វិបតិ្តជនភៀសខ្លួនតាមទូក កំពុងចោទជាថ្មីមកលើអឺរ៉ុប និងទំនាក់ទំនង បារាំង-អ៊ីតាលី
ចុះផ្សាយនៅថ្ងៃ៖
ស្តាប់ - ០៨:៣២
វិបត្តិជនភៀសខ្លួនក្នុងសមុទ្រម៉េឌីទែរ៉ាណេ កំពុងតែធ្វើឲ្យមានសង្គ្រាមពាក្យសំដី ឈ្លោះប្រកែកគ្នា រវាងរដ្ឋាភិបាលបារាំង និងអ៊ីតាលី។ អស់រយៈពេលប្រមាណ៣សប្តាហ៍ ដែលនាវា Ocean Viking សង្គ្រោះជនភៀសខ្លួន បានអណ្តែតតែលតោលក្នុងសមុទ្រ ជាមួយនឹងជនភៀសខ្លួនចំនួនជាង២៣០នាក់។ អ៊ីតាលីបានបដិសេធមិនឲ្យនាវានេះចូលចត។ ទីបំផុត រដ្ឋាភិបាលបារាំងបានសុខចិត្តឲ្យនាវានេះចូលចត ដាក់ជនភៀសខ្លួនឲ្យឡើងគោក តែបារាំងបានចោទប្រកាន់ទៅអ៊ីតាលី ថាបានធ្វើរឿងអមនុស្សធម៌ ហើយផ្ទុយនឹងវិធានច្បាប់សមុទ្រអន្តរជាតិ ព្រោះថានាវាស្ថិតនៅកៀកនឹងដែនដីអ៊ីតាលីជាងគេ។
សុំ៤៣ដង តែអ៊ីតាលីប្រកែក
នាវា Ocean Viking របស់អង្គការមនុស្សធម៌ SOS Méditerranée បានចូលទៅដល់កំពង់ផែទាហានបារាំង នៅក្រុងទូឡុងហើយ នៅវេលាម៉ោង ៨និង៥០នាទីព្រឹកថ្ងៃសុក្រនេះ។ នាវាអង្គការមនុស្សធម៌នេះ បានស្រង់ជនភៀសខ្លួនចំនួនសរុប ២៣៤នាក់ ក្នុងនោះមានកុមារ៥៧នាក់ ពីក្នុងសមុទ្រម៉េឌីទែរ៉ាណេ ហើយបានអណ្តែតតែលតោលប្រមាណ៣សប្តាហ៍ ដោយសារតែគ្មានប្រទេសណាព្រមទទួលឲ្យចូលចត។
អង្គការ SOS Méditerranée បានបញ្ជាក់ថា ខ្លួនបានសុំទៅអាជ្ញាធរអ៊ីតាលីចំនួន៤៣ដង ដើម្បីសុំចូលចត ទំលាក់ជនភៀសខ្លួន ដែលត្រូវការការសង្គ្រោះបន្ទាន់ ព្រោះកំពង់ផែអ៊ីតាលីនៅកៀកជាងគេ។ ដោយអ៊ីតាលីបដិសេធម្តងហើយម្តងទៀត ទីបំផុតនាវានេះក៏បានបើកសំដៅមកកាន់ដែនទឹកបារាំង។ ក្រោយអេះអុញស្ទាក់ស្ទើរជាច្រើនថ្ងៃ ទីបំផុតរដ្ឋាភិបាលបារាំង បានសម្រេចកាលពីរសៀលម្សិលមិញ ឲ្យនាវានេះចូលចត។
បើតាមការបញ្ជាក់ពីលោក Gérald Darmanin រដ្ឋមន្ត្រីក្រសួងមហាផ្ទៃបារាំង ជនអន្តោប្រវេសន៍ទាំង២៣០នាក់ នឹងត្រូវយកឡើងគោក ដាក់ឲ្យសម្រាកក្នុងមណ្ឌលរងចាំមួយ។ បន្ទាប់មកគេនឹងចាប់ផ្តើមពិនិត្យសុខភាព ហើយនិងពិនិត្យឯកសារករណីម្នាក់ម្តងៗ។ លោករដ្ឋមន្ត្រីបារាំងអះអាងថា បារាំងនឹងទទួលយកជនអន្តោប្រវេសន៍ចំនួន១ភាគ៣ ដែលបំពេញគ្រប់លក្ខខណ្ឌទទួលបានសិទ្ធិជ្រកកោន ឧទាហរណ៍ដូចជាអ្នកភៀសខ្លួនមកពីប្រទេសមានសង្គ្រាមជាដើម។ ២ភាគ៣ទៀត នឹងត្រូវបែងចែកទៅតាមប្រទេសអឺរ៉ុប៩ប្រទេសផ្សេងទៀត ដែលគេបានសុខចិត្តទទួលយក ក្នុងនោះមានអាល្លឺម៉ង់ ដែលនឹងទទួលយកចំនួន៨០នាក់។ ចំណែកជនអន្តោប្រវេសន៍ ដែលមិនបំពេញគ្រប់លក្ខខណ្ឌទទួលបានសិទ្ធិជ្រកកោន គឺអាជ្ញាធរបារាំង និងរៀបចំនីតិវិធី បញ្ជូនទៅប្រទេសដើមវិញភ្លាម។
អ៊ីតាលីចិត្តខ្មៅ?
តំណាងរដ្ឋាភិបាលអ៊ីតាលី និងបារាំង បានបន្តផ្លោងពាក្យសំដីចោទប្រកាន់គ្នាខ្លាំងណាស់ ប្រមាណ២ថ្ងៃមកនេះ។ ខាងបារាំង ទាំងរដ្ឋមន្ត្រីក្រសួងមហាផ្ទៃ ទាំងអ្នកនាំពាក្យរដ្ឋាភិបាល បានចោទរដ្ឋាភិបាលថ្មីអ៊ីតាលី ដែលដឹកនាំដោយលោកស្រី ចរចា ម៉េឡូនី ថាគ្មានធម៌មេត្តា ចិត្តខ្មៅណាស់ បដិសេធមិនឲ្យនាវាដឹកជនភៀសខ្លួនចូលចត។ រដ្ឋាភិបាលបារាំងអះអាងថា ធម្មតាគឺអ៊ីតាលីទេ ដែលឆ្នេរស្ថិតនៅកៀកនឹងនាវានោះ ដែលត្រូវមានកាតព្វកិច្ចឲ្យនាវាចូលចត។ តែអ៊ីតាលីបានធ្វើរឿងអមនុស្សធម៌ និងគ្មានការទទួលខុសត្រូវ រុញនាវានេះឲ្យគ្មានជម្រើស មកសុំចូលចតនៅបារាំងវិញ។ ជាវិធានការឆ្លើយតប នឹងទង្វើអមនុស្សធម៌របស់រដ្ឋាភិបាលអ៊ីតាលីនេះ ភាគីបារាំង បានចេញបញ្ជា ពង្រាយកម្លាំងនគរបាល បង្កើនការត្រូតពិនិត្យនៅតាមច្រកព្រំដែនជាមួយអ៊ីតាលី។
ដោយឡែកពីអ៊ីតាលីវិញ គេបានឆ្លើយតបថា ប្រតិកម្មរបស់ភាគីបារាំងនេះ ដូចជាជ្រុលហួសហេតុពេកហើយ។ រដ្ឋមន្ត្រីក្រសួងមហាផ្ទៃអ៊ីតាលី បានបរិហាតបមកវិញថា បារាំងចោទអ៊ីតាលីថាចិត្តខ្មៅ អមនុស្សធម៌ តែបារាំងប្រហែលភ្លេចហើយ ថាគិតពីដើមឆ្នាំនេះមក អ៊ីតាលីបានទទួលជនអន្តោប្រវេសន៍ចំនួន ៩ម៉ឺននាក់ហើយ។ ជាច្រើនឆ្នាំមកហើយ ដែលអ៊ីតាលី ទទួលរ៉ាប់រងបញ្ហានេះតែម្នាក់ឯង។
តាមពិតទៅ បញ្ហារុញទំលាក់ការទទួលខុសត្រូវឲ្យគ្នាទៅវិញទៅមក រវាងបារាំងនិងអ៊ីតាលី មិនមែនទើបតែកើតឡើងលើកនេះទេ។ កាលពីឆ្នាំ២០១៨ នាវា Aquarius របស់អង្គការមនុស្សធម៌មួយទៀត ដឹកជនភៀសខ្លួនប្រមាណ៦០០នាក់ ក៏ជួបបញ្ហស្រដៀងគ្នាហ្នឹងដែរ។ អ៊ីតាលីបដិសេធមិនទទួល បារាំងក៏មិនទទួល។ ទីបំផុត អេស្ប៉ាញបានយល់ព្រមទទួល។ យើងឃើញថា បញ្ហានេះវាកើតឡើងច្រំដែល ច្រើនដងហើយ ដោយប្រទេសនីមួយព្យាយាមរកវិធីការពារខ្លួន មិនចង់ទទួលយកជនអន្តោប្រវេសន៍មកបន្ថែមទៀត។
ក្រុមអ្នកនយោបាយស្តាំនិយមជ្រុលបារាំង បានលើកឡើងថា បើចេះតែទទួលយក គឺនាវាទាំងនោះនឹងនាំជនអន្តោប្រវេសន៍មករហូត ទប់មិនឈ្នះទេ។ ហើយអ្នកខ្លះទៀតបានចោទអង្គការមនុស្សធម៌ ដែលស្រង់មនុស្សពីក្នុងសមុទ្រនោះ ថាជាអ្នកចូលរួមជួយជំរុញឲ្យជនអន្តោប្រវេសន៍ឆ្លងទូកមកកាន់តែច្រើនថែមទៀត ព្រោះអាងថាមានគេចាំជួយស្រង់ឡើងនាវាធំៗ ដឹកទៅដល់ផែប្រទេសអឺរ៉ុបតែម្តង។
ចំណុចចំហផ្នែកគតិយុទ្ធ
យោងតាមអង្គការសមុទ្រអន្តរជាតិជាតិ ដែលជាផ្នែកមួយនៃអង្គការសហប្រជាជាតិ គឺតាមពិតទៅច្បាប់អន្តរជាតិមិនបានកំណត់ថា ប្រទេសណាស្ថិតនៅកៀកជាងគេ ត្រូវតែមានកាតព្វកិច្ចទទួលនាវាសង្គ្រោះមនុស្សនោះទេ។ គេគ្រាន់តែកំណត់ថា នាវាសង្គ្រោះអាចចូលចតនៅទីកន្លែងមួយ ដែល “មានសុវត្ថិភាព” ផុតគ្រោះថ្នាក់។
ទាក់ទិននឹងការសង្គ្រោះមនុស្សក្នុងសមុទ្រនេះ មានអត្ថបទច្បាប់ និងសន្ធិសញ្ញាច្រើន ដែលគេអាចបកស្រាយ បន្ថែមលើគ្នា ហើយពេលខ្លះក៏អាចមានខ្លឹមសារផ្ទុយគ្នាខ្លះដែរ។ យើងត្រូវដឹងថា អត្ថបទច្បាប់ទាំងនេះ ត្រូវបានតាក់តែងឡើង តាំងពីទសវត្សឆ្នាំ ៧០ - ៨០ ដូច្នេះ មិនមែនក្នុងបរិបទដើម្បីចាត់ចែងដោះស្រាយ បញ្ហាអន្តោប្រវេសន៍រាប់ពាន់រាប់ម៉ឺននាក់ ដូចករណីបច្ចុប្បន្ននេះទេ។ ហើយដូច្នេះហើយ បានជាបញ្ហានេះ វាបង្កើតឲ្យមាន ចំណុចចំហផ្នែកគតិយុទ្ធ ដែលម្នាក់ៗអាចបកស្រាយ ដើម្បីការពារខ្លួន។
ជាការពិត ប្រទេសស្ថិតនៅជួរមុខគេ ក្នុងសមុទ្រម៉េឌីទែរ៉ាណេ ដែលមានដូចជា អ៊ីតាលី ក្រិក ម៉ាល់ត៍ ជាដើម គឺជាអ្នកទទួលរ៉ាប់រងបញ្ហាច្រើនណាស់ កន្លងមកនេះ ទាក់ទិននឹងបញ្ហាអន្តោប្រវេសន៍ឆ្លងទូកមកតាមសមុទ្រនេះ។ ចង់មិនចង់ ប្រទេសទាំងនេះស្ថិតនៅកៀកជាងគេ ដែលជនអន្តោប្រវេសន៍ឆ្លងទូកមកដល់។ សង្គ្រាម ជីវភាពក្រីក្រ ជាដើមបានរុញច្រានមនុស្សឲ្យភៀសខ្លួនមកអឺរ៉ុបកាន់តែច្រើន។ ពីមួយឆ្នាំទៅមួយឆ្នាំ ជនអន្តោប្រវេសន៍ មកពីអាហ្វ្រិក មកពីដំបន់ដើមបូព៌ា និងអាស៊ីខាងត្បូងផង បានផ្សងគ្រោះថ្នាក់ ជិះទូកឆ្លងសមុទ្រទៅកាន់អឺរ៉ុបកាន់តែច្រើន។ វាជាបញ្ហាវិបត្តិ ដែលអឺរ៉ុបនៅតែមិនទាន់មានយន្តការជាក់ច្បាស់ ដើម្បីដោះស្រាយ។ យោងតាមអង្គការជនភៀសខ្លួនអន្តរជាតិ គិតពីដើមឆ្នាំមក មានជនអន្តោប្រវេសន៍ស្លាប់ដោយលិចទូកក្នុងសមុទ្រម៉េឌីទែរ៉ាណេ ចំនួនប្រមាណ១៩០០នាក់ហើយ។
យន្តការសាមគ្គីអឺរ៉ុប ដែលគ្មានប្រសិទ្ធភាព
សហភាពអឺរ៉ុបបានព្យាយាមចរចា បង្កើតយន្តការសាមគ្គីទាំងអស់គ្នា២៧ប្រទេស ដើម្បីចែករំលែកយកជនភៀសខ្លួន កុំឲ្យប្រទេសស្ថិតនៅជួរមុខ ដែលមានអ៊ីតាលី ក្រិក និងកោះម៉ាល់តិ៍ជាដើមនេះ ទទួលលំបាកតែម្នាក់ឯងពេក។ ក៏ប៉ុន្តែប្រទេសសមាជិកអឺរ៉ុបនៅតំបន់អឺរ៉ុបកណ្តាលនិងខាងកើត មានដូចជាប៉ូឡូញ ហុងគ្រី ឆេក ជាដើម បានបដិសេធដាច់ខាតតែម្តងមិនព្រមទេ។
ក្រោយមក កាលពីខែមិថុនាកន្លងទៅនេះ សហភាពអឺរ៉ុប ក៏បានអនុម័តយន្តការបណ្តោះអាសន្នមួយ ដោយឈរលើគោលការណ៍ស្ម័គ្រចិត្ត ដើម្បីជួយសម្រួលប្រទេសស្ថិតនៅជួរមុខ។ យន្តការនេះ អនុញ្ញាតឲ្យប្រទេសដែលស្ម័គ្រចិត្ត ដែលមានចំនួន១២ប្រទេស ទទួលយកជនភៀសខ្លួនពីប្រទេសជួរមុខ ចំនួនសរុប ៨០០០នាក់ក្នុងមួយឆ្នាំ។ ក្នុងចំណោមនេះ បារាំង និងអាល្លឺម៉ង់ ត្រូវទទួលម្នាក់ ៣០០០នាក់។ ក៏ប៉ុន្តែតួលេខនេះ មានតែលើក្រដាសទេ ការពិតជាក់ស្តែង គិតមកត្រឹមពេលនេះ ជិតដាច់ឆ្នាំហើយ មានជនភៀសខ្លួនសរុប តែ១១៧នាក់ទេ ដែលត្រូវបានបញ្ជូនយកទៅប្រទេសដែលព្រមទទួល។ ត្រង់នេះហើយ បានជាអ៊ីតាលីខឹងទ្រាំលែងបាន។
លោកស្រី Sophie Beau នាយិកាអង្គការ SOS Mediterranée បានលើកឡើងថា រដ្ឋាភិបាលស្តាំនិយមជ្រុលអ៊ីតាលី បង្ហាញជំហរកាន់តែរឹងរូសប្រឆាំងជនអន្តោប្រវេសន៍ណាស់។ ដូច្នេះវាជារឿងបន្ទាន់បំផុត ដែលសហភាពអឺរ៉ុបពត្រូវតែបង្កើតយន្តការថ្មី ឲ្យមានប្រសិទ្ធភាពដើម្បីបែកចែកគ្នា សាមគ្គីគ្នាក្នុងរឿងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ