កូរ៉េខាងជើងបាញ់មីស៊ីលបីបន្ថែម អាមេរិកនិងកូរ៉េខាងត្បូងប្រកាសបន្តសមយុទ្ធ
ចុះផ្សាយនៅថ្ងៃ៖
ស្តាប់ - ០៧:២១
ភាពតានតឹងក្នុងតំបន់ ឧបទ្វីបកូរ៉េកំពុងស្គាល់ភាពតានតឹងដល់កំពូល។ បន្ទាប់ពីបានបាញ់មីស៊ីលដ៏សន្ធឹកសន្ធាប់កាលពីម្សិលមិញ នៅថ្ងៃព្រហស្បតិ៍ទី ៣វិច្ឆិកានេះ ព្យុងយ៉ាងបានបាញ់មីស៊ីលបីគ្រាប់ទៀត ក្នុងនោះមួយគ្រាប់ទំនងជាមីស៊ីលអន្តរទ្វីបផង ដែលជំរុញឱ្យជប៉ុនទាញសញ្ញាអាសន្នទាំងព្រលឹម។ ប្រឈមនឹងការផ្គើនមីស៊ីលអត់ឈប់របស់កូរ៉េខាងជើង សម្ព័ន្ធមិត្តអាមេរិកជប៉ុនកូរ៉េខាងត្បូង បានប្រកាសបន្តសមយុទ្ធរបស់ខ្លួនជាច្រើនថ្ងៃទៀត។
ជប៉ុនប្រកាសអាសន្នមីស៊ីល
ស្នូរស៊ីរ៉ែន បានរោទិ៍ឡើងជាលើកទីពីរ ក្នុងរយៈពេលពីរថ្ងៃជាប់គ្នានៅកោះ Ulleungdoរបស់កូរ៉េខាងត្បូងដែលស្ថិតនៅភាគខាងកើត ចម្ងាយ១២០គីឡូម៉ែត្រពីឧបទ្វីប។ ចំណែកជប៉ុនក៏បានទាញសញ្ញាអាសន្នដែរ។ ប្រព័ន្ធប្រកាសអាសន្ន J-Alert ដែលឱ្យសញ្ញានៅពេលមានរញ្ជួយដី រលកយក្សស៊ូណាមិ និងនៅពេលមានមីស៊ីលគំរាមដែនដីជប៉ុន បានដាស់ពលរដ្ឋជប៉ុននៅ នៅដេប៉ាតឺម៉ង់ Miyagi, Yamagata et Niigata ភាគឦសានប្រទេស ព្រមទាំងក្រុងតូក្យូផង នៅវេលាម៉ោង៨ព្រឹក ដោយប្រកាសថា ទំនងអាចមានមីស៊ីលហោះកាត់លើប្រទេសជប៉ុន ឆ្ពោះទៅមហាសមុទ្ទប៉ាស៊ីហ្វិក នៅវេលា ម៉ោង ៧និង៤៨នាទី។ ប្រសិនបើពលរដ្ឋឃើញអ្វីគួរឱ្យសង្ស័យ កុំចូលជិត ហើយត្រូវទាក់ទងទៅប៉ូលិសឬក្រុមសង្គ្រោះភ្លាម។ នាយករដ្ឋមន្ត្រីជប៉ុន បានរួសរាន់អំពាវនាវឱ្យ យន្តហោះ និងនាវា ធានាការពារសុវត្ថិភាព ត្រៀមប្រឈមនឹងគ្រប់ហេតុការណ៍ដែលកើតជាយថាហេតុណាមួយ ព្រមទាំងកោះប្រជុំក្រុមប្រឹក្សាសន្តិសុខជាតិជាបន្ទាន់ផង។
មីស៊ីលអន្តរទ្វីប (ICBM)
ប៉ុន្តែការប្រកាសអាសន្ន មានរយៈពេលតែប្រមាណតែជាង១០នាទីប៉ុណ្ណោះ និងជាការប្រកាសអាសន្នខ្យល់ ព្រោះបើតាមយោធាកូរ៉េខាងត្បូង មីស៊ីលកូរ៉េខាងជើងបានធ្លាក់មុនទៅដល់ជប៉ុន។ កូរ៉េខាងជើងបានបាញ់មីស៊ីល ចំនួនបីគ្រាប់ ៖ មួយគ្រាប់ទំនងជាមីស៊ីលបាលីស្ទិកអន្តរទ្វីប(ICBM) ដែលមានកម្លាំងអាចហោះរំលងលើប្រទេសជប៉ុន ដល់កោះ របស់អាមេរិកក្នុងមហាសមុទ្ទប៉ាស៊ីហ្វិកផង។ ទំនងជាបានបាញ់ចេញពីតំបន់ស៊ូណាន ក្បែរក្រុងព្យុងយ៉ាង នៅម៉ោង ៧ និង៤០នាទី ការបាញ់មីស៊ីលអន្តរទ្វីប បានទទួលបរាជ័យ នៅពេលកាំជ្រួចផ្តាច់ចេញពីគ្នា។ នេះបើតាមការលម្អិតរបស់យោធាកូរ៉េខាងត្បូង។ ពីរគ្រាប់ទៀត ជាមីស៊ីលបាលីស្ទិករយៈចម្ងាយខ្លី ដែលបាញ់ចេញពីមណ្ឌល Kaechon នៃខេត្ត Pyongang ភាគខាងត្បូងប្រទេសនៅវេលាម៉ោង ៨និង៣៩នាទី។
ជាសរុបមីស៊ីលទាំងបីគ្រាប់ បានធ្លាក់នៅភាគខាងកើតនៃឧបទ្វីប ក្នុងសមុទ្ទជប៉ុនទាំងអស់គ្នា។ បើតាមយោធាជប៉ុន គ្រាប់មីស៊ីលអន្តរទ្វីបកូរ៉េខាងជើង បើ ជោគជ័យអាចបាញ់ឡើងដល់កម្ពស់២ពាន់គីឡូម៉ែត្រ បានចម្ងាយដល់ទៅ៧៥០គីឡូម៉ែត្រ និងលឿនជាងសំឡេងដល់ទៅ១៥ដង។
ជប៉ុនត្រៀមបំពាក់មីស៊ីលអ៊ីពែរសូនិក
កាលពីថ្ងៃទី ៤ តុលា កូរ៉េខាងជើងបានបាញ់មីស៊ីលហោះរំលងជប៉ុន ម្តង និងជាលើកទីមួយគិតចាប់តាំងពីឆ្នាំ២០១៧មក។ នៅថ្ងៃនេះ ជប៉ុនប្រហោងពោះម្តងទៀត។ ប្រឈមនឹងស្ថានការណ៍បែបនេះ លោក គីស្ហ៊ីដា បានចាត់ទុកការបាញ់មីស៊ីលបន្តឥតឈប់របស់ព្យុងយ៉ាងថាជាទង្វើមិនអាចអនុគ្រោះបានទេ។ ហេតុដូច្នេះហើយបានជាបើតាមសារព័ត៌មានសេដ្ឋកិច្ច Nikkei ក្រសួងការពារជាតិជប៉ុន គ្រោងនឹងដាក់ពង្រាយមីស៊ីលអ៊ីពែរសូនិក ការពារប្រទេសពីពេលនេះដល់ឆ្នាំ២០៣០ ដើម្បីពង្រឹងសមត្ថភាពកម្លា។ មីស៊ីលអ៊ីពែរសូនិក មានល្បឿនលឿនជាងកាំជ្រួចMach៥ ហើយមានសមត្ថភាពបំផ្លាញប្រព័ន្ធការពារខែលមីស៊ីលបានដោយសារគេមិនអាចព្យាករផ្លូវហោះហើរវាបាន។
ក្រសួងការពារជាតិជប៉ុនយល់ថា ប្រឈមនឹងភាពក្រឡាប់ចាក់នៃស្ថានភាពយុទ្ធសាស្ត្របច្ចុប្បន្ន សង្គ្រាមអ៊ុយក្រែន ការបាញ់មីស៊ីលជារដឹករបស់កូរ៉េខាងជើង និងសន្ទុះអំណាចយោធាចិន ជប៉ុនក៏ត្រូវតែពង្រឹងសមត្ថភាពយោធារបស់ខ្លួន ហើយនឹងធ្វើវិសោធនកម្ម ដើម្បីសម្រេចទិសដៅនេះ នៅក្នុងសៀវភៅសស្តីពីយុទ្ធសាស្ត្រការពារជាតិរបស់ខ្លួននៅដំណាច់ឆ្នាំ។
ព្យុងយ៉ាងអាចនឹងសាកល្បងនុយក្លេអ៊ែរ ជាលើកទី៧
ភ្នាក់ងារចារកិច្ចកូរ៉េខាងត្បូង គិតថាព្យុងយ៉ាងអាចនឹងធ្វើការសាកល្បងនុយក្លេអ៊ែរជាលើកទី ៧ នៅមុនថ្ងៃបោះឆ្នោតពាក់កណ្តាលអាណត្តិនៅសហរដ្ឋអាមេរិក ថ្ងៃទី ៨វិច្ឆិកា។ ការបាញ់មីស៊ីលជាបន្តបន្ទាប់ជាសញ្ញាមួយអាចបញ្ជាក់បានដែរអំពីការត្រៀមលក្ខណៈបាញ់នុយក្លេអ៊ែរ។
តែម្យ៉ាងវិញទៀតនោះ ទោះបីមានការសាកល្បងនុយក្លេអ៊ែរ ឬគ្មាន ក៏ភាពតានតឹង ក្នុងឧបទ្វីបកូរ៉េ ទំនងជាមិនងាយនឹងបានស្រាកស្រានដែរ។ ហេតុការណ៍នៅថ្ងៃព្រហស្បតិ៍នេះ អាចឆ្លុះឱ្យឃើញជាថ្មីទៀត អំពីភាពប្រឈមបង្កឱ្យភាគីកូរ៉េទាំងសងខាង។
កូរ៉េខាងជើង បានដំឡើងការគំរាមមួយកំរិតទៀត ដោយបាញ់មីស៊ីលបាលីស្ទិកអន្តរទ្វីប។ បរាជ័យមែន ប៉ុន្តែបើបូកនឹងការបាញ់មីស៊ីលពីម្សិលទៅ ជាសរុប កូរ៉េខាងជើងបានបាញ់មីស៊ីលដល់ទៅ ២៦គ្រាប់ ក្នុងរយៈពេលពីរថ្ងៃ។ ហើយកាលពីសម័យកូរ៉េខាងជើងដឹកនាំដោយលោក គីម ជុងអ៊ីលជាឪពុក ព្យុងយ៉ាងបានបាញ់ តែ១៣គ្រាប់ប៉ុណ្ណោះ ក្នុងរយៈពេល១៥ឆ្នាំ។
ចំណែកខាងសេអ៊ូល វ៉ាស៊ីនតោន និងតូក្យូវិញ ក៏មិនងាយថយ។ ដើម្បីឆ្លើយតបនឹងការបាញ់មីស៊ីលដ៏ប្រសាចពីសំណាក់កូរ៉េខាងជើង កូរ៉េខាងត្បូង និងអាមេរិកនឹងបន្តបន្ថែមពេលវេលាធ្វើសមយុទ្ធទ្រង់ទ្រាយធំបំផុតមិនធ្លាប់មានរបស់ខ្លួនទៀត។ សមយុទ្ធ Vigilant Storm ដែលប្រមូលផ្តុំយន្តហោះចម្បាំងនិងយន្តហោះប្រយុទ្ធដល់ទៅ២៤០គ្រឿង ត្រូវបានព្យុងយ៉ាងចោទជាការហាត់សមរបៀបចូលវាយលុកលើកូរ៉េខាងជើង ទើបកូរ៉េខាងជើងសងសឹកវិញតាមរយៈការបាញ់មីស៊ីល។
កូរ៉េទាំងពីរធ្លាប់ថ្លោះថ្លោយផ្ទុះអាវុធដាក់គ្នាដែរឬទេ ?
ថ្ងៃពុធទី ២វិច្ឆិកា ជាលើកទីមួយ គិតចាប់តាំងពីសង្គ្រាមកូរ៉េ ១៩៥០-៥៣មក ដែលមានមីស៊ីលកូរ៉េខាងជើង បានធ្លាក់នៅចម្ងាយតែ៦០គីឡូម៉ែត្រពីឆ្នេរកូរ៉េខាងត្បូង ក្នុងដែនទឹកអន្តរជាតិ ជាប់ព្រំដែនទឹករវាងប្រទេសទាំងពីរ។
ព្រំប្រទល់ដែនទឹកអន្តរកូរ៉េ ធ្លាប់ជាសមរភូមិប្រឈមអាវុធដាក់គ្នាយ៉ាងសាហាវ នារយៈពេលប៉ុន្មានឆ្នាំ ចុងក្រោយមកនេះ។ នៅឆ្នាំ១៩៩៩ ទ័ពល្បាតកូរ៉េខាងជើង បានបើកឆ្លង គំនូសព្រំដែនទឹក ប្រមាណ១០គីឡូម៉ែត្រពី ហើយព្រមចេញទៅវិញ បន្ទាប់ពីការបាញ់តបតគ្នាជាមួយកូរ៉េខាងត្បូង បណ្តាលឱ្យស្លាប់ជីវិតជនកូរ៉េខាងជើងជាច្រើននាក់។ នៅឆ្នាំ២០១០ ខែវិច្ឆិកា ព្យុងយ៉ាងបានទម្លាក់គ្រាប់លើកោះ យ៉ុងព្យុន ក្បែរបន្ទាត់ព្រំដែន បណ្តាលឱ្យស្លាប់កូរ៉េខាងត្បូងបួននាក់ និងបំផុសការព្រួយបារម្ភមិនតិចទេ ខ្លាចរាលដាលទៅជាជម្លោះធំ។
សង្គ្រាមកូរ៉េឆ្នាំ១៩៥០-១៩៥៣ បានបិទបញ្ចប់សង្គ្រាមទៅដោយការចុះកិច្ចព្រមព្រៀងឈប់បាញ់ មិនមែនដោយចុះ កិច្ចព្រមព្រៀងសន្តិភាពទេ។ ដូច្នេះ ជាផ្លូវការ កូរ៉េទាំងពីរនៅមានសង្គ្រាមនឹងគ្នានៅឡើយ។ ហើយដើម្បីបញ្ចៀសភាពប្រឈមដោយចៃដន្យ អង្គការសហប្រជាជាតិ ដឹកនាំដោយសហរដ្ឋអាមេរិកបានកំណត់គូសព្រំដែន ទឹក និងដីគោក។ ប៉ុន្តែព្យុងយ៉ាងមិនទទួលស្គាល់បន្ទាត់ព្រំដែននេះទេ ព្រោះ យល់ជាការរៀបចំឡើងជាឯកតោភាគី ដោយកម្លាំងអង្គការសហប្រជាជាតិ។ កូរ៉េខាងជើង ទទួលស្គាល់តែ បន្ទាត់ព្រំដែន ចាប់ពីតំបន់គ្មានកងទ័ព (តំបន់ស) ដែលនៅខាងត្បូងគំនូសព្រំដែន។ ជាមួយនឹងសមត្ថភាពនុយក្លេអ៊ែរ កូរ៉េខាងជើងអាចនឹងលែងទទួលស្គាល់ បន្ទាត់ព្រំដែននិងតំបន់គ្មានកងទ័ពផង។ នេះបើតាមអ្នកជំនាញមួយចំនួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ