អ៊ុយក្រែន ដណ្តើមតំបន់គែរសុនមកវិញ ខណៈរុស្ស៊ីនៅតែចាត់ទុកថាជាដែនដីខ្លួន
ចុះផ្សាយនៅថ្ងៃ៖
ស្តាប់ - ០៧:២២
តំបន់គែរសុន (Kherson) បានធ្លាក់ក្នុងដៃអ៊ុយក្រែនវិញ នាថ្ងៃសុក្រ ទី១១ វិច្ឆិកា ក្រោយពីរុស្ស៊ីបានដកទ័ពចេញ។ ក្រុមប្រទេសលោកខាងលិចបានសាទរចំពោះព្រឹត្តិការណ៍មួយនេះ តែរុស្ស៊ីនៅបន្តចាត់ទុកតំបន់ គែរសុន ជាដែនដីដែលខ្លួនបានផ្តាច់យកជាមួយនឹង ៣ តំបន់ទៀត។ យ៉ាងណាក៏ដោយ ការអំពាវនាវឲ្យបិទបញ្ចប់សង្រ្គាមទាំងស្រុងនៅអ៊ុយក្រែនកំពុងបន្តមាន។
« ជ័យជម្នះជាប្រវត្តិសាស្ត្រថ្មីបន្ថែមទៀត សម្រាប់ អ៊ុយក្រែន»
ពលរដ្ឋអ៊ុយក្រែននៅទូទាំងផ្ទៃប្រទេស ធ្វើបុណ្យអបអរស្រែកហ៊ោកញ្ជ្រៀវ។ ប្រមុខរដ្ឋអ៊ុយក្រែន វ៉ូឡូឌីមៀរ ហ្សេឡេនស្គី (Volodymyr Zelensky) ប្រកាស«ជ័យជម្នះជាប្រវត្តិសាស្ត្រ» ថាកងទ័ពអ៊ុយក្រែន យកបានរដ្ឋបាលតំបន់ទីក្រុងគែរសុនមកវិញហើយ ហើយជាក់ស្តែង គឺគេអាចមើលឃើញរូបថតនិងវីដេអូជាច្រើន ដែលបញ្ជាក់ថា ទ័ពអ៊ុយក្រែន បានដោតទង់ជាតិនៅក្នុងទឹកដីនេះ ហើយទាហានទាំងស្រីប្រុសបានថតបង្ហាញកន្លែងដែលខ្លួនចូលទៅដល់។
អ្នកឆ្លើយឆ្លងវិទ្យុបារាំង RFI Stéphane Siohan រាយការណ៍ពីអ៊ុយក្រែន ថាឃើញទាហានអ៊ុយក្រែនបានចូលទៅតំបន់គែរសុនពិតមែន ហើយប្រជាជនបានរត់មកឱបហ្វូងទាហានយ៉ាងស្វិតតែម្តង។ ជាការជួបជុំដ៏កម្រ ផ្សំដោយក្តីរំភើប និង ទឹកភ្នែកលាយឡំគ្នា ដ្បិតថា តំបន់នេះ បានឋិតក្រោមដៃកងទ័ពរុស្ស៊ី ប្រមាណជា ៨ ខែមកហើយ។
ទោះយ៉ាងនេះក្តី ទាហានអ៊ុយក្រែនបានបោះជំហានរុលទៅមុខ ដោយក្តីប្រយ័ត្នប្រយែងជាទីបំផុត។ ប្រយ័ត្ន ព្រោះ ខ្លាចក្រែងរុស្ស៊ីមានដាក់អន្ទាក់និងបង្កប់គ្រាប់មីននិងគ្រឿងបំផ្ទុះផ្តាច់ជីវិត ជាដើម។ ម្យ៉ាងទៀត គឺគេនៅតែភ័យខ្លាចចំពោះការទម្លាក់គ្រាប់បែកនិងគ្រាប់ផ្លោងពីសំណាក់រុស្ស៊ី។ ទ័ពរុស្ស៊ី ដែលនៅមិនឆ្ងាយប៉ុន្មានពីគ្នាឡើយ ពោលគឺគម្លាតត្រឹមតែមួយត្រើយទន្លេតែប៉ុណ្ណោះ។ ពេលរុស្ស៊ីដកទ័ពជាង ៣ ម៉ឺននាក់ និងសម្ភារៈសឹកនៅត្រើយម្ខាងរួចហើយនោះ គឺរុស្ស៊ីបានបំផ្ទុះផ្តាច់ស្ពានទៀតផង។
«សង្គ្រាមនៅបន្ត!»
ថ្ងៃសុក្រ រដ្ឋបាលទីក្រុងវ៉ាស៊ីនតោន បានអបអរសាទរ និងចាត់ទុកថា «នេះជាជ័យជម្នះដ៏អស្ចារ្យ»។ នេះបើតាមទីប្រឹក្សាសន្តិសុខជាតិសហរដ្ឋអាមេរិក លោក ចេក សុលីវាន់ (Jake Sullivan ) ដែលអមដំណើរលោក ចូ បៃដិន ទៅប្រជុំនៅភ្នំពេញ។
នៅថ្ងៃសៅរ៍ ប្រទេសអង់គ្លេស រដ្ឋមន្ត្រីការពារជាតិ Ben Wallace កត់សម្គាល់ថា ការដកទ័ពរបស់រុស្ស៊ីចេញពី គែរសុន គឺជាបរាជ័យយុទ្ធសាស្ត្រយោធាជាថ្មីទៀត ហើយសាធារណៈមតិរុស្ស៊ី នឹងច្បាស់ជាចោទសួរពីកម្សោយរបស់ទ័ពរុស្ស៊ី ព្រមទាំងដណ្តឹងសួរដែរថាតើត្រូវបន្តសង្គ្រាមធ្វើស្អីទៀត និងបានការអ្វី ?
បើទោះបីជា ប្រមុខរដ្ឋរុស្ស៊ី វ្ល៉ាឌីមៀរ ពូទីន (Vladimir Poutine) ពុំបញ្ចេញយោបល់ជាសាធារណៈអ្វីឡើយចំពោះករណីនេះ ប៉ុន្តែ អ្នកនាំពាក្យរបស់វិមានក្រេមឡាំង បានប្រាប់អ្នកកាសែតនៅរដ្ឋធានីម៉ូស្កូ ថា តំបន់គែរសុន ជាដែនដីដែលខ្លួន រួមជាមួយនឹង ៣តំបន់ទៀត។
រដ្ឋមន្ត្រីការបរទេសអ៊ុយក្រែន Dmytro Kouleba ក៏បានដាស់តឿនថា ទោះបីឈ្នះទ័ពនៅលើសមរភូមិប្រយុទ្ធនិងដណ្តើមយកបានតំបន់គែរសុនមកវិញក៏ដោយ ប៉ុន្តែសឹកសង្គ្រាមនៅតែបន្ត។ ថ្លែងនៅក្នុងដំណើរទៅប្រជុំអាស៊ាននៅភ្នំពេញ ប្រមុខការបរទេសអ៊ុយក្រែន បានប្រាប់ទៅសមភាគីនាយករដ្ឋមន្ត្រីអូស្ត្រាលី ថា កាលណាសង្គ្រាមនៅបន្ត ហើយរុស្ស៊ីនៅតែពង្រឹងកម្លាំងឈ្លានពាន នោះអ៊ុយក្រែនគឺនៅតែត្រូវការពឹងពាក់ជំនួយរបស់សម្ព័ន្ធមិត្តជានិច្ច។
នៅខែតុលា អូស្ត្រាលី បានជូនរថពាសដែក ៣០ គ្រឿង ឲ្យអ៊ុយក្រែន និងបញ្ជូនមន្ត្រីយោធាជំនាញអូស្ត្រាលី ចំនួន៧០ ដើម្បីជួយបង្វឹកកងទ័ពអ៊ុយក្រែន។ សហភាពអឺរ៉ុបនិងបច្ចិមលោកវិញ ក្រៅពីជួយលុយកាក់និងអាវុធ ក៏បានជួយបង្រៀនទ័ពអ៊ុយក្រែននេះដែរ។
សង្គ្រាមរុស្ស៊ីអ៊ុនក្រែននៅបន្ត! ម៉ោង ៣ ទៀបភ្លឺ ថ្ងៃសៅរ៍ នៅប៉ែកនីរតី ចម្ងាយប្រមាណជា ៦០ គីឡូម៉ែត្រពីទីប្រជុំជនតំបន់គែរសុន គឺ រុស្ស៊ីបានបាញ់មីស៊ីល S-300 ទៅលើអគារមួយកម្អស់ ៥ ជាន់ ដែលបណ្តាលឲ្យរំលំបាក់មួយជំហៀង និងស្លាប់មនុស្ស ៧នាក់ទៀត។
ថ្នាក់ដឹកនាំអន្តរជាតិជំរុញឲ្យភាគីជម្លោះចរចារកពន្លឺសន្តិភាព។
អគ្គមេបញ្ជាការយោធាសហរដ្ឋអាមេរិក ឧត្តមសេនីយ Mark Milley បានថ្លែងក្តីសង្ឃឹមកាលពីពេលថ្មីៗនេះ ថា ជ័យជម្នះដោយចុងអាវុធសឹកសង្គ្រាម គឺមិនអាចទៅរួច ទាំងរុស្ស៊ី និងទាំងអ៊ុយក្រែន។ ដូច្នេះ គឺមានតែការបោះដៃចរចាពិភាក្សាគ្នាទេ ទើបអាចបញ្ចប់សង្គ្រាមនេះបាន ។
ស្រដៀងគ្នានេះដែរ ប្រធានាធិបតីបារាំង អេម៉ានុយអែល ម៉ាក្រុង នៅក្នុងសន្និសីទស្តីពីសន្តិភាពនៅក្រុងប៉ារីស ពីថ្ងៃសុក្រ បានលើកឡើងពីពន្លឺសន្តិភាពនៅអ៊ុយក្រែន គឺអាចកើតមានទៅបាន តែតាមផ្លូវចរចាសម្រុះសម្រួលគ្នា។ ទីប្រឹក្សាម្នាក់របស់វិមានប្រធានាធិបតីបារាំង លើកឡើងទៀតថា កិច្ចប្រជុំកំពូលនៃប្រទេសមានសេដ្ឋកិច្ចជឿនលឿន G20 ដែលត្រូវបើកកិច្ចប្រជុំនៅដើមសប្តាហ៍ខាងមុខ គឺនឹងមានទីតាំងសក្តិសមសម្រាប់ឲ្យរុស្ស៊ីនិងអ៊ុយក្រែនចរចាគ្នា ហើយនិងថា ភាគច្រើននៃសមាជិក G20 សុទ្ធតែមិនពេញចិត្តសង្គ្រាមឈ្លានពានទេ។
ក្នុងជំនួបG20 ខាងមុខនេះ ប្រធានាធិបតី ចូ បៃដិន អាចនឹងជជែកជាមួយប្រធានាធិបតីចិន ស៊ី ជិនពីង ហើយ ប្រធានបទសង្គ្រាមនៅអ៊ុយក្រែន ទំនងច្បាស់ជាលោក បៃដិន ស្នើឲ្យលោក ស៊ី ជួយនឹងរុស្ស៊ី ផង ក៏អាចថាបាន។ គេមិនច្បាស់ពេកទេចំណុចនេះ តែអ្វីដែលច្បាស់ គឺ ប្រធានាធិបតីរុស្ស៊ី ពូទីន ថានឹងមិនចូលរួមកិច្ចប្រជុំG20ឡើយ ខណៈដែលប្រធានាធិបតីអ៊ុយក្រែន ហ្សេឡេនស្គី ថានឹងចូលរួមតាមរយៈវីដេអូពីចម្ងាយ។
រីឯ ប្រទេស តួកគី សុំចេញមុខសម្រុះសម្រួល។ រដ្ឋបាលទីក្រុងអង់ការ៉ា (Ankara ) ដែលស្និទ្ធនឹងរដ្ឋធានីម៉ូស្កូ មួយរយៈមកនេះ បានដើរតួជាអន្តរការីដ៏សំខាន់ តាំងពីការជួយបញ្ចុះបញ្ចូលឲ្យអាចដឹកស្បៀងគ្រាប់ធញ្ញជាតិចេញពីតំបន់ជម្លោះដែលជាប់គាំងយូរខែមកហើយ នៅថ្ងៃសៅរ៍ ប្រធានាធិបតី រេសេប តាយីប អ៊ែរដូហ្កាន ( Tayyip Erdogan) ក៏បានស្នើចូលខ្លួនមកសុំធ្វើជាស្ពានភ្ជាប់សម្តី រវាង អ៊ុយក្រែន និង រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ