ហេតុអ្វីនាយករដ្ឋមន្រ្តីអាល្លឺម៉ង់ជំនះធ្វើទស្សនកិច្ចដ៏ចម្រូងចម្រាសនៅប្រទេសចិន?
ចុះផ្សាយនៅថ្ងៃ៖
ស្តាប់ - ០៧:០៩
នៅប្រទេសចិន លោកប្រធានាធិបតី ស៊ី ជីនពីងបានទទួលរាក់ទាក់ អធិការបតីអាល្លឺម៉ង់លោក អូឡាហ្វ ស្ហុល៍ ដែលត្រូវធ្វើដំណើរទស្សនកិច្ចរយៈពេល ១ថ្ងៃ នៅទីក្រុងប៉េកាំង នៅថ្ងៃសុក្រទី ៤វិច្ឆិកានេះ។ អមដំណើរដោយគណៈប្រតិភូអាល្លឺម៉ង់ ប្រមាណ ៦០នាក់ ដែលភាគច្រើនជាអ្នកជំនួញ ប្រធានក្រុមហ៊ុនផលិតរថយន្តអាល្លឺម៉ង់ លោកនាយករដ្ឋមន្រ្តី អូឡាហ្វ ស្ហុល៍ ធ្វើដំណើរទៅជួបប្រមុខដឹកនាំចិន ក្នុងបំណងពង្រឹងសហប្រតិបត្តិសេដ្ឋកិច្ចរវាងអាល្លឺម៉ង់ ដែលជាក្បាលម៉ាស៊ីនសេដ្ឋកិច្ចរបស់អឺរ៉ុប និងចិនដែលជាមហាអំណាចសេដ្ឋកិច្ចពិភពលោកទី២។ យ៉ាងណាក៏ដោយ ទស្សនកិច្ចរយៈពេលដ៏ខ្លី របស់ប្រមុខរដ្ឋាភិបាលអាល្លឺម៉ង់ នៅទីក្រុងប៉េកាំង មិនត្រូវបានគេមើលឃើញក្នុងផ្លូវល្អទេ ទាំងនៅក្នុងចំណោមមតិអាល្លឺម៉ង់ និងអឺរ៉ុប។
អធិការបតីអាល្លឺម៉ង់ លោកអូឡាហ្វ ស្ហុល៍ បានធ្វើដំណើរទៅដល់ទីក្រុងប៉េកាំង នៅថ្ងៃសុក្រនេះដើម្បីបំពេញទស្សនកិច្ចរយៈពេលតែមួយថ្ងៃគត់ នៅប្រទេសចិន។ មុននឹងបើកជំនួបទ្វេភាគី ជាមួយនាយករដ្ឋមន្រ្តីចិន លោកលី ខឺឈាំង ប្រមុខរដ្ឋាភិបាលអាល្លឺម៉ង់ ត្រូវបានលោកស៊ី ជីនពីង ទទួលស្វាគម នៅវិមានប្រធានាធិបតី។ នាយករដ្ឋមន្រ្តីអាល្លឺម៉ង់ធ្វើដំណើរទៅប្រទេសចិន ដើម្បីព្យាយាម រឹតចំណងជាមួយចិន ដែលជាមហាអំណាច សេដ្ឋកិច្ចពិភពលោក។
នាយករដ្ឋមន្រ្តីអាល្លឺម៉ង់កំពុងបំពេញទស្សនកិច្ចដ៏ចម្រូងចម្រាសនៅទីក្រុងប៉េកាំង ព្រោះថា ទស្សនកិច្ចរបស់លោកធ្វើឡើងនៅក្នុងបរិបទមួយ ដែលប្រទេសលោកខាងលិច កំពុងតានតឹង រិះគន់របបផ្តាច់ការចិន នៅក្នុងរឿងគំរាមកំហែងកោះតៃវ៉ាន់ ការរំលោភសិទ្ធិមនុស្សនៅ ស៊ីនជាំង និងការនៅស្ងៀម មិនថ្កោលទោសរបស់ប៉េកាំង ទៅលើរុស្ស៊ី ដែលកំពុងធ្វើសង្រ្គាមឈ្លានពានអ៊ុយក្រែន។
តាមការវាយតម្លៃរបស់អ្នកជំនាញនយោបាយអាល្លឺម៉ង់ លោកនាយករដ្ឋមន្រ្តីអូឡាហ្វ ស្ហុល៍ធ្វើដំណើរទៅទីក្រុងប៉េកាំង ទៅជួបផ្ទាល់ លោកប្រធានាធិបតីលោកស៊ី ជីនពីង ក្នុងរយៈពេលខ្លី តែមួយថ្ងៃមែន ប៉ុន្តែ វាមានអត្ថន័យជ្រៅ ដែលអាចធ្វើឲ្យសម្ព័ន្ធមិត្ត ដូចជាសហភាពអឺរ៉ុប និងអាមេរិក បាត់បង់ជំនឿទុកចិត្តលើអាល្លឺម៉ង់។
នៅក្នុងប្រទេសវិញ ដំណើរទស្សនកិច្ចរបស់លោកនាយករដ្ឋមន្រ្តីអាល្លឺម៉ង់ ទៅប៉េកាំងលើកនេះ ក៏ស្ថិតក្នុងក្រសែភ្នែករិះគន់ខ្លាំងផងដែរ មិនថាពីខាងគណបក្សប្រឆាំង ឬគណបក្សដែលចូលរួមក្នុងរដ្ឋាភិបាលចម្រុះរបស់លោកអូឡាហ្វ ស្ហុល៍។ សូម្បីរដ្ឋមន្រ្តីការបរទេសអាល្លឺម៉ង់ផ្ទាល់ ដែលធ្វើការក្នុងជួររដ្ឋាភិបាលរបស់លោកអូឡាហ្វ ស្ហុល៍ ក៏មិនគាំទ្រ ដំណើរទស្សនកិច្ចរបស់លោកស្ហុល៍នៅប្រទេសចិនដែរ។
នៅប៉ុន្មានថ្ងៃមុនការចេញដំណើររបស់លោកអូឡាហ្វ ស្ហុល៍ ទៅប៉េកាំង លោកស្រីរដ្ឋមន្រ្តី ការបរទេស Annalena Baerbock បានព្រមានកុំឲ្យអាល្លឺម៉ង់ដើរជាន់ដានចាស់ នៅពេលសេដ្ឋកិច្ចរបស់អាល្លឺម៉ង់ត្រូវពឹងផ្អែកទាំងស្រុងលើប្រភពថាមពលរុស្ស៊ី។
គណបក្សនយោបាយអាល្លឺម៉ង់ បារម្ភខ្លាចថា ដំណើរទស្សនកិច្ចរបស់លោកអូឡាហ្វ ស្ហុល៍ទៅជួបប្រធានាធិបតីចិន នៅប៉េកាំង លើកនេះ នឹងធ្វើឲ្យអាល្លឺម៉ង់បាត់បង់ឯករាជ្យភាព ផ្នែកសេដ្ឋកិច្ច ធ្លាក់ចុះក្នុងអន្ទាក់ ដោយត្រូវពឹងផ្អែកលើចិន បន្ទាប់ពីព្យាយាមដកខ្លួនចេញពីរុស្ស៊ី។ ប្រជាជនអាល្លឺម៉ង់មានហេតុផលដែលត្រូវភ័យបារម្ភពីរឿងនេះ ព្រោះថា កាលពីមួយសប្តាហ៍មុននេះ លោកនាយករដ្ឋមន្រ្តីអាល្លឺម៉ង់ទើបជំនះនឹងមតិប្រឆាំងរបស់រដ្ឋមន្រ្តីរបស់លោក៦រូប ដោយបើកភ្លើងខៀវ អនុញ្ញាតឲ្យក្រុមហ៊ុនដឹកជញ្ជូនរដ្ឋចិន ឈ្មោះ Cosco ចូលទិញ កាន់កាប់ភាគហ៊ុនចំនួន ២៥% (៣៥%ការចង់បានដំបូងរបស់ក្រុមហ៊ុនចិន) របស់កំពង់ផែដ៏សំខាន់របស់អាល្លឺម៉ង់ នៅHambourg។ ទាំងប្រធានចារកម្ម និងរដ្ឋមន្រ្តីអាល្លឺម៉ង់ បានព្រមានពីបញ្ហាសន្តិសុខជាតិ និងគ្រោះថ្នាក់ទៅលើបណ្តាញហេដ្ឋារចនាសម្ព័ន្ធអាល្លឺម៉ង់ បើសិនគេអនុញ្ញាតឲ្យក្រុមហ៊ុនបរទេសមានសិទ្ធិចូលកាន់កាប់ភាគហ៊ុន កំពង់ផែអាល្លឺម៉ង់។ ប៉ុន្តែ លោកស្ហុល៍មិនបានស្តាប់លឺ ការទាមទារ ទទូចសុំរបស់រដ្ឋមន្រ្តី និងប្រញាប់បើកភ្លើងខៀវ ឲ្យក្រុមហ៊ុនចិន ចូលមានភាគហ៊ុននៅកំពង់ផែHambourg ដើម្បីជាអំណោយ កាដូ សម្រាប់ប្រធានាធិបតីចិន នៅពេលលោកធ្វើដំណើរទៅប៉េកាំងនៅសុក្រ។
ហេតុអ្វី លោកអូឡាហ្វ ស្ហុល៍នៅតែជំនះ ធ្វើទស្សនកិច្ច ទៅជួបប្រធានាធិបតីចិន លោកស៊ី ជីនពីង នៅទីក្រុងប៉េកាំង?
នៅមុនធ្វើដំណើរទស្សនកិច្ច នៅប៉េកាំង លោកអូឡាហ្វ ស្ហុល៍ផ្ទាល់ធ្លាប់ទទួលស្គាល់ថា ដំណើរទស្សនកិច្ចរបស់លោកចម្រូងចម្រាស រងការរិះគន់ ប៉ុន្តែ លោកបានព្យាយាមឲ្យគេយល់ថា លោកធ្វើដូច្នេះ គឺដើម្បីការពារម៉ូឌែល សេដ្ឋកិច្ចរបស់អាល្លឺម៉ង់ ដោយពិភាក្សាដោយបើកចំហរជាមួយសមភាគីចិនពី សហប្រតិបត្តិការសេដ្ឋកិច្ចទាំងពីរ ការប្រែប្រួលអាកាសធាតុ សន្តិសុខស្បៀង និងប្រាក់បំណុលរបស់ប្រទេស។ បើតាមលោកនាយករដ្ឋមន្រ្តីអាល្លឺម៉ង់ ចិនសព្វថ្ងៃមិនដូចចិនកាលពី ៥ ឬ១០ឆ្នាំមុនទេ។ បើសិនចិន ផ្លាស់ប្តូរ ដូច្នេះ ទំនាក់ទំនងអាល្លឺម៉ង់ជាមួយចិន ក៏ត្រូវផ្លាស់ប្តូរដែរ។ សម្រាប់លោកនាយករដ្ឋមន្រ្តីអាល្លឺម៉ង់ គេមិនអាចកាត់ផ្តាច់ ដោះដៃពីចិនទាំងស្រុងនោះទេ ប៉ុន្តែ គេអាចកាត់បន្ថយ ការពឹងផ្អែកទៅលើចិន ដោយមើលទៅលើស្ថានការណ៍ជាក់ស្តែង និងសមរម្យ។
តាមប្រព័ន្ធផ្សព្វផ្សាយចិនCCTV នៅក្នុងជំនួបជាមួយនាយករដ្ឋមន្រ្តីអាល្លឺម៉ង់ ប្រធានាធិបតីចិនលោក ស៊ី ជីនពីងបាននិយាយថា ក្នុងនាមជាប្រទេសដ៏ធំដែលមានឥទ្ធិពលខ្លាំងដូចគ្នា ចិន និងអាល្លឺម៉ង់គួរចាប់ដៃធ្វើការជាមួយគ្នា នៅក្នុងបរិបទដែលកំពុងមានការផ្លាស់ប្តូរនៅក្នុងពិភពលោកយ៉ាងដូច្នេះ ដើម្បីសន្តិភាពនៅក្នុងពិភពលោក។
ជំហរងាកទៅរកចិន របស់លោកអូឡាហ្វ ស្ហុល៍ បានទទួលការគាំទ្រពីក្រុមហ៊ុន អ្នកជំនួញអាល្លឺម៉ង់ ដែលពេលនេះកំពុងភ័យបារម្ភពីសេដ្ឋកិច្ចដើរថយក្រោយរបស់អាល្លឺម៉ង់ ដោយសារតែវិបត្តិថាមពលឡើងថ្លៃ បង្កឡើងដោយសង្រ្គាមរុស្ស៊ី ឈ្លានពានអ៊ុយក្រែន។ ចាប់តាំងពីងាកចេញ ពីថាមពលរុស្ស៊ី និងស្តារប្រយោជន៍សេដ្ឋកិច្ច រដ្ឋាភិបាលអាល្លឺម៉ង់ បានសម្រុកយុទ្ធនាការទូត ជាមួយប្រទេសផ្គត់ផ្គង់ថាមពល និងនៅបណ្តាប្រទេសអាស៊ី ដូចជាជប៉ុន និងចិន។ ចិនជាដៃគូពាណិជ្ជកម្មធំជាងគេរបស់អាល្លឺម៉ង់ ព្រោះថា ចិនមិនត្រឹមជាទីផ្សាររបស់គ្រឿងមេកានិក រថយន្តអាល្លឺម៉ង់ ប៉ុន្តែ ក្រុមហ៊ុនអាល្លឺម៉ង់ជាច្រើនកំពុងបោះទុនវិនិយោគរកផលចំណេញក្រាសក្រែល នៅប្រទេស ចិន។
ម្យ៉ាង ដោយធ្វើដំណើរទៅជួបប្រធានាធិបតីចិនដោយផ្ទាល់នៅពេលនេះ លោកអូឡាហ្វ ស្ហុល៍ និយាយថា លោកចង់ស្វែងយល់ថា តើនៅមានផ្លូវ សហការស្មើភាពគ្នាជាមួយចិនឬទេ ព្រោះថា រហូតមក អាល្លឺម៉ង់ នៅតែមិនសប្បាយចិត្តនឹងចិន ក្នុងរឿងគោរពកម្មសិទ្ធិបញ្ញា ការធ្វើជំនួញចាញ់ប្រៀបក្រុមហ៊ុនចិន ដែលទទួលការឧបត្ថម្ភពីរដ្ឋ។
ចិនទទួលបានប្រយោជន៍ពីទស្សនកិច្ចនិមិត្តរូបរបស់នាយករដ្ឋមន្រ្តីអាល្លឺម៉ង់
ទស្សនកិច្ចរបស់លោកនាយករដ្ឋមន្រ្តីអាល្លឺម៉ង់ នៅ ទីក្រុងប៉េកាំងនឹងមិនផ្តល់លទ្ធផលសេដ្ឋកិច្ចជាក់ស្តែង សម្រាប់ចិននោះទេ។ ប៉ុន្តែ ទស្សនកិច្ចរបស់លោកស្ហុល៍ ដែលជាមេដឹកនាំបរទេស និងជាប្រទេសសមាជិករបស់G7លើកនេះ ជាទស្សនកិច្ចនិមិត្តរូប ដែលបានបញ្ជាក់ពីការទទួលស្គាល់ ជាអន្តរជាតិ និង ផ្តល់ភាពស្របច្បាប់ដល់អំណាចដឹកនាំរបស់លោកស៊ី ជីនពីង ដែលទើបត្រូវបានបក្សកុម្មុយនិស្តបោះឆ្នោត ផ្តល់សិទ្ធិឲ្យដឹកនាំប្រទេសអាណត្តិទី៣។
ដោយទទួលនាយករដ្ឋមន្រ្តីអាល្លឺម៉ង់ នៅ១២ថ្ងៃក្រោយ ត្រូវបានសមាជបក្សកុម្មុយនិស្តបោះឆ្នោតគាំទ្រឲ្យបន្តដឹកនាំប្រទេសចិន លោកស៊ី ជីនពីងចង់បញ្ជាក់ដែរថា ចិនក្រោមការដឹកនាំរបស់លោក មិនឯកោ ដូច ការដាក់សម្ពាធរបស់អាមេរិក។
ដោយមិនចង់ឲ្យគេចោទប្រកាន់លោកថា ចាញ់ប្រៀបចរចាជាមួយមេដឹកនាំចិន លោកនាយករដ្ឋមន្រ្តី អាល្លឺម៉ង់បាននិយាយថា លោកនឹងលើកយកចំណុចខ្វែងគំនិតគ្នា រវាងចិន និងអាល្លឺម៉ង់ ដូចជារឿងសិទ្ធិមនុស្ស និងបញ្ហាសង្រ្គាមអ៊ុយក្រែន ទៅនិយាយ ជាមួយមេដឹកនាំចិន។
នៅក្នុងសន្និសីទកាសែត នៅក្រោយជំនួបជាមួយនាយករដ្ឋមន្រ្តីចិន លោកនាយករដ្ឋមន្រ្តីអាល្លឺម៉ង់ អូឡាហ្វ ស្ហុល៍បាននិយាយថា លោកបានទាមទារឲ្យចិន ដាក់សម្ពាធលើរុស្ស៊ី ដែលកំពុងធ្វើសង្រ្គាម សម្លាប់មនុស្សនៅប្រទេសអ៊ុយក្រែន។
ប៉ុន្តែ អ្នកនាំពាក្យរបស់ក្រសួងការបរទេសចិន បាននិយាយកាត់ខ្លីនៅថ្ងៃនេះថា ដោយសារតែពេលវេលាខ្លី មេដឹកនាំទាំងពីរមិនបាននិយាយច្រើនពីសំណុំរឿងអ៊ុយក្រែន។ ម្យ៉ាង ប៉េកាំងប្រឆាំងដាច់ខាត ការលូកដៃរបស់បរទេសក្នុងកិច្ចការផ្ទៃក្នុងចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ