ទីក្រុងឡុងដ៍ ជូនដំណើរព្រះមហាក្សត្រិយ៍អេលីហ្សាបិតទី២ជាលើកចុងក្រោយ ក្នុងព្រះរាជពិធីបុណ្យសពដ៍ធំមហិមា
ចុះផ្សាយនៅថ្ងៃ៖
ស្តាប់ - ០៧:៤៦
ថ្ងៃចន្ទទី១៩កញ្ញានេះ ទីក្រុងឡុងដ៍ប្រទេសអង់គ្លេស ត្រូវឈប់ទ្រឹងមួយកន្លែង ដើម្បីប្រារព្ធព្រះរាជពិធីបុណ្យសព នៃព្រះមហាក្សត្រិយ៍អេលីហ្សាបិតទី២។ ក្រៅពីប្រជាជនសាមញ្ញរាប់សែននាក់ ដែលបានមករងចាំជូនដំណើរ និងថ្វាយគារវកិច្ចចំពោះការដង្ហែរព្រះសពជាលើកចុងក្រោយ កម្មវិធីនៅថ្ងៃនេះនឹងមានវត្តមានចូលរួម ដោយព្រះមហាក្សត្រ ប្រមុខរដ្ឋ ប្រមុខរដ្ឋាភិបាល និងថ្នាក់ដឹកនាំអន្តរជាតិ ជាច្រើនពាន់នាក់។ ព្រះរាជពិធីបុណ្យសពនេះ គឺជាបន្ទុកទទួលខុសត្រូវផ្នែកសន្តិសុខ ដ៏ធំបំផុតមិនធ្លាប់មាន សម្រាប់អាជ្ញាធរ ក៏ដូចជារដ្ឋាភិបាលអង់គ្លេស។
ពិធីបុណ្យសពប្រចាំសតវត្ស
កម្មវិធីធំនៅថ្ងៃទី១៩កញ្ញា គឺកម្មវិធីនៅក្នុងព្រះវិហារ Westminster នៅវេលាម៉ោង១០ព្រឹក ដែលមានរយៈពេលប្រហែល១ម៉ោង និងដោយមានមនុស្សចូលរួម សុទ្ធតែជាព្រះមហាក្សត្រ ប្រមុខរដ្ឋ ប្រមុខរដ្ឋាភិបាល ដែលត្រូវបានរដ្ឋាភិបាលអង់គ្លេសផ្ញើលិខិតទៅអញ្ជើញ។ កម្មវិធីក្នុងព្រះវិហារ Westminsterចប់រួចរាល់ ម្ឈូសនៃព្រះសពរបស់ព្រះមហាក្សត្រិយ៍អេលីហ្សាបិតទី២ នឹងត្រូវដឹកតាមក្បួនដង្ហែ ក្នុងទីក្រុងឡុងដ៍ ឆ្ពោះទៅកាន់វិមានជ័យជំនះ Arc de Wellington ដែលស្ថិតនៅក្នុងសួនឧទ្យាន Hyde Park។ ព្រះអង្គឆាលស៍ទី៣ ព្រមទាំងក្រុមគ្រួសារព្រះញាតិវង្ស នឹងយាងដើរតាមពីក្រោយ។
មនុស្សម្នារាប់សែននាក់ បានមកឈររង់ចាំ ខ្លះបានបោះតង់ដេកចាំច្រើនថ្ងៃមកហើយ ដើម្បីបាននៅមុខគេ នឹងបានឃើញក្បួនដង្ហែរនេះ។ នៅព្រឹកថ្ងៃចន្ទនេះដែរ ជើងយន្តហោះជាច្រើនរយ ត្រូវផ្អាកមិនឲ្យហោះហើរ ឆ្លងកាត់ ឬចុះឡើងនៅទីក្រុងឡុងដ៍ទេ ដើម្បីកុំឲ្យមានសំឡេងរំខាន ដល់ការស្មឹងស្មាតស្មារតី បង្ហាញគារវកិច្ចគោរពព្រះវិញ្ញាណក្ខន្ធ ជាលើកចុងក្រោយ ថ្វាយចំពោះព្រះមហាក្សត្រីអេលីហ្សាបិតទី២។
បន្ទាប់ពីចប់ក្បួនដង្ហែរនេះហើយ ព្រះសព និងត្រូវបញ្ជូនទៅកាន់ ប្រសាទ Windsor ចំងាយប្រមាណ៣៥គីឡូម៉ែត្រ ជាយរាជធានីឡុងដ៍ ដើម្បីរៀបចំពិធីបញ្ចុះនៅទីនោះ នៅល្ងាចថ្ងៃចន្ទនេះ។ កម្មវិធីបញ្ចុះព្រះសពនេះ គឺមានតែសមាជិកក្រុមគ្រួសារព្រះញាតិវត្សចូលរួមតែប៉ុណ្ណោះ។
បន្ទុកការពារសន្តិសុខដ៏សែនធ្ងន់បំផុត
បើគិតពីកម្មវិធីបុណ្យសព របស់លោក Winston Churchil អតីតនាយករដ្ឋមន្ត្រីអង់គ្លេស កាលពីឆ្នាំ១៩៦៥ គឺអង់គ្លេសមិនដែលមានកម្មវិធីបុណ្យសពដ៏ធំបែបនេះទេ។ កុំថាឡើយសម្រាប់អង់គ្លេស កម្មវិធីព្រះរាជពិធីបុណ្យសព របស់ព្រះមហាក្សត្រិយ៍អេលីហ្សាបិតទី២នៅថ្ងៃនេះ គឺជាកម្មវិធីធំបំផុតមិនធ្លាប់មានទេ នៅក្នុងពិភពលោក។
នៅក្នុងកម្មវិធីក្នុងព្រះវិហារ Westminster មានមនុស្សចូលរួមប្រមាណ២ពាន់នាក់ គឺសុទ្ធតែជាព្រះមហាក្សត្រ ប្រមុខរដ្ឋ ប្រមុខរដ្ឋាភិបាល និងតំណាងអង្គទូត ជិត២០០ប្រទេសឯណោះ។ ព្រះចៅអធិរាជជប៉ុន ណារូហ៊ីតូ និងព្រះរាជាយា ក៏មានវត្តមាន រួមជាមួយ ព្រះមហាក្សត្រអេស្ប៉ាញ ព្រះមហាក្សត្រហូឡង់ ព្រះមហាក្សត្រន័រវេស ព្រះមហាក្សត្រប៊ែលហ្សិក ព្រះមហាក្សត្រិយ៍ដាណឺម៉ាក និងព្រះអង្គម្ចាស់អាល់ប៊ែរ នៃម៉ូណាកូជាដើម។ ក្រៅពីនេះ មានប្រមុខរដ្ឋបណ្តាប្រទេសធំៗ មានលោកចូ បៃដិន ប្រធានាធិបតីអាមេរិក លោកម៉ាក្រុង ប្រធានាធិបតីបារាំង លោកយូស្តាំងទ្រុយដូ នាយករដ្ឋមន្ត្រីកាណាដា លោកស្រីប្រធានាគណៈកម្មការអឺរ៉ុបជាដើម។ល។ ដោយឡែក លោកស៊ី ជិនពីង មិនបានអញ្ជើញមកទេ ដោយលោកអនុប្រធានាធិបតីចិន Wang Qishan មកជំនួស។
ដូច្នេះវិធានការការពារសន្តិសុខនៅទីក្រុងឡុងដ៍ គឺត្រូវរឹតបន្តឹងខ្លាំងសម្បើមណាស់។ ទាហានប្រមាណ៦០០០នាក់ មានវត្តមាន។ លើដំបូលអាគារ តាមដងផ្លូវសំខាន់ៗ មានក្រុមសន្តិសុខតាមល្បាត និងតម្រង់កាំភ្លើងជាប់ជានិច្ចក្នុងករណីមានបញ្ហាបន្ទាន់ណាមួយ។ មន្ត្រីទទួលបន្ទុកសន្តិសុខអង់គ្លេសម្នាក់ បាននិយាយតាមទូរទស្សន៍ BBC ថា ការការពារសន្តិសុខនៅថ្ងៃនេះ គឺប្រៀបបីដូចជាត្រូវរៀបចំ កម្មវិធីដំណើរទស្សនកិច្ចផ្លូវរដ្ឋ របស់ប្រមុខរដ្ឋចំនួន១០០ប្រទេសក្នុងពេលតែមួយ។
ក្រៅពីវិធានការសន្តិសុខដ៏តឹងតែងបំផុតនោះ ការរៀបចំកម្មវិធីដែលមានឥស្សរជនធំៗច្រើនគ្នាចូលរួម ក្នុងពេលតែមួយបែបនេះ គឺគេត្រូវតែប្រុងប្រយ័ត្នណាស់ ដើម្បីចៀសវាងបញ្ហា ច្រណែន ឬថ្នាំងថ្នាក់ចិត្ត។ គេត្រូវគិត តាំងពីកៅអីអង្គុយ ថាអ្នកណាអង្គុយជិតអ្នកណា អ្នកណាអង្គុយមុខ អ្នកណាអង្គុយនៅក្រោយ អ្នកណាអង្គុយក្បែរជញ្ជាំង ឬអង្គុយបាំងក្រោយសសរជាដើម។
យ៉ាងណាមិញ ទាក់ទិននឹងការធ្វើដំណើរទៅកាន់ព្រះវិហាវ Westminter នៅព្រឹកថ្ងៃចន្ទនេះ អាជ្ញាធរអង់គ្លេស បានសម្រេចរៀបចំឲ្យឥស្សរជនទាំងអស់ ត្រូវធ្វើដំណើររួមគ្នា នៅក្នុងរថយន្តក្រុង ដែលគេរៀបចំជាពិសេស។ ក៏ប៉ុន្តែរហូតដល់នាទីចុងក្រោយ មានការតវ៉ា ពីក្រុមការងារការពារសន្តិសុខ របស់ឥស្សរជនមួយចំនួន បានតវ៉ាមិនចង់ឲ្យព្រះមហាក្សត្រគេ ប្រធានាធិបតីគេ ទៅជិះរថយន្តក្រុងរួមគ្នាជាមួយអ្នកផ្សេងទៀត។ ជាក់ស្តែងគឺខាងភាគីការពារសន្តិសុខរបស់លោកចូ បៃដិន ដែលតវ៉ាខ្លាំងជាងគេ ហើយទីបំផុត គឺលោកចូ បៃដិន មិនជិះរថយន្តក្រុងជាមួយគេទេ តែលោកបានជិះរថយន្តលីមូស៊ីនពិសេសរបស់លោក ឆ្ពោះទៅកាន់ព្រះវិហារ Westminter។
ឱកាសកសាងកេរ្តិ៍ឈ្មោះ របស់រដ្ឋាភិបាលលោកស្រី លីហ្ស ត្រាស្ស
លោកស្រី លីហ្ស ត្រាស្ស នាយករដ្ឋមន្ត្រីថ្មីអង់គ្លេស ទើបតែចូលកាន់តំណែងបាន២សប្តាហ៍ប៉ុណ្ណោះ ហើយពីមុនមក គេមិនសូវស្គាល់គាត់ទេ។ ដូច្នេះហើយ ឱកាសនេះ គឺជាឱកាសសំខាន់ណាស់ ព្រោះថារដ្ឋាភិបាលលោកស្រី ជាអ្នកទទួលបន្ទុករៀបចំព្រះរាជពិធីបុណ្យសពដ៏ធំមហិមានេះ ហើយមានថ្នាក់ដឹកនាំ ប្រមុខរដ្ឋ មហាក្សត្រ ឥស្សរជនធំៗទូទាំងពិភពលោកតែម្តង មកចូលរួម។ ជាឱកាសល្អ តែក៏ជាការលំបាកណាស់ដែរ ព្រោះត្រូវរៀបចំឲ្យបានជោគជ័យ កុំឲ្យមានបញ្ហាអ្វី កើតឡើង មិនថាផ្នែកប្រូតូកូល និងផ្នែកសន្តិសុខ។
កន្លងប៉ុន្មានឆ្នាំមកនេះ រដ្ឋាភិបាលអង់គ្លេស បានចុះថយប្រជាប្រិយភាពមិនតិចទេ នៅលើឆាកអន្តរជាតិ ជាពិសេសនៅក្រោយពេលអង់គ្លេសសម្រេចចាកចេញពីសហភាពអឺរ៉ុប និងនៅក្នុងសំណុំរឿងអៀរឡង់ជាដើម។ អង់គ្លេសត្រូវគេមើលឃើញថា ចង់នៅតែឯង លែងចង់សហការ ក្នុងសម្ព័ន្ធភាពជាមួយប្រទេសផ្សេងទៀតនៅអឺរ៉ុប។ ដូច្នេះឱកាសនេះ គឺជាពេលា ដើម្បីឲ្យរដ្ឋាភិបាលអង់គ្លេសស្តារមុខមាត់ឡើងវិញ ក្នុងនាមជាមហាអំណាចលោកខាងលិចមួយដែរ។
មិនមែនតែរដ្ឋាភិបាលអង់គ្លេសទេ ដែលកំពុងតែបានទទួលផលពីការរៀបចំព្រះរាជពិធីបុណ្យសពដ៏ធំមហិមានេះ។ ព្រះអង្គឆាលស៍ទី៣ ព្រះមាហាក្សត្រថ្មី និងក្រុមគ្រួសារព្រះញាតិវង្ស ក៏កំពុងតែទទួលបាននូវប្រជាប្រិយភាពច្រើនដែរ។ ព្រះអង្គឆាលស៍ទី៣ ដែលពីមុនមកប្រជាជនអង់គ្លេសមិនសូវស្រលាញ់ ពេលនេះ យោងតាមការធ្វើប្រជាមតិដោយ Yougov គឺព្រះអង្គបានទទួលមតិគាំទ្រសុទិដ្ឋិនិយម ចំនួន៧០% ចំណែកឯព្រះអង្គម្ចាស់ William បានទទួលចំនួន៨០%។
យ៉ាងណាក៏ដោយ អំឡុងពេលនេះ អង់គ្លេសទាំងមូលកំពុងតែកាន់ទុក្ខ សោកសង្រេងជាមួយនឹងការបាត់បង់ព្រះមហាក្សត្រិយ៍អេលីហ្សាបិតទី២។ ពេលចប់កម្មវិធីទាំងនេះ តថៈភាពពិតជាក់ស្តែងនៃជីវភាពប្រចាំថ្ងៃនឹងត្រលប់មកវិញហើយ ជាមួយនឹងវិបត្តិសេដ្ឋកិច្ច អតិផរណា ទំនិញឡើងថ្លៃកប់ពពក។ មិនត្រឹមតែប៉ុណ្ណោះ សហគមន៍ Commonwealth ដែលមានប្រទេសសមាជិក៥៦ប្រទេស ដឹកនាំដោយអង់គ្លេសនោះ ក៏អាចនឹងរង្គោះរង្គើរដែរ ព្រោះលែងមានព្រះមហាក្សត្រិយ៍អាលីហ្សាបិតទី២ ជាបង្គោលទប់ទៀតហើយ។ ចំណែកព្រះរាជាណាចក្រអង់គ្លេសខ្លួនឯង ក៏អាចនឹងមានបញ្ហាបាក់បែកដែរ ព្រោះតំបន់អេកូស ឬស្កុតលែនដ៍ ព្រមទាំងតំបន់អៀរឡង់ខាងជើង អាចនឹងបន្តរករឿងផ្តាច់ខ្លួន ប្រកាសឯករាជ្យជាក់ជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ