នាវាស្រាវជ្រាវរបស់ចិន ចូលចតនៅកំពង់ផែស្រីលង្កា ឯឥណ្ឌានិងអាមេរិក បារម្ភថាជានាវាឈ្លបយកការណ៍
ចុះផ្សាយនៅថ្ងៃ៖
នៅថ្ងៃអង្គារ៍ ទី១៦សីហា នាវាស្រាវជ្រាវរបស់ចិន ចូលចតនៅកំពង់ផែស្រីលង្កា ដែលជាកំពង់ផែអន្តរជាតិទឹកជ្រៅដ៏ចម្រូងចម្រាស ដោយសារ ស្រីលង្កា បានជួលឲ្យ ចិន រយៈ៩៩ឆ្នាំ ព្រោះតែគ្មានលុយសងបំណុល។ នាវាស្រាវជ្រាវរបស់ចិន គ្រោងនឹងបន្តសំណាក់ចុះថតនៅកំពង់ផែស្រីលង្ការនេះ រហូតដល់ថ្ងៃទី២២កក្កដា។ ជាអំលុងពេលដែល ឥណ្ឌា និងអាមេរិក ព្រួយបារម្ភថា នាវានេះ ជានាវាឈ្លបយកការណ៍។
ហេតុអ្វី បានជា ឥណ្ឌា មិនពេញចិត្ត?
ឥណ្ឌា មិនពេញចិត្ត ពីព្រោះតែ ឥណ្ឌា ដែលជាសម្ព័ន្ធមិត្តមួយធំរបស់បច្ចិមលោក បានសម្តែងក្តីព្រួយបារម្ភពីឥទ្ធិពលកាន់តែធំៗឡើងរបស់មហាយក្ស ចិន ទៅលើស្រីលង្កា ហើយឥណ្ឌាសង្ស័យថា នាវាស្រាវជ្រាវរបស់ចិននោះ គឺចូលទៅឈ្លបយកការណ៍ ដែលនាំឲ្យប៉ះពាល់ដល់បញ្ហាសុវត្ថិភាពក្នុងតំបន់ ឬប៉ះពាល់ផលប្រយោជន៍ឥណ្ឌានិងសម្ព័ន្ធមិត្ត។
ជាក់ស្តែងទៅ នាវាស្រាវជ្រាវរបស់ចិន ឈ្មោះថា យ័ន វ៉ាង ៥ (Yuan Wang 5) បានធ្វើដំណើរចាកចេញពីកំពង់ផែចិន សាងយីន (Jiangyin) ថ្ងៃទី១៣កក្កដា ហើយបើតាមគម្រោង ត្រូវចុះថតនៅកំពង់ផែនស្រីលង្កា តាំងតែពីថ្ងៃទី១១សីហា សប្តាហ៍មុនម្ល៉េះ ប៉ុន្តែ ត្រូវពន្យារពេល ព្រោះតែ ឥណ្ឌា មិនសប្បាយចិត្ត និងជំទាស់ ហើយ ឥណ្ឌា ក៏ប្រទាំងប្រទើសផ្នែកផ្លូវទូតខ្លះផងជាមួយ ចិន គ្រាន់តែករណីនាវានេះ។
ជុំវិញក្តីមន្ទិលរបស់ ឥណ្ឌា ដែលសង្ស័យថា នាវាចិនឈ្លបយកការណ៍ គឺ អ្នកទទួលខុសត្រូវកំពង់ផែស្រីលង្កា បានប្រកាសប្រាប់អ្នកសារព័ត៌មានថា នាវាស្រាវជ្រាវរបស់ចិន នៅក្នុងអំលុងពេលចុះថតនៅកំពង់ផែស្រីលង្កា រហូតដល់ថ្ងៃទី២២សីហា គឺនឹងមិនធ្វើសកម្មស្រាវជ្រាវអ្វីទេ។ អ្នកទទួលខុសត្រូវកំពង់ផែស្រីលង្កា ក៏បានគូសបញ្ជាក់ចំណុចនេះ ប្រាប់ទៅភាគី ឥណ្ឌា ចិនខ្លួនឯង និងសហរដ្ឋអាមេរិក រួចហើយ។ ក៏ប៉ុន្តែ ទោះជាម្តេចក្តី ក្តីមន្ទិលសង្ស័យនៅតែមាន។ ក្តីសង្ស័យនិងក្តីព្រួយដើរទន្ទឹមនេះ ព្រោះតែ ទូរទស្សន៍ឥណ្ឌា CNN-News18 បានផ្សាយដំណឹងដែរថា នាវាស្រាវជ្រាវចិន យ័ន វ៉ាង ៥ (Yuan Wang 5) មានមុខនាទីច្រើនយ៉ាង គឺឈ្លបយកការណ៍, ត្រូវប្រើដើម្បីតាមដានផ្កាយរណបនិងលំហ, ហើយក៏អាចប្រើសម្រាប់បាញ់មីស៊ីលបាឡេស្ទិកឆ្លងទ្វីប ទៀតផង។
ក្តីសង្ស័យ និងក្តីព្រួយបារម្ភ របស់ ឥណ្ឌា គឺច្បាស់ជាមានហេតុផល។
ស្រីលង្កា ដែលជំពាក់លុយចិនច្រើនសន្ធឹកសន្ទាប់ ក៏ព្រោះតែការកសាងអភិវឌ្ឍហេដ្ឋារចនាសម្ព័ន្ធ។ កំពង់ផែអន្តរជាតិទឹកជ្រៅ Hambantota គឺកាលពីឆ្នាំ២០១៧ ត្រូវរដ្ឋាភិបាលស្រីលង្កា សម្រេចជួលរយៈពេលវែង រហូតដល់ ៩៩ ឆ្នាំ ទៅឲ្យចិន ជាម្ចាស់បំណុល។ នៅក្នុងពេល ស្រីលង្កា ធ្វើច្បាប់ជួលកំពង់ផែនេះទៅឲ្យចិន គឺត្រូវប្រជាពលរដ្ឋក្មេងចាស់ប្រុសស្រី និងព្រះសង្ឃច្រើននាក់និងអង្គ បានធ្វើបាតុកម្មតវ៉ាសម្បើមណាស់ ប្រឆាំងនឹងការសម្រេចចិត្តរបស់រដ្ឋាភិបាលស្រីលង្កា។ ប៉ុន្តែ ថ្នាក់ដឹកនាំស្រីលង្កា គ្មានជម្រើសអ្វីផ្សេង ក្រៅពីធ្វើសម្បទានរយៈជិត១សតវត្សរ៍ នូវកំពង់ផែអន្តរជាតិដ៏សំខាន់មួយរបស់ខ្លួន ទៅឲ្យចិន ព្រោះគ្មានលុយសងបំណុលចិន និងសងថ្លៃសាងសង។
តាំងពីចុងឆ្នាំ២០២១មកម្ល៉េះ ស្រីលង្កា ជួបបញ្ហាសេដ្ឋកិច្ច-សង្គម-នយោបាយ។ ស្រីលង្កាដែល មានប្រជាជន២២លាននាក់ បានជួបបញ្ហាខ្វះស្បៀង ខ្វះប្រេងសាំង និងថ្នាំសង្កូវ ដែលវិបត្តិដែលដរចេញពីបញ្ហាហិរញ្ញវត្ថុ ហើយបំណុលសាធរណៈ រដ្ឋជំពាក់លុយប្រទេសច្រើនទៅៗ គ្មានលទ្ធភាពសង។
ត្រឹមពាក់កណ្តាលខែមេសាកន្លងទៅ ស្រីលង្កា ជំពាក់បំណុលបរទេស៥១ពាន់លានដុល្លារ។ ស្រីលង្កា ក៏ខំប្រឹងប្រែងដើរចរចាខ្ចីបុលពីអង្គការរូបិយវត្ថុអន្តរជាតិទៀតផង។ ក្នុងបរិបទនេះ កាលពីពេលថ្មីៗនេះ ចិន មិនត្រឹមតែមើលនឹងភ្នែកទេ ស្រីលង្កាមិនទាន់ទាំងបានសងចិនផង តែចិនថែមទាំងផ្តល់លុយឲ្យស្រីលង្កាទៀត គឺចំនួន ១ពាន់លានដុល្លារទៀត សម្រាប់ឲ្យស្រីលង្កាសងបំណុលប្រទេសផ្សេងទៀត ហើយនិងផ្តល់ ១,៥ពាន់លានដុល្លារទៀត សម្រាប់ទិញសម្ភារៈបរិក្ខារនិងស្បៀង។
ហេតុដូច្នេះហើយ ពេលដែល នាវាដំបូងរបស់ចិន មកកាន់កំពង់ផែ គឺបង្កឲ្យផ្ទុះការចាប់អារម្មណ៍ខ្លះ ពីអ្នកស្រុកស្រីលង្កាខ្លួន និងមតិសាធារណៈអន្តរជាតិ។
ឥណ្ឌា ធ្វើអ្វីដើម្បីទប់ទល់ប្រឈមនឹងឥទ្ធិពលចិន?
ថ្ងៃអង្គារ៍ទី១៦សីហា ទន្ទឹមនឹងការមកដល់នៃនាវាស្រាវជ្រាវចិននៅស្រីលង្កា ឥណ្ឌាក៏បានប្រគល់ផ្តល់ឲ្យស្រីលង្កា នូវយន្តហោះមួយគ្រឿង ម៉ាក Dornier 228 ដែលមានសមត្ថភាពប្រមើលមើលសភាពការណ៍ផ្លូវសមុទ្រ។ យន្តហោះនេះ បំពាក់ដោយគ្រឿងឧបករណ៍ទំនើបៗជឿនលឿន ដែលអនុញ្ញាតឲ្យឃ្លាំមើល និងវាយលុកចំពោះសញ្ញាអេឡិចត្រូនិចផង។
ក្នុងថ្ងៃជាមួយគ្នានេះ ថ្នាក់ដឹកនាំស្រីលង្កា លោក Manusha Nanayakkara បានថ្លែងអំណរគុណដល់ឥណ្ឌានិងចិន ដែលប្រទេសទាំងពីរ សុទ្ធតែបានជួយជ្រោមជ្រែង ស្រីលង្កា ក្នុងស្ថានភាពលំបាក ពិសេសក្នុងអំលុងពេលមានវិបត្តិសេដ្ឋកិច្ចដ៏អាក្រក់បំផុត មិនធ្លាប់ជួបដូចសព្វថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ