បារាំង-អាល្លឺម៉ង់៖ហេតុអ្វីបានជាលោកម៉ាក្រុង និងលោកស្ហុលស៍ត្រូវព្យាយាមបន្ធយភាពតានតឹងរវាងគ្នា?
ចុះផ្សាយនៅថ្ងៃ៖
ស្តាប់ - ០៦:២០
នៅក្នុងប្រទេសបារាំង ប្រធានាធិបតីលោកអេម៉ានុយអែល ម៉ាក្រុងទទួលជួបនាយករដ្ឋមន្រ្តីអាល្លឺម៉ង់លោកអូឡាហ្វ ស្ហុលស៍នៅក្នុងវិមានអេលីហ្សេនាថ្ងៃពុធ ទី២៦ តុលា។ កម្មវត្ថុនៃជំនួប គឺដើម្បីផ្តល់សន្ទុះឡើងវិញនូវទំនាក់ទំនងទ្វេភាគីដែលបានស្គាល់ភាពរកាំរកូសខ្លាំងនារយៈពេលចុងក្រោយនេះ។ បន្ទាប់មក ការព្យាយាមផ្តល់សន្ទុះឡើងវិញនូវម៉ាស៊ីនអឺរ៉ុបក៏ជាកម្មវត្ថុនៃជំនួបរវាងលោកម៉ាក្រុង និងលោកស្ហុលស៍ដែរ ពិសេសនៅក្នុងបរិបទនៃសង្រ្គាមរុស្ស៊ីឈ្លានពានអ៊ុយក្រែន។
តាមកម្មវីធីផ្សព្វផ្សាយដោយវិមានប្រធានាធិបតីបារាំងអេលីហ្សេនាយប់ថ្ងៃអង្គារ ទី២៥ តុលា នាយករដ្ឋមន្រ្តីអាល្លឺម៉ង់លោកអូឡាហ្វ ស្ហុលស៍មកដល់ក្រុងប៉ារីសនៅម៉ោង ១២ថ្ងៃត្រង់ម៉ោងនៅបារាំងក្នុងថ្ងៃពុធ ទី២៦ តុលា និងចូលរួមទទួលទានអាហារថ្ងៃត្រង់ជាមួយប្រធានាធិបតីបារាំងលោកអេម៉ានុយអែល ម៉ាក្រុងនៅម៉ោង ១២ និង៣៥នាទី។ តាមវិមានអេលីហ្សេដដែល លោកម៉ាក្រុង និងលោកស្ហុលស៍គ្មានគម្រោងធ្វើសេចក្តីថ្លែងការណ៍អ្វីទាំងអស់ ទោះនៅមុនជំនួប និងនៅក្រោយជំនួប។ តាមពិត វត្តមានលោកស្ហុលស៍ក្នុងទឹកដីបារាំងពេលនេះមិនបានគ្រោងទុកទេ។
អ្វីដែលបានគ្រោងទុកក្នុងថ្ងៃពុធ ទី២៦ តុលា គឺកិច្ចប្រជុំគណៈរដ្ឋមន្រ្តីរួមគ្នារវាងបារាំង និងអាល្លឺម៉ង់។ តែដោយកិច្ចប្រជុំមួយនេះត្រូវបានលុបចោលវិញនៅក្រោយមានភាពចម្រូងចម្រាស់លើសំណុំរឿងមួយចំនួនរវាងគ្នា កិច្ចប្រជុំគណៈរដ្ឋមន្រ្តីបារាំង អាល្លឺម៉ង់ក៏ត្រូវបានជំនួសដោយជំនួបទទួលទានអាហារថ្ងៃត្រង់រវាងលោកម៉ាក្រុង និងលោកស្ហុលស៍វិញ។ ជំនួបម៉ាក្រុង ស្ហុលស៍ត្រូវបានគេមើលឃើញថា ជាជំនួបដោយបង្ខំចិត្តដើម្បីកុំឲ្យមានភាគីណាមួយបាក់មុខ បាក់មាត់។ គ្រប់គ្នាសង្ឃឹមថា ជំនួបផ្ទាល់ម៉ាក្រុង ស្ហុលស៍ពេលនេះអាចជួយកាត់បន្ថយភាពតានតឹងរវាងគ្នា។
មានប្រធានរឿងប្រទាំងប្រទើសច្រើនរវាងបារាំង និងអាល្លឺម៉ង់
ភាពចម្រូងចម្រាស ឬភាពមិនចុះសម្រុងគ្នារវាងបារាំង និងអាល្លឺម៉ង់មាននៅក្នុងក្របខណ្ឌសហភាពអឺរ៉ុប និងនៅក្នុងក្របខណ្ឌទំនាក់ទំនងទ្វេភាគី។ គេបានសង្កេតឃើញជារួមថា តាំងពីលោកអូឡាហ្វ ស្ហុលស៍ឡើងកាន់តំណែង ពិសេសក្រោយរុស្ស៊ីចូលឈ្លានពានអ៊ុយក្រែនមក អាល្លឺមង់ជំនាន់លោកស្ហុលស៍ហាក់បានបែកផ្សេង និងកំពុងជ្រើសយកផ្លូវផ្សេងដាច់ដោយឡែករបស់ខ្លួន ឬនិយាយឲ្យស្រួលយល់ លោកស្ហុលស៍កំពុងគិតតែប្រយោជន៍របស់អាល្លឺម៉ង់មួយគត់។ ជាក់ស្តែង នៅក្នុងវិបត្តិថាមពលដែលកំពុងគ្របដណ្តប់លើអឺរ៉ុបទាំងមូល ពិសេសក្រោយពីរុស្ស៊ីបិទក្បាលរ៉ូប៊ីណេឧស្ម័ន លោកស្ហុលស៍បានអនុម័តនូវផែនការមួយក្នុងទឹកប្រាក់ដល់ទៅ ២០០ ០០០លានអឺរ៉ូដើម្បីជួយពលរដ្ឋ និងរោងចក្រសហគ្រាសអាល្លឺម៉ង់។
ផែនការរបស់លោកស្ហុលស៍នេះបានទទួលរងការរិះគន់ចាស់ដៃពីបារាំង និងពីប្រទេសសមាជិកអឺរ៉ុបផ្សេង។ ក្នុងរឿងថាមពលដដែល លោកស្ហុលស៍បានជំទាស់នឹងសំណើរបស់បារាំងដែលចង់កំណត់តម្លៃឧស្ម័ននាំចូលនៅក្នុងក្របខណ្ឌអឺរ៉ុប។ ចំណែកនៅក្នុងវិស័យការពារជាតិក៏លោកស្ហុលស៍បានប្តូរជំហរ ១៨០អង្សារដោយចង់ឲ្យកម្លាំងទ័ពអាល្លឺម៉ង់ក្លាយជាកម្លាំងទ័ពដែលមានបំពាក់អាវុធទំនើបជាងគេនៅអឺរ៉ុប។ នៅក្នុងន័យនេះ លោកស្ហុលស៏ហាក់បានងាកទៅទិញគ្រឿងសព្វាវុធពីអ្នកផ្សេង ពិសេសពីអាមេរិកដោយមើលស្រាល ឬមើលរំលងលើគ្រឿងសព្វាវុធរបស់អឺរ៉ុប ពិសេសរបស់បារាំង។
មានកិច្ចសហប្រតិបត្តិការឧស្សាហកម្មយោធាមួយចំនួនរវាងបារាំង និងអាល្លឺម៉ង់កំពុងបន្តជាប់គាំង ដូចជាកម្មវិធីយុទ្ធសាស្រ្តក្នុងការផលិតអនាគតយន្តហោះចម្បាំង ការផលិតអនាគតរថក្រោះ ឬកាំភ្លើងធំជាដើម។ តែមានចំណុចមួយដែលប៉ារីស និងប៊ែរឡាំងបានព្រមព្រៀងគ្នានៅក្នុងរឿងថាមពល គឺអាល្លឺម៉ង់ដែលសម្បូរភ្លើងអគ្គិសនី និងខ្វះឧស្ម័នសុខចិត្តលក់ភ្លើងអគ្គិសនីឲ្យបារាំងជាថ្នូរនឹងបារាំងលក់ឧស្ម័នឲ្យវិញ។
បារាំង និងអាល្លឺម៉ង់ត្រូវការគ្នាទៅវិញ ទៅមកសម្រាប់ប្រយោជន៍ផ្ទាល់ខ្លួន និងប្រយោជន៍អឺរ៉ុប
ក្រៅតែពីជាប្រទេសសមាជិកសហភាពអឺរ៉ុបដូចគ្នា បារាំង និងអាល្លឺម៉ង់ក៏ជាប្រទេសស្ថាបនិក និងក៏ជាមហាអំណាចសេដ្ឋកិច្ចរបស់សហភាពអឺរ៉ុប។ អាល្លឺម៉ង់ និងបារាំងជាក្បាលម៉ាស៊ីនរបស់សហភាពអឺរ៉ុបដែលមានទឹកមាត់ប្រៃជាងគេនៅក្នុងសហភាពអឺរ៉ុប និងតែងពុះពារ ខ្នះខ្នែងគ្រប់យ៉ាងដើម្បីប្រយោជន៍រួម។ បារាំង និងអាល្លឺម៉ង់សុទ្ធតែបានដឹងច្បាស់ពីការត្រូវការគ្នាទៅវិញ ទៅមក និងការមានសាមគ្គីគ្នាដើម្បីផលប្រយោជន៍ផ្ទាល់ខ្លួន និងផលប្រយោជន៍សហភាពអឺរ៉ុបទាំងមូល។
ក្នុងថ្ងៃទី២០ តុលាថ្មីៗនេះ ពោលក្រោយការលុបកិច្ចប្រជុំគណៈរដ្ឋមន្រ្តីរួមរវាងបារាំង និងអាល្លឺម៉ង់ ប្រធានាធិបតីបារាំងលោកម៉ាក្រុងបានបញ្ជាក់ៗថា ការដាក់អាល្លឺម៉ង់ឲ្យនៅឯកោមិនមែនជារឿងល្អសម្រាប់អឺរ៉ុប និងសម្រាប់អាល្លឺម៉ង់ខ្លួនឯង។ សុបមកវិញ បញ្ហាមិនមែនផ្តោតតែលើទំនាក់ទំនងទ្វេភាគីរវាងបារាំង និងអាល្លឺម៉ង់ប៉ុណ្ណោះទេ តែក៏ផ្តោតផងដែរពីតួនាទីរបស់ប្រទេសទាំងពីរនៅផ្ទៃក្នុងអឺរ៉ុប។ ប៉ារីស និងប៊ែរឡាំងបានយល់ឃើញដូចគ្នាថា ការបែកបាក់គ្នា និងការបែកបាក់នៅផ្ទៃក្នុងអឺរ៉ុបនៅក្នុងកាលៈទេសៈសព្វថ្ងៃជាការហុចដងដាវឲ្យប្រធានាធិបតីរុស្ស៊ីលោកពូទីន។
ដូច្នេះវាជារឿងបន្ទាន់បំផុតដែលនៅក្នុងជំនួបពេលនេះ លោកម៉ាក្រុង និងលោកស្ហុលស៍ត្រូវលើកយករឿងខ្វែងគ្នាទាំងអស់ដាក់លើតុដើម្បីនិយាយគ្នាឲ្យបានច្បាស់លាស់ និងត្រង់ទៅ ត្រង់មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ