អាមេរិក-រុស្ស៊ី៖លោកបៃដិនព្រមានលោកពូទីន បើលោកពូទីនហ៊ានប្រើអាវុធគីមី ឬអាវុធនុយក្លេអ៊ែរនៅអ៊ុយក្រែន
ចុះផ្សាយនៅថ្ងៃ៖
ស្តាប់ - ០៦:៣២
នៅយប់ថ្ងៃសៅរ៍ ទី១៧ កញ្ញា ប្រធានាធិបតីអាមេរិកលោកបៃដិនបានអញ្ជើញទៅដល់ទីក្រុងឡុងដ៏ ប្រទេសអង់គ្លេសដើម្បីចូលរួមនៅក្នុងពិធីបុណ្យសពព្រះមហាក្សត្រិយ៍អេលីហ្សាបិតទី២ ដែលត្រៀមធ្វើក្នុងថ្ងៃចន្ទ ទី១៩ កញ្ញា។ តែមុននឹងចាកចេញពីអាមេរិក លោកបៃដិនបានផ្តល់បទសម្ភាសន៍មួយឲ្យកាណាល់ទូរទស្សន៍ CBS។ នៅក្នុងបទសម្ភាសន៍ លោកបៃដិនបានអំពាវនាវក្នុងន័យព្រមានកុំឲ្យប្រធានាធិបតីរុស្ស៊ីលោកពូទីនប្រើអាវុធគីមី ឬអាវុធនុយក្លេអ៊ែរនៅក្នុងសង្រ្គាមអ៊ុយក្រែន។
ព័ត៌មានជុំវិញប្រធានាធិបតីរុស្ស៊ីលោកពូទីនគំរាមប្រើ ឬប្រើជាយថាហេតុនូវអាវុធគីមី ឬអាវុធនុយក្លេអ៊ែរនៅក្នុងសង្រ្គាមអ៊ុយក្រែនមិនមែនជារឿងថ្មីទេ។ ក្រសួងស៊ើបការណ៍សម្ងាត់អាមេរិកធ្លាប់បានលើកឡើង និងសម្តែងក្តីបារម្ភចំពោះរឿងនេះ ហើយលោកពូទីនខ្លួនឯងក៏ធ្លាប់បានលើកយកអាវុធនុយក្លេអ៊ែរទៅគំរាមដែរ ពិសេសនៅពេលដែលក្រុមប្រទេសលោកខាងលិចបានបង្កើនការជួយគាំទ្រផ្លូវយោធា និងផ្តល់អាវុធទំនើបៗឲ្យអ៊ុយក្រែន។ ទន្ទឹមនឹងការគំរាម លោកពូទីនក៏ធ្លាប់បានបង្ហាញពីការសាកល្បងប្រកបដោយជោគជ័យនូវគ្រាប់មីស៊ីលបំពាក់ក្បាលនុយក្លេអ៊ែរដែលលោកបញ្ជាក់ថា ជាអាវុធដែលពិភពលោកមិនធា្លប់បានស្គាល់ទេ។
គិតត្រឹមថ្ងៃអាទិត្យ ទី១៨ កញ្ញា សង្រ្គាមរុស្ស៊ីឈ្លានពានអ៊ុយក្រែនបានឈានចូលជិត ៧ខែ និងដែលគេបានសង្កេតឃើញថា ទ័ពរុស្ស៊ីកំពុងចាញ់ច្រាបទ័ពអ៊ុយក្រែននៅលើសមរភូមិជាច្រើន។ ក្នុងរយៈពេលចុងក្រោយនេះ ទ័ពអ៊ុយក្រែនបានវាយដណ្តើមយកពីដៃទ័ពរុស្ស៊ីមកវិញនូវទីតាំងជាច្រើនកន្លែង។ ស្ថានការណ៍នេះត្រូវបានលោកពូទីនចេញមុខព្រមានថា រុស្ស៊ីនឹងចាត់វិធានការឲ្យបានខ្លាំងជាងនេះបន្ថែមទៀត បើទ័ពរុស្ស៊ីស្ថិតក្រោមសម្ពាធ និងកាន់តែធ្លាក់ឥទ្ធិពលនៅលើសមរភូមិសង្រ្គាម។ គឺការព្រមានចាត់វិធានការឲ្យបានខ្លាំងបន្ថែមទៀតនេះហើយដែលនាំឲ្យមានតម្រុយថា លោកពូទីនអាចប្រើអាវុធគីមី ឬអាវុធនុយក្លេអ៊ែរដើម្បីមានប្រៀបនៅលើសមរភូមិសង្រ្គាម។
លោកបៃដិនប្រាប់លោកពូទីនកុំឲ្យឆ្លងកាត់ខ្សែបន្ទាត់ក្រហម
ប្រធានាធិបតីអាមេរិកលោកបៃដិនបានចេញមុខព្រមានថា រុស្ស៊ីនឹងទទួលផលវិបាកធ្ងន់ធ្ងរ បើលោកពូទីនហ៊ានប្រើអាវុធគីមី ឬអាវុធនុយក្លេអ៊ែរលើអ៊ុយក្រែន។ « សូមកុំប្រព្រឹត្ត » នេះជាឃ្លាដែលលោកបៃដិនបានថ្លែងរម្លឹកដល់ទៅ ៣ដង និងជាសារដែលលោកបៃដិនចង់បញ្ជូនត្រង់ទៅឲ្យលោកពូទីន។ តាមលោកបៃដិន បើលោកពូទីនហ៊ានប្រើអាវុធគីមី ឬអាវុធនុយក្លេអ៊ែរនៅក្នុងសង្រ្គាមអ៊ុយក្រែន រូបភាព និងមុខមាត់នៃសង្រ្គាមមួយនេះនឹងមានការផ្លាស់ប្តូរដែលពិភពលោកមិនធ្លាប់បានជួបប្រទះទេគិតតាំងពីក្រោយសង្រ្គាមលោកលើកទី២។
បើតាមមើលទៅ លោកបៃដិនប្រហែលចង់មានន័យថា ពិភពលោកនឹងធ្លាក់ទៅក្នុងសង្រ្គាមលោកជាថ្មី បើលោកពូទីនហ៊ានឆ្លងខ្សែបន្ទាត់ក្រហមដោយប្រើអាវុធនុយក្លេអ៊ែរ។ តើការលើកឡើងរបស់លោកបៃដិននេះមានន័យថា អាមេរិកនឹងចូលខ្លួនអន្តរាគមន៍ផ្លូវយោធាដោយផ្ទាល់ទល់នឹងរុស្ស៊ីនៅលើសមរភូមិអ៊ុយក្រែនឬ?។ លោកបៃដិនបានត្រឹមផ្តល់ចម្លើយក្នុងន័យព្រមានថា រុស្ស៊ីនឹងទទួលផលវិបាកធ្ងន់ធ្ងរ និងថា ចម្លើយរបស់អាមេរិកនឹងអាស្រ័យទាំងស្រុងលើទំហំនៃទង្វើរបស់រុស្ស៊ី។ ឃើញថាពេលនេះ គេហាក់កំពុងឃើញមានច្រើននូវសង្រ្គាមពាក្យសម្តីជាងការអនុវត្តន៍ជាក់ស្តែងពីខាងរុស្ស៊ីក៏ដូចពីខាងអាមេរិក។
សំណួរដែលកំពុងចោទ តើលោកពូទីនហ៊ានប្រើអាវុធគីមី ឬអាវុធនុយក្លេអ៊ែរនៅលើសមរភូមិសង្រ្គាមអ៊ុយក្រែន ឬអត់ និងថា ចុះបើលោកពូទីនប្រើមែន តើលោកបៃដិនហ៊ានវាយប្រហារផ្លូវយោធាលើរុស្ស៊ីដែរ ឬទេ?។ ទាំងនេះជាសំណួរដែលគេពិបាកផ្តល់ចម្លើយច្បាស់នៅពេលនេះ។
លោកពូទីនមិនប្រញាប់បិទសង្រ្គាមនៅអ៊ុយក្រែន
លោកពូទីននៅមិនទាន់បានឆ្លើយតបយ៉ាងម៉េច ឬមួយក៏មិនឆ្លើយតបនឹងការព្រមានរបស់លោកបៃដិនទេនៅពេលនេះ។ តែនៅជំនួបទ្វេភាគីជាមួយនាយករដ្ឋមន្រ្តីឥណ្ឌាលោកណារិនដ្រា ម៉ូឌីនាឱកាសកិច្ចប្រជុំកំពូលរបស់អង្គការកិច្ចសហប្រតិបត្តិការសៀងហៃដែលរៀបចំធ្វើក្នុងប្រទេសអ៊ូសបេគីស្ថាន លោកពូទីនបាននិយាយប្រាប់លោកម៉ូឌីថា លោកយល់ពីក្តីបារម្ភរបស់លោកម៉ូឌីទាក់ទងនឹងសង្រ្គាមអ៊ុយក្រែន។ លោកម៉ូឌីបាននិយាយប្រាប់លោកពូទីនថា មិនមែនជាពេលវេលាសម្រាប់សង្រ្គាមទេ។ តែលោកពូទីនបានឆ្លើយប្រាប់លោកម៉ូឌីវិញថា លោកនឹងធ្វើអ្វីៗគ្រប់យ៉ាងដែលអាចធ្វើទៅបានដើម្បីបិទបញ្ចប់សង្រ្គាមអ៊ុយក្រែនឲ្យបានឆាប់បំផុត។
តែស្រាប់នៅចំពោះមុខក្រុមអ្នកកាសែតរុស្ស៊ី លោកពូទីនបែរជាបានអះអាងផ្ទុយទៅវិញដោយបញ្ជាក់ថា រុស្ស៊ីមិនប្រញាប់ដើម្បីបិទបញ្ចប់កម្មវត្ថុគន្លឹះរបស់ខ្លួននៅអ៊ុយក្រែនទេ និងថា ផែនការគោលរបស់រុស្ស៊ីក៏មិនចាំបាច់តម្រូវឲ្យមានការផ្លាស់ប្តូរដែរ ព្រោះរុស្ស៊ីគ្មានប្រញាប់ទៅណាទេ។ តាមរយៈសម្តីនេះនាំឲ្យគេយល់បានភ្លាមថា សង្រ្គាមរុស្ស៊ីឈ្លានពានអ៊ុយក្រែនហាក់មិនបានត្រៀមខ្លួនដើម្បីបិទបញ្ចប់នៅឡើយទេ នោះបើទោះបីជាលោកពូទីនដឹងថា រុស្ស៊ីកំពុងស្ថិតក្នុងស្ថានភាពលំបាកលើផ្នែកការទូត និងការលំបាកក្នុងផ្លូវយោធានៅក្នុងសង្រ្គាមជិត ៧ខែមួយនេះក៏ដោយ។
គេមិនដឹងថា តើសង្រ្គាមមួយនេះនឹងអូសបន្លាយពេលប៉ុន្មានខែថែមទៀតទេ។ អ្វីដែលគេអាចនិយាយបាន សង្រ្គាមមួយនេះកំពុងជះផលវិបាកកាន់តែខ្លាំងដល់ពិភពលោកទាំងមូល ពិសេសវិបត្តិខ្វះស្បៀង និងវិបត្តិថាមពល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ