សហភាពអឺរ៉ុបបន្ថែមជំនួយកាន់តែធំដល់អ៊ុយក្រែន តាមរយៈការបណ្តុះបណ្តាលទាហាន និងសម្ភារៈយោធា
ចុះផ្សាយនៅថ្ងៃ៖
ស្តាប់ - ០៦:០១
នៅក្នុងបរិបទសង្គ្រាមនៅអ៊ុយក្រែន សហភាពអឺរ៉ុប កំពុងតែបោះជំហានដ៏សំខាន់មួយ នៅក្នុងការជួយទំនុងបម្រុងដល់កងទ័ពអ៊ុយក្រែន ដែលកំពុងតែប្រយុទ្ធមានប្រៀប លើកងទ័ពរុស្ស៊ី។ ជាជំហានថ្មី ដែលសហភាពអឺរ៉ុប នឹងរៀបចំការបណ្តុះបណ្តាល បង្វឹកទាហានអ៊ុយក្រែនជាច្រើនម៉ឺននាក់ នៅក្នុងទឹកដីរបស់ខ្លួន រួមជាមួយនឹងទំនួយថវិកា ចំណាយលើសម្ភារៈយោធា ជាច្រើនរយលានអឺរ៉ុបថែមទៀត។ វាគឺជាលើកទីមួយហើយ ដែលសហភាពអឺរ៉ុប ចេញមុខបណ្តុះបណ្តាលទាហានបរទេស នៅលើទឹកដីខ្លួន នៅក្នុងទំហំដ៏ធំបែបនេះ។
បង្វឹកកងទ័ពអ៊ុយក្រែនលើទឹកដីអឺរ៉ុប
ថ្នាក់ដឹកនាំអឺរ៉ុប បានទទួលស្គាល់ថា គម្រោងប្រតិបត្តិការបណ្ដុះបណ្ដាល បង្វឹកកងទ័ពអ៊ុយក្រែននេះ គឺជាប្រតិបត្តិទ្រង់ទ្រាយធំ លើកដំបូងមិនធ្លាប់មានទេ ដែលអឺរ៉ុបធ្វើនៅលើទឹកដីខ្លួន។ គម្រោងជួយកងទ័ពអ៊ុយក្រែននេះ ត្រូវបានថ្នាក់ដឹកនៃប្រទេសសមាជិកទាំង២៧ នៃសហភាពអឺរ៉ុប បានស្រុះស្រួលគ្នា កាលពីជំនួបកំពូលនៅទីក្រុងប្រាហ្ក កាលពីថ្ងៃទី៣០កញ្ញា។ ហើយនៅថ្ងៃចន្ទ ទី១៧តុលានេះ រដ្ឋមន្ត្រីក្រសួងការបរទេសនៃប្រទេសសមាជិកទាំង២៧ នឹងជួបប្រជុំគ្នានៅ លុចហ្សំបួរដើម្បីនិយាយលម្អិតពីផែនការ ហើយនឹងចាប់ផ្តើមគម្រោងនេះ ភ្លាមៗតែម្តង។
តាមពិតទៅ កន្លងមក តាំងតែពីសង្គ្រាមអ៊ុយក្រែន បានចាប់ផ្ទុះឡើង ប្រទេសមួយចំនួននៅអឺរ៉ុប និងអង់គ្លេសជាដើម បានចាប់ផ្តើមអនុវត្តគម្រោង បណ្តុះបណ្តាល បង្វឹកកងទ័ពអ៊ុយក្រែន ខ្លះហើយ គ្រាន់តែថា វាមានលក្ខណៈរប៉ាត់រប៉ាយច្រើន។ ហេតុដូច្នេះហើយ បានជាសហភាពអឺរ៉ុប ចង់ធ្វើវាឲ្យមានលក្ខណៈរួម ជាបណ្តុំជាក្រុម ចាត់ចែងពីទីបញ្ជាការរួមតែមួយ ដើម្បីឲ្យវាមានប្រសិទ្ធភាពខ្ពស់។ ផែនការបណ្តុះបណ្តាលរួមចាត់ចែងដោយសហភាពអឺរ៉ុប មានន័យ ថវិកាចំណាយ ក៏នឹងត្រូវស្រាក់គ្នាដែរ រវាងប្រទេសទាំងអស់ ដែលក្នុងនោះ អាល្លឺម៉ង់ បារាំង អ៊ីតាលី អេស្ប៉ាញ ជាអ្នកចូលរួមវិភាគទានច្រើនជាងគេ។ គម្រោងនេះ មានថវិកាចំណាយ សម្រាប់ឆ្នាំដំបូង ចំនួនខ្ទង់ ពី៥០ ទៅ៦០លានអឺរ៉ូ។
ជំហានដំបូង បង្វឹកទាហានអ៊ុយក្រែន១៥០០០នាក់
តាមអ្វីដែលគ្រោងទុក គឺជាជំហានដំបូង គេនឹងបណ្តុះបណ្តាល បង្វឹកទាហានអ៊ុយក្រែន ចំនួន ១៥០០០នាក់ ដែលក្នុងនោះ ១២០០០នាក់ នឹងទទួលបានការបណ្តុះបណ្តាលលើមូលដ្ឋានគ្រិះទូទៅ ចំណែក ២៨០០នាក់ទៀត គឺទទួលបានការបណ្តុះបណ្តាលជំនាញ។ ប្រភពពីមន្ត្រីទូតសហភាពអឺរ៉ុប អះអាងថានេះ ជាកម្មវត្ថុដំបូង ដែលអាចនឹងប្រែប្រួល កើនទំហំ ជាបន្តបន្ទាប់ទៀត។
គេនឹងបង្កើតទីបញ្ជាការដ្ឋានរួមមួយ ទទួលបន្ទុកកិច្ចការបណ្តុះបណ្តាលនេះ។ ចំពោះទីតាំងបណ្តុះបណ្តាលវិញ គឺមាន២ធំៗ មួយស្ថិតនៅប៉ូឡូញ ដែលមានព្រំដែនជាប់អ៊ុយក្រែន ងាយស្រួលឲ្យទាហានអ៊ុយក្រែនចេញចូល ហើយមួយទៀត នៅអាល្លឺម៉ង់។ អាល្លឺម៉ង់ បញ្ជាក់ថាខាងគេ គេមានគម្រោងបណ្តុះបណ្ដាលកងល្បាតអ៊ុយក្រែន ប្រមាណជិត១ម៉ឺននាក់។ ចំណែករដ្ឋមន្ត្រីការពារជាតិបារាំងវិញ បានបញ្ជាក់នៅព្រឹកមិញនេះថា បារាំងនឹងទទួលបង្វឹកទាហានជំនាញអ៊ុយក្រែន ចំនួនប្រមាណ២ពាន់នាក់។
ទាក់ទិននឹងកម្មវិធីបណ្តុះបណ្តាល ដែលទាហានអ៊ុយក្រែនត្រូវការ គឺមានច្រើនផ្នែកណាស់។ ខាងភាគីអ៊ុយក្រែន បានស្នើសុំកម្មវិធីបណ្តុះបណ្តាលជាច្រើន ដែលភាគច្រើនពាក់ព័ន្ធនឹងរបៀបប្រើប្រាស់ ថែរក្សា ជួលជុល សម្ភារៈសព្វាវុធថ្មីៗ ដែលខ្លួនទើបតែទទួលបាន។ កងទ័ពអ៊ុយក្រែន ត្រូវការចេះប្រើប្រាស់ កាណុងកាំភ្លើងធំទំនើបៗ ប្រព័ន្ធរ៉ាដាចាប់ដ្រូន ចាប់មីស៊ីលរបស់សត្រូវ ជាដើម។ល។ ក្រៅពីនេះ នៅមានការបណ្តុះបណ្តាល ផ្នែកដោះមីន ប្រតិបត្តិការតាក់ទិក ការត្រៀមការពារផ្នែកផ្លូវអាកាស គ្រប់គ្រងបណ្តាញទំនាក់ទំនងទូរគមនាគមន៍ និងផ្នែកពេទ្យសង្គ្រោះផងដែរ។ ហើយបើតាមការបញ្ជាក់ពីមន្ត្រីអឺរ៉ុប គឺប្រទេសនីមួយៗ ដែលផ្តល់ជំនួយសព្វាវុធ ប្រភេទមួយណាទៅឲ្យអ៊ុយក្រែន គឺត្រូវតែបន្តផ្តល់ការបណ្តុះបណ្ដាល បង្វឹកលើការប្រើប្រាស់គ្រឿងសព្វាវុធនោះ។
បន្ថែមកញ្ចប់ថវិកាគ្រឿងសព្វាវុធជួយអ៊ុយក្រែន ៥០០លានអឺរ៉ូ
បើគ្មានអ្វីប្រែប្រួលទេ កិច្ចប្រជុំនៅលុចហ្សំបួរ ថ្ងៃនេះ គឺក្រុមប្រទេសអឺរ៉ុប នឹងសម្រេចបញ្ចេញកញ្ចប់ថវិកា ចំនួន៥០០លានអឺរ៉ុបមួយកញ្ចប់ទៀត ដើម្បីជួយផ្នែកសម្ភារៈ គ្រឿងសព្វាវុធឲ្យអ៊ុយក្រែន។ មានន័យថា គិតជាសរុប គឺអឺរ៉ុប ជួយអ៊ុយក្រែនផ្នែកនេះ ចំនួន៣ពាន់លានអឺរ៉ូហើយ។ នេះនៅមិនទាន់រាប់ ជំនួយយោធា ដែលប្រទេសសមាជិកនីមួយបានជួយអ៊ុយក្រែន ជាលក្ខណៈទ្វេភាគីទេ។
លោករដ្ឋមន្ត្រីការបរទេសអ៊ុយក្រែន នឹងមានវត្តមាន តាមប្រព័ន្ធវីដេអូខុសហ្វឺរិនស៍ នៅក្នុងកិច្ចប្រជុំថ្ងៃនេះ។ បារាំង មានគម្រោង ផ្តល់ឲ្យអ៊ុយក្រែន នូវកាណុងCaesar ចំនួន៦កាណុងទៀត បន្ថែមពីលើ១៨កាណុង ដែលបានប្រគល់រួចរាល់ហើយ ហើយដែលកងទ័ពអ៊ុយក្រែន យកទៅប្រើយ៉ាងមានប្រសិទ្ធភាពបំផុត។ បន្ថែមពីនេះ បារាំងនឹងផ្តល់ប្រព័ន្ធបាញ់គ្រាប់កាំភ្លើងត្បាល់ ១៥៥មីលីម៉ែត្រ កាណុងបាញ់គ្រាប់រ៉ូកែត LRU ព្រមទាំងប្រព័ន្ធការពារ ពីដីទៅអាកាស ដើម្បីប្រឆាំងនឹងនឹងយានដ្រូនរបស់រុស្ស៊ី។ ចំណែកអាល្លឺម៉ង់ និង អេស្ប៉ាញវិញ បានប្រកាសថា នឹងជួយផ្ដល់ឲ្យអ៊ុយក្រែន នូវប្រព័ន្ធការពារផ្លូវអាកាស។
យើងឃើញថាក្រុមប្រទេសអឺរ៉ុប បានសម្លឹងឃើញគ្រោះថ្នាក់ធំណាស់ ទាក់ទិននឹងការគំរាមរបស់រុស្ស៊ីមកលើសន្តិសុខរបស់គេ។ ថ្ងៃនេះរុស្ស៊ីវាយឈ្លានពានអ៊ុយក្រែន ថ្ងៃក្រោយរុស្ស៊ីនឹងបន្តវាយលុកឈ្លានពានមកលើប្រទេសផ្សេងទៀត ដែលជាសមាជិកសហភាពអឺរ៉ុប។ ដូច្នេះហើយ វាជារឿងចាំបាច់បំផុតដែលពេលនេះ អឺរ៉ុបត្រូវតែជួយអ៊ុយក្រែន យកឈ្នះលើរុស្ស៊ីឲ្យបាន។ លោក Josep Borrell ប្រមុខការទូតអឺរ៉ុប បានអះអាងហើយថា អឺរ៉ុបនឹងមកទុកចោល ឲ្យអ៊ុយក្រែន ខ្វះមុខខ្វះក្រោយក្នុងការការពារខ្លួន ប្រយុទ្ធតតាំងនឹងការឈ្លានពានរបស់រុស្ស៊ីជាដាច់ខាត។ មិនថា សហភាពអឺរ៉ុប អង់គ្លេស ឬសហរដ្ឋអាមេរិកទេ គឺគេនឹងរួមគ្នាជួយអ៊ុយក្រែន ទោះត្រូវចំណាយប៉ុន្មានក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ