រុស្ស៊ីកោះប្រជុំក្រុមប្រឹក្សាសន្តិសុខ ចំណែកក្រុងធំៗរបស់អ៊ុយក្រែន រងការទម្លាក់គ្រាប់បែក
ចុះផ្សាយនៅថ្ងៃ៖
ស្តាប់ - ០៧:១៣
ពីរថ្ងៃក្រោយផ្ទុះស្ពានគ្រីមេ ក្រុងធំៗរបស់អ៊ុយក្រែន ក្នុងនោះរួមមានទាំងរដ្ឋធានីកៀវផង រងការវាយប្រហារដោយទម្លាក់គ្រាប់បែក។ លោក វ្ល៉ាឌីមៀរ ពូទីន បានលើកឡើងថា «ការឆ្លើយតបរបស់រុស្ស៊ី គឺឲ្យសក្តិសមនឹងទំហំនៃការគំរាមកំហែងចំពោះប្រទេសរុស្ស៊ី»។ ប្រសាសន៍នេះ ទំនងជាសំដៅដល់ការវាយបកចំពោះការបំផ្ទុះស្ពានគ្រីមេ ដែល រុស្ស៊ី ចោទថាជាស្នាដៃរបស់ អ៊ុយក្រែន។ នៅម៉ូស្គូ ថ្ងៃទី១០តុលា ក្រុមប្រឹក្សាសន្តិសុខជាតិរុស្ស៊ីជួបប្រជុំគ្នាក្រោមអធិបតីភាពរបស់លោកប្រមុខរដ្ឋ វ្ល៉ាឌីមៀរ ពូទីន។
រដ្ឋធានីកៀវ រងការទម្លាក់គ្រាប់បែកនិងមីស៊ីល ជាថ្មី បន្ទាប់ពីអាក់ខាន ប្រមាណជា ៣ ខែ។
នៅព្រឹកថ្ងៃច័ន្ទ មានមីស៊ីលចំនួន ៧៥គ្រាប់ ដែល រុស្ស៊ី បាញ់ទៅទឹកដីអ៊ុយក្រែន ហើយក្នុងមានចំនួន ប្រមាណ៤០គ្រាប់ ត្រូវប្រព័ន្ធការពារផ្លូវអាកាសរបស់ អ៊ុយក្រែន បានបាញ់កម្ទេច។ នេះបើតាមការអះអាង របស់ ទីបញ្ជាការកងទ័ពអ៊ុយក្រែន ដែលប្រកាសតាមប្រព័ន្ធតេលេក្រាម។ ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី មានប្រសាសន៍បញ្ជាក់ដែរថា ការវាយប្រហារនេះ មានទាំងមីស៊ីល និងយន្តហោះដ្រូនទម្លាក់គ្រាប់បែក ហើយដែលមានចេតនាកម្ទេចបំផ្លាញ់ទីតាំងហេដ្ឋារចនាសម្ព័ន្ធសំខាន់ ដូចជាកន្លែងផ្ទុះថាមពលជាដើម។ លោក ហ្សេឡេនស្គី ឲ្យដឹងទៀតថា ដ្រូនទម្លាក់គ្រប់បែក ដែល រុស្ស៊ី ប្រើនោះ ជាយន្តហោះដ្រូនទិញពី អ៊ីរ៉ង់ ហើយបាញ់ចេញពីដែនដី បេឡារុស។ ប្រឈមមុខនឹងការវាយប្រហារច្រើននៅថ្ងៃច័ន្ទ ប្រធានាធិបតីអ៊ុយក្រែន សរសេរក្នុងបណ្តាញសង្គម ថា «ពួកគេព្យាយាមកម្ទេចពួកយើង គឺចង់លុបបំបាត់យើងចេញពីផែនដីនេះតែម្តង។»
មានវិនាសកម្មច្រើនកន្លែង! ការវាយប្រហារនេះ ទម្រង់លក្ខណៈជាការបាញ់ស្រោចស្ទើរតែគ្រប់ទិសតែម្តង។ ទីក្រុងខ្លះដែលមិនត្រូវជាទីកន្លែងសមរភូមិជួរមុខសោះ ក៏បែរជាត្រូវរងការវាយប្រហារដែរ ជាក់ស្តែង តួយ៉ាង តំបន់ Lviv (ល្វីវ) នៅខាងលិចប្រទេស។ តំបន់ផ្សេងទៀត នៃ រដ្ឋធានីអ៊ុយក្រែន ក៏ត្រូវរងគ្រាប់មីស៊ីលដែរ ដូចជា ទែរនូពីល (Ternopil) នៅខាងលិចរដ្ឋធានី, ឌ្នីប្រូ (Dnipro) តំបន់ប៉ែកកណ្តាលរដ្ឋធានី ហើយនិងតំបន់ ហ្សាប៉ូរីចា (Zaporijja) ប៉ែកខាងត្បូងនៃផ្ទៃប្រទេស ព្រមទាំងតំបន់និងក្រុងជាច្រើនផ្សេងទៀត ជាអាទិ៍ Khmelnytskiï, Vinnitsia, Soumi, Kharkiv, Jytomyr ។ តុល្យការ បឋម បើនិយាយតែពីនៅ ហ្សាប៉ូរីចា គឺមានស្លាប់មនុស្ស ១៣ នាក់ និងរបួសប្រមាណ ៩០ នាក់ ។ កាលពី ៣ ថ្ងៃមុន មានស្លាប់ ១៧ នាក់រួចមកហើយ។
បើនិយាយចំពោះតែរដ្ឋធានីកៀវ ! ស្នងការនគលបាលរដ្ឋធានី បញ្ជាក់ថា មានយ៉ាងហោចពលរដ្ឋ ៥ នាក់ស្លាប់ ហើយរបួស ១២ នាក់។ ការទម្លាក់គ្រាប់បែកចុងក្រោយបំផុត ទៅលើរដ្ឋធានីកៀវ គឺនៅថ្ងៃទី ២៦ មិថុនា ហើយតាំងពីនោះមក គឺមិនឃើញមានទេ។ រីឯ ផ្លូវមេត្រូ រថភ្លើងក្រោមដីនៅក្រុងកៀវ កន្លែងខ្លះ ត្រូវខកខាន ហើយប្រព័ន្ធអគ្គីសនី និងប្រព័ន្ធទឹកស្អាត នៅកន្លែងខ្លះក្នុងទីក្រុង ត្រូវកាត់ផ្តាច់ ព្រោះតែរងខូចខាតដោយការវាយប្រហាររបស់ រុស្ស៊ី។
តើ លោកខាងលិច បញ្ចេញប្រតិកម្មយ៉ាងដូចម្តេចខ្លះ?
ចំពោះការវាយប្រហាររបស់រុស្ស៊ី ទៅលើបណ្តាទីក្រុងអ៊ុយក្រែន និងបណ្តាលឲ្យគ្រោះថ្នាក់ដល់ជនស៊ិវិល ប្រមុខការទូតសហភាពអឺរ៉ុប Josep Borell បានប្រកាសថ្លែងក្តីរន្ធត់ស្លុតចិត្តជាខ្លាំងចំពោះអំពើសោកនាកដកម្ម ជាថ្មីនេះ និងចាត់ទុកថា ជា«ឧក្រិដ្ឋកិច្ចសង្គ្រាម»។ ប្រធានាធិបតីបារាំង ម៉ាក្រុង ថ្លែងក្តីបារម្ភខ្លាំង។ អង់គ្លេស បានថ្កោលទោសចាស់ដៃដែរ។ តាមរយៈរដ្ឋមន្ត្រីការបរទេសអង់គ្លេស, រដ្ឋបាលក្រុងឡុងឌ្រឺ ចាត់ទុកថា អំពើរុស្ស៊ី គឺមិនអាចទទួលយកបានទាល់តែសោះ និងបញ្ជាក់ទៀតថា «ទង្វើរបស់រដ្ឋបាលម៉ូស្កូនេះ គឺជាសញ្ញាស្តែងពីភាពកម្សោយរបស់លោក ពូទីន និងគឺមិនមែនជាការសម្តែងកម្លាំងទេ»។ នៅលើបណ្តាញសង្គមធ្វីតធ័រ ប្រមុខរាជទូត James Cleverly ធានាបញ្ជាក់ស្មារតីសាមគ្គីភាពជាមួយអ៊ុយក្រែនថា អង់គ្លេសគាំទ្រស្មារតីអ៊ុយក្រែនយ៉ាងពេញទំហឹង។
រីឯប្រទេសម៉ូដាវី ដែលនៅកៀកក្បែរប្រទេសជម្លោះ ក៏ថ្លែងក្តីមិនសប្បាយចិត្តដែរ។ ប្រមុខការទូតម៉ូដាវី បានឲ្យដឹងថា មីស៊ីលរុស្ស៊ីចំនួនបីគ្រាប់ បានហោះរំលងដែនអាកាសរបស់ខ្លួន។
ផ្ទុយទៅវិញ បេឡារុស ជាសម្ព័ន្ធរុស្ស៊ី គឺប្រធានាធិបតី លោក អាឡិចសង់ លូកាស្ហេនកូ បានប្រកាសចោទប្រកាន់ថា អ៊ុយក្រែនត្រៀមវាយប្រហារប្រទេសរបស់ខ្លួន ដូច្នេះអាស្រ័យតែសភាពធ្ងន់ធ្ងរ បេឡារុស ក៏ត្រៀមដាក់ពង្រាយកងទ័ពរួមគ្នា បេឡារុស និង រុស្ស៊ី នៅព្រំដែនអ៊ុយក្រែន ដែរ។
លោក ពូទីន កោះប្រជុំក្រុមប្រឹក្សាសន្តិសុខជាតិរុស្ស៊ី ពិភាក្សាជុំវិញការវាយប្រហារនៅលើស្ពានគ្រីមេ។
នៅវិមានក្រិមឡាំង ប្រមុខរដ្ឋរុស្ស៊ី លោក វ្ល៉ាឌីមៀរ ពូទីន បានកោះប្រជុំអ្នកនយោបាយជាន់ខ្ពស់ រដ្ឋមន្ត្រីធំៗសំខាន់ៗ ថ្នាក់ដឹកនាំផ្នែកសន្តិសុខជាតិ និងមេបញ្ជាយោធា។ ជាការប្រជុំតាមទម្លាប់ តែវាជួនចំពេលសភាពការណ៍ក្តៅ ដ្បិតកិច្ចប្រជុំពិសេសនេះ គឺរំលងតែ៤៨ម៉ោងប៉ុណ្ណោះក្រោយពីស្ពានគ្រីមេ ត្រូវបំផ្ទុះ។ គណៈកម្មាការស៊ើបអង្កេតរុស្ស៊ី ត្រូវផ្តល់សេចក្តីរាយការណ៍ដល់ប្រមុខរដ្ឋ។
ចំពោះរុស្ស៊ី, ហេតុការណ៍នេះ បង្កឡើងដោយភ្នាក់ងារសម្ងាត់អ៊ុយក្រែន ដោយមានជំនួយពីពលរដ្ឋរុស្ស៊ីនិងជនបរទេសទៀតផង។ តាមរយៈវីដេអូមួយ ដែលវិមានក្រិមឡាងបង្ហោះ គឺលោក វ្ល៉ាឌីមៀរ ពូទីន បានចោទប្រកាន់ថា «គ្មានអ្វីត្រូវសង្ស័យទេ នេះជាសកម្មភាពភេរវកម្ម ហើយអ៊ុយក្រែន គឺជាអ្នកប្រព្រឹត្ត ជាអ្នកបញ្ជា និងជាអ្នកនៅពីក្រោយខ្នងផង»។
រុស្ស៊ីបានភ្ជាប់ដែនដីគ្រីមេចូលជាឧបសម្ពន្ធដែនដីរបស់ខ្លួនកាលពីឆ្នាំ២០១៤។ ជុំវិញការឆ្លើយតបរបស់រុស្ស៊ីវិញ ចំពោះការវាយប្រហារលើស្ពានគ្រីមេនេះ លោក វ្ល៉ាឌីមៀរ ពូទីន មានប្រសាន៍ថា «ការឆ្លើយតបរបស់រុស្ស៊ី គឺឲ្យសក្តិសមនឹងទំហំនៃការគំរាមកំហែងចំពោះប្រទេសរុស្ស៊ី»។ ទោះយ៉ាងនេះក្តី ការវាយប្រហារលើស្ពានប៉ុណ្ណេះ គឺមិនទាន់ដល់ថ្នាក់ជំរុញឲ្យរុស្ស៊ីប្រើប្រាស់គ្រាប់បែកនុយក្លេអ៊ែរនោះឡើយ។ នេះបើតាមលោក ពូទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ