លោក រីស៊ី ស៊ូណាក់ នាយករដ្ឋមន្ត្រីថ្មីអង់គ្លេស ក្នុងបរិបទវិបត្តិដ៏សែនធ្ងន់ ទាំងសេដ្ឋកិច្ចនិងនយោបាយ
ចុះផ្សាយនៅថ្ងៃ៖
ស្តាប់ - ០៧:២៨
៤ថ្ងៃក្រោយលោកស្រី លីស ត្រាស្ស បានលាចុះពីតំណែងនាយករដ្ឋមន្ត្រីអង់គ្លេស គណបក្សអភិរក្សនិយមអង់គ្លេសបានសម្រេចតែងតាំង លោក រីស៊ី ស៊ូណាក់ ជាប្រធានថ្មីរបស់គណបក្ស កាលពីថ្ងៃចន្ទម្សិលមិញ។ ហើយនៅថ្ងៃអង្គារទី២៥តុលា លោក រីស៊ី ស៊ូណាក់ បានចូលគាល់ ព្រះចៅហ្សាលទី៣ ដើម្បីទទួលការប្រទានតំណែង តែងតាំងជានាយករដ្ឋមន្ត្រីថ្មី។ អាណត្តិនាយករដ្ឋមន្រ្តី របស់លោក រីស៊ី ស៊ូណាក់ គឺស្ថិតនៅក្នុងបរិបទមួយលំបាកលំបិនបំផុត ព្រោះប្រទេសអង់គ្លេស កំពុងតែជួបវិបត្តិយ៉ាងធ្ងន់ធ្ងរ មិនថាសេដ្ឋកិច្ច និងនយោបាយ។
នាយករដ្ឋមន្ត្រីក្មេងជាងគេ និងមានដើមកំណើតឥណ្ឌា
ម៉ោង១០ព្រឹកថ្ងៃអង្គារទី២៥តុលា លោកស្រី លីស ត្រាស្ស បានថ្លែងសុន្ទរកថាជាចុងក្រោយ នៅខាងមុខផ្ទះលេខ១០ ផ្លូវ Downing Street។ បន្ទាប់មកទៀត លោកស្រី បានចូលទៅគាល់ព្រះអង្គ ហ្សាលទី៣ ដើម្បីថ្វាយសារលាឈប់ពីមុខងារ។ ហើយជាបន្ទាប់មកទៀត គឺលោក រីស៊ី ស៊ូណាក់ បានចូលគាល់ព្រះអង្គហ្សាលទី៣ ដើម្បីទទួលបានការប្រទាន តែងតាំងជាផ្លូវការ ជានាយករដ្ឋមន្ត្រីថ្មីរបស់អង់គ្លេស។ មុននេះបន្តិច ម៉ោង១១ និង៣៥នាទីព្រឹក លោក រីស៊ី ស៊ូណាក់ បានថ្លែងសុន្ទរកថាជាលើកដំបូង នៅខាងមុខផ្ទះលេខ១០ ផ្លូវ Downing Street ដើម្បីចូលកាន់មុខងារជាផ្លូវការ ចាប់ពីថ្ងៃនេះទៅ។
នេះគឺជាលើកទីមួយហើយ ក្នុងប្រវត្តិសាស្ត្រអង់គ្លេស ដែលមាននាយករដ្ឋមន្ត្រី មានដើមកំណើតមកពីឥណ្ឌា ហើយមានវ័យក្មេងជាងគេថែមទៀត។ ឪពុកម្តាយលោក មានដើមកំណើតឥណ្ឌាទាំង២នាក់ ស្រុកកំណើតនៅតំបន់ពុនចាប់ ហើយបានភៀសខ្លួនទៅរស់នៅកេនយ៉ា កាលជំនាន់ឆ្នាំ១៩៦០ មុននឹងមករស់នៅលើទឹកដីអង់គ្លេស។ ឪពុកលោកធ្វើពេទ្យ ម្តាយលោកជាឱសថការី។ លោក រីស៊ី ស៊ូណាក់ កើតនៅតំបន់ Southamton ប្រទេសអង់គ្លេស នៅឆ្នាំ១៩៨០ ជាកូនច្បងគេ។ លោកបានចូលរៀននៅសកលវិទ្យាល័យOxford ជំនាញទស្សនវិទ្យា សេដ្ឋកិច្ច និងវិទ្យាសាស្ត្រនយោបាយ។ លោកក៏មានសញ្ញាប័ត្រអនុបណ្ឌិត ផ្នែកគ្រប់គ្រងជំនួញ នៅសកលវិទ្យាល័យ Standford សហរដ្ឋអាមេរិកដែរ។
លោករីស៊ី ស៊ូណាក់ បានចូលប្រឡូកក្នុងនយោបាយ ដោយបានជាប់ឆ្នោតជាសមាជិកសភា តំបន់Yorkshire នៅឆ្នាំ២០១៥។ លោកក៏ជាអ្នកនយោបាយម្នាក់ ដែលបានប្រកាសគាំទ្រ Brexit ដែរ។ ក្នុងអាណត្តិលោកបូរីស ចនសុន លោកត្រូវបានតែងតាំងជារដ្ឋមន្ត្រីក្រសួងសេដ្ឋកិច្ចហិរញ្ញវត្ថុ រហូតទាល់តែមានការខ្វែងគំនិតគ្នា កាលពីខែកក្កដា ឆ្នាំ២០២១ ទើបលោកបានចាកចេញពីរដ្ឋាភិបាល។ កាលពីដើមខែកញ្ញា លោកបានបរាជ័យ មិនត្រូវបានសមាជិកបក្សអភិរក្សនិយមជ្រើសតាំងជានាយករដ្ឋមន្ត្រី។ តែទីបំផុត លោកស្រីលីស ត្រាស្ស បានលាឈប់វិញ ដោយសារតែគ្មានសមត្ថភាព កំណត់គោលនយោបាយរួម ដើម្បីដោះស្រាយវិបត្តិសេដ្ឋកិច្ចនៅអង់គ្លេស។
វិបត្តិធ្ងន់២ផ្ទួនគ្នា
សេដ្ឋកិច្ចអង់គ្លេសចុះខ្សោយ ជីវភាពប្រជាជនជួបការលំបាក ដោយសារតែបញ្ហាBrexit ៣-៤ឆ្នាំមកហើយ ហើយវាកាន់តែលំបាកមួយជាន់ទៀត ដោយសារតែសង្គ្រាមនៅអ៊ុយក្រែន។ តម្លៃទំនិញចំណីអាហារ តម្លៃប្រេងឥន្ធនៈ តម្លៃហ្កាស ជាពិសេសតម្លៃចរន្តអគ្គិសនី គឺបានឡើងថ្ងៃមួយគុណជា២។ ប្រជាជនកាន់តែច្រើនទៅៗ ដែលមិនអាចមានប្រាក់ បង់ថ្លៃចំណាយទាំងនេះបានទេ។ អត្រាអតិផរណានៅអង់គ្លេស មានចំនួន១០,១% ពោលគឺខ្ពស់ជាងគេក្នុងចំណោមប្រទេសសេដ្ឋកិច្ចនាំមុខ G7។
វិបត្តិកាន់តែផុងជ្រៅ បន្ទាប់ពីលោកស្រី លីស ត្រាស្ស បានប្រកាសគោលនយោបាយ កាត់បន្ថយពន្ធ ហើយបានធ្វើឲ្យទីផ្សារហិរញ្ញវត្ថុរំជើបរំជួលខ្លាំង។ ស្ថាប័នទីផ្សារហិរញ្ញវត្ថុ ដែលមិនយល់ស្របជាមួយផែនការសេដ្ឋកិច្ចរបស់លោកស្រី លីស ត្រាស្ស បានបង្កើនការប្រុងប្រយ័ត្នខ្ពស់ មិនចង់ចំណាយប្រាក់វិនិយោគ និងផ្តល់កម្ចីផ្សេងៗទេ។ ប្រការនេះ បានធ្វើឲ្យអត្រាការប្រាក់ ជាពិសេសសម្រាប់កម្ចីអចលនៈទ្រព្យ ដែលការប្រាក់បានឡើង ពី៣% រហូតដល់ជាង ៦%។ ការិយាល័យប្រឹក្សា Capital Economics បានព្យាករណ៍ថាឆ្នាំនេះ ចំណូលដុលក្នុងស្រុករបស់អង់គ្លេស អាចនឹងដើរថយក្រោយ ចំនួន២%។
យោងតាមលោក Paul Johnson អគ្គនាយក Institute for Fiscal Studies គឺលោករីស៊ី ស៊ូណាក់ នាយករដ្ឋមន្ត្រីថ្មី ត្រូវប្រឈមនឹងជម្រើសដ៏លំបាកខ្លាំងណាស់។ ទីមួយត្រូវតែធានា ឲ្យទីផ្សារហិញ្ញវត្ថុមានទំនុកចិត្តឡើងវិញ ក្នុងការវិនិយោគ ផ្តល់កម្ចីជម្រុញសន្ទុះសេដ្ឋកិច្ច។ ទី២ត្រូវតែទប់កុំឲ្យបំណុលសាធារណៈឡើងកាន់តែខ្ពស់ ដែលមានន័យថា លោកត្រូវតែតម្លើងពន្ធក្នុងកម្រិតមួយសមល្មម ដើម្បីកុំឲ្យជីវភាពប្រជាជនកាន់តែលំបាក។ យោងតាមការគុណគូរ គឺលោក រីស៊ី ស៊ូណាក់ ត្រូវតែរកប្រាក់មកបំពេញចន្លោះប្រហោង ចំនួនយ៉ាងហោច ៣ម៉ឺនលានលីវ្រស្ទែរលីង ក្នុងមួយឆ្នាំ ទើបអាចទប់បំណុលសាធារណៈបាន។ ដូច្នេះ តើត្រូវទៅរកប្រាក់នេះពីណាមក?
ក្នុងសន្ទរកថាខ្លីរបស់លោកកាលពីថ្ងៃចន្ទ បន្ទាប់ពីសមាជិកសភាបក្សអភិរក្សនិយម បានតែងតាំងលោកជាប្រធានបក្ស លោករីស៊ី ស៊ូណាក់ បានលើកឡើងថា “អង់គ្លេសគឺជាប្រទេសមួយដ៏ធំអស្ចារ្យ ក៏ប៉ុន្តែវាច្បាស់ណាស់ ដែលយើងត្រូវទទួលស្គាល់ការពិត ថាយើងកំពុងតែឆ្លងកាត់វិបត្តិសេដ្ឋកិច្ចធ្ងន់ធ្ងរណាស់”។ លោកបានអះអាងទៀតថា អាទិភាពរបស់លោក គឺប្រឹងប្រែងដឹកនាំប្រទេស បង្រួបបង្រួមកុំឲ្យមានការបែកបាក់គ្នា ដើម្បីស្តារស្ថិរភាពសេដ្ឋកិច្ច និងនយោបាយឡើងវិញ។
បោះឆ្នោតសភាមុនអាណត្តិ?
ត្រឹមតែ៦ខែចុងក្រោយនេះ អង់គ្លេសត្រូវដូរនាយករដ្ឋមន្ត្រី៣នាក់ទៅហើយ ដែលនេះវាបង្ហាញអំពីអស្ថិរភាពនយោបាយខ្លាំងណាស់។ គណបក្សអភិរក្សនិយម បានតែងតាំងមនុស្សម្នាក់ហើយម្នាក់ទៀត ដើម្បីមកដឹកនាំរដ្ឋាភិបាលនេះ។ នាយករដ្ឋមន្ត្រីបក្សអភិរក្សនិយមដូរចុះឡើង ធ្វើឲ្យវិបត្តិសេដ្ឋកិច្ច និងនយោបាយកាន់តែផុងជ្រៅ។ បញ្ហានេះ បានធ្វើឲ្យមានមតិចោទសួរ អំពីភាពស្របច្បាប់របស់រដ្ឋាភិបាលអង់គ្លេស ដែលដឹកនាំដោយក្រុមបក្សអភិរក្សនិយម។ ហើយក្នុងគណបក្សអភិរក្សនិយមនេះទៀតសោត ក៏ឈ្លោះប្រកែកគ្នាដែរ។ ការឈ្លោះប្រកែកគ្នាក្នុងបក្សនេះ អាចជាឧបសគ្គធំមួយ ដល់លោករីស៊ី ស៊ូណាក់ ក្នុងការដឹកនាំប្រទេស អនុម័តច្បាប់ផ្សេងៗនៅសភា។ យ៉ាងណាមិញ លោក រីស៊ី ស៊ូណាក់ បាននិយាយព្រមានរួចហើយ ថាគណបក្សអភិរក្សនិយម ត្រូវតែពិចារណាឲ្យច្បាស់នៅពេលនេះថា “រើសទៅ រវាង ការរួបរួមឯកភាពគ្នា និងមរណៈភាពនយោបាយ”។
គណបក្សពលករ ដែលជាបក្សប្រឆាំង បានទាមទារថា ត្រូវតែរៀបចំបោះឆ្នោតសភាឡើងវិញ ទុកឲ្យប្រជាពលរដ្ឋអង់គ្លេស ជាអ្នកសម្រេចចិត្ត ថាបក្សណានឹងបានសំឡេងភាគច្រើននៅសភា ដើម្បីដឹកនាំរដ្ឋាភិបាល។ ហើយយោងតាមលទ្ធផលស្ទាបស្ទង់មតិមួយ របស់វិទ្យាស្ថាន Ipsos ចេញផ្សាយកាលពីថ្ងៃចន្ទ គឺ ៦២%នៃប្រជាជនអង់គ្លេស ចង់បានការបោះឆ្នោតសភាសាជាថ្មី ឲ្យបានឆាប់បំផុតមុនដាច់ឆ្នាំ២០២២នេះ ព្រោះពួកគេ ទ្រាំលែងបានទៀតហើយ ចំពោះការដឹកនាំប្រទេសបែបលេងសើច របស់គណបក្សអភិរក្សនិយម។
តែយ៉ាងណា លោក រីស៊ី ស៊ូណាក់ ធ្លាប់បានបញ្ជាក់ថា លោកមិនគាំទ្រឲ្យបោះឆ្នោតមុនអាណត្តិទេ។ ជាមួយគ្នានេះ យោងតាមការស្ទាបស្ទង់មតិ ធ្វើដោយវិទ្យស្ថាន YouGov គឺមានប្រជាជនអង់គ្លេសតែ ៣៨%ទេ ដែលពេញចិត្តចំពោះការដែលលោក រីស៊ី ស៊ូណាក់ ឡើងមកធ្វើជានាយករដ្ឋមន្ត្រី។ ដូច្នេះ បើបោះឆ្នោតសភាមុនអាណត្តិ មិនប្រាកដថាបក្សអភិរក្សនិយមនឹងឈ្នះ ហើយក៏មិនប្រាកដថា លោករីស៊ី ស៊ូណាក់ខ្លួនឯង នឹងបានជាប់ ធ្វើជានាយករដ្ឋមន្ត្រីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ