ធ្លាយបំពង់បង្ហូរឧស្ម័ន Nord Stream៖ហេតុអ្វីបានជាមានការលើកឡើងពីវិច្ឆេទកម្មជាងគ្រោះថ្នាក់?
ចុះផ្សាយនៅថ្ងៃ៖
ស្តាប់ - ០៧:១៨
សង្រ្គាមពាក្យសម្តីកំពុងបន្តមានយ៉ាងផុសផុលជុំវិញការបែកធ្លាយបំពង់បង្ហូរឧស្ម័ន Nord Stream 1 និង Nord Stream 2 នៅក្រោមសមុទ្របាល់ទិកកាលពីថ្ងៃចន្ទ ទី២៧ កញ្ញា។ បំពង់បង្ហូរឧស្ម័នទាំងពីរនេះបាន ត ភ្ជាប់ពីប្រទេសរុស្ស៊ីទៅប្រទេសអាល្លឺម៉ង់។ ការបែកធ្លាយមាន ៣កន្លែងផ្សេងគ្នាដោយមានពីរកន្លែងនៅលើបំពង់ Nord stream 1 ក្នុងនោះ មានមួយកន្លែងស្ថិតក្នុងដែនទឹករបស់ដាណឺម៉ាក និងមួយកន្លែងទៀតស្ថិតក្នុងដែនទឹករបស់ស៊ុយអែត។ ចំណែកការធ្លាយមួយកន្លែងលើបំពង់ Nord Stream 2 ស្ថិតក្នុងដែនទឹកសេដ្ឋកិច្ចផ្តាច់មុខរបស់ដាណឺម៉ាក។ ខណៈនេះ ការស៊ើបអង្កេតមួយបានបើកធ្វើដើម្បីស្វែងរកការពិតជុំវិញការបែកធ្លាយបំពង់ Nord Stream ទាំងពីរ។
នៅក្នុងសម្មតិកម្មពីដំបូង ពោលនៅក្រោយកើតហេតុភ្លាមៗ គេបានទុកការបែកធ្លាយបំពង់បង្ហូរឧស្ម័ន Nord Stream នៅក្រោមសមុទ្របាល់ទិកដែលត ភ្ជាប់ពីរុស្ស៊ីទៅអាល្លឺម៉ង់ជារឿងគ្រោះថ្នាក់ មានន័យថា មិនមែនជាទង្វើរបស់អ្នកណាម្នាក់ ឬប្រទេសណាមួយទេ។ តែក្រោយមក សម្មតិកម្មគ្រោះថ្នាក់នេះហាក់ត្រូវបានគេផាត់ចេញបន្តិចម្តងៗដោយងាកទៅផ្តោតលើសម្មតិកម្មវិច្ឆេទកម្មវិញ មានន័យថា ជាទង្វើបង្កឡើងដោយអ្នកណាម្នាក់ ឬប្រទេសណាមួយវិញ។ ទង្វើវិច្ឆេទកម្មអាចជាទង្វើដោយចេតនា មិនចេតនា ឬជាទង្វើដែលមានការរៀបចំទុកមុន។ ហេតុផលដែលគេហ៊ានលើកឡើងថាជាវិច្ឆេទកម្ម គឺដោយសារមានសំឡេងផ្ទុះចំនួនពីរដងនៅក្រោមសមុទ្រ មុនមានការធ្លាយឧស្ម័នអណ្តែតលើផ្ទៃសមុទ្រដែលគេបានឃើញផ្ទាល់នឹងភ្នែក។
សំឡេងផ្ទុះចំនួនពីរដងនេះត្រូវបានថតដោយមជ្ឈមណ្ឌលជាតិរញ្ជួយដីរបស់ប្រទេសស៊ុយអែត ក្នុងនោះ កម្លាំងផ្ទុះទី១ មានកម្រិត ១,៩រ៉ិចទ័រ ហើយកម្លាំងផ្ទុះទី២ មានកម្រិត ២,៣រ៉ិចទ័រ។ សំឡេងផ្ទុះទាំងពីរនេះក៏ត្រូវបានបញ្ជាក់ដោយវិទ្យាស្ថានឯករាជ្យមួយនៅក្នុងប្រទេសដាណឺម៉ាកដែរ។ យោងតាមក្រុមអ្នកជំនាញរញ្ជួយដី កម្លាំងផ្ទុះមានឥទ្ធិពលស្មើនឹងការបំផ្ទុះជាតិ TNT ដល់ទៅ ១០០តោន។ សម្រាប់អ្នកជំនាញស៊ុយអែតលោក Peter Schmidt ការផ្ទុះដោយកម្លាំងខ្លាំងដូចកម្លាំងរញ្ជួយដីទាំងពីរនេះបានធ្វើឲ្យបែកធ្លាយបំពង់បង្ហូរឧស្ម័ន Nord Stream ដល់ទៅ ៣កន្លែងក្នុងពេលតែមួយ។
តើជាស្នាដៃរបស់អ្នកណា?
នៅពេលនេះ គេពិបាកទម្លាក់ការទទួលខុសត្រូវលើអ្នកណាម្នាក់ ឬប្រទេសណាមួយ នោះបើទោះបីជារុស្ស៊ីកំពុងត្រូវបានគេចង្អុលមុខក៏ដោយ។ អ្វីដែលច្បាស់ សហភាពអឺរ៉ុបបានលើកឡើងចំៗថាជាវិច្ឆេទកម្ម ពោលមិនមែនជាគ្រោះថ្នាក់ទេ។ នៅក្នុងសេចក្តីថ្លែងការណ៍ចុះផ្សាយក្នុងថ្ងៃពុធ ទី២៨ កញ្ញា ប្រមុខការទូតអឺរ៉ុបលោក Josep Borrell បានព្រមានប្រឆាំងនឹងគ្រប់ការវាយប្រហារសំដៅលើហេដ្ឋារចនាសម្ព័ន្ធថាមពលអឺរ៉ុប។ តាមលោក Josep Borrell រាល់ទង្វើចេតនាដែលប៉ះពាល់ដល់ហេដ្ឋារចនាសម្ព័ន្ធថាមពលអឺរ៉ុបជារឿងមិនអាចទទួលយកបាន និងត្រូវទទួលការឆ្លើយតបវិញយ៉ាងម៉ឹងម៉ាត់ជាទីបំផុត។
គួរបញ្ជាក់ថា ព្រឹត្តិការណ៍បែកធ្លាយបំពង់បង្ហូរឧស្ម័ន Nord Stream ពេលនេះបានកើតមានឡើង ចំពេលដែលសង្រ្គាមរុស្ស៊ីឈ្លានពានអ៊ុយក្រែនកំពុងបន្តក្តៅគគុក និងខណៈដែលបស្ចិមលោកកំពុងបន្តសង្កត់ ករុស្ស៊ីដោយប្រើទណ្ឌកម្មសេដ្ឋកិច្ច និងការជួយគាំទ្រអ៊ុយក្រែនជាលុយកាក់ និងជាគ្រឿងសព្វាវុធ។ ពីខាងរុស្ស៊ីវិញ ក្រុងមូស្គូបានប្រើឧស្ម័នដែលអឺរ៉ុបបានពឹងខ្លាំងលើខ្លួនជាអាវុធយុទ្ធសាស្រ្តដើម្បីសងសឹកវិញ។ អ៊ីចឹងហើយបានជាមានការលើកឡើងថា មានតួអង្គសំខាន់ចំនួន ៤ ដែលអាចជាប់ពាក់ព័ន្ធនឹងរឿងវិច្ឆេទកម្មទម្លាយបំពង់បង្ហូរឧស្ម័ន Nord Stream គឺអឺរ៉ុប អាមេរិក រុស្ស៊ី និងអ៊ុយក្រែន។
តើជាស្នាដៃរបស់អឺរ៉ុបខ្លួនឯង?។ ចម្លើយ គឺប្រហែលមិនអាចទេ ព្រោះអឺរ៉ុបកំពុងត្រូវការឧស្ម័ន។ តើជាស្នាដៃរបស់អាមេរិក?។ វាអាច តែប្រហែលអាមេរិកមិនធ្វើទេ ព្រោះមានផលវិបាកច្រើនជាងផលចំណេញ។ បើជាស្នាដៃរៀបចំដោយអាមេរិកមែន អាមេរិកនឹងបាត់បង់កិត្តិយស បែកបាក់ជាមួយអឺរ៉ុប និងជាមួយអង្គការអូតង់។ តើជាស្នាដៃរបស់អ៊ុយក្រែន?។ រឿងអីថាមិនបាន ព្រោះអ៊ុយក្រែនកំពុងចង់ឲ្យអឺរ៉ុបឈប់ទិញឧស្ម័នទាំងស្រុងពីរុស្ស៊ីស្រាប់ផង។ តែបញ្ហានៅត្រង់ថា អ៊ុយក្រែនគ្មានសមត្ថភាពទៅកម្ទេចបំពង់ Nord stream ដល់បាតសមុទ្រទេ។ ដូច្នេះនៅសល់តួអង្គរុស្ស៊ីដែលមានទាំងសមត្ថភាព និងលទ្ធភាពក្នុងការធ្វើរឿងនេះ។
តែសំណួរដែលចោទ បើរុស្ស៊ីចង់ឈប់បញ្ជូនឧស្ម័នទៅអឺរ៉ុបទាំងស្រុង រុស្ស៊ីអាចបិទរ៉ូប៊ីណេបានទេតើ ចាំបាច់អីទៅទម្លាយបំពង់ Nord stream ដែលខ្លួនកំពុងមានភាគហ៊ុនច្រើននោះ?។ ទាំងនេះគ្រាន់ជាសម្មតិកម្ម ហើយអ្វីដែលកំពុងកើតមានពេលនេះ គឺការមានមន្ទិលសង្ស័យ និងការចោទគ្នាទៅវិញ ទៅមក។
ដាណឺម៉ាក និងន័រវែសប្រកាសដាក់ហេដ្ឋារចនាសម្ព័ន្ធថាមពលក្នុងភាពអាសន្ន
ក្រោយការផ្ទុះធ្លាយបំពង់បង្ហូរឧស្ម័ន Nord Stream ប្រទេសដាណឺម៉ាក និងន័រវែសបានប្រកាសដាក់ហេដ្ឋារចនាសម្ព័ន្ធថាមពលរបស់ខ្លួនក្នុងភាពអាសន្ន។ ការធ្វើចរាចរណ៍សមុទ្រនៅក្បែរតំបន់ធ្លាយឧស្ម័នត្រូវបានហាមឃាត់។ រដ្ឋមន្រ្តីក្រសួងថាមពលបានប្រកាសពង្រឹងវិធានការសន្តិសុខនៅតាមស្ថានីយ៍ប្រេង និងឧស្ម័ននៅគ្រប់ទីកន្លែងទាំងអស់។ នេះជាវិធានការបង្ការដើម្បីទប់ស្កាត់នឹងការវាយប្រហារជាយថាហេតុណាមួយដូចករណីបំពង់បង្ហូរឧស្ម័ន Nord Stream។ ចូរកុំភ្លេចថាក្រៅពីរុស្ស៊ី ន័រវែស និងដាណឺម៉ាកក៏ជាប្រទេសផ្គត់ផ្គង់ឧស្ម័នឲ្យអឺរ៉ុបដែរ ពិសេសន័រវែស។
ក្នុងថ្ងៃទទួលព័ត៌មានពីការបែកធ្លាយបំពង់ Nord stream ប្រទេសន័រវែសបានបើកសម្ពោធបំពង់បង្ហូរឧស្ម័នទៅកាន់ប្រទេសប៉ូឡូញ។ ខណៈនេះ និងអត់ពីរុស្ស៊ី ន័រវែសក្លាយជាប្រទេសផ្គត់ផ្គង់ឧស្ម័នច្រើនជាងគេឲ្យអឺរ៉ុប។ ប្រឈមនឹងការបែកធ្លាយបំពង់បង្ហូរឧស្ម័ន Nord stream ពេលនេះ អឺរ៉ុបកំពុងស្ថិតក្នុងស្ថានភាពអាសន្នឧស្ម័នជាងពេលណាៗទាំងអស់ ពិសេសខណៈដែលរដូវត្រជាក់កំពុងឈានមកដល់។ ទន្ទឹមនឹងខ្វះឧស្ម័នប្រើប្រាស់ តម្លៃឧស្ម័នបានហក់ឡើងមួយកម្រិតទៀត។ អាល្លឺម៉ង់ជាប្រទេសដែលកំពុងប្រឈមខ្លាំងជាងគេ ព្រោះពេលនេះ អាល្លឺម៉ង់ដែលធ្លាប់ពឹងលើឧស្ម័នរុស្ស៊ីដល់ទៅ ៥៥% លែងមានឧស្ម័នរុស្ស៊ីប្រើទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ