បញ្ហាវិបត្តិ១០០ជំពូក រងចាំលោកស្រីលីហ្ស ត្រាស្ស នាយករដ្ឋមន្ត្រីថ្មីអង់គ្លេស
ចុះផ្សាយនៅថ្ងៃ៖
ស្តាប់ - ០៧:១៥
លោក បូរីស ចនសុន បានសម្រេចលាឈប់ពីមុខតំណែង នាយករដ្ឋមន្ត្រីអង់គ្លេស ដោយសារតែរឿងអាស្រូវផ្ទួនៗគ្នា ទាក់ទិននឹងការរៀបចំកម្មវិធីជប់លៀងសប្បាយក្អាកក្អាយ ក្នុងខណៈពេលដែលប្រជាជនទូទាំងប្រទេស ត្រូវជាប់បំរាមរាំងខ្ទប់ទាំងស្រុង ដោយសារតែកូវីដ១៩។ ចន្ទទី៥កញ្ញា គណបក្សអភិរក្សនិយមបានបោះឆ្នោតជ្រើសរើស លោកស្រី លីហ្ស ត្រាស្ស ឲ្យមកធ្វើជានាយករដ្ឋមន្ត្រីថ្មី មកជំនួសលោកបូរីស ចនសុន។ វិបត្តិសេដ្ឋកិច្ច ទំនិញឡើងថ្លៃ អតិផរណា កំពុងតែរងចាំរដ្ឋាភិបាលថ្មីឲ្យដោះស្រាយ។
ការបោះឆ្នោតនេះ មិនមែនជាការបោះឆ្នោតថ្នាក់ជាតិ ប្រជាជនអង់គ្លេសទូទាំងប្រទេស ទៅបោះឆ្នោតជ្រើសរើសនាយករដ្ឋមន្ត្រីថ្មីទេ។ វាគឺជាការបោះឆ្នោតក្នុងបក្សអភិរក្សនិយម ព្រោះថាបក្សនេះមានសំឡេងភាគច្រើននៅក្នុងសភាស្រាប់ហើយ ហើយក្នុងករណីនាយករដ្ឋមន្ត្រីលាឈប់ពីតំណែង មុនចប់អាណត្តិបែបនេះ គឺបក្សនេះមានសិទ្ធិសម្រេចជ្រើសនាយករដ្ឋមន្ត្រីថ្មី។
សមាជិកគណបក្សអភិរក្សនិយម ចំនួនប្រមាណ២សែននាក់ បានបោះឆ្នោតបញ្ចេញមតិ។ អស់រយៈពេល១៥ថ្ងៃ អ្នកមានសិទ្ធិបោះឆ្នោតទាំងអស់ បានសម្រេចជ្រើស និងជម្រុះបេក្ខជន ឲ្យនៅសល់ផ្តាច់ព្រាត់ តែ២នាក់ទេ។ លទ្ធផលកាលពីថ្ងៃទី២០កក្កដា បង្ហាញឲ្យឃើញថាបេក្ខជនទាំង២នោះ គឺលោកស្រី លីហ្ស ត្រាស្ស និងលោក រីឈី ស៊ូណាក់។ ចំណែកការបោះឆ្នោតផ្តាច់ព្រាត់ គឺបានចាប់ផ្តើមធ្វើ រវាងពីថ្ងៃទី១សីហា ដល់ថ្ងៃទី ២កញ្ញា តាមរយៈការបោះឆ្នោតតាមបណ្តាញអ៊ីនធ័រនិត និងតាមការផ្ញើសំបុត្រ។
ទាក់ទិននឹងការបោះឆ្នោតជ្រើសរើសនាយករដ្ឋមន្ត្រីមកជំនួស តែនៅក្នុងផ្ទៃក្នុងបក្សនេះ ត្រូវបានអ្នកវិភាគខ្លះ បានរិះគន់ដែរ ថាវាមានចំណុចអវិជ្ជមានច្រើនណាស់។ ក្នុងចំណោមសមាជិកបក្ស ដែលមានសិទ្ធិបោះឆ្នោត គឺភាគច្រើនសុទ្ធតែជាមនុស្សប្រុស ស្បែកស អាយុចាប់ពី៥០ឆ្នាំឡើងទៅ។ ជារួម គឺភាគច្រើនលើសលុប សុទ្ធតែជាអ្នកភរិក្សនិយម ស្តាំនិយម។ ពោលគឺសំឡេងឆ្នោតដែលស្តែងមក វាមិនឆ្លើយតបទៅនឹងតថៈភាពជាក់ស្តែងនៃសង្គមអង់គ្លេសទេ ដែលវាមានភាពចម្រុះ មានប្រុសមានស្រី មានក្មេងមានចាស់ ហើយជាពិសេសនោះ គឺមានសហគមន៍ជាតិសាសន៍ជនជាតិច្រើន។
សមាជិកបក្សអភិរក្សនិយម ចង់បានតែនាយករដ្ឋមន្ត្រីស្តាំនិយមខ្លាំង
រវាងបេក្ខជនទាំង២ គឺលោកស្រី លីហ្ស ត្រាស្ស និងលោក រីឈី ស៊ូណាក់ គឺថាវាខុសគ្នាស្រលះតែម្តង។ ម្នាក់ប្រុស ម្នាក់ស្រី ម្នាក់ដើមកំណើតបរទេស ម្នាក់ទៀតគឺអង់គ្លេស។ លោករីឈី ស៊ូណាក់ជាអ្នកបច្ចេកទេស ចំណែកលោកស្រីលីហ្ស ត្រាស្ស គឺជាអ្នកនយោបាយ។
លោក រីឈី ស៊ូណាក់ អាយុ៤២ឆ្នាំ មានឪពុកម្តាយដើមកំណើតឥណ្ឌា។ បន្ទាប់ពីបានរកប្រាក់ចំណូល បានយ៉ាងសន្ធឹកសន្ធាប់ក្នុងវិស័យផ្នែកធនាគារ និងហិរញ្ញវត្ថុ លោករីឈី ស៊ូណាក់ បានហក់ចូល វិស័យនយោបាយ កាលពីឆ្នាំ២០១៥ ជាប់ឆ្នោតជាសមាជិកសភា។ មានបទពិសោធន៍នយោបាយតិចតួចមែន តែលោកត្រូវបានលោកបូរីស ចនសុន ជ្រើសរើសឲ្យធ្វើជារដ្ឋមន្ត្រីក្រសួងហិរញ្ញវត្ថុ កាលពីដើមឆ្នាំ២០២០។ តែទីបំផុត លោក រីឈី ស៊ូណាក់ បានសម្រេចជ្រើសរើសដើរចេញពីរដ្ឋាភិបាល កាលពីខែកក្កដា ហើយបានប្រមូលផ្តុំមនុស្ស ដើម្បីបណ្តេញលោកបូរីស ចនសុន ឲ្យលាឈប់។ សម្រាប់អ្នកនយោបាយក្នុងបក្សអភិរក្សនិយមខ្លះ គេសំឡឹងឃើញថា លោក រីឈី ស៊ូណាក់ ជាមនុស្សក្បត់ ដល់ត្រើយសើយគូទ ឬជាមនុស្សឱកាសនិយម មិនគួរឲ្យទុកចិត្តជាដើម។
ដោយឡែក លោកស្រី លីហ្ស ត្រាស្ស បច្ចុប្បន្នអាយុ៤៧ឆ្នាំ ត្រូវគេចាត់ទុកថាជាមនុស្សដែលមានបទពិសោធន៍នយោបាយ ចាស់ទុំជាងលោករីឈី ស៊ូណាក់។ លោកស្រី លីហ្ស ត្រាស្ស បានជាប់ឆ្នោតជាសមាជិកសភាម្នាក់ របស់គណបក្សអភិរក្សនិយម នៅឆ្នាំ២០១០ មុននឹងបានកាន់ក្រសួងផ្សេងៗគ្នាជាបន្តបន្ទាប់ ដូចជាក្រសួងអប់រំ បរិស្ថាន យុត្តិធម៌ និង រតនាគារជាតិជាដើម មុននឹងឡើងមកកាន់ក្រសួងការបរទេសចុងក្រោយបង្អស់។
លោកស្រីលីហ្ស ត្រាស្ស ពីមុនជាអ្នកសេរីប្រជាធិបតេយ្យ កណ្តាលនិយម តែបច្ចុប្បន្ននេះ ទំនោរនយោបាយរបស់គាត់ ត្រូវបានគេមើលឃើញថា បានផ្អៀងខ្លាំងទៅស្តាំនិយម។ អ្នកវិភាគ ក៏មើលឃើញដែរ ថាលោកស្រីជាអ្នកស្មោះហើយគាំទ្រលោកបូរីស ចនសុន ដល់ទីបំផុត ហើយនឹងមកបន្តអនុវត្តគោលនយោបាយដឹកនាំ របស់លោកបូរីស ចនសុន តទៅទៀត។ ចំណុចមួយដ៏សំខាន់ ដែលលោកស្រីបានសន្យា គឺនឹងកាត់បន្ថយពន្ធ ដើម្បីជួយជីវភាពរបស់ប្រជាពលរដ្ឋអង់គ្លេស។ ក្នុងចំណោមសមាជិកបក្ស គេនៅគាំទ្រលោកបូរីស ចនសុនច្រើនណាស់ ហើយអ្នកបោះឆ្នោតទាំងនោះ ក៏ជាអ្នកគាំទ្រឲ្យកាត់បន្ថយពន្ធទៀត។ ម្លោះហើយ ជ័យជំនះរបស់លោកស្រី លីហ្ស ត្រាស្ស គឺថាវាមិនមែនជារឿងលំបាកប៉ុន្មានទេ។
បញ្ហា១០០ជំពូកកំពុងរងចាំ
លទ្ធផលស្ថាពរបានប្រកាស គឺលោកស្រី លីហ្ស ត្រាស្ស ដែលនឹងមកធ្វើជានាយករដ្ឋមន្ត្រីថ្មី។ នៅថ្ងៃស្អែក លោកស្រី នឹងចូលគាល់ ព្រះមហាក្សត្រីអេលីហ្សបែត ទី២ ហើយនឹងចាប់ផ្តើមរៀបចំបង្កើតរដ្ឋាភិបាលថ្មី។ លោកស្រីនាយករដ្ឋមន្ត្រីថ្មី មានសំណុំរឿងលំបាកៗ ដែលត្រូវដោះស្រាយច្រើនណាស់។ បញ្ហាធំបំផុត គឺអតិផរណា នៅអង់គ្លេស ដែលបច្ចុប្បន្ន មានចំនួន១០% ហើយបើតាមការព្យាករណ៍ របស់ធនាគារ Goldman Sachs នៅឆ្នាំក្រោយ អាចនឹងឡើងដល់២២%ផង។ វិបត្តិសេដ្ឋកិច្ច ទំនិញឡើងថ្លៃគ្រប់មុខ ជាពិសេស គឺទំនិញវត្ថុធាតុដើមថាមពលតែម្តង ដែលមានដូចជា ប្រេងឥន្ធនៈ និង ឧស្ម័ន។
យោងតាមការិយាល័យគ្រប់គ្រងទីផ្សារចរន្តអគ្គិសនី និងឧស្ម័ន គឺនៅខែតុលាខាងមុខ តម្លៃអគ្គិសនីនិងថាមពល សម្រាប់ប្រជាពលរដ្ឋទូទៅ នឹងឡើងពី ១៩៧១ ដល់ទៅ ៣៥៤៩ លីវ្រស្តែរលីង ជាមធ្យម ក្នុងមួយឆ្នាំ។ ហើយនៅឆ្នាំ២០២៣ អាចនឹងឡើងដល់ទៅ ៦០០០លីវ្រស្តែរលីងឯណោះ។ ក្នុងកម្រិតនេះ គឺ២៥%នៃប្រជាជនអង់គ្លេស ដែលនឹងមិនអាចមានលទ្ធភាពបង់ថ្លៃថាមពលបានទេ។ ក្រៅពីនេះ នៅមានសាលារៀន មន្ទីរពេទ្យ និងសហគ្រាសធុនតូចជាដើម ដែលនឹងលំបាកខ្លាំង។ ប៉ុន្មានខែមកនេះ បុគ្គលិកច្រើនវិស័យណាស់នៅអង់គ្លេស ដែលបានធ្វើបាតុកម្ម តវ៉ាទូទាំងប្រទេស។
ក្រៅពីសន្យាថានឹងកាត់បន្ថយពន្ធ លោកស្រីលីហ្ស ត្រាស្ស បានអះអាងថា លោកស្រីនឹងធ្វើគ្រប់យ៉ាង ដើម្បីជួយជីវភាពប្រជាពលរដ្ឋអង់គ្លេស។ តែរហូតមកទល់ពេលនេះ លោកស្រី មិនទាន់បានពន្យល់លម្អិតទេ ថាជួយដោយរបៀបណា ហើយបានប្រាក់ពីណាមកជួយ បើរដ្ឋកាត់បន្ថយពន្ធទៅទៀត។
យ៉ាងណាក៏ដោយ យោងតាមស្ថិតិ YouGov គឺ៥២%នៃប្រជាជនអង់គ្លេស គិតថាលោកស្រី លីហ្ស ត្រាស្ស នឹងគឺជានាយករដ្ឋមន្ត្រីដែលមិនល្អ ព្រោះលោកស្រីមានទំនោរសេរីនិយម រឹងរូស និងស្តាំនិយមខ្លាំងណាស់។ នៅការបោះឆ្នោតសភាអាណត្តិថ្មី ខែមករាឆ្នាំ២០២៥ គណបក្សពលករទំនងជាអាចឈានមកដណ្តើមសំឡេងភាគច្រើនក្នុងសភាវិញ ប្រសិនបើរដ្ឋាភិបាលរបស់លោកស្រី លីហ្ស ត្រាស្ស គ្មានលទ្ធភាពដោះស្រាយបញ្ហាវិបតិ្ត១០០ជំពូកនាពេលនេះទេនោះ។ ហើយថាមិនត្រូវ អាចនឹងមានវិបត្តិរំលាយសភាចោល បោះឆ្នោតមុនអាណត្តិផង ព្រោះថាចលនាតវ៉ាពីគ្រប់មជ្ឈដ្ឋានប្រឆាំងនឹងការដឹកនាំរបស់បក្សអភិរក្សនិយម គឺមានសន្ទុះកាន់តែខ្លាំងឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ