លោក ដូណាល់ ត្រាំ ត្រូវរដ្ឋអាជ្ញានៃរដ្ឋញូវយ៉ក ហៅទៅសាកសួរ ជុំវិញសំណុំរឿងគេចពន្ធ
ចុះផ្សាយនៅថ្ងៃ៖
ស្តាប់ - ០៦:៣២
ថ្ងៃពុធ អតីតប្រធានាធិបតីសហរដ្ឋអាមេរិក លោក ដូណាល់ ត្រាំ ត្រូវរដ្ឋអាជ្ញារដ្ឋញូវយ៉ក កោះហៅទៅសាកសួរ នៅតុលាការក្រុងញូវយ៉ក ដោយសង្ស័យពីបទលួចគេចពន្ធ។ ក្នុងអង្គសវនាការ រយៈពេលប្រមាណ ៦ ម៉ោង មហាសេដ្ឋី ដូណាល់ ត្រាំ បានរក្សាសិទ្ធិនៅស្ងៀមស្ងាត់ មិនឆ្លើយតបអ្វីទាំងអស់។ អង្គសវនាការនៅរដ្ឋញូវយ៉ក់នេះ គឺធ្វើឡើងតែពីរថ្ងៃប៉ុណ្ណោះ បន្ទាប់ពី នគរបាលសហព័ន្ធ បានចុះឆែកឆេរនៅគេហរដ្ឋរបស់លោក ត្រាំ នៅផ្លរីដា (Florida)។
សំណុំរឿងប៉ូលិសFBI ចូលឆែកឆេរ និងសំណុំរឿងគេចពន្ធ ដាច់ដោយឡែកគ្នា។
-បើនិយាយពីផ្លូវច្បាប់ សំណុំរឿងពីរនេះ គ្មានអ្វីពាក់ព័ន្ធគ្នាទេ គឺជារឿងដាច់ដោយឡែកសុទ្ធសាធ។ ការឆែកឆេរកាលពីពីរថ្ងៃមុន នៅគេហដ្ឋានភូមិគ្រឹះ របស់លោក ត្រាំ នៅ Mar-a-Lago ក្នុងរដ្ឋផ្លរីដា ជាសំណុំរឿងរបស់នគរបាលសហព័ន្ធ FBI ដែលពាក់ព័ន្ធនឹងឯកសារសម្ងាត់ជាតិ ជាច្រើនកេស។ ប៉ូលិសសហព័ន្ធសង្ស័យថាលោក ត្រាំ យកទៅជាមួយរូបលោក ក្រោយចាកចេញពីវិមានប្រធានាធិបតី នៅពេលចប់អាណត្តិ។ លោក ត្រាំ និងបក្សពួក បានរិះគន់ប៉ូលិស និងចោទប្រកាន់ បង្កឲ្យកើតក្តីមិនទុកចិត្តទៅលើនគរបាល ដែលចុះទៅឆែកឆេរនោះ។ លោក ត្រាំ លើកឡើងថា ខ្លាចក្រែង ប៉ូលិសដាក់ឯកសារបន្លំនៅបាតហិប ឬកន្លែងណាមួយ ដើម្បីទម្លាក់កំហុសមកលើរូបលោក។ សម្រាប់លោកត្រាំ, ចំណុចនេះជាការណ៍មួយគួរឲ្យបារម្ភនិងទុកចិត្តបានចំពោះនគរបាលសហព័ន្ធ។ ចំណុចនេះ ក៏គ្មានដែលមានអតីតប្រធានាធិបតីអាមេរិករូបណាមួយ ព្រួយឬសង្ស័យពីប្រព័ន្ធយុត្តិធម៌របស់ប្រទេសខ្លួនបែបនេះទេ។ ពាក់ព័ន្ធករណីរឿងនេះ បើតាមទីភ្នាក់ងារព័ត៌មានបារាំងAFP សូម្បីតែក្រសួងយុត្តិធម៌អាមេរិក និង ប៉ូលីសសហព័ន្ធFBI ក៏មិនទាន់បង្ហើបឲ្យដឹងច្បាស់ ថាម្តេចនៅឡើយទេ។
ចំណែកសំណុំរឿងទៅឆ្លើយបំភ្លឺនៅតុលាការញូវយ៉ក ពីថ្ងៃពុធ ជាសំណុំរឿងស៊ីវិល ទាក់ទងនឹងការគេចពន្ធ និងការរកស៊ីនៅក្រុមហ៊ុនផ្ទាល់ខ្លួនរបស់ក្រុមគ្រួសាររបស់លោក។ តុលាការរដ្ឋញូវយ៉ក បានបើកនីតីវិធីស៊ើបអង្កេតរឿងនេះ បន្ទាប់ពីមានសក្ខីកម្មរបស់សាក្សីជាច្រើននាក់ ក្នុងនោះក៏មានអតីតមេធាវី របស់លោក ត្រាំ មួយផង ដែលអះអាងថា លោក ត្រាំ និងក្រុមហ៊ុនគាត់ បានធ្វើឯកសារក្រដាសស្នាមក្លេងបន្លំ ដើម្បីអាចកេងចំណេញក្នុងការខ្ចីប្រាក់, និងចំណេញពីការគេចវេះមិនបង់ពន្ធ ហើយនិងអាចចំណេញថែមទៀត ពីក្រុមហ៊ុនធានារ៉ាប់រង ជាដើម។
ចំពោះករណីនេះ កូនៗពីរនាក់របស់លោក ត្រាំ មាន Ivanka និង Donald Jr គឺត្រូវភ្នាក់ងាររបស់អយ្យការរដ្ឋញូវយ៉ក បានហៅទៅសាកសួររួចហើយ កាលពីចុងខែកក្កដា និងដើមខែសីហានេះ។ តាមពិតទៅ លោក ដូណាល់ ត្រាំ ក៏ត្រូវចូលឆ្លើយបំភ្លឺ ក្នុងខែកក្កដាដែរ ប៉ុន្តែដោយសារតែភរិយាទី១របស់លោក បានទទួលអនិច្ចកម្ម ទើបសនាវការត្រូវពន្យារពេល និងទើបតែធ្វើឡើងពីថ្ងៃទី១០សីហា។
ក្នុងអង្គសវនាការ លោក ដូណាល់ ត្រាំ រក្សាភាពស្ងាត់ស្ងៀម។ ផ្ទុយទៅវិញ នៅក្រៅតុលាការវិញ លោកបែរជាបានសម្តីខ្លាំងណាស់។
លោក ដូណាល់ ត្រាំ បានសម្រេចរក្សាសិទ្ធិមិនឆ្លើយ ពីព្រោះលោកសំអាងផ្អែកទៅលើវិសោធនកម្ម លើកទី៥ នៃរដ្ឋធម្មនុញ្ញអាមេរិក ដែលអនុញ្ញាតឲ្យពលរដ្ឋអាមេរិកគ្រប់រូប អាចរក្សាសិទ្ធនៅស្ងៀមស្ងាត់ មិនឆ្លើយតប ឬមិននិយាយថ្លែងអ្វី ដែលអាចនាំឲ្យគេចាប់ពិរុទ្ធប្រឆាំងនឹងខ្លួនឯង ឬក៏ មិនថ្លែងសក្ខីកម្មដាក់បន្ទុកលើខ្លួនឯង។
ផ្ទុយទៅវិញ នៅពេលចេញក្រៅតុលាការ លោក ដូណាល់ ត្រាំ បាននិយាយថ្លែងនៅក្នុងបណ្តាញសង្គមផ្ទាល់ខ្លួន ដោយបានរិះគន់ រដ្ឋអាជ្ញានៃរដ្ឋញូវយ៉ក ថាមានកន្លែងធ្វើការល្អអស្ចារ្យ មានលក្ខខណ្ឌការងារក៏ប្រសើរ តែបែរជាមិនខំប្រឹងប្រែងធ្វើការឲ្យល្អ និងបែរជាបណ្តោយឲ្យ មនុស្សនៅញូវយ៉ក បង្កបញ្ហានិងមានឃាតកម្មសម្លាប់គ្នាយ៉ាងច្រើន។ មិនតែប៉ុណ្ណោះ រដ្ឋអាជ្ញានៃរដ្ឋញូវយ៉ក បង្ខាតពេលវេលាក្នុងការស៊ើបអង្កេតករណីរបស់លោក យ៉ាងឥតអំពើ ទៅវិញ។ នេះបើតាមលោក ត្រាំ។
តាំងតែជាច្រើនខែមកហើយ និងតាំងពីថ្ងៃអង្គារ៍មកទៀត មួយថ្ងៃមុនចូលសវនាការ លោក ដូណាល់ ត្រាំ បានរិះគន់រដ្ឋអាជ្ញានៃរដ្ឋញូវយ៉ក់ថាជាមនុស្សរើសអើងប្រកាន់ពូជសាសន៍ និងថា នៅក្នុងរដ្ឋបាលដឹកនាំដោយ ចូ បៃឌិន ខាងបក្សប្រជាធិបតេយ្យ គឺ គ្រួសារ និងរូបលោក ត្រាំ ផ្ទាល់ ក្លាយជាផ្ទាំងស៊ើប ដែលត្រូវគេធ្វើទុក្ខបុកម្នេញ និងវាយប្រហារពីគ្រប់ជ្រុងគ្រប់ទិសទី។
គួរជ្រាបថា ប្រមាណជាជាង៣ឆ្នាំមកហើយ ដែលសំណុំរឿងសង្ស័យគេចពន្ធរបស់លោក ដូណាល់ ត្រាំ បានត្រូវបើកការស៊ើបអង្កេត តែ រដ្ឋអាជ្ញានៃរដ្ឋញូវយ៉ក អ្នកស្រី Letitia James បញ្ជាក់ថា អយ្យការតុលាការញូវយ៉ក នឹងត្រូវស៊ើបអង្កេតជាបន្តទៀត ព្រោះថា ប្រទេសអាមេរិក គ្មានជនណាអង្គុយនៅពីលើច្បាប់ទេ។ អ្នកស្រីរដ្ឋអាជ្ញាអាមេរិកស្បែកខ្មៅរូបនេះ បានបញ្ជាក់ក្នុងសេចក្តីថ្លែងការណ៍ខ្លីមួយថា «នឹងបន្តនីតិវិធីតទៅទៀត តាមដែលច្បាប់អនុញ្ញាតឲ្យធ្វើ»។
សំណុំរឿងនៅរដ្ឋញូវយកនេះ ជារឿងរដ្ឋប្បវេណី ដែល រដ្ឋអាជ្ញា អាចត្រឹមមានសិទ្ធស៊ើបអង្កេតបន្ត និងស្នើទាមទារឲ្យបង់ពិន័យជាទឹកប្រាក់ បើសិនជា តុលាការរដ្ឋញូវយ៉ក រកឃើញថាលោក ត្រាំ និងក្រុមហ៊ុនរបស់គាត់បានប្រព្រឹត្តខុស លួចគេចពន្ធ មែននោះ។ ទោះជាម្តេចក្តី អង្គហេតុហេតុនេះ ក៏អាចជាកម្មវត្ថុមួយ និងនាំឲ្យ រដ្ឋអាជ្ញា បើកការស៊ើបអង្កេតព្រហ្មទណ្ឌ បានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ