ហេតុអ្វីរុស្ស៊ី ប្រកាសដកថយចេញពីក្រុងយុទ្ធសាស្ត្រKherson ?
ចុះផ្សាយនៅថ្ងៃ៖
ស្តាប់ - ០៦:២១
ទង់ជាតិរុស្ស៊ីដែលបក់រវិចៗនៅតំបន់ឃែរសុនតាំងពី៨ខែមក បានទម្លាក់ចុះពីទង់វិញហើយ នៅព្រឹកថ្ងៃព្រហស្បតិ៍ទី ១០ វិច្ឆិកានេះ។ នេះបើតាមរូបភាពបង្ហោះក្នុងប្លុករុស្ស៊ីមួយ ដែលមានសិទ្ធិថតសកម្មភាពរបស់រុស្ស៊ី នៅភាគខាងត្បូងប្រទេសអ៊ុយក្រែន។ ការដកទ័ពចេញនេះប្រព្រឹត្តទៅជួនចំពេលមេដឹកនាំជាន់ខ្ពស់យោធាអាមេរិកប្រកាសថាចំនួនទាហានរុស្ស៊ីនិងអ៊ុយក្រែនបាត់បង់ជីវិតអស់ប្រហាក់ប្រហែលគ្នានៅក្នុងសង្គ្រាម និងបង្ហាញក្តីសង្ឃឹមថានឹងអាចបិទបញ្ចប់សង្គ្រាមដោយការចរចា។ ប៉ុន្តែលោកប្រធានាធិបតីរុស្ស៊ី វ្លាដេមៀ ពូទីន បន្តស្ថិតក្នុងភាពឯកាដដែល។ លោកបានប្រកាសមិនធ្វើដំណើរទៅចូលជំនួបកំពូលហ្សេ២០ តាមការអញ្ជើញរបស់ឥណ្ឌូណេស៊ីទេ។
រុស្ស៊ីបានត្រៀមលក្ខណៈដកថយយូរក្រែលដែរហើយ ដោយបានជម្លៀសជាបឋមសម្ភារៈបរិក្ខាយោធា និងកម្ទេចរចនាសម្ព័ន្ធផ្សេងៗ ព្រមទាំងបានជម្លៀសប្រជាជនស៊ីវិលជាច្រើនទៀត កាលពីប៉ុន្មានថ្ងៃមុន ហើយឥលូវដល់វេន ជម្លៀសទាហានម្តង។
មូលហេតុនៃការដកទ័ព ត្រូវបានភាគីរុស្ស៊ីបញ្ជាក់ដោយផ្ទាល់រួច ថាគ្មានប្រយោជន៍អ្វីត្រូវបន្តនៅក្នុងក្រុងឃែរសុន ដែលស្ថិតនៅត្រើយខាងលិចនៃទន្លេ Dniepr ទេ។ រុស្ស៊ីមានយុទ្ធសាស្ត្រច្បាស់លាស់ គឺត្រូវជម្លៀសទាហានចេញពីកន្លែងដែលអាចនាំឱ្យមានការខូចខាត និងបាត់បង់ជីវិតច្រើន។ សម្រាប់យោធារុស្ស៊ី និងបើយោលទៅទីតាំងភូមិសាស្ត្រ បើថយទ័ពទៅឈរជើងនៅត្រើយខាងទន្លេ Dniepr ស្រួលតតាំងនិងការពារខ្លួនជាង ប្រយុទ្ធដោយឈរបែរខ្នងដាក់ទន្លេ ដែលថយតែបន្តិចត្រូវធ្លាក់ទឹក។ ប៉ុន្មានថ្ងៃចុងក្រោយមកនេះ កងកម្លាំងអ៊ុយក្រែន ដោយមានជំនួយអាវុធទំនើបៗពីសម្ព័ន្ធមិត្តបស្ចិមលោក បានវាយយ៉ាងសន្ធាប់លើតំបន់ឃែរសុន បែបចង់ព័ទ្ធខ្ទប់រុស្ស៊ីទល់នឹងទន្លេផង និងវាយដៅផ្តាច់បណ្តាញផ្គត់ផ្គង់ស្បៀងអាវុធរបស់រុស្ស៊ីទៀត។ អ៊ុយក្រែនបានបន្តជំនួយពីក្រុមប្រទេសលោកខាងលិចដោយរដឹក។ ម្សិលមិញគណៈកម្មការអឺរ៉ុបស្នើប្រទេសជាសមាជិកទាំង២៧ឱ្យព្រមផ្តល់ជំនួយក្នុងទម្រង់ជាប្រាក់កម្ចី១៨ពាន់លានអឺរ៉ូ សម្រាប់ឆ្នាំ២០២៣។
ទាហានអ៊ុយក្រែនកាន់តែមានប្រៀប ?
ឃែរសុន គឺជាក្រុងរបស់តំបន់ដែលមានឈ្មោះថាឃែរសុនដូចគ្នា និងជាក្រុងធំតែមួយគត់ដែលរុស្ស៊ីប្រើកម្លាំងវាយដណ្តើមយកបាន តាំងពីផ្តើមបើកប្រតិបត្តិការយោធាលើអ៊ុយក្រែន នៅថ្ងៃទី ២៤ កុម្ភៈ២០២២មក។ រុស្ស៊ីចង់បានតំបន់នេះ ព្រោះជាទីតាំងប្រកបទៅដោយយុទ្ធសាស្ត្រ ជាផ្លូវត្រង់ដ៏សំខាន់បំផុតសម្រាប់ភ្ជាប់ទៅតំបន់គ្រីមេ។ ឃែរសុននេះ ក៏ជាផ្នែកមួយនៃផ្នែកទាំងបួន ដែលរុស្ស៊ីបានប្រកាសជាឯកតោភាគីភ្ជាប់មកធ្វើជាទឹកដីរបស់ខ្លួន កាលពីថ្ងៃទី ៣០កញ្ញា ដោយសន្យាថានឹងប្រើគ្រប់មធ្យោបាយ និងកម្លាំងការពារដែនដីនេះ។
ប៉ុន្តែនយោបាយរបស់ក្រេមឡាំង ត្រូវប្រឈមនឹងការពិតជាក់ស្តែងលើសមរភូមិ ដែលទាហានលែងមានទឹកចិត្តនឹងប្រយុទ្ធ។ រុស្ស៊ីបានដាក់ទាហាននៅឃែរសុន ចំនួនប្រមាណពី ២ទៅបីម៉ឺននាក់ ដែលសុទ្ធតែមានសមត្ថភាពខ្ពស់ បំពាក់ដោយអាវុធធុនធ្ងន់ទៀត។ តែថ្មីៗនេះ មានការប្តូរផ្លាស់ដកចេញដាក់ចូលទាហានមួយចំនួន យកទៅទប់ទល់នៅសមរភូមិផ្សេង។ អ៊ីចឹងគេពិតអាចសន្មត់បានថា ការដកថយនៃ គឺ ដើម្បីការពារខ្លួន។ ត្រូវតែដកថយសិន ដើម្បីកុំឱ្យបរាជ័យទាន់។ គ្រាន់តែថាបើដកថយទៅត្រើយម្ខាងទន្លេហើយវាពិតជាពិបាកឆ្លងមកយកឈ្នះវិញណាស់ ព្រោះកាលពីផ្តើមប្រតិបត្តិការ រុស្ស៊ីធ្លាប់ចង់ដណ្តើមក្រុងផ្សេងៗទៀតដែរ តែមិនអាចសម្រេចបំណង នៅពេលត្រូវវាយឆ្លងទន្លេ។
ដូច្នេះទន្ទឹមគ្នា គេពិតជាអាចនិយាយបានថា នេះជាជោគជ័យរបស់អ៊ុយក្រែន ដែលកងទ័ពមានសមត្ថភាពខ្ពស់ជាងហើយមានចំនួនច្រើនទៀត ដណ្តើមបានក្រុងការកីវ ហើយកំពុងឈានទៅដណ្តើមបានក្រុងឃែរសុនប្រកបដោយយុទ្ធសាស្ត្រទៀត។
តែទាហានអ៊ុយក្រែនទំនងជាត្រូវការពេលពីរបីសប្តាហ៍ទៀត ទើបអាចដណ្តើមគ្រប់គ្រងតំបន់ និងចូលទៅដល់ក្រុងឃែរសុននេះបាន ព្រោះរុស្ស៊ីច្បាស់ជាត្រៀមលក្ខណៈ ពង្រាយជាតិផ្ទុះ គ្រាប់មីន ដើម្បីពន្យឺតនិងសម្លាប់កម្លាំងរបស់សត្រូវជាក់ជាមិនខាន។
ស្លាប់និងរបួសម្ខាងៗ មួយសែននាក់
ស្របពេលជាមួយគ្នានេះ ឧត្តមសេនីយ៍ Mark Milley អ្នកទទួលខុសត្រូវជាន់ខ្ពស់យោធាអាមេរិកបាន ព្រមានថា រុស្ស៊ីក៏ដូចជាអ៊ុយក្រែន ទំនងជាមិនអាចឈ្នះចាញ់គ្នាដោយប្រើកម្លាំងយោធាបានទេ។ ថ្វីបើខាងរុស្ស៊ី មានទាហាន ជាង១សែននាក់បានស្លាប់និងរបួស នៅខាងអ៊ុយក្រែន ក៏ទំនងជាមានការបាត់បង់ប្រហាក់ប្រហែលគ្នាដែរ។ តួលេខផ្តល់ដោយឧត្តមសេនីយ៍Milley មិនអាចផ្ទៀងផ្ទាល់ដោយឯករាជ្យបានទេ ប៉ុន្តែជាតុល្យការដែលប្រាកដជាងគេផ្តល់ដោយក្រុងវ៉ាស៊ីនតោន។
សម្រាប់មន្ត្រីជាន់ខ្ពស់អាមេរិករូបនេះ គ្មានទេជោគជ័យដោយប្រើកម្លាំងយោធា មិនថាសម្រាប់រុស្ស៊ី ឬអ៊ុយក្រែនឡើយ គឺមានតែការចរចាទេទើបអាចបញ្ចប់សង្គ្រាមបាន។ លោកថាមានពន្លឺនៃការចាប់ផ្តើមចរចា។
លោកពូទីនមិនទៅហ្សេ២០
ប៉ុន្តែសម្រាប់ពេលនេះ លោកប្រធានាធិបតីពូទីន នៅតែឯកាខ្លាំងដដែល។ បន្ទាប់ពីស្រពិចស្រពិលអស់ជាច្រើនខែ នៅថ្ងៃនេះ រុស្ស៊ីបានបញ្ជាក់ថា លោកពូទីន មិនអញ្ជើញទៅចូលរួមក្នុងជំនួបកំពូលហ្សេ២០ នៅបាលីប្រទេសឥណ្ឌូណេស៊ីដែលប្រព្រឹត្តទៅពីថ្ងៃទី ១៥-១៦វិច្ឆិកាសប្តាហ៍ក្រោយទេ។ រុស្ស៊ីសុំបញ្ជូនតំណាងត្រឹមលោករដ្ឋមន្ត្រីការបរទេសសែកហ្គៃ ឡាវ្រូស។ លោកឡាវ្រូស ធ្លាប់ដើរចេញកណ្តាលប្រជុំម្តងហើយកាលពីខែកក្កដា ក្នុងឱកាសជំនួប្រជុំថ្នាក់រដ្ឋមន្ត្រីការបរទេសហ្សេ២០។ បើតាមប្រភពឥណ្ឌូណេស៊ី លោកពូទីនអាចនឹងធ្វើអន្តរាគមន៍តាមវីដេអូខុនហ្វេរិន ដូចលោកប្រធានាធិបតីហ្សេឡេនស្គី ដែលទទួលការអញ្ជើញក្នុងនាមជាភ្ញៀវ។
ចំណែកលោកប្រធានាធិបតីអាមេរិក ចូ បៃដិន ដែលធ្លាប់បានចាត់ទុកលោកពូទីន ជាច្រើនដង ថាជាឧក្រិដ្ឋជន ក៏ធ្លាប់បានបង្ហាញឆន្ទៈមិនចង់ជួបសន្ទនាជាមួយប្រធានាធិបតីរុស្ស៊ី នៅក្នុងជំនួបហ្សេ២០នេះទេ។ លើកលែងតែប្រធានាធិបតីបារាំងម្នាក់ប៉ុណ្ណោះ ដែលបន្តរក្សាទំនាក់ទំនងជាមួយលោកពូទីន និងព្រមានពីហានិភ័យនៃការដាក់លោកពូទីនឱ្យនៅឯកា។
ជំនួបកំពូលហ្សេ២០នៅក្រុងបាលី នឹងមានប្រមុខរដ្ឋ-រដ្ឋាភិបាល១៧ចូលរួម ក្នុងនោះមានលោកស៊ីជីនពីង និងលោកចូបៃដិនផង។ ជាការជួបជុំដ៏សំខាន់បំផុតក្រោយសម័យកូវីដ ប៉ុន្តែវាប្រព្រឹត្តក្នុងបរិបទពហុវិបត្តិ សង្គ្រាមអ៊ុយក្រែនផង វិបត្តិសេដ្ឋកិច្ចបង្កឡើងអតិផរណាខ្លាំងផង និងវិបត្តិបង្កឡើងដោយការប្រែប្រួលអាកាសធាតុផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ