នៅមហាសន្និបាត អ.ស.ប.សំឡេងប្រឆាំងការកាត់យកទឹកដីអ៊ុយក្រែនពីសំណាក់រុស្ស៊ីមានសន្ទុះកើនឡើង
ចុះផ្សាយនៅថ្ងៃ៖
ស្តាប់ - ០៧:២៤
អ៊ុយក្រែននឹងទទួលបានប្រព័ន្ធការពារដែនអាកាសពីប្រទេសក្នុងបក្សសម្ព័ន្ធអូតង់ ដើម្បីទប់ទល់ការពារខ្លួនពីការបាញ់ស្រោចមីស៊ីលរបស់រុស្ស៊ី។ ក្រៅពីត្រេកអរទទួលជំនួយយោធាពីអូតង់ និងប្រទេសលោកខាងលិច ប្រធានាធិបតី អ៊ុយក្រែន លោកហ្សេឡេនស្គីបាននិយាយអរគុណផងដែរ ប្រទេសសមាជិករបស់អង្គការសហប្រជាជាតិ ដែលបានបោះឆ្នោត គាំទ្រសេចក្តីសម្រេច ថ្កោលទោសការកាត់យកទឹកដីអ៊ុយក្រែនចំនួន៤ ពីសំណាក់ប្រទេសរុស្ស៊ី។ នៅក្នុងមហាសន្និបាតអង្គការសហប្រជាជាតិ កាលពីថ្ងៃពុធម្សិលមិញ សេចក្តីសម្រេចថ្កោលទោសការកាត់យកទឹកដីអ៊ុយក្រែនបានទទួលសំឡេងគាំទ្រ ចំនួន ១៤៣ សំឡេងប្រឆាំង ចំនួន ៥ និងសំឡេងអនុប្បវាទចំនួន ៣៥។
នៅមហាសន្និបាតអង្គការសហប្រជាជាតិ កាលពីថ្ងៃពុធម្សិលមិញ ប្រទេសចំនួន ១៤៣ បានបោះឆ្នោតគាំទ្រសេចក្តីសម្រេច ថ្កោលទោស ការកាត់យកទឹកដី អ៊ុយក្រែនពីសំណាក់រុស្ស៊ី។ នៅអង្គការសហប្រជាជាតិ សំឡេងប្រឆាំងនឹងការកាត់យកទឹកដីអ៊ុយក្រែនពីសំណាក់រុស្ស៊ី មានចំនួនកើនឡើង បើប្រៀបធៀបនឹងការបោះឆ្នោតនៅមហាសន្និបាតកាលពីខែ មីនា នៅប៉ុន្មានថ្ងៃក្រោយ រុស្ស៊ីធ្វើសង្រ្គាមឈ្លានពានអ៊ុយក្រែន។
នៅថ្ងៃពុធ ប្រទេសចំនួន ១៤៣ បានបោះឆ្នោតគាំទ្រសេចក្តីសម្រេច ថ្កោលទោស ការកាត់យកទឹកដីអ៊ុយក្រែន។ ប្រទេស៥ បានបោះឆ្នោត ប្រឆាំងនឹងសេចក្តីសម្រេច ចំណែកប្រទេស ចំនួន ៣៥ បោះឆ្នោតអនុប្បវាទ។ បើប្រៀបធៀបនឹងការបោះឆ្នោត កាលពីខែ មីនា លើសេចក្តីសម្រេចថ្កោលទោសការឈ្លានពានអ៊ុយក្រែន ដែលមានប្រទេសចំនួន១៤១ បោះឆ្នោត គាំទ្រអធិបតេយ្យភាព និងបូរណភាពរបស់អ៊ុយក្រែន គេឃើញថា សំឡេង គាំទ្រសេចក្តីសម្រេចរបស់មហាសន្និបាតលើកនេះ បានកើនឡើង ពីរសំឡេង។ ចំណែក ចំនួនប្រទេសដែលប្រឆាំង ឬ ប្រទេសដែលបោះឆ្នោតអនុប្បវាទ គឺនៅថេរដដែល គឺ ៥សំឡេង និង៣៥សំឡេង។
ចំនួនសំឡេងគាំទ្រសេចក្តីសម្រេចកើនឡើង ២សំឡេង ព្រោះថា ប្រទេសចំនួន៣ ដូចជាបង់ក្លាដែស អ៊ីរ៉ាក់ និងសេណេហ្កាល់ ដែលធ្លាប់បោះឆ្នោតអនុប្បវាទ កាលពីខែ មីនា បានត្រលប់មកបោះឆ្នោត ប្រឆាំងរុស្ស៊ី ក្នុងរឿងកាត់យកទឹកដីអ៊ុយក្រែន។ ប្រទេសអេរីត្រេដែលធ្លាប់បោះឆ្នោតគាំទ្រ រុស្ស៊ី បានត្រលប់មកបោះឆ្នោតអនុប្បវាទ ចំណែកនីហ្ការ៉ាហ្គ័ ដែលធ្លាប់នៅអព្យាក្រឹត្យ បានចូលមកក្រុមរុស្ស៊ី កូរ៉េខាងជើង ស៊ីរី បេឡារុស ដើម្បីប្រឆាំង មិនឲ្យគេថ្កោលទោសរុស្ស៊ីក្នុងរឿងកាត់យកទឹកដីអ៊ុយក្រែនទៅវិញ។
នៅក្នុងចំណោមប្រទេសបោះឆ្នោតអនុប្បវាទ ចំនួន ៣៥ ដែលមានចិន ឥណ្ឌា ប៉ាគីស្ថាន និងអាហ្វ្រិកខាងត្បូង គេសង្កេតឃើញផងដែរ មានប្រទេសអាហ្វ្រិកដល់ទៅ ១៩ដែលបោះឆ្នោតអនុប្បវាទ។ ហេតុផលគឺប្រទេសអាហ្វ្រិកមិនត្រឹមចង់រក្សាជំហរអាព្យាក្រឹត្យរបស់ខ្លួន ប៉ុន្តែ ក៏ចង់ផងដែរ រក្សាទំនាក់ទំនងជាមួយប្រទេសជម្លោះទាំងពីររុស្ស៊ី និងអ៊ុយក្រែន ដែលជាប្រភពនាំចូលស្រូវសាឡីសំខាន់ទៅរបស់អាហ្វ្រិក។
ប្រទេសគាំទ្រសេចក្តីសម្រេចថ្កោលទោសរុស្ស៊ី មានចំនួនកើនឡើងជាងមុន ក៏ដោយមកពីយុទ្ធនាការទូតបញ្ចុះបញ្ចូលខ្លាំងរបស់អាមេរិក និងអ៊ុយក្រែនផ្ទាល់។ ថ្លែងទៅកាន់មហាអង្គសន្និបាត នៅមុនការបោះឆ្នោត ឯកអគ្គរដ្ឋទូតអាមេរិកនៅអង្គការសហប្រជាជាតិបាននិយាយព្រមានថា ថ្ងៃនេះ រុស្ស៊ី ឈ្លានពានអ៊ុយក្រែន។ ប៉ុន្តែ នៅថ្ងៃស្អែក ដែនដីរបស់ប្រទេសមួយទៀត នឹងអាចរងការរំលោភឈ្លានពាន។ សម្រាប់អ្នកតំណាងអាមេរិក សង្រ្គាមសព្វថ្ងៃកំពុងកើតនៅទឹកដីអឺរ៉ុប ប៉ុន្តែ វាក៏នឹងអាចកើតឡើង នៅអាស៊ី អាហ្វ្រិក ឬនៅអាមេរិកឡាទីន។ ដូច្នេះ ការបោះឆ្នោត ថ្កោលទោស រុស្ស៊ីលើកនេះ គឺជាការព្រមាន បង្កាកុំឲ្យរឿងបែបនេះ អាចកើតឡើងនៅកន្លែងផ្សេងបាន។
នៅក្រោយការបោះឆ្នោត កាលពីថ្ងៃពុធ ប្រធានាធិបតីអាមេរិក លោកចូ បៃដិន បាននិយាយស្វាគម លទ្ធផលឆ្នោត ដែលលោកចាត់ទុកជាសាររបស់សហគមន៍អន្តរជាតិ ទៅកាន់ម៉ូស្គូថា គេមិនអាចលុបបំបាត់អធិបតេយ្យភាពរបស់ប្រទេសមួយ ពីលើផែនទីពិភពលោកបាននោះទេ។
អូតង់ប្រកាសផ្តល់ប្រព័ន្ធខែលមីស៊ីល ដើម្បីឲ្យអ៊ុយក្រែនប្រើបាញ់ទម្លាក់មីស៊ីលរុស្ស៊ី
នៅក្នុងកិច្ចប្រជុំថ្នាក់រដ្ឋមន្រ្តីការពារជាតិ កាលពីថ្ងៃពុធទី ១២តុលា អគ្គលេខាធិការអង្គការអូតង់ បានធានាប្រាប់ភាគីអ៊ុយក្រែនថា ការផ្តល់ប្រព័ន្ធការពារដែនអាកាសទៅឲ្យអ៊ុយក្រែន គឺជាអាទិភាពចំបងរបស់អូតង់។
ខណៈពេលដែលអ៊ុយក្រែនកំពុងបន្តរងស្រោចដោយគ្រាប់មីស៊ីលរបស់រុស្ស៊ី ដែលបានចោទប្រកាន់សងសឹកអ៊ុយក្រែន ថា ជាអ្នកបំផ្ទុះបំផ្លាញស្ពានគ្រីមេ ប្រទេសសមាជិកអូតង់ នាំមុខដោយអាមេរិក អាល្លឺម៉ង់ អង់គ្លេសនិងបារាំង បានចេញមុខ ប្រកាសផ្តល់ប្រព័ន្ធខែលមីស៊ីល ទំនើបៗរបស់ខ្លួន ដើម្បីជួយឲ្យអ៊ុយក្រែន អាចការពារខ្លួនពីការវាយប្រហាររបស់មីស៊ីលរុស្ស៊ី។
អាមេរិកបានសន្យាបញ្ជូនប្រព័ន្ធខែលមីស៊ីល ឈ្មោះ NASAMS។ អាល្លឺម៉ង់បញ្ជូន ប្រព័ន្ធការពារដែនអាកាស Iris-T។ ចំណែកអង់គ្លេសសន្យាបញ្ជូនមីស៊ីលAMRAAMសម្រាប់ប្រព័ន្ធខែលមីស៊ីលរបស់អាមេរិក។ ចំណែកប្រធានាធិបតីបារាំងឯណោះវិញ បានប្រកាសបញ្ជូនរ៉ាដា ប្រព័ន្ធ និងមីស៊ីលប្រឆាំងការវាយប្រហារតាមផ្លូវអាកាស ទៅឲ្យអ៊ុយក្រែន។ ប្រធានាធិបតីបារាំងបានបញ្ជាក់ដែរថា នឹងសហការជាមួយប្រទេសដាណឺម៉ាក ដើម្បីបញ្ជូនកាំភ្លើងផ្លោងCeasarរបស់បារាំង ចំនួន ៦ដើមបន្ថែម ទៀតទៅឲ្យអ៊ុយក្រែន បន្ថែមពីលើកាំភ្លើងCeasar ១៨ដើមដែលបារាំងបានបញ្ជូនទៅឲ្យអ៊ុយក្រែនរួចហើយ។
លោកហ្សេឡេនស្គីថា អ៊ុយក្រែន តូ្រវការជំនួយ ៥៥ពាន់លានដុល្លារ
ក្រៅពីសុំសព្វាវុធ ប្រព័ន្ធខែលមីស៊ីលពីបក្សសម្ព័ន្ធអូតង់ ប្រធានាធិបតីអ៊ុយក្រែន នៅថ្ងៃពុធម្សិលមិញ បាននិយាយសុំជំនួយផងដែរពីក្រុមប្រទេស G7 និងស្ថាប័នហិរញ្ញវត្ថុអន្តរជាតិដូចជាIMF និងធនាគារពិភពលោក។
អ៊ុយក្រែនត្រូវការជំនួយសព្វគ្រប់ ព្រោះបើតាមអ៊ុយក្រែន ការវាយប្រហារមីស៊ីលរបស់រុស្ស៊ី នៅប៉ុន្មានថ្ងៃមកនេះ បានដៅបំផ្លាញទីតាំង ហេដ្ឋារចនាសម្ព័ន្ធស៊ីវិលច្រើនណាស់។ តាមរដ្ឋមន្រ្តីការពារជាតិ អ៊ុយក្រែន ៣០ភាគរយនៃទីតាំងផ្គង់ផ្គង់ថាមពលរបស់អ៊ុយក្រែន បានរងការបាញ់បំផ្លាញរបស់មីស៊ីលរុស្ស៊ី តាំងពីថ្ងៃចន្ទ។ ការណ៍នេះធ្វើឲ្យគេគិតថា រុស្ស៊ីកំពុងចង់ធ្វើបាបប្រជាជនអ៊ុយក្រែន ជាពិសេសនៅពេលរដូវរងាកាន់តែខិតចូលមកដល់។
តាមការវាយតម្លៃរបស់ប្រធានាធិបតីអ៊ុយក្រែន គេត្រូវការចាំបាច់ថវិកា ប្រមាណ ៥៥ពាន់លានដុល្លារ សម្រាប់សាងសង់ហេដ្ឋារចនាសម្ព័ន្ធ ដែលរងការបាញ់បំផ្លាញរបស់មីស៊ីលរុស្ស៊ី។ នៅក្នុងកិច្ចប្រជុំជាមួយមូលនិធិរូបិយវត្ថុអន្តរជាតិ និងក្រុមប្រទេសG7 កាលពីថ្ងៃពុធ ប្រធានាធិបតីអ៊ុយក្រែន អះអាងថា ការផ្តល់ជំនួយសម្រាប់សាងសង់អ៊ុយក្រែន ឡើងវិញ និងឲ្យបានឆាប់បំផុត ជាមធ្យោបាយតែមួយ ដើម្បីយកឈ្នះលើសង្រ្គាមឈ្លានពានរបស់រុស្ស៊ី នៅអ៊ុយក្រែន។
រុស្ស៊ីពន្លយពីការចរចាការទូតដែលមានតួកគីជាអន្តរការី
គិតមកដល់ថ្ងៃព្រហស្បតិ៍ទី ១៣តុលានេះ សង្រ្គាមរុស្ស៊ី ឈ្លានពានអ៊ុយក្រែន ដែលមានរយៈពេល ២៣២ថ្ងៃ មកហើយ បានសម្លាប់ប្រជាជនស៊ីវិលអ៊ុយក្រែន និងកងទ័ពរបស់ប្រទេសទាំងពីរ រាប់ម៉ឺននាក់។ ក្រៅពីបង្កការបំផ្លាញជីវិតមនុស្ស និងហេដ្ឋារចនាសម្ព័ន្ធយ៉ាងធ្ងន់ធ្ងរនៅក្នុងទឹកដី អ៊ុយក្រែន សង្រ្គាមរុស្ស៊ី អ៊ុយក្រែនកំពុងបង្កឲ្យមានវិបត្តិថាមពលឡើងថ្លៃ និងវិបត្តិស្បៀង នៅក្នុងពិភពលោក។
នៅថ្ងៃពុធទី ១២តុលា ទីប្រឹក្សារបស់វិមានក្រេមឡាំងលោកIouri Ouchakov បាននិយាយថា គេកំពុងរង់ចាំ មើលសំណើរបស់តួកគី ដែលចង់ដើរតួជាអន្តរការីសម្រាប់ជម្លោះនៅអ៊ុយក្រែន។ តាមទីប្រឹក្សាខាងលើ នៅក្នុងជំនួបជាមួយ លោកប្រធានាធិបតីពូទីន នៅក្រៅក្របខ័ណ្ឌ នៃសន្និសីទសម្រាប់វិធានការទំនុកចិត្តនៅអាស៊ី នៅទីក្រុងAstana ប្រទេសកាហ្សាក់ស្ថាន ប្រធានាធិបតីតួកគី លោកអ៊ែរដូហ្កាននឹងអាចមានសំណើគួរឲ្យចាប់អារម្មណ៍ខ្លះ សម្រាប់លោកពូទីន ទាក់ទងនឹងសង្រ្គាមអ៊ុយក្រែន។
នៅថ្ងៃអង្គារ រដ្ឋមន្រ្តីការពារជាតិតួកគីបានអំពាវនាវសាជាថ្មី ពីសារៈសំខាន់នៃបទឈប់បាញ់ រវាងរុស្ស៊ី អ៊ុយក្រែន។ តួកគីសមាជិករបស់អូតង់ដែលបដិសេធមិនថ្កោលទោសសេដ្ឋកិច្ចលើរុស្ស៊ី តាមអាមេរិក ធ្លាប់ដើរតួជាអាជ្ញាកណ្តាលសម្រាប់ការចរចាការទូតរវាងភាគីអ៊ុយក្រែន និងរុស្ស៊ី កន្លងមក។ នៅពេលការចរចាស្តីពីការបញ្ចប់ការប្រយុទ្ធគ្នានៅសមរភូមិត្រូវបរាជ័យ តួកគីធ្លាប់បានជោគជ័យ ជំរុញ ឲ្យរុស្ស៊ី និងអ៊ុយក្រែន ចុះកិច្ចព្រមព្រៀង ដើម្បីបើកផ្លូវឲ្យអ៊ុយក្រែនអាចនាំចេញស្រូវសាឡីចេញពីកំពង់ផែ អូដេសា កាលពីខែ កក្កដាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ