ព្រះអង្គឆាលស៍ទី៣ ឡើងគ្រងរាជសម្បត្តិក្នុងបរិបទអប្រជាប្រិយភាព ព្រមទាំងវិបត្តិសេដ្ឋកិច្ច-នយោបាយ
ចុះផ្សាយនៅថ្ងៃ៖
ស្តាប់ - ០៧:២២
ប្រទេសអង់គ្លេស រួមទាំងប្រទេសសមាជិកនៃសហគមន៍ Commonwealth ទាំងអស់ កំពុងតែកាន់មរណៈទុក្ខ បន្ទាប់ពីការសោយទីវង្គតនៃមហាក្សត្រី អេលីហ្សាបិតទី២ កាលពីល្ងាចថ្ងៃព្រហស្បតិ៍ ទី៨កញ្ញា។ តាមការគ្រោងទុក ក្នុងកម្មវិធីប្រូតូកូលដ៏តឹងតែងបំផុតនោះ នៅថ្ងៃសោរ៍ទី ១០កញ្ញានេះ គេនឹងប្រកាសការចូលគ្រងរាជសម្បតិ្តជាផ្លូវការ របស់ព្រះមហាក្សត្រថ្មី គឺព្រះអង្គឆាលស៍ទី៣។ ព្រះអង្គឆាលស៍ ដែលមានព្រះជន្ន៧៣ព្រះវស្សា គឺជាបុត្រច្បងរបស់ព្រះមហាក្សត្រីអេលីហ្សាបិតទី២។ ការឡើងគ្រងរាជសម្បតិ្តរបស់ព្រះអង្គឆាលស៍ នាពេលនេះ គឺវាជួនចំពេលដែលប្រទេសអង់គ្លេស កំពុងស្ថិតនៅក្នុងវិបត្តិតានតឹង ទាំងសេដ្ឋកិច្ចនិងនយោបាយ។ ជាងនេះទៀត កន្លងមក ព្រះអង្គមានប្រជាប្រិយភាពតិចខ្លាំងណាស់ នៅក្នុងទឹកចិត្តរបស់ប្រជាពលរដ្ឋអង់គ្លេស។
នៅព្រឹកថ្ងៃសៅរ៍ទី១០កញ្ញា យោងតាមកម្មវិធីរបៀបវារៈយ៉ាងលម្អិត ដែលគេបានកំណត់ទុករួចជាស្រេច គឺក្រុមប្រឹក្សារាជសម្បតិ្តអង់គ្លេស បានជួបប្រជុំគ្នា នៅវិមាន Saint James ក្នុងទីក្រុងឡុងដ៍ នៅម៉ោង១០ព្រឹក។ ហើយបន្ទាប់មក នៅម៉ោង១១ព្រឹក គឺលោក David White ដែលមានងារជា « Garter Principal King of Arms » បានថ្លែងប្រកាសជាឱឡាឫក ទៅកាន់មហាជន នៅខាងមុខវិមាន Saint James ប្រកាសពីការចូលគ្រងរាជសម្បត្តិរបស់ព្រះអង្គឆាលស៍ មហាក្សត្ររបស់អង់គ្លេសនិងបណ្តាប្រទេស Commonwealth ទាំងអស់ ចាប់ពីពេលនេះទៅ។ បន្ទាប់មកទៀត មន្ត្រីនាំសារនៃព្រះបរមរាជវាំង នឹងជិះរទេះសេះ ទៅកាន់ ទីលាន Trafalgar Square និងទីលាន Royal Exchange កណ្តាលទីក្រុងឡុងដ៍ ដើម្បីអានសារ ប្រកាសជាសាធារណៈ ទៅកាន់ប្រជានុរាស្ត្រអង់គ្លេស អំពីការឡើងគ្រងរាជសម្បត្តិរបស់ព្រះមហាក្សត្រថ្មី។
បន្ទាប់មកទៀត រដ្ឋសភានឹងជួបប្រជុំគ្នា ក្នុងពេលរសៀល ដើម្បីប្រកាសអំពីប្តេជ្ញាសន្យាបម្រើប្រទេសជាតិ ក្រោមម្លប់រាជបល្ល័ង្គ ដែលគង់ដោយព្រះអង្គឆាលស៍ទី៣។ ហើយនៅម៉ោង៣រសៀល លោកស្រីនាយករដ្ឋមន្ត្រី លីហ្ស ត្រាស់ នឹងដឹកនាំរដ្ឋមន្ត្រីទាំងអស់ ចូលគាល់ព្រះមហាក្សត្រ នៅព្រះរាជវាំង Buckingham។
ហើយចាប់ពីថ្ងៃអាទិត្យស្អែកទៅ ព្រះអង្គឆាលស៍ទី៣ នឹងចាប់ផ្តើមធ្វើដំណើរ ទៅកាន់សភា នៃប្រទេសបណ្តាតំបន់ទាំង៣ផ្សេងទៀត ដែលជាសមាជិកនៃព្រះរាជាណាចក្រអង់គ្លេស ដោយចាប់ផ្តើម ពីតំបន់អេកូស បន្ទាប់មកតំបន់អៀរឡង់ខាងជើង ហើយតំបន់Wales ឬ Pays de Galles។ ដោយឡែក កម្មវិធីបំពាក់ម្កុដគ្រងរាជបល្ល័ង្គ របស់ព្រះអង្គឆាលស៍ទី៣ ប្រហែលជាអាចត្រូវរៀបចំនៅយូរខែខាងមុខទៀត ទំរាំដល់ពិធីបុណ្យកាន់មរណៈទុក្ខ នៃព្រះសពរបស់ព្រះមហាក្សត្រីអេលីហ្សាបិតទី២ ចប់រួចរាល់អស់។
សន្យាបំរើប្រជាជាតិអង់គ្លេស និងការពាររបបរាជានិយមអាស្រ័យរដ្ឋធម្មនុញ្ញ
នៅក្នុងសុន្ទរកថាលើកទី១ ថ្លែងទៅកាន់ប្រជានុរាស្ត្រ កាលពីយប់ប្រ ព្រះអង្គឆាលស៍ទី៣ បានថ្លែងថា មិនខុសពីមាតាព្រះអង្គ គឺព្រះអង្គ សូមសន្យាបម្រើប្រទេសអស់មួយជីវិត។ ដោយបានរំលឹកអំពីវីរៈភាព និងការបូជារបស់ព្រះមាតា ព្រះអង្គឆាលស៍ទី៣ បានសន្យាជាឱឡាឫក ថានឹងបម្រើប្រជានុរាស្ត្រទាំងអស់ ដោយភក្តីភាព ដោយការគោរព ព្រមទាំងដោយក្តីស្រលាញ់ មិនថាប្រជានុរាស្ត្រនៅអង់គ្លេស ឬនៅដែនដីផ្សេងៗទៀតចំនុះឲ្យអង់គ្លេស មិនថាអ្នកនោះមានដើមកំណើតមកពីណា ប្រកាន់ជំនឿសាសនាអ្វីនោះទេ។
បន្ទាប់មកទៀត ព្រះអង្គបានថ្លែងថា ព្រះអង្គសន្យាការពារគោលការណ៍គ្រិះ នៃរបបរាជានិយមអាស្រ័យរដ្ឋធម្មនុញ្ញ ដែលសរសរទ្រូងរបបនយោបាយអង់គ្លេស។ ហើយដរាបណាព្រះអង្គនៅមានជីវិត នោះព្រះអង្គសូមសន្យាការពារតម្លៃ ប្រពៃណី វប្បធម៌ ទំនៀមទំលាប់ ព្រមទាំងជំនឿសាសនាគ្រិស្តអង់គ្លីកានរបស់អង់គ្លេស។
ជាចុងក្រោយ បន្ទាប់ពីបានប្រកាស តែងតាំងបុត្ររបស់ព្រះអង្គ គឺព្រះអង្គម្ចាស់ William ព្រមទាំងព្រះជាយា ជា ព្រះអង្គម្ចាស់ និងម្ចាស់ក្សត្រីតំបន់Wales ព្រះអង្គឆាលស៍ទី៣ បានថ្លែងដោយក្តីក្តុកក្តួលបំផុត នូវពាក្យថា “អរគុណ អ្នកម្តាយជាទីស្រលាញ់” ។ ពាក្យអរគុណ ដ៏សាមញ្ញ ដែលព្រះអង្គបានថ្លែងនេះ បានបង្ហាញអំពីអារម្មណ៍ពិតប្រាកដ ដែលបញ្ជាក់ថា ព្រះអង្គស្រលាញ់ និងគោរពព្រះមហាក្សត្រីអេលីហ្សាបិត ខ្លាំងកម្រិតណា។
ប្រជាប្រិយភាពតិច
ដូចយើងបានដឹងហើយ ថា ព្រះមហាក្សត្រីអេលីហ្សាបិតទី២ ដែលបានគ្រងរាជសម្បតិ្តដល់ទៅ៧០ឆ្នាំនោះ មានប្រជាប្រិយភាព ត្រូវប្រជាជនសឹងតែទូទាំងពិភពលោក គោរពស្រលាញ់ខ្លាំងណាស់។ សម្រាប់ប្រជាជនអង់គ្លេសទូទៅ គឺគ្មាននរណាម្នាក់អាចមកប្រៀបស្មើព្រះមហាក្សត្រីអេលីហ្សាបិតទី២បានទេ។ ជាងនេះទៀត ព្រះអង្គឆាលស៍ទី៣ ដែលមានព្រះជន្ម៧៣ព្រះវស្សានេះ ជាមហាក្សត្រអង់គ្លេស ដែលបានចាប់ផ្តើមឡើងគ្រងរាជ ក្នុងព្រះជន្មច្រើនជាងគេបង្អស់។ វ័យចំណាស់នេះ ធ្វើឲ្យអ្នកវិភាគខ្លះ លើកឡើងថា តាមពិតទៅ ព្រះអង្គគ្រាន់តែមកគ្រងរាជ ដោយគោរពទៅតាមលេខរៀងរាជទាយាទ តែប៉ុណ្ណោះ។ ពោលគឺ រជ្ជកាលរបស់ព្រះអង្គឆាលស៍ទី៣ ជាសម័យអន្តរកាល មុននឹងរាជបល្ល័ង្គនេះ ត្រូវប្រគល់ទៅឲ្យ ព្រះអង្គម្ចាស់William ដែលបច្ចុប្បន្នមានព្រះជន្ម ៤០ព្រះវស្សា។
យ៉ាងណាមិញ យោងតាមការស្ទាបស្ទង់មតិ គឺព្រះអង្គម្ចាស់ William មានប្រជាប្រិយភាពខ្ពស់ជាងព្រះអង្គឆាលស៍ទី៣ខ្លាំងណាស់។ ព្រះកិត្តិនាម ក៏ដូចជាប្រជាប្រិយភាពរបស់ព្រះអង្គឆាលស៍ទី៣ គឺវាបានប្រលាក់ប្រលូស ជាមួយនឹងរឿងអាស្រូវ ដែលពាក់ព័ន្ធនឹងព្រះអង្គម្ចាស់ក្សត្រី Diana ហើយដែលប្រជាជនអង់គ្លេសភាគច្រើន នៅចាំមិនទាន់ភ្លេចទេ។
វិបត្តិនយោបាយនិងសេដ្ឋកិច្ច
ក្រៅពីបញ្ហាអប្រជាប្រិយភាពនេះ ព្រះអង្គឆាលស៍ទី៣ ឡើងគ្រងរាជសម្បត្តិ នៅក្នុងកាលៈទេសៈមួយ ដែលប្រទេសអង់គ្លេស កំពុងជួបវិបត្តិធ្ងន់ធ្ងរខ្លាំងណាស់។ ជាបឋមពីបញ្ហាសេដ្ឋកិច្ច ក្នុងបរិបទសង្រ្គាមនៅអ៊ុយក្រែន អតិផរណាខ្ពស់ តម្លៃទំនិញឡើងថ្លៃ គ្មានថាមពលប្រើប្រាស់ជាដើម។ រដ្ឋាភិបាលថ្មី ដឹកនាំដោយលោកស្រី លីហ្ស ត្រាស់ ទើបតែចូលកាន់តំណែងមិនទាន់បាន១សប្តាហ៍ផងទេ។ បើទោះបីពេលនេះ ចលនាបាតុកម្ម កូដកម្មតវ៉ានានា ត្រូវបានផ្អាក ដើម្បីកាន់មរណៈទុក្ខមែន តែពេលដែលពិធីចប់សព្វគ្រប់ ប្រជាជនអង់គ្លេសនឹងធ្វើបាតុកម្មឡើងវិញមិនខានទេ។
បន្ថែមពីបញ្ហាសេដ្ឋកិច្ចនេះ អង់គ្លេសកំពុងតែពើបប្រទះនឹងបញ្ហានយោបាយ បែកបាក់ឯកភាពជាតិ។ តំបន់អេកូស ឬស្កុតលែន ព្រមទាំងតំបន់អៀរឡើងខាងជើង កំពុងតែមានចលនា ទាមទារផ្តាច់ខ្លួនចេញពីព្រះរាជាណាចក្រអង់គ្លេស។ នៅតំបន់អេកូស ការបោះឆ្នោតប្រជាមតិដើម្បីផ្តាច់ខ្លួន គឺនឹងធ្វើនៅខែតុលា ឆ្នាំក្រោយ។
មួយវិញទៀតនោះ យោងតាមអ្នកវិភាគខ្លះ គឺសហគមន៍ Commonwealth ដែលមាន៥៦ប្រទេស ដឹកនាំដោយអង់គ្លេសនោះ ក៏អាចប្រហែលជារង្គោះរង្គើរដែរ ដោយមានអ្នកខ្លះចង់ចាកចេញ។ ប្រទេសមួយចំនួន ដែលធ្លាប់គោរពព្រះមហាក្សត្រីអេលីហ្សាបិតទី២ មិនប្រាកដថាគេនឹងបន្តគោរព ចាត់ទុកព្រះអង្គឆាលស៍ទី៣ ជាព្រះមហាក្សត្ររបស់គេទេ។ ដូច្នេះ ព្រះអង្គឆាលស៍ទី៣ មានតួនាទីធំណាស់ អំណេះតទៅ ក្នុងការពង្រឹងសាមគ្គី ឯកភាពជាតិអង់គ្លេស ហើយប្រមូលពង្រឹងឥទ្ធិពលរបស់ចក្រភពអង់គ្លេសឡើងវិញ។ ចង់មិនចង់ វាជាការងារមួយដ៏លំបាក ខណៈព្រះអង្គឆាលស៍ទី៣ខ្លួនឯង ពុំសូវមានប្រជាប្រិយភាព គេមិនសូវជាគោរពស្រលាញ់ផងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ