ឥណ្ឌូណេស៊ី៖មានស្លាប់យ៉ាងតិច ១២៥នាក់នៅក្នុងព្រឹត្តិការណ៍រត់ជាន់គ្នានៅក្នុងពហុកីឡាដ្ឋាន
ចុះផ្សាយនៅថ្ងៃ៖
ស្តាប់ - ០៧:៣០
នៅក្នុងប្រទេសឥណ្ឌូណេស៊ី ព្រឹត្តិការណ៍រត់ជាន់គ្នានៅក្នុងពហុកីឡាដ្ឋានមួយបានបណ្តាលឲ្យមានមនុស្សស្លាប់យ៉ាងតិច ១២៥នាក់ និងរបួសជិត ២០០នាក់។ ឧប្បត្តិហេតុនេះបានកើតមានឡើងនៅយប់ថ្ងៃសៅរ៍ ទី១ តុលា ក្រោយពីមានការប្រកួតរបស់កីឡាករចំនួន ២ក្រុម។ ក្នុងថ្ងៃអាទិត្យ ទី២ តុលានេះ ប្រធានាធិបតីឥណ្ឌូណេស៊ីលោកចូកូ វីដូដូបានបញ្ជាឲ្យមានការស៊ើបអង្កេតមួយជាបន្ទាន់ដើម្បីស្វែងរកការពិត។ ចំណែករដ្ឋាភិបាលបានសម្តែងការសុំទោសចំពោះហេតុការណ៍មួយនេះ ពិសេសសុំទោសចំពោះក្រុមគ្រួសារជនរងគ្រោះ។
អ្វីៗបានកើតមានឡើងនៅក្នុងប្រកួតកីឡាបាល់ទាត់រវាងក្រុមកីឡាករ អារ៉េម៉ា FC និងក្រុមកីឡាករពែរសឺបាយ៉ា ស៊ូរ៉ាបាយ៉ានៅក្នុងពហុកីឡាដ្ឋានកន់យូរូហានក្នុងទីក្រុងម៉ាឡងដែលស្ថិតប៉ែកខាងកើតកោះហ្សាវ៉ាកាលពីយប់ថ្ងៃសៅរ៍ ទី១ តុលា។ រដ្ឋមន្រ្តីសន្តិសុខបានថ្លែងនៅក្នុងសារចុះផ្សាយក្នុងបណ្តាញសង្គមតេឡេក្រាមថា មានសំបុត្រចំនួន ៤២ ០០០សំបុត្រត្រូវបានលក់ ខណៈដែលពហុកីឡាដ្ឋានកន់យូរូហានមិនអាចដាក់មនុស្សលើសពី ៣៨ ០០០នាក់បានឡើយ។ តែនេះមិនមែនជាមូលហេតុនៃការរត់ជាន់គ្នារហូតដល់បណ្តាលឲ្យមានមនុស្សស្លាប់យ៉ាងតិច ១២៥នាក់ និងរបួសជិត ២០០នាក់ទេ។
តាមពិត ហេតុការណ៍បានផ្ទុះឡើងនៅពេលចប់ការប្រកួតដែលក្រុមកីឡាករពែរសឺបាយ៉ា ស៊ូរ៉ាបាយ៉ាបានទាត់ឈ្នះក្រុមកីឡាករ អារ៉េម៉ា FC ៣ ទល់នឹង ២។ គួរបញ្ជាក់ថា ក្រុមកីឡាករបាល់ទាត់ទាំងពីរក្រុមនេះជាគូប្រជែងស្លាប់រស់ ហើយនេះជាលើកទី១ គិតតាំងជាង ២០ឆ្នាំកន្លងទៅដែលក្រុមកីឡាករ អារ៉េម៉ា FC បានទាត់ចាញ់ក្រុមកីឡាករពែរសឺបាយ៉ា ស៊ូរ៉ាបាយ៉ា។ ការចាញ់នេះបានធ្វើឲ្យក្រុមអ្នកគាំទ្រកីឡាករ អារ៉េម៉ា FC ប្រមាណជា ៣ ០០០នាក់ខឹងសម្បារ និងបាននាំគ្នាចូលលើទីលានប្រកួត។ នៅពេលនោះ កម្លាំងសន្តិសុខក៏បានចូលអន្តរាគមន៍ដោយបានបាញ់គ្រាប់បែកផ្សែងបង្ហូរទឹកភ្នែកយ៉ាងច្រើនសម្បើមដើម្បីបំបែកហ្វូងមនុស្ស។
អន្តរាគមន៍របស់កម្លាំងសន្តិសុខនាពេលនោះបានបង្កឲ្យមានភាពចលាចល ការរត់ជាន់គ្នា និងករណីថប់ដង្ហើមដោយគេជាន់ ឬដោយគ្រាប់បែកផ្សែងបង្ហូរទឹកភ្នែក។ រូបភាពដែលទូរទស្សន៍ក្នុងស្រុកបានចាក់ផ្សាយ គឺភាពអនាធិបតេយ្យពេញទីនៅក្នុងពហុកីឡាដ្ឋានដោយមានការវាយប្រតប់គ្នារវាងក្រុមអ្នកគាំទ្រកីឡាករម្ខាងៗ ការវាយលើកម្លាំងប៉ូលិស ដុតឡានប៉ូលិស ការវាយលើកម្លាំងសន្តិសុខនៅក្នុងពហុកីឡាដ្ឋាន ការរត់ប្រសេកប្រសាច ជាន់លើគ្នារបស់អ្នកទស្សនាដើម្បីរកច្រកចេញពីពហុកីឡាដ្ឋាន ឬមួយក៏ការព្យាយាមជួយសង្រ្គោះអ្នកថប់ដង្ហើម សន្លប់។ តាមមេប៉ូលិសក្នុងស្រុក មាន ៣៤នាក់បានស្លាប់ភ្លាមៗនៅក្នុងពហុកីឡាដ្ឋាន ហើយអ្នកផ្សេងទៀតបានស្លាប់នៅមន្ទីរពេទ្យក្រោយរងរបួសធ្ងន់។
ការស៊ើបអង្កេតបានចាប់ផ្តើម
ព្រឹត្តិការណ៍សោកសៅមួយនេះមិនអាចស្ថិតនៅដោយគ្មានការស្វែងរកការពិតបានឡើយ។ នៅក្នុងបទអន្តរាគមន៍តាមទូរទស្សន៍នាព្រឹកថ្ងៃអាទិត្យ ទី២ តុលា ប្រធានាធិបតីឥណ្ឌូណេស៊ីលោកចូកូ វីដូដូបានបញ្ជាឲ្យបើកការស៊ើបអង្កេតមួយជាបន្ទាន់ និងបញ្ជាឲ្យបញ្ឈប់រាល់ការប្រកួតកីឡាបាល់ទាត់ផ្សេងទៀតរហូតដល់មានលទ្ធផលនៃការស៊ើបអង្កេត។ ទន្ទឹមគ្នានេះ លោកវីដូដូបានបញ្ជាឲ្យរដ្ឋមន្រ្តីកីឡា មេប៉ូលិសជាតិ និងប្រធានសមាគមកីឡាបាល់ទាត់ជាតិដឹកនាំការវាយតម្លៃទូទៅលើការប្រកួតកីឡាបាល់ទាត់ និងនីតិវិធីសន្តិសុខនៅក្នុងពហុកីឡាដ្ឋាន។ លោកវីដូដូសង្ឃឹមថា សោកនាដកម្មនៅពហុកីដ្ឋានម៉ាឡងជាសោកនាដកម្មចុងក្រោយសម្រាប់កីឡាបាល់ទាត់នៅក្នុងប្រទេស។
ចំណែករដ្ឋាភិបាលបានសម្តែងការសុំទោសចំពោះសោកនាដកម្មមួយនេះ និងសុំទោសជាពិសេសចំពោះក្រុមគ្រួសារជនរងគ្រោះ។ ការចូលរួមសោកស្តាយចំពោះការបាត់បង់ជីវិតមនុស្សដ៏ច្រើនក៏មានពីប្រធានសហព័ន្ធបាល់ទាត់អាស៊ីលោកសាលម៉ាន ប៊ីន អ៊ីប្រាហ៊ីម អាល់ ខាលីហ្វានៅក្នុងសេចក្តីប្រកាសព័ត៌មានមួយ។ គួរបញ្ជាក់ថានៅឥណ្ឌូណេស៊ី អំពើហិង្សារវាងក្រុមអ្នកគាំទ្រកីឡាកររៀងៗខ្លួនឧស្សាហ៍កើតមានឡើង និងដែលពេលខ្លះ ការប្រទូស្រា្តយគ្នាបានឈានដល់ការកាប់សម្លាប់គ្នាយ៉ាងសាហាវទៀតផង។
សោកនាដកម្មពេលនេះជាមេរៀនសម្រាប់ឥណ្ឌូណេស៊ី
ពហុកីឡាដ្ឋានឥណ្ឌូណេស៊ីត្រូវបានគេចាត់ទុកជាពហុកីឡាដ្ឋានមួយក្នុងចំណោមពហុកីឡាដ្ឋានដែលប្រកបដោយគ្រោះថ្នាក់ជាងគេក្នុងលោក។ គ្រោះថ្នាក់ដែលគេចង់និយាយនេះ គឺការប្រឈមមុខដាក់គ្នារវាងក្រុមអ្នកគាំទ្រកីឡាកររៀងៗខ្លួន។ ជាទូទៅ អំពើហិង្សានៅក្នុងពហុកីឡាដ្ឋានច្រើនផ្ទុះឡើងនៅក្រោយចប់ការប្រកួត និងពេលខ្លះអាចនៅមុនការប្រកួត។ ព្រឹត្តិការណ៍ដែលទើបកើតមាននៅឥណ្ឌូណេស៊ីពេលនេះត្រូវបានគេចាត់ទុកសោកនាដកម្មស្លាប់មនុស្សច្រើនជាងគេនៅក្នុងការប្រកួតបាល់ទាត់ ក្រោយពីព្រឹត្តិការណ៍ឆ្នាំ ១៩៦៤ នៅក្នុងពហុកីឡាដ្ឋានជាតិ Estado ក្រុងលីម៉ា ប្រទេសប៉េរូ។
កាលណោះ ព្រឹត្តិការណ៍ជ្រួលច្របល់ រត់ជាន់គ្នានៅក្នុងការប្រកួតបាល់ទាត់រវាងក្រុមកីឡាករប៉េរូ និងអាហ្សង់ទីនបានបណ្តាលឲ្យមានមនុស្សស្លាប់ ៣២៨នាក់ និងរបួស ១ ០០០នាក់។ ដូច្នេះសម្រាប់ឥណ្ឌូណេស៊ី សោកនាដកម្មក្នុងយប់ថ្ងៃសៅរ៍ ទី១ តុលាជាមេរៀនមួយដែលរដ្ឋអំណាចត្រូវគិតគូរ និងសើរើមើលឡើងវិញពីសន្តិសុខនៅក្នុងពហុកីឡាដ្ឋាន។ ចូរកុំភ្លេចថា ឥណ្ឌូណេស៊ីត្រូវធ្វើជាម្ចាស់ផ្ទះរៀបចំការប្រកួតកីឡាបាល់ទាត់ពិភពលោកសម្រាប់កីឡាករក្រោមអាយុ ២០ឆ្នាំនៅខែឧសភា និងមិថុនា ឆ្នាំ ២០២៣ និងចំពេលដែលឥណ្ឌូណេស៊ីកំពុងដាក់បេក្ខភាពជាអ្នករៀបចំការប្រកួតកីឡាបាល់ទាត់អាស៊ីក្នុងឆ្នាំ ២០២៣។
ឥណ្ឌូណេស៊ីក៏ដូចជាប្រទេសអាស៊ីខ្លះ រួមទាំងប្រទេសក្រៅតំបន់អាស៊ីផង បាល់ទាត់ដែលជាកីឡាមួយពេញនិយមមិនគួរណាស់ប្រែក្លាយទៅជាព្រឹត្តិការណ៍សោកនាដកម្មដូចពេលនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ