំណែកនៅស្ថានីយ៍ Zaporijjia វិញ រ៉េអាក់ទ័រមានដល់ទៅ៦ ដែលអាចរងគ្រាប់មីស៊ីលឬគ្រាប់រ៉ូកែត។ កាលពីខែមីនា លោករដ្ឋមន្ត្រីក្រសួងការបរទេសអ៊ុយក្រែន បានលើកឡើងថា ក្នុងករណីមានបញ្ហាផ្ទុះនៅស្ថានីយ៍ Zaporijjia គឺមហន្តរាយអាចនឹងធ្ងន់ធ្ងរ លើសTchernobyl ដល់ទៅ១០ដងឯណោះ។
ពីទីក្រុងញូយ៉ក កាលពីថ្ងៃទី១សីហា លោកអង់តូនីញូ ហ្គូតទែរស៍ អគ្គលេខាធិការអង្គការសហប្រជាជាតិ បានបង្ហាញការបារម្ភធំណាស់ ទាក់ទិននឹងមហន្តរាយនុយក្លេអ៊ែរ ដែលពិភពលោកយើងកំពុងតែប្រឈម។ ណាសង្គ្រាមនៅអ៊ុយក្រែន ណាបញ្ហាតានតឹងខ្លាំងរវាងចិននិងអាមេរិក ក្នុងសំណុំរឿងតៃវ៉ាន់។ លោកអង់តូនីញូ ហ្គូតទែរស៍ លើកឡើង មហន្តរាយនុយក្លេអ៊ែរ មកលើមនុស្សជាតិយើង អាចកើតមានឡើងគ្រប់ពេល ដោយការយល់ច្រលំគ្នា ឬក៏ការវិនិច្ឆ័យដោយមិនត្រឹមត្រូវណាមួយ។ កំហុសតែមួយប៉ព្រិចភ្នែកនេះ អាចនឹងបង្កឲ្យមានវិនាសកម្មនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ