ប្រឈមនឹងគ្រោះរាំងស្ងួត អាមេរិកកាត់បន្ថយកូតាប្រើប្រាស់ទឹក នៅតាមរដ្ឋមួយចំនួនតាមទន្លេខូឡូរ៉ាដូ
ចុះផ្សាយនៅថ្ងៃ៖
ស្តាប់ - ០៨:៣៦
រដូវក្តៅឆ្នាំ២០២២នេះ គ្រោះរាំងស្ងួតមិនមែនធ្វើបាប ត្រឹមតែនៅតាមប្រទេសអឺរ៉ុបទេ។ នៅសហរដ្ឋអាមេរិកឯណោះ បញ្ហារាំងស្ងួតនេះ កំពុងតែចោទឡើងជាខ្លាំង ជាពិសេសនៅតាមបណ្តារដ្ឋភាគកណ្តាល នឹងភាគខាងត្បូង ដែលសំបូរទៅដោយវាលខ្សាច់។ ទន្លេខូឡូរ៉ាដូ គឺជាប្រភពទឹកដ៏សំខាន់បំផុតនៅតាមរដ្ឋទាំងនោះ។ ក៏ប៉ុន្តែកំពស់ទឹកទន្លេនេះ បានរីងស្ងួតកាន់តែខ្លាំង គួរឲ្យព្រួយបារម្ភបំផុត។ ប្រឈមនឹងបញ្ហានេះ រដ្ឋាភិបាលសហព័ន្ធអាមេរិក បានសម្រេចកាត់បន្ថយកូតានៃការប្រើប្រាស់ទឹក នៅតាមរដ្ឋតាមបណ្តោយទន្លេខូឡូរ៉ាដូ ព្រមទាំងនៅប្រទេសមិចស៊ិកផងដែរ។
អាងទន្លេរីងស្ងួត
ទន្លេខូឡូរ៉ាដូ ជាទន្លេដ៏ធំ ប្រវែង២៣២០គីឡូម៉ែត្រ កំពុងតែប្រឈមនឹងបញ្ហារីងស្ងួតគួរឲ្យបារម្ភបំផុត។ ទន្លេនេះ គឺជាប្រភពទឹកដ៏សំខាន់ សំរាប់រដ្ឋចំនួន៧ នៅភាគខាងត្បូងឈាងខាងលិចសហរដ្ឋអាមេរិក គឺរដ្ឋខូឡូរ៉ាដូ រដ្ឋវ៉ាយអូមីង រដ្ឋយូតា រដ្ឋណេវ៉ាដា រដ្ឋញូមិចស៊ិកូ រដ្ឋកាលីហ្វ័រញ៉ា រដ្ឋអារីហ្សូណា ព្រមទាំងផ្នែកខាងជើងប្រទេសមិចស៊ិកផងដែរ។
យោងតាមលោកស្រី Camille Touton នាយិកាការិយាល័យគ្រប់គ្រងធនធានទឹកនិងទំនប់ បានឲ្យដឹងថា គ្រោះរាំងស្ងួតឆ្នាំនេះ ដែលជាឆ្នាំទី២៣ហើយ កំពុងតែធ្វើឲ្យអាងទន្លេខូឡូរ៉ាដូ ត្រូវរីងស្ងួត មិនងាយស្រោចស្រង់ត្រលប់មកវិញបានទេ។ បឹងធំៗចំនួន២ ដែលជាអាងស្តុកទឹកដ៏សំខាន់នៅតាមដន្លេនេះ គឺបឹង Powell និងបឹង Mead កំពស់ទឹក បានស្រុតចុះជាខ្លាំង មិនធ្លាប់មានទេក្នុងប្រវត្តិសាស្ត្រ។
ប្រមាណជាង២០ឆ្នាំកន្លងមកនេះ ភ្លៀងធ្លាក់កាន់តែតិចទៅៗ កម្រិតព្រឹលទឹកកកក៏មានតិចដែរ នៅតំបន់ប្រជុំភ្នំ ដែលជាប្រភពទឹកទន្លេខូឡូរ៉ាដូនេះ។ ហេតុដូច្នេះហើយ បានជាពីមួយឆ្នាំទៅមួយឆ្នាំ កំពស់ទឹកទន្លេខូឡូរ៉ាដូ កាន់តែចុះទាប គួរផ្សំនឹងកត្តាអាកាសធាតុកាន់តែក្តៅខ្លាំងថែមទៀត ដែលធ្វើឲ្យតម្រូវការទឹកកាន់តែចាំបាច់។
វិស័យកសិកម្ម និង វិស័យផលិតថាមពល
មនុស្សយ៉ាងហោច៤០លាននាក់ ដែលរស់នៅរំពឹងនឹងទន្លេខូឡូរ៉ាដូនេះ។ មិនមែនរំពឹងតែទៅលើប្រភពទឹក ដើម្បីយកមកប្រើប្រាស់រាស់ថ្ងៃនោះទេ តែដងទន្លេនេះ គឺជាប្រភពនៃទំនប់វារីអគ្គិសនីជាច្រើនកន្លែងផងដែរ ដែលផលិតចរន្តអគ្គិសនីឲ្យមនុស្សប្រើប្រាស់។ ជាងនេះទៀត វិស័យកសិកម្ម ដីចំការធំៗរាប់ម៉ឺនរាប់សែនហិកតា ក្នុងតាមរដ្ឋក្នុងតំបន់នេះ គឺជាអ្នកប្រើប្រាស់ទឹកខ្លាំងសំបើមបំផុត។ ដូច្នេះ ការរីងស្ងួតធនធានទឹកក្នុងអាងទន្លេនេះ វាគឺជាវិបត្តិមួយ ដ័ធំណាស់។ ម្ខាងគឺគ្មានទឹកគ្រប់គ្រាន់ សម្រាប់ប្រើប្រាស់តាមផ្ទះ និងស្រោចចំការដំណាំ ម្ខាងទៀត ខាងទំនប់វារីអគ្គិសនីវិញ ត្រូវការទប់ទឹកទុក ក្នុងកម្រិតកំពស់ណាមួយ ដើម្បីអាចផលិតចរន្តអគ្គិសនី។
គឺប្រឈមនឹងបញ្ហានេះហើយ បានជារដ្ឋាភិបាលអាមេរិក បានជម្រុញឲ្យរដ្ឋទាំងអស់ដែលមានចំណែកប្រើប្រាស់ទឹកនៅតាមដងទន្លេនេះ ត្រូវនិយាយស្រុះស្រួលគ្នា ឲ្យបានមុនថ្ងៃទី១៦សីហា ដើម្បីកាត់បន្ថយការប្រើប្រាស់ ឲ្យបាន១៥%ជាមធ្យម។ តែទីបំផុត រដ្ឋទាំងអស់គ្មានការស្រុះស្រួលណាមួយទេ។ ហេតុដូច្នេះហើយ បានជារដ្ឋាភិបាលសហព័ន្ធ បានចូលអន្តរាគមន៍ ដើម្បីដាក់កំហិតឲ្យមានការកាត់បន្ថយកូតាប្រើប្រាស់ទឹក។ យោងតាមការដាក់កំហិតនេះ ចាប់ពីឆ្នាំ២០២៣ទៅ កូតាទឹកសម្រាប់រដ្ឋអារីហ្សូណា នឹងត្រូវកាត់បន្ថយចំនួន ២១% រដ្ឋណេវ៉ាដា កាត់បន្ថយចំនួន៨% ហើយចំណែកតំបន់ភាគជើងប្រទេសមិចស៊ិក ដែលទន្លេខូឡូរ៉ូដូ ហូរកាត់ចុងក្រោយគេនោះ នឹងត្រូវកាត់បន្ថយកូតាប្រើប្រាស់ចំនួន៧%។
រដ្ឋច្រណែនគ្នារឿងកូតាទឹក
អន្តរាគមន៍ ដាក់កំហិតកាត់បន្ថយកូតាប្រើប្រាស់ទឹកទន្លេខូឡូរ៉ាដូ ពីសំណាក់រដ្ឋាភិបាលសហព័ន្ធ បានបង្កើតឲ្យមានបញ្ហាតានតឹង ជាការច្រណែនគ្នារវាងរដ្ឋនីមួយៗ។ គួរបញ្ជាក់ថា ការបែងចែកកម្រិតប្រើប្រាស់ទឹកទន្លេខូឡូរ៉ាដូនេះ គឺត្រូវបានកំណត់ដោយ កិច្ចព្រមព្រៀង Colorado River Compact ចុះនៅឆ្នាំ១៩២២ ដែលសហរដ្ឋអាមេរិក បានចុះហត្ថលេខាជាមួយប្រទេសមិចស៊ិក។ កិច្ចព្រមព្រៀងនេះ បានបង្កើតជាយន្តការ សាមគ្គី រវាងរដ្ឋដែលស្ថិតនៅផ្នែកខាងលើនៃអាងទន្លេ ដែលមានដូចជា រដ្ឋខូឡូរ៉ាដូ យូតា វ៉ាយអូមីង និងញូមិកសិក ជាមួយនឹងរដ្ឋស្ថិតនៅផ្នែកខាងក្រោម ដែលមានដូចជា ណេវ៉ាដា កាលីហ្វ័រញ៉ា និងអារីហ្សូណា ព្រមទាំងតំបន់ខាងជើងប្រទេសមិចស៊ិក។ រដ្ឋនៅផ្នែកខាងលើ ត្រូវតែបើកទឹកឲ្យរដ្ឋនៅខាងក្រោមឲ្យបានគ្រប់គ្រាន់ មិនអាចប្រើប្រាស់តែម្នាក់ឯងឡើយ។
តែផ្ទុយទៅវិញ យោងតាមវិធានការដាក់កំហិត ដែលរដ្ឋសហព័ន្ធបានកំណត់កាលពីថ្ងៃទី១៦សីហា គឺសុទ្ធតែរដ្ឋនៅខាងក្រោមទាំងអស់ ដែលត្រូវកាត់បន្ថយកូតា។ ជាក់ស្តែង រដ្ឋអារីហ្សូណា តែម្តង ដែលស្ថិតនៅខាងត្បូងបំផុត មានន័យថានៅខាងក្រោយគេបង្អស់ ដែលបានស្រែកតវ៉ា ថាវាជារឿងអយុត្តិធម៌ ព្រោះរដ្ឋអារីហ្សូណា ត្រូវកាត់បន្ថយកូតាច្រើនជាងគេបង្អស់ ដល់ទៅ២១%។ ការិយាល័យគ្រប់គ្រងធនធានទឹករបស់រដ្ឋអារីហ្សូណា បានចេញលិខិតមួយ លើកឡើងថា វាជារឿងមិនអាចអត់ទ្រាំ និងទទួលយកបានតទៅទៀតនោះទេ ដែលរដ្ឋអារីហ្សូណា តែងតែជាអ្នកទទួលថ្មបាក់តែម្នាក់ឯង ខណៈរដ្ឋផ្សេងៗទៀត ស្ថិតនៅផ្នែកខាងលើដងទន្លេខូឡូរ៉ាដូ បែរជាមិនជួយចូលរួមសាមគ្គី ក្នុងការកាត់បន្ថយការប្រើប្រាស់ទឹក។
យ៉ាងណាក៏ដោយ រដ្ឋាភិបាលអាមេរិក សង្ឃឹមថានឹងអាចដោះស្រាយបញ្ហាតានតឹង ការច្រណែនគ្នារវាងរដ្ឋនីមួយនេះ តាមរយៈវិធានការហិរញ្ញវត្ថុមួយចំនួន ដូចជាផែនការសាងសង់ហេដ្ឋារចនាសម្ព័ន្ធ ចំនួនប្រមាណ៨៣០០លានដុល្ការ និងផែនការដើម្បីទប់ទល់នឹងវិបត្តិគ្រោះរាំងស្ងួតនេះ នៅតាមដងទន្លេខូឡូរ៉ូដូ ដែលមានទឹកប្រាក់សរុប ចំនួន៤ពាន់លានដុល្លារ។ ការិយាល័យគ្រប់គ្រងធនធានទឹកអាមេរិក ក៏នឹងអាចសងសំណងជំងឺចិត្ត ដល់អ្នកប្រើប្រាស់ទាំងអស់ ដែលសុខចិត្តលះបង់មិនប្រើប្រាស់ទឹក ដែលជាកូតារបស់ខ្លួន។ ចំណែករដ្ឋអារីហ្សូណា បានចាប់ផ្តើមសងសំណងខូចខាត ដល់ម្ចាស់ចំការធំៗ ដែលសុខចិត្តមិនដាំដុះមួយរយៈ ដើម្បីកាត់បន្ថយតម្រូវការទឹក។
៣០ឆ្នាំខាងមុខនេះ សហរដ្ឋអាមេរិក នឹងជួបរលកសីតុណ្ហភាពក្តៅខ្លាំង កាន់តែញឹកញាប់
យោងតាមរបាយការណ៍ថ្មី ចេញផ្សាយដោយ First Street Foundation កាលពីថ្ងៃចន្ទ ទី១៥សីហា គឺ រលកសីតុណ្ហភាពក្តៅខ្លាំងបំផុត នឹងបោកបក់កាន់តែញឹកញាប់ ក្នុងរវាង៣០ឆ្នាំខាងមុខ នៅតំបន់ភាគកណ្តាកសហរដ្ឋអាមេរិក រាប់ចាប់ពីរដ្ឋល្វីស្យ៉ាន នៅខាងភាគខាងត្បូង ឡើងទៅដល់តំបន់បឹងមីឈីហ្គែន នៅភាគខាងជើង។ យោងតាមរបាយការណ៍នេះ សីតុណ្ហភាព អាចនឹងឡើង ថ្ងៃខ្លះ ដល់ ៥១°c។
បច្ចុប្បន្ននេះ មានស្រុក (County) ចំនួន ប្រមាណតែ៥០ទេ ពោលគឺមនុស្សប្រមាណ៨លាននាក់ នៅសហរដ្ឋអាមេរិក ដែលប្រឈមនឹងបញ្ហាសីតុណ្ហភាពក្តៅខ្លាំងនេះ។ ក៏ប៉ុន្តែយោងតាមការសន្និដ្ឋានរបស់របាយការណ៍ថ្មីនេះ គឺរលកកំដៅខ្លាំង អាចគ្របដណ្តប់លើស្រុកចំនួន ដល់ទៅ១០០០ ដែលមានប្រជាជនសរុប ប្រមាណ១០០លាននាក់ ឯណោះ ដែលនឹងរងគ្រោះដោយវិបត្តីសីតុណ្ហភាពក្តៅខ្លាំង។ សម្រាប់អ្នកធ្លាប់រស់នៅស៊ាំនឹងសីតុណ្ហភាពក្តៅ នៅតាមរដ្ឋភាគខាងត្បូង វាមិនសូវជាមានបញ្ហាចោទប៉ុន្មានទេ។ តែបញ្ហាប្រឈមគ្រោះថ្នាក់បំផុត គឺប្រជាជនរស់នៅរដ្ឋភាគខាងជើង ដែលរងគ្រោះរហូតដល់ស្លាប់ ដោយការថប់ដង្ហើម។
វិបត្តិសីតុណ្ហភាពក្តៅហួតហែង គ្រោះរាំងស្ងួត គ្មានភ្លៀងធ្លាក់ ហាក់កំពុងតែយាយីនៅតាមតំបន់ជាច្រើន នៃភពផែនដីយើង ខណៈនៅតំបន់ខ្លះទៀត ភ្លៀងធ្លាក់ខ្លាំងជ្រុល យ៉ាងគំហុកក្នុងពេលដ៏ខ្លី បង្កជាមហន្តរាយទឹកជំនន់ បាក់រមៀលដីជាដើម។ ទាំងអស់នេះ វាគឺជាផលវិបាកកើតឡើង ដោយកត្តាបម្រែបម្រួលអាកាសធាតុ។ ឧស្ម័នកាបូនិក នៅក្នុងស្រទាប់អូហ្សូន គឺជារនាំងហ៊ំព័ទ្ធ ធ្វើឲ្យផែនដីយើងឡើងកំដៅសីតុណ្ហភាព ហើយធ្វើឲ្យប្រែប្រួលក្រឡាប់ចាក់ ដល់អាកាសធាតុជុំវិញផែនដីទាំងមូលតែម្តង។ បញ្ហាទាំងអស់នេះ នឹងកាន់តែធ្ងន់ធ្ងរខ្លាំងឡើងៗ ដរាបណាមនុស្សយើង មិនប្រឹងប្រែងកាត់បន្ថយ ការបញ្ចេញឧស្ម័នផ្ទះកញ្ចក់ទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ