អ៊ុយក្រែន៖ យ៉ាងហោចណាស់ផ្នូរចំនួន៤៥០ ត្រូវគេប្រទះឃើញនៅជាយក្រុងអ៊ីហ្សយូម
ចុះផ្សាយនៅថ្ងៃ៖
ស្តាប់ - ០៧:១៩
បន្ទាប់ពីការប្រទះឃើញ នូវរណ្តៅកប់សពរួម និងសាកសពមនុស្សស្លាប់រាយប៉ាយ នៅក្រុងប៊ូឆា ក្បែររដ្ឋធានីកៀវ កាលពីខែមេសា នៅពេលនេះអាជ្ញាធរអ៊ុយក្រែន ទើបតែបានប្រទះឃើញផ្នូរសាកសព ចំនួនយ៉ាងហោច៤៥០ទៀត នៅក្នុងព្រៃមួយកន្លែងក្បែរក្រុងអ៊ីហ្សយូម។ ក្រុងអ៊ីស្សយូម ដែលទើបតែត្រូវបានកងទ័ពអ៊ុយក្រែន រំដោះបានមកវិញ ពីដៃកងទ័ពរុស្ស៊ី កាលពីដើមសប្តាហ៍នេះ។ ភាគីអ៊ុយក្រែន បានលើកឡើងថា ផ្នូរសាកសពជាច្រើនរយនាក់ នៅក្រុងអ៊ីហ្សយូមនេះ គឺជាសក្ខីកម្មបញ្ជាក់ពីអំពើសាហាវព្រៃផ្សៃ ការកាប់សម្លាប់ របស់កងទ័ពរុស្ស៊ី ហើយរុស្ស៊ីត្រូវតែទទួលខុសត្រូវចំពោះមុខច្បាប់។
ប្រមាណ៤៥០ផ្នូរ
រូបភាពរណ្តៅសពរួម ព្រមទាំងសាកសពស្លាប់រាយប៉ាយនៅ ក្រុងប៊ូឆា ដែលគេបានប្រទះឃើញកាលពីខែមេសា នៅអន្ទងជាប់វិញ្ញាណ និងកែវភ្នែករបស់យើងមិនទាន់ទៅណាឆ្ងាយទេ។ តែពេលនេះ ដំណឹងសោកនាកដកម្មមួយទៀត បានមកដល់ គឺការប្រទះឃើញរណ្តៅកប់សព ច្រើនរយនាក់ នៅក្នុងដីព្រៃមួយកន្លែង ជាយទីក្រុងអ៊ីហ្សយូម។
ទីក្រុងអ៊ីហ្សយូមនេះ ដែលធ្លាប់មានប្រជាជនរស់នៅប្រមាណ៥ម៉ឺននាក់ ទើបតែត្រូវបានកងទ័ពអ៊ុយក្រែនរំដោះបាន ២-៣ ថ្ងៃមុននេះ។ ទីក្រុងនេះ បានធ្លាក់ទៅក្នុងដៃរបស់កងទ័ពរុស្ស៊ី តាំងតែងពីខែមីនាម្លេះ ព្រោះជាក្រុងយុទ្ធសាស្ត្រ ច្រកផ្លូវថ្នល់ឆ្លងកាត់ ដើម្បីដឹកជញ្ជូនស្បៀង និងគ្រឿងសព្វាវុធផ្សេងៗ របស់កងទ័ពរុស្ស៊ី។
កងទ័ពអ៊ុយក្រែន ទើបតែបានចូលទៅដល់ទីក្រុងនេះ ហើយកាលពីថ្ងៃពុធ លោកហ្សេឡេនស្គី ក៏បានទៅដល់ទីនោះដែរ។ យប់ថ្ងៃព្រហស្បតិ៍ទី១៥កញ្ញា នៅក្នុងសារវីដេអូប្រចាំថ្ងៃ លោកប្រធានាធិបតីហ្សេឡេនស្គី បានលើកឡើងថា កងទ័ពអ៊ុយក្រែន ទើបប្រទះឃើញផ្នូរសពជាច្រើនរយ នៅក្រុងអ៊ីហ្សយូម។ លោកបានប្រកាសថា នៅថ្ងៃសុក្រនេះ ក្រុមអ្នកកាសែតអ៊ុយក្រែន និងបរទេស នឹងធ្វើដំណើរទៅក្រុងអ៊ីហ្សយូម ដើម្បីពិនិត្យមើលទីតាំងផ្នូរសពទាំងនោះ។
ព្រឹកថ្ងៃសុក្រ លោក Mikhaïlo Podoliak ទីប្រឹក្សាពិសេស របស់លោកប្រធានាធិបតីអ៊ុយក្រែន បានបញ្ជាក់ថា ផ្នូរសពមានចំនួនប្រមាណ៤៥០ នៅក្នុងដីព្រៃមួយកន្លែង ជាយក្រុងអ៊ីហ្សយូម។ នៅក្នុងសារលើទំព័រ Twitter លោកបានសរសេរបន្ថែមថា អស់រយៈពេលជាច្រើនខែមកហើយ ដែលប្រជាជនក្រុងអ៊ីហ្សយូម បានរងនូវ អំពើហិង្សាសាហាវយង់ឃ្នង ការធ្វើទារុញកម្ម ការសម្លាប់រង្គាល បង្កឡើងដោយដោយចោរឈ្លានពានរុស្ស៊ី។
រណ្តៅមួយ មានទាហានអ៊ុយក្រែន១៧នាក់
ផ្អែកតាមលោក Sergueiï Botvinov នាយនគរបាលម្នាក់នៅក្រុងអ៊ីហ្សយូម បានប្រាប់បណ្តាញទូរទស្សន៍ Sky News សាកសពខ្លះ ស្លាប់ដោយត្រូវគ្រាប់កាំភ្លើង និងមួយចំនួនទៀត ស្លាប់ដោយការទំលាក់គ្រាប់បែក គ្រាប់មីនផ្ទុះ និងការបាញ់ប្លោងមីស៊ីលជាដើម។ យ៉ាងណាមិញ កាលពីថ្ងៃទី១២កញ្ញា អ្នកកាសែតAFP ដែលបានចូលទៅដល់ក្រុងអ៊ីហ្សយូមដំបូងបង្អស់ ក្រោយកងទ័ពអ៊ុយក្រែនរំដោះបាន បានឲ្យដឹងថាទីក្រុងនេះ ត្រូវខ្ទេចខ្ទាំខ្លាំងណាស់ ដោយសារការវាយប្រយុទ្ធគ្នា។ អាគារ ផ្ទះសំបែង ត្រូវបាក់បែងសឹងទាំងស្រុង តាមផ្លូវរថក្រោះ រថពាសដែក ឆេះខ្លោចរប៉ាត់រប៉ាយ។
ដោយឡែក បើតាមសំដីរបស់លោក Oleg Kotenko មន្ត្រីរដ្ឋាភិបាលអ៊ុយក្រែនទទួលបន្ទុក ស្រាវជ្រាវរុករកជនរងគ្រោះដោយសង្គ្រាម បានឆ្លើយប្រាប់អ្នកយកព័ត៌មានបារាំង AFP នៅព្រឹកថ្ងៃសុក្រនេះថា រណ្តៅកប់សពទាំងនេះ ត្រូវបានរកឃើញ បន្ទាប់ពីមានវីដេអូមួយត្រូវគេបង្ហោះតាមបណ្តាញសង្គម។ លោកម្នាក់នេះអះអាងថា នៅលើផ្នូរគឺមានលេខសំគាល់ ហើយលោកបានឃើញលេខ ៤៤៣។ លោកអះអាងថា ទៀតថា មានរណ្តៅមួយ ដែលមានដោតឈើឆ្កាង មានសរសេរអក្សរថា “ទាហានអ៊ុយក្រែន១៧នាក់”។ ដូច្នេះវាអាចមានន័យថា រណ្តៅផ្សេងៗទៀត គឺអាចមានសាកសពលើសពី១ ហើយក៏អាចមានទីតាំងកប់សពរៀបនេះ នៅកន្លែងផ្សេងទៀតដែរក្បែរក្រុងអ៊ីហ្សយូមនេះ។
លោក Oleg Kotenko បញ្ជាក់ថា ផ្នូរខ្លះមានសរសេរឈ្មោះសំគាល់ ឯផ្នូរខ្លះទៀតអត់មានសរសេរអ្វីសំគាល់ទេ ដែលអាចមានន័យថា ជាសាកសពដែលគេប្រមូលនៅតាមផ្លូវជាដើម។ លោកបានលើកឡើងទៀតថា ក្នុងរយៈពេលច្រើនខែដែលក្រុងអ៊ីហ្សយូមស្ថិតក្នុងដៃកងទ័ពរុស្ស៊ី គឺប្រជាជនខ្លះ អាចស្លាប់ដោយដាច់ពោះ គ្មានអ្វីហូប ព្រោះទីនេះត្រូវកាត់ផ្តាច់ទាំងស្រុងតែម្តង គ្មាននរណាចូលមកដល់ ដឹកស្បៀងចេញចូលបានទេ។
លោកស្រី Elizabeth Throssell អ្នកនាំពាក្យឧត្តមស្នងការសិទ្ធិមនុស្ស នៃអង្គការសហប្រជាជាតិ បានបញ្ជាក់ថាក្រុមការងារពិសេសមួយ នឹងត្រូវបញ្ជូនទៅពិនិត្យដល់ទីតាំងរណ្តៅកប់សពទាំងនោះ ក្នុងពេលដ៏ឆាប់បំផុត។ លោកស្រីអះអាងថា ក្នុងករណីបែបនេះ វាជារឿងចំបាច់នឹងបន្ទាន់បំផុត ដែលត្រូវតែពិនិត្យ ថាតើសាកសពណាខ្លះ ជាប្រជាជនស៊ីវីល ណាខ្លះជាទាហាន ហើយស្លាប់ដោយសារមូលហេតុអ្វីខ្លះ ដោយការប្រយុទ្ធគ្នា ដោយការបាញ់សម្លាប់ចោល ឬដោយមូលហេតុធម្មជាតិ ដូចជាគ្មានស្បៀងអាហារ ឬមានជំងឺដង្កាត់ជាដើម។ ព័ត៌មានទាំងអស់នេះ ចាំបាច់ណាស់ដើម្បីចងក្រងជាសំណុំឯកសារ ឈានទៅស្វែងរកយុត្តិធម៌ទៅថ្ងៃអនាគត។
លោកស្រី វ៉ុនឌែរ ឡេយែន៖ ពូទីនត្រូវតែទទួលទោស !
លោកស្រី អួរស៊ូឡា វ៉ុនឌែរ ឡេយែន ប្រធានគណៈកម្មការអឺរ៉ុប បានទៅទស្សនកិច្ចជាលើកទី៣ នៅទីក្រុងកៀវ កាលពីថ្ងៃព្រហស្បតិ៍។ លោកស្រី បានផ្តល់បទសម្ភាសន៍ ឲ្យបណ្តាញទូរទស្សន៍អាល្លឺម៉ង់ Bild ដោយលោកស្រីបានអះអាងថា រុស្ស៊ីត្រូវតែចាញ់សង្គ្រាមនេះ ហើយលោកពូទីន ត្រូវតែទទួលខុសត្រូវចំពោះទង្វើរបស់ខ្លួន។ លោកស្រីគាំទ្រ និងចង់ឃើញលោកពូទីន ត្រូវប្រព័ន្ធយុត្តិធម៌អន្តរជាតិ យកទៅកាត់ទោស។
បន្ថែមពីនេះ ក្នុងពេលជួបជាមួយលោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី លោកស្រីអួរស៊ូឡា វ៉ុនឌែរ ឡេយែន បានថ្លែងកោតសរសើរ ចំពោះភាពក្លាហាន និងវីរៈភាព របស់កងទ័ពអ៊ុយក្រែន។ ក្នុងនាមប្រធានគណៈកម្មការអឺរ៉ុប លោកស្រីបានសន្យាថា សហភាពអឺរ៉ុបនឹងបន្តជួយទំនុកបំរុងអ៊ុយក្រែន ទោះយូរប៉ុណ្ណាក៏ដោយ ព្រោះអ៊ុយក្រែនគឺជាមិត្តរបស់អឺរ៉ុបជារៀងដរាប។
លោកប្រធានាធិបតីហ្សេឡេនស្គីវិញ បានថ្លែងថា បច្ចុប្បន្ននេះអ៊ុយក្រែនត្រូវការថវិកា ចំនួន៥ពាន់លានដុល្លារ សម្រាប់ចំណាយក្នុងមួយខែ ព្រោះថាសេដ្ឋកិច្ចអ៊ុយក្រែនជួបបញ្ហាលំបាកខ្លាំងណាស់ ដោយសារសង្គ្រាម។ ហើយអ្វីដែលអ៊ុយក្រែនចង់បានទៅថ្ងៃអនាគត គឺចង់ចូលរួមនៅក្នុងទីផ្សាររួមរបស់អឺរ៉ុប ដើម្បីអាចចរាចរណ៍ទំនិញដោយសេរី។ លោកអះអាងថា អ៊ុយក្រែនអាចផ្គត់ផ្គង់ចរន្តអគ្គិសនីឲ្យបណ្តាប្រទេសអឺរ៉ុបថែមទៀត។
អាមេរិកបន្ថែមកញ្ចប់ថវិកា៦០០លានដុល្លារ
ទាក់ទិននឹងការជួយអ៊ុយក្រែន ដើម្បីយកឈ្នះរុស្ស៊ីនេះ រដ្ឋាភិបាលអាល្លឺម៉ង់ បានបញ្ជាក់ឲ្យដឹង កាលពីថ្ងៃព្រហស្បតិ៍ម្សិលមិញថា អាល្លឺម៉ង់ នឹងប្រគល់រថពាសដែកមួយចំនួន ទៅឲ្យកងទ័ពអ៊ុយក្រែន។ ចំណែក រដ្ឋាភិបាលអាមេរិកវិញ ទើបតែបានសម្រេចកាលពីថ្ងៃព្រហស្បតិ៍ម្សិលមិញដែរ ថានឹងផ្តល់កញ្ចប់ថវិកាថ្មីមួយទៀត ចំនួន៦០០លានដុល្លារ ទៅឲ្យអ៊ុយក្រែន។ សេតវិមានអាមេរិក បញ្ជាក់ថាកញ្ចប់ថវិកានេះ នឹងយកទៅចំណាយ ក្នុងវិស័យបណ្តុះបណ្តាលទាហាន ព្រមទាំងទិញសម្ភារៈប្រើប្រាស់ខ្លះ សម្រាប់កងទ័ពអ៊ុយក្រែន តែមិនបានលំអិតឲ្យច្បាស់ទេ ថាក្នុងថវិកានេះ មានរាប់ទាំងជំនួយជាគ្រឿងសព្វាវុធឬអត់។
ដោយឡែក លោកស្រី Maria Zakharova អ្នកនាំពាក្យក្រសួងការបរទេសរុស្ស៊ីវិញ បានអះអាងថា ប្រសិនបើអាមេរិក ហ៊ានតែប្រគល់ គ្រាប់មីស៊ីលរត់បានចំងាយឆ្ងាយ ទៅឲ្យអ៊ុយក្រែន នោះរុស្ស៊ីប្រាកដជានឹងមិននៅស្ងៀមឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ